Хуссар Иры аразынц ипподром къуындӕг авналӕнтимӕ сабитӕн

Хуссар Иры аразынц ипподром къуындӕг авналӕнтимӕ сабитӕн

45
(ранӕуӕггонд 09:29 05.08.2021)
Ногдзинадтӕ арӕзт цӕуынц Хуссар Ирыстоны президент Бибылты Анатолийы финансон ӕххуысӕй ӕмӕ сывӕллӕтты омбудсмен Цхуырбаты Татьянайы хъӕппӕрисӕй

ЦХИНВАЛ, 4 авг - Sputnik, Плиты Фатимӕ. Хуссар Ирыстоны Цхинвалы районы Джеры комы президенты цур сывӕллӕтты ӕххӕстбарджын Цхуырбаты Татьянайы хъӕппӕрисӕй арӕзт цӕуы ипподром къуындӕг авналӕнтимӕ сабитӕн.

Объект арӕзт цӕуы Къӕбулты Хъазбеджы номыл бӕхты бадыны центр "Сидуг"-ы бындурыл. Центр арӕзт ӕрцыд 2019 азы Джеры комы ӕдзӕрӕг хъӕу Алхашенты хъӕуы.

Ныридӕгӕн цӕуы арӕзтад, йӕ баконд нывӕндынц августы. 

"Рагӕй мӕм уыд иппотеропи ӕмӕ ленк кӕныны центртӕ бакӕныны хъуыды къуындӕг авналӕнтимӕ сабитӕн. Ипподромы фӕдыл бацӕттӕ кодтон проект. Мӕ хъӕппӕрис райста паддзахады сӕргълӕууӕг Бибылты Анатолийы ӕххуыс, уый фӕрцы цӕуы арӕзтад. Фыццаг рады уый уыдзӕн сабитӕн, стӕй та хистӕр кары низӕфхӕрд адӕмӕн", - радзырдта Sputnik сывӕллӕтты барты фӕдыл ӕххӕстбарджын Цхуырбаты Татьяна.

Йӕ ныхӕстӕм гӕсгӕ, уый сфидар кодта бадзырд фирма "Сидуг"-ы бардарӕг Къӕбулты Ренатимӕ, кӕцы ӕнӕаргъӕй йӕхимӕ райсдзӕн сахъат сӕвӕллӕтты ахуыр кӕнын, уый ныхмӕ йын йӕ центры сараздзысты ипподром.

Фӕстӕдӕр уым фӕзындзӕн бӕхтыл бадыны скъола дӕр .

45
Цхинвал

Фондз ФТЦ ӕмӕ цыппар хъыгдардбаййафӕджы: МХМ радзырдтой къуырийы уавӕры тыххӕй

2
(ранӕуӕггонд 14:38 27.09.2021)
Барадхъахъхъӕнӕг уагдоны фехъусын кодтой фыдракӕндтӕ ӕмӕ республикӕйы фӕндӕгтыл уавӕры тыххӕй

ЦХИНВАЛ, 27 сен — Sputnik. Хуссар Ирыстоны фӕндӕгтыл ивгъуыд къуыри ӕрцыд фондз аварийы, кӕцыты фӕстиуӕгӕн бахъыгдард сты цыппар адӕймаджы. Уый тыххӕй къуырисӕры фехъусын кодта республикӕйы Мидхъуыддӕгты министрады (МХМ) пресс-службӕ.

Афтӕ ма Паддзахадон автоинспекцийы кусджытӕ сбӕрӕг кодтой фӕндагон змӕлды 196 фӕткхалды.

"Цыппар шофыры фӕдыл сарӕзтӕуыд административон протоколтӕ хӕдтулгӕ нозтджынӕй скъӕрыны тыххӕй", - банысан кодтой пресс-службӕйы.

Уагдоны бафтыдтой, зӕгъгӕ, иу къуыримӕ республикӕйы территорийыл регистрацигонд ӕрцыд иу фыдракӕнд, кӕцы раргом кодтой мидхъуыддӕгты органтӕ. Алыгъуызон фӕткхӕлдты тыххӕй бӕрнмӕ ӕрбаздахтой цалдӕр адӕймаджы, уыдонӕй иуы – наркотикон фӕрӕзтӕй ӕнӕзаконон пайда кӕныны тыххӕй.

2
Аграрон хӕдзарад Южной сад ныссадздзӕн фӕткъуыйы ног хуызтӕ

Аграрон хӕдзарад "Южной сад" ныссадздзӕн фӕткъуыйы ног хуызтӕ

5
(ранӕуӕггонд 15:10 27.09.2021)
Цъунары хъӕуы уӕвӕг дыргъдоны фӕзындзӕн фӕткъуыйы ног хуызтӕ, ныридӕгӕн дзы зайы Италийӕ ласт ӕртӕ хуызы

ЦХИНВАЛ, 27 окт - Sputnik, Плиты Фатимæ. Аграрон хӕдзарад "Южной сад" уалдзӕджы ныссадздзӕн фӕткъуыйы ног хуызтӕ. Дыргъдӕттӕм бафтдзӕн уӕлӕмхас ноджы 33 гектары зӕххытӕ, фехъусын кодта Sputnik хӕдзарады директор Бекъойты Леван.

"Уалдзӕджы ӕрбалӕугӕ азы хӕдзарад ныссадздзӕн фӕткъуыйы ног хуызтӕ. Нӕ дыргъдӕтты территори фӕуӕрӕх уыдзӕн ноджы 30 гектарӕй фылдӕр", - загъта Бекъойты Леван.

"Южный сад" у Хуссар Ирыстоны территорийыл аграрон инвестпроекты ӕвӕрццӕг дӕнцӕг. 2020 азы арвыста 350 тоннӕйы фӕткъуы фӕсарӕнты базармӕ.

Уыимӕ иумӕ ма хӕдзарад лӕггад кӕны йӕ тыллӕгӕй скъолатӕн, сабидӕттӕн ӕмӕ уагдӕттӕн. Ӕрвыл фӕззӕг фӕткъуы байуарынц ӕнӕаргъӕй банысангонд уагдӕтты. 

Уӕрӕсейаг инвесторы фӕрӕзтӕй фӕткъуыты хӕдзарад сарӕзтӕуыд 2019 уалдзӕджы Хуссар Ирыстоны Цхинвалы районы Цъунары хъӕуы. Ӕртӕ сорты фӕткъуыбӕлӕсты талатӕ ӕрластой Италийӕ ӕмӕ сӕ ныссагътой 50 гектары территорийыл.

5