Цхинвалы ӕртыккӕгӕм скъола

Цхинвалы ӕртыккӕгӕм скъола байгом уыдзӕн ног ахуырадон азы райдайӕнмӕ

12
(ранӕуӕггонд 16:46 12.07.2021)
Ахуырадон азы райдайӕнмӕ ӕртыккӕгӕм астӕуккаг скъола ратдзысты эксплуатацимӕ. Ныртӕккӕ уагъд цӕуынц фасадон куыстытӕ

ЦХИНВАЛ, 12 июл — Sputnik, Хъуылымбегты Азӕмӕт. Цхинвалы ӕртыккӕгӕм астӕуккаг скъола ратдзысты эксплуатацимӕ ног ахуырадон азы райдайӕнмӕ, фехъусын кодта Sputnik арӕзтады министрады минӕвар Къацты Сослан.

"Арӕзтадон объекты архайынц 27 кусӕджы. Куыстытӕ сты кӕронбӕттӕн этапыл", - загъта Къацты Сослан.

Йӕ ныхӕстӕм гӕсгӕ, уый фӕстӕ кусджытӕ бавналдзысты территорийы хӕрзарӕзтадмӕ.

Къацты Сослан бафтыдта, зӕгъгӕ, проектмӕ гӕсгӕ скъолайы уыдзӕн актон зал, хӕрӕндон, библиотекӕ ӕмӕ кӕсӕн зал.

"Афтӕ ма дзы уыдзӕн музейон хатӕн ӕмӕ лифт низӕфхӕрд адӕмӕн", - банысан кодта министрады минӕвар.

Зӕронд аварион бӕстыхай, кӕцы арӕзт ӕрцыд 1939 азы, ныппырх кодтой ивгъуыд азы кӕрон, йӕ бынаты сцайдагъ сты арӕзтадон куыстытӕ. Ног бæстыхай арæзт цæуы 2020-2022 æзты инвестицион нывæзты фæлгæтты. Ӕртæуæладзыгон скъола нымад у 200 ахуырдзауыл. Ног бæстыхайы арæзтады æмгъуыдмӕ йæ ахуырдзаутæ æмæ педколлектив сты "уазæгуаты" Цхинвалы 12-æм скъоламæ.

12
Автотрассӕ Цхинвал-Дменисыл фӕндагон-транспортон цау

Хуссари Иры ӕрцыд авари: ис зианбаййафджытӕ

8
(ранӕуӕггонд 10:59 31.07.2021)
Фӕндагон бӕллӕххы фӕстиуӕгӕн фӕцӕфуӕвджыты баластой республикон рынчындонмӕ буары алыгъуызон цӕфтимӕ

ЦХИНВАЛ, 31 июл - Sputnik. Автотрассӕ Цхинвал-Дменисыл майрӕмбоны изӕры ӕрцыд фӕндагон-транспортон цау, уый фӕстиуӕгӕн бахъыгдард сты дыууӕ адӕймаджы, хъусын кӕны республикӕйы МХМ пресс-службӕ.

"Авари ӕрцыд 21:00 сахатмӕ ӕввахс автотрассӕ Цхинвал-Дменисыл. Развӕлгъау бӕрӕггӕнӕнтӕм гӕсгӕ, хӕдтулгӕ ВАЗ-2109 фехӕлдта фӕндагон змӕлды фӕтк ӕмӕ сӕмбӕлд машинӕ Toyota Prado", - дзырдӕуы хъусинаджы.

Фӕндагон бӕллӕхы фӕстиуӕгӕн бахъыгдард сты дыууӕ адӕймаджы, уыдон буары алыгъуызон цӕфтимӕ фӕхӕццӕ кодтой РБМЦ. 

Уагдоны банысан кодтой, цауы бынаты кӕй кусынц ПАИ минӕвӕрттӕ, уыдон бӕлвырд кӕнынц аварийы аххосӕгтӕ.

8
Арт-тыгъдад Портал

Хуссар Иры ӕмбырд кӕнынц фӕрӕзтӕ арт-тыгъдад "Портал" сцалцӕг кӕнынӕн

13
(ранӕуӕггонд 15:02 30.07.2021)
Ӕртӕ азы размӕ ӕрдӕгпырх бӕстыхай Ирӕтты уынгыл рахицӕн кодтой инициативон фӕсивӕдӕн, цӕмӕй дзы сорганизаци кӕной арт-тыгъдад

ЦХИНВАЛ, 30 июл — Sputnik, Хъуылымбегты Зӕлинӕ. Инициативон фӕсивӕды къорд ӕмбырд кӕны ӕхцайы фӕрӕзтӕ, цӕмӕй кӕронмӕ саразой верандӕ арт-тыгъдад "Портал"-ы, фехъусын кодта Sputnik "Хуссар Портал"-ы организатортӕй иу Джиоты Къоста.

Ӕртӕуӕладзыгон бӕстыхай Ирӕтты уынгыл паддзахад рахицӕн кодта инициативон фӕсивӕдӕн, цӕмӕй дзы сорганизаци кӕной арт-тыгъдад. Джиоты Къостайы ныхӕстӕм гӕсгӕ, инициативон къорд куыстытӕм бавнӕлдта ӕртӕ азы размӕ – уыцы рӕстӕгмӕ уыдон сцалцӕг кодтой уӕлхӕдзар, раивтой рудзгуытӕ, сӕвӕрдтой дуӕрттӕ, сарӕзтой балкон ӕмӕ дыккаг уӕладзыг. Бӕстыхаймӕ бауагътой электроэнерги дӕр.

"Цалцӕггӕнӕн куыстытӕм ӕнӕкӕсгӕйӕ, фарон фӕззӕджы "Портал" бакодта йӕ дуӕрттӕ хорз музыкӕ уарзджытӕн. Мадзӕлтты рӕстӕджы, кӕцытӕ уагъд цыдысты ацы сӕрд, ӕрӕмбырд кодтой фӕрӕзтӕ мӕнгагъуысты каркасӕн. Сӕрды кӕронмӕ нӕ хӕс у саразын мӕнгагъуыст террасӕйыл, ӕндӕра ноджы иу зымӕг нӕ фасад не сфӕраздзӕн. Ацы куыстытӕ балхынцъ кӕнынӕн мах хъӕуы 30 мин сомы", - банысан кодта Джиоты Къоста.

Йӕ ныхӕстӕм гӕсгӕ, абоны боны онг ӕрӕмбырд кодтой 20 мин сомы.

Арт-тыгъдад "Портал"-ы хъуыды фӕзынд Дзӕуджыхъӕуы активон фӕсивӕды хсӕн. Ахӕм проект Хуссар Ирыстоны сорганизаци кӕныны хъӕппӕрис бахастой хуссарирыстойнаг активисттӕ: Гуыцмӕзты Инна, Джиоты Къоста, Дзигойты Карина ӕмӕ ӕндӕртӕ.

13