Ӕхсӕнадӕмон ӕфсӕддон хъӕзтытӕ

Хъахъхъӕнынады министрады командӕ ӕрцыд Алабиномӕ АрМИ-2021-мӕ цӕттӕкӕнынады фӕдыл

24
(ранӕуӕггонд 13:09 09.08.2021)
Хуссар Ирыстоны ӕфсӕддонтӕ хъахъхъӕндзысты республикӕйы кад "Танкон биатлон" конкурсы. Командӕйы сконды сты цыппар танкон экипажы

ЦХИНВАЛ, 9 авг - Sputnik. Хуссар Ирыстоны танкистты командӕ ӕрцыд ӕфсӕддон полигон "Алабино"-мӕ, цы ран цӕудзӕн Ӕхсӕнадӕмон ӕфсӕддон хъӕзтыты "Танкон биатлон" конкурсмӕ цӕттӕкӕнынады фӕдыл фӕстаг этап. Ӕфсӕддонтӕ базонгӕ уыдзысты трассӕимӕ, конкурсы фӕтктимӕ, бакусдзысты алыгъуызон элементтыл. Уый тыххӕй хъусын кӕны Хуссар Ирыстоны Хъахъхъӕнынады министрады пресс-службӕ.

Хуссар Ирыстоны танкисттӕ хайад райсдзысты "Танкон биатлон" конкурсы алы этапы дӕр. Командӕйы сконды сты цыппар танкон экипажы.

Фарон Хуссар Ирыстоны Хъахъхъӕнынады министрады командӕтӕ равдыстой аккаг фӕстиуджытӕ Ӕхсӕнадӕмон ӕфсӕддон хъӕзтыты. Уӕлдай расгуыхтысты танкисттӕ "Танкон биатлон" конкурсы. Уыдон бацахстой ӕртыккаг бынат дыккаг дивизионы.

Ӕхсӕнадӕмон ӕфсӕддон хъӕзтытӕ "АрМИ-2021" уагъд цӕудзысты 22 августӕй 4 сентябрьмӕ Ӕхсӕнадӕмон ӕфсӕддон-техникон форум "АРМИЯ-2021" мадзӕлттимӕ иумӕ полигон "Алабино" ӕмӕ парк "Патриот"-ы. Хъӕзтытӕ ӕмӕ Форумы иумӕйаг баконд ацӕудзӕн 22 августы Конгрессон-равдыстон центр "Патриот"-ы, цы ран хайад райсдзысты Уӕрӕсейы Хъахъхъӕнынады министрады, хицауады ӕмӕ хъахъхъӕнынадон сӕудӕджерады куыстуӕтты минӕвӕрттӕ, афтӕ ма фӕсарӕйнаг делегацитӕ ӕмӕ уазджытӕ.

24
РБМЦ сырх зонӕ

Хуссар Иры хицауад медиктӕн фиддонтӕн рахицӕн кодта 10 милуан сомӕй фылдӕр

2
(ранӕуӕггонд 16:09 16.09.2021)
Фӕрӕзтӕ рахицӕн кӕныны фӕдыл скъуыддзаг рахастӕуыд цыппӕрӕмы республикӕйы хицауады ӕнӕрадон рабадтыл

ЦХИНВАЛ, 16 сен - Sputnik. Хуссар Ирыстоны хицауад рахицӕн кодта йӕ фӕстауӕрцон фондӕй 10,2 милуан сомы сӕрмагонд социалон фиддонтӕн медиктӕн ӕмӕ ӕндӕр кусджытӕн коронавирусимӕ тохы тыххӕй, хъусын кӕны министрты кабинеты пресс-службӕ.

Скъуыддзаг рахастӕуыд хицауады ӕнӕрадон рабадтыл. Фӕрӕзтӕ байуӕрстой афтӕмӕй:

  • Республикон бирӕпрофилон медицинон центр 2021 азы 1 майӕ 31 августы онг периоды тыххӕй райсдзӕн 9 425 210 сомы
  • Дзауы районон рынчындон 1 апрелӕй 31 августы онг периодӕн райсдзӕн 350 750 сомы
  • Къуайсайы рынчындон 22 июнӕй 31 августы онг периодӕн райсдзӕн – 347 833 сомы
  • Знауыры районон рынчындон 1 июнӕй 31 августы онг периодӕн райсдзӕн – 79 250 сомы
  • Цхинвалы районы амбулаторон ӕххуысы центр 1 июлӕй 31 августы онг периодӕн райсдзӕн 73 750 сомы

Хицауады сӕрдар Бекъойты Геннадий бахӕс кодта Ӕнӕниздзинад хъахъхъӕнынады министрадӕн хъус дарын рахицӕнгонд фӕрӕзты хардз кӕнынмӕ ӕмӕ бавдисын Финансты министрадӕн хыгъдлӕвӕрд уый фӕдыл.

2
хъӕууонхӕдзарадон техникӕ

Хуссар Иры хъӕууон хӕдзарад баххӕст ис ног техникӕйӕ

3
(ранӕуӕггонд 16:09 16.09.2021)
Ног техникӕйы нымӕцы ис ахӕмтӕ, кӕцытӕ республикӕйы фӕзындысты фыццаг хатт, сӕ нымӕцы дуруидзӕн ӕмӕ картофӕфснайӕн хӕдтулгӕ

ЦХИНВАЛ, 16 сен – Sputnik, Плиты Фатимӕ. Хуссар Ирыстоны хъӕууон хӕдзарады министрад баххӕст кодта йӕ техникон базӕ ног ифтонгадӕй. 2021 азы уагдоны къухы бафтыд ноджы 42 иууӕджы, фехъусын кодта Sputnik министрады кусӕг Мулдарты Игорь.

Ног техникӕйы нымӕцы ис ахӕмтӕ, кӕцытӕ республикӕйы фӕзындысты фыццаг хатт, сӕ нымӕцы дуруидзӕн ӕмӕ картофӕфснайӕн хӕдтулгӕ. 

"Фыццаг хатт самал кодтам дуруидзӕн ӕмӕ картофӕфснайӕн машинӕ. Уымӕй размӕ нӕм уыд картофкъахӕн, фӕлӕ ног ифтонгад у егъаудӕр авналӕнтимӕ", - загъта уый.

Мулдарты Игоры ныхӕстӕм гӕсгӕ, ног техникӕйыл кусын бынӕттонтӕн амыдтой ӕрцӕуӕггаг специалисттӕ.

"Техникӕ цы амалиуӕгад рауагъта, уый кусджытӕ рцыдысты, ам бынаты сӕмбырд кодтой хъӕууонхӕдзарадон техникӕ ӕмӕ бацамыдтой бынӕттонтӕн сӕ куыст. Стӕй ма рӕстӕгӕй-рӕстӕгмӕ цӕудзысты ӕмӕ бӕлвырд кӕндзысты сӕ техникон уавӕр", - бафтыдта министрады кусӕг.

3