Туристтæ

Хуссар Ирыстон цадæггай кæны туристты уарзондæр бæстæ

59
(ранӕуӕггонд 15:34 19.08.2021)
Республикæмæ фылдæрбæрцæй цæуынц уæрæсейæгтæ, фæлæ фæстаг рæстæджыты рæзы æндæр фæсарæйнаг бæстæтæй туристты нымæц дæр. Популярон гид Карсанты Гурамы нымадмæ гæсгæ, Хуссар Ирмæ ацы аз æрцыд цалдæр мин бæлццоны

ЦХИНВАЛ, 19 авг – Sputnik, Козаты Диана. Хуссар Ирыстон фæстаг æзты цымыдисонæй цымыдисондæр кæны канд Уæрæсейæ туристтæн нæ, фæлæ ма æндæр бæстæтæй бæлццæттæн дæр, радзырдта йæ интервьюйы Sputnik экономикæйы министрады туризмы хайады хистæр Плиты Вадим.

Уæрæсейы Арæнгæрон службæ æрæджы ныммыхуыр кодта статистикон бæрæггæнæнтæ фæсарæнтæм уæрæсейæгты балцыты фæдыл. Иууыл популярондæр бæстæтæ сты Абхаз, Турк æмæ Украинæ. Иннæ популярондæр республикæты хсæн сты Казахстан, ИАЭ, Финлянди, Кипр, Хуссар Ирыстон, Сомихстон æмæ Киргизи.

Плиты Вадим банысан кодта, зæгъгæ, кæд ацы хабар фылдæр баст у æнæхъæн дунейы коронавирусон арæнæвæрдтимæ, уæддæр Хуссар Ирыстон цадæггай здахы фæсарæйнаг туристты хъусдард.

"Фæстаг дыууæ азы уæрæсейæгтæн æхгæд уыдысты бирæ бæстæтæ, уымæ гæсгæ адæм агуырдтой варианттæ. Сæ иу - Хуссар Ир. Уый махæн у хорз хабар", - загъта уый.

Хайады хистæры ныхæстæм гæсгæ, практикæ æвдисы, кæй фæфылдæр туристты хъусдард ахæм хуызтæм, куыд эко- æмæ этнотуризм, уæлдар популярондæр сты Хъелы æмæ Урстуалты кæмттæ.

Плиты Вадим ма радзырдта, туристты фылдæр хай кæй æрцæуы уалдзæг, сæрд æмæ фæззæджы. Зымæджы та, географион хиæдты тыххæй, нæ вæййы фадæттæ бирæ бæлццæттæ райсынæн.

"Цы цымыдис кæны туристты? Зæгъæм, уæрæсейæгты цымыдис кæны æрдз, фæсарæйнæгты - Хуссар Ир йæхæдæг куыд бæстæ, йæ культурæ, истори, адæм, цардуаг", - дзуры уый.

Министрады минæвар ма банысан кодта, зæгъгæ, Хуссар Иры ис уавæртæ эко- æмæ этнотуризмæн,хæххон туризмæн , фæлæ дзы курортон улæфтæн та нæй фаг инфраструктурæ.

Популярон гид Карсанты Гурам куыд фехъусын кодта, афтæмæй ресрубликæйы туризмы хъуыддаг бæрæг фæхуыздæр. Йæ нымадмæ гæсгæ, Хуссар Ирмæ ацы аз æрцыд фондз минæй фылдæр бæлццоны.

59
РБМЦ сырх зонӕ

Хуссар Иры хицауад медиктӕн фиддонтӕн рахицӕн кодта 10 милуан сомӕй фылдӕр

2
(ранӕуӕггонд 16:09 16.09.2021)
Фӕрӕзтӕ рахицӕн кӕныны фӕдыл скъуыддзаг рахастӕуыд цыппӕрӕмы республикӕйы хицауады ӕнӕрадон рабадтыл

ЦХИНВАЛ, 16 сен - Sputnik. Хуссар Ирыстоны хицауад рахицӕн кодта йӕ фӕстауӕрцон фондӕй 10,2 милуан сомы сӕрмагонд социалон фиддонтӕн медиктӕн ӕмӕ ӕндӕр кусджытӕн коронавирусимӕ тохы тыххӕй, хъусын кӕны министрты кабинеты пресс-службӕ.

Скъуыддзаг рахастӕуыд хицауады ӕнӕрадон рабадтыл. Фӕрӕзтӕ байуӕрстой афтӕмӕй:

  • Республикон бирӕпрофилон медицинон центр 2021 азы 1 майӕ 31 августы онг периоды тыххӕй райсдзӕн 9 425 210 сомы
  • Дзауы районон рынчындон 1 апрелӕй 31 августы онг периодӕн райсдзӕн 350 750 сомы
  • Къуайсайы рынчындон 22 июнӕй 31 августы онг периодӕн райсдзӕн – 347 833 сомы
  • Знауыры районон рынчындон 1 июнӕй 31 августы онг периодӕн райсдзӕн – 79 250 сомы
  • Цхинвалы районы амбулаторон ӕххуысы центр 1 июлӕй 31 августы онг периодӕн райсдзӕн 73 750 сомы

Хицауады сӕрдар Бекъойты Геннадий бахӕс кодта Ӕнӕниздзинад хъахъхъӕнынады министрадӕн хъус дарын рахицӕнгонд фӕрӕзты хардз кӕнынмӕ ӕмӕ бавдисын Финансты министрадӕн хыгъдлӕвӕрд уый фӕдыл.

2
хъӕууонхӕдзарадон техникӕ

Хуссар Иры хъӕууон хӕдзарад баххӕст ис ног техникӕйӕ

3
(ранӕуӕггонд 16:09 16.09.2021)
Ног техникӕйы нымӕцы ис ахӕмтӕ, кӕцытӕ республикӕйы фӕзындысты фыццаг хатт, сӕ нымӕцы дуруидзӕн ӕмӕ картофӕфснайӕн хӕдтулгӕ

ЦХИНВАЛ, 16 сен – Sputnik, Плиты Фатимӕ. Хуссар Ирыстоны хъӕууон хӕдзарады министрад баххӕст кодта йӕ техникон базӕ ног ифтонгадӕй. 2021 азы уагдоны къухы бафтыд ноджы 42 иууӕджы, фехъусын кодта Sputnik министрады кусӕг Мулдарты Игорь.

Ног техникӕйы нымӕцы ис ахӕмтӕ, кӕцытӕ республикӕйы фӕзындысты фыццаг хатт, сӕ нымӕцы дуруидзӕн ӕмӕ картофӕфснайӕн хӕдтулгӕ. 

"Фыццаг хатт самал кодтам дуруидзӕн ӕмӕ картофӕфснайӕн машинӕ. Уымӕй размӕ нӕм уыд картофкъахӕн, фӕлӕ ног ифтонгад у егъаудӕр авналӕнтимӕ", - загъта уый.

Мулдарты Игоры ныхӕстӕм гӕсгӕ, ног техникӕйыл кусын бынӕттонтӕн амыдтой ӕрцӕуӕггаг специалисттӕ.

"Техникӕ цы амалиуӕгад рауагъта, уый кусджытӕ рцыдысты, ам бынаты сӕмбырд кодтой хъӕууонхӕдзарадон техникӕ ӕмӕ бацамыдтой бынӕттонтӕн сӕ куыст. Стӕй ма рӕстӕгӕй-рӕстӕгмӕ цӕудзысты ӕмӕ бӕлвырд кӕндзысты сӕ техникон уавӕр", - бафтыдта министрады кусӕг.

3