Ирон театртæ равдисдзысты спектакльтæ Цхинвал æмæ Дзæуджыхъæуы

Равдысттæ æмæ Къостайы бон: ирон театртæ равдисдзысты спектакльтæ Цхинвал æмæ Дзæуджыхъæуы

126
(ранӕуӕггонд 10:26 10.09.2021)
Гастрольты фӕдыл разыдзинад сфидар кодтой дыууӕ ирон театры аивадон къухдариуӕггӕнджытӕ Дзудцаты Тамерлан ӕмӕ Уалыты Гиви

ЦХИНВАЛ, 10 сен — Sputnik, Плиты Фатимӕ. Хуссар ӕмӕ Цӕгат Ирыстоны ирон театртӕ ауадздзысты дыууӕварсон равдысттӕ Цхинвал ӕмӕ Дзӕуджыхъӕуы, фехъусын кодта Sputnik уагдоны аивадон разамонӕг Дзудцаты Тамерлан.

Гастрольты фӕдыл разыдзинад сфидар кодтой дыууӕ ирон театры аивадон къухдариуӕггӕнджытӕ Дзудцаты Тамерлан ӕмӕ Уалыты Гиви.

"Сентябры разыдзинад йӕ тыхы бацӕудзӕн - Цӕгат Ирыстоны Ирон театр равдисдзӕн 22 сентябры Цхинвалы спектакль "Ричард III". Мах та нӕхи 'рдыгӕй 29 сентябры равдисдзыстӕм Джелыты Хъазыбеджы спектакль "Дон Жуан", - загъта Дзудцаты Тамерлан.

Уый ма бафтыдта, дыууӕ театры ӕмгуыстад адарддӕр уыдзӕн октябры дӕр.

"Октябры равдысттӕ нывонд уыдзысты Хетӕгкаты Къостайы райгуырӕн бонӕн. 14 октябры мах равдисдзыстӕм Роман Габрияйы ӕвӕрд спектакль "Къоста", уыцы бон Цӕгат Ирыстоны ирон театр та Цхинвалы ӕвдисдзӕн спектакль "Фатимӕ", - бафтыдта уый.

Дыккаг бон дыууӕ труппӕ дӕр ӕвдисдзысты сӕ спектакльтӕ бынаты.

126
РБМЦ сырх зонӕ

Хуссар Иры хицауад медиктӕн фиддонтӕн рахицӕн кодта 10 милуан сомӕй фылдӕр

2
(ранӕуӕггонд 16:09 16.09.2021)
Фӕрӕзтӕ рахицӕн кӕныны фӕдыл скъуыддзаг рахастӕуыд цыппӕрӕмы республикӕйы хицауады ӕнӕрадон рабадтыл

ЦХИНВАЛ, 16 сен - Sputnik. Хуссар Ирыстоны хицауад рахицӕн кодта йӕ фӕстауӕрцон фондӕй 10,2 милуан сомы сӕрмагонд социалон фиддонтӕн медиктӕн ӕмӕ ӕндӕр кусджытӕн коронавирусимӕ тохы тыххӕй, хъусын кӕны министрты кабинеты пресс-службӕ.

Скъуыддзаг рахастӕуыд хицауады ӕнӕрадон рабадтыл. Фӕрӕзтӕ байуӕрстой афтӕмӕй:

  • Республикон бирӕпрофилон медицинон центр 2021 азы 1 майӕ 31 августы онг периоды тыххӕй райсдзӕн 9 425 210 сомы
  • Дзауы районон рынчындон 1 апрелӕй 31 августы онг периодӕн райсдзӕн 350 750 сомы
  • Къуайсайы рынчындон 22 июнӕй 31 августы онг периодӕн райсдзӕн – 347 833 сомы
  • Знауыры районон рынчындон 1 июнӕй 31 августы онг периодӕн райсдзӕн – 79 250 сомы
  • Цхинвалы районы амбулаторон ӕххуысы центр 1 июлӕй 31 августы онг периодӕн райсдзӕн 73 750 сомы

Хицауады сӕрдар Бекъойты Геннадий бахӕс кодта Ӕнӕниздзинад хъахъхъӕнынады министрадӕн хъус дарын рахицӕнгонд фӕрӕзты хардз кӕнынмӕ ӕмӕ бавдисын Финансты министрадӕн хыгъдлӕвӕрд уый фӕдыл.

2
хъӕууонхӕдзарадон техникӕ

Хуссар Иры хъӕууон хӕдзарад баххӕст ис ног техникӕйӕ

3
(ранӕуӕггонд 16:09 16.09.2021)
Ног техникӕйы нымӕцы ис ахӕмтӕ, кӕцытӕ республикӕйы фӕзындысты фыццаг хатт, сӕ нымӕцы дуруидзӕн ӕмӕ картофӕфснайӕн хӕдтулгӕ

ЦХИНВАЛ, 16 сен – Sputnik, Плиты Фатимӕ. Хуссар Ирыстоны хъӕууон хӕдзарады министрад баххӕст кодта йӕ техникон базӕ ног ифтонгадӕй. 2021 азы уагдоны къухы бафтыд ноджы 42 иууӕджы, фехъусын кодта Sputnik министрады кусӕг Мулдарты Игорь.

Ног техникӕйы нымӕцы ис ахӕмтӕ, кӕцытӕ республикӕйы фӕзындысты фыццаг хатт, сӕ нымӕцы дуруидзӕн ӕмӕ картофӕфснайӕн хӕдтулгӕ. 

"Фыццаг хатт самал кодтам дуруидзӕн ӕмӕ картофӕфснайӕн машинӕ. Уымӕй размӕ нӕм уыд картофкъахӕн, фӕлӕ ног ифтонгад у егъаудӕр авналӕнтимӕ", - загъта уый.

Мулдарты Игоры ныхӕстӕм гӕсгӕ, ног техникӕйыл кусын бынӕттонтӕн амыдтой ӕрцӕуӕггаг специалисттӕ.

"Техникӕ цы амалиуӕгад рауагъта, уый кусджытӕ рцыдысты, ам бынаты сӕмбырд кодтой хъӕууонхӕдзарадон техникӕ ӕмӕ бацамыдтой бынӕттонтӕн сӕ куыст. Стӕй ма рӕстӕгӕй-рӕстӕгмӕ цӕудзысты ӕмӕ бӕлвырд кӕндзысты сӕ техникон уавӕр", - бафтыдта министрады кусӕг.

3