ЦХИНВАЛ, 9 авг — Sputnik, Гӕбӕраты Элина. Хуссар Ирыстоны Дзауы районы ацыдысты фыдохы мадзӕлттӕ, кӕцытӕ нывонд уыдысты 2008 азы хӕсты 13-ӕм афӕдзы бонӕн. Районон администрацийы пресс-секретарь Тедеты Лиана куыд фехъусын кодта Sputnik, афтӕмӕй районы цӕрджытӕ ссардтой гуырдзиаг агрессийы амӕттӕгты рухс нӕмттӕ дидинтӕ сӕвӕрын ӕмӕ фыдохы митингӕй.
"Хӕсты райдайӕны афӕдзы бон, поселочы райсом сӕвӕрдтой дидинтӕ ӕмӕ веноктӕ Кад ӕмӕ Мысӕн Аллейы, цы ран хайад райстой тыхон структурӕты минӕвӕрттӕ ӕмӕ районы администрацийы кусджытӕ. Уый фӕстӕ уыдон бабӕрӕг кодтой фӕмардуӕвджыты ингӕнтӕ ӕмӕ сын ссардтой сӕ рухс нӕмттӕ", - банысан кодта Тедеты Лиана.
Мысӕн мадзӕлтты дыккаг хай ацыд 8 августы изӕры – уӕд районы ацыд акци "Мысӕн цырагъ" дӕр.
"Ивгъуыд азтӕм абаргӕйӕ, ацы хатт цъусдӕр адӕм ӕрӕмбырд коронавирусы пандемийы аххосӕй. Фыдохы митингы ралӕууыдысты районы ӕфсӕддон комиссар Санахъоты Юрий ӕмӕ поселочы скъолайы ахуыргӕнӕг Коцты Роза", - радзырдта Тедеты Лиана.
Мадзалы кӕрон иу уысм алӕууыдысты ӕдзӕмӕй ӕмӕ суагътой уӕларвмӕ тымбылӕгтӕ 2008 азы хӕсты амӕттӕгты мысӕнӕн.
Гуырдзыстон 2008 азы 8 августы ӕхста Хуссар Ирыстон "Град"-ӕй, Гуырдзыйы ӕфсӕдтӕ ӕрбабырстой республикӕмӕ. Уӕрӕсе, Хуссар Ирыстоны цӕрджыты хъахъхъӕнгӕйӕ, кӕцыты стыр хай райста УФ ӕмбӕстӕггад, бакодта йе 'фсӕдты республикӕмӕ ӕмӕ фондзбонон хӕсты фӕстӕ фӕтардта Гуырдзыстоны ӕфсӕдты. Мӕскуы 2008 азы 26 августы банымадта Хуссар Ирыстон ӕмӕ Абхазы хӕдбардзинад.
