ЦХИНВАЛ, 7 мар — Sputnik, Босыкты Наталья. Хуссар Ирыстоны ахуырады министрады хъӕуы бакусын ахуырады методикӕйыл, кӕцы уыдзӕн здӕхт ирон адӕмы культурӕ, традицитӕ ӕмӕ ӕгъдӕуттӕ ахуыр кӕнынмӕ, загъта президент Тыбылты Леонид тематикон тымбыл фынгыл Цхинвалы.
"Рӕзгӕ фӕлтӕры монон хъомыладыл хъуамӕ кусой ӕрмӕст ныййарджытӕ нӕ, фӕлӕ ахуыргӕнджытӕ, ирон адӕмы хъӕздыг культурӕ ӕмӕ традицитӕм стыр хъусдард ӕздӕхгӕйӕ. Иумӕйаг куысты ӕмӕ фӕсивӕдмӕ ирон адӕмы истори ӕмӕ традицитӕм цымыдис сӕвзӕрыны фӕрцы, фӕлтӕрмӕ ӕнхъӕлмӕ кӕсы рухс ӕмӕ аккаг фидӕн", — равдыста ныфс Тыбылты Леонид.
Хуссар Ирыстоны ЗИИ-ы зонадон кусӕг Гаглойты Иринӕйы хъуыдымӕ гӕсгӕ, иухаттон мадзӕлттӕ нӕ аскъуыддзаг кӕндзысты нырыккон ӕхсӕнады цы проблемӕ сырӕзт, уый. Иринӕйы ныхӕстӕм гӕсгӕ, ахуырады министрад хъуамӕ бакуса концепцийыл.
"Мах хъуамӕ суӕм цивилизацигонд, традицион ӕхсӕнад, кӕцы хъуамӕ размӕ цӕуа нырыккон дунейы. Уый тыххӕй ис концепци, идеологи, цы ран уыдзӕн нысан алцыдӕр райрӕзтӕн", — загъта зонадон кусӕг.
Ахуырады министр Гасситы Наталийы неыхӕстӕм гӕсгӕ, ведомствӕ ныридӕгӕн кусы нывӕзтыл, кӕцы ратдзӕн фадат фӕсивӕды националон этикет ӕмӕ ӕрвылбонон практикӕйыл фӕхӕст кӕнын.
