Багаев Георгий

Актеры номарæн: Багаты Георгийæн ныффæлдыстой суадон

155
(ранӕуӕггонд 16:51 13.01.2020)
Номарæн доны гуырæн фæзынд Къуаисамæ фæндаггæрон, йæ райгуырæн хъæу Хъемултамæ хæстæг

ЦХИНВАЛ, 13 янв — Sputnik, Плиты Фатимæ. Хуссар Ирыстоны æмæ Цæгат Ирыстоны сгуыхт артист, ПДТ курдиатджын актер Багаты Георгийæн трассæ Цхинвал-Къуайсайы фæндаггæрон йæ бинонты хъæппæрисæй ныффæлдыстой суадон.

Фæлдыст суадон фæзынд курдиатджын актерæн йæ райгуырæн хъæу Хъемултамæ хæстæг. Ирон адæммæ суадоны фæлдисыны æгъдау ис раг замантæй, суадон фæлдыстой уæлдай дырддзæугæ æмæ кадджын адæмæн.

"Мæ фыды фæндыд ныффæлдисын суадон. Трассæйыл нæ хъæумæ хæстæг ис æрмæстдæр ацы доны гуырæн. Амайгæ йæ скодтон мæхæдæг, фæлæ мын арæзтадæн баххуыс кодтой хъæубæстæ, æмгæрттæ, Цхинвалы сыхæгтæ æмæ трассæйы фæндагаразджытæ. Фæндыд нæ æгъдаумæ гæсгæ уый сцæттæ кæнын йæ афæдзы бонмæ, фæлæ чысыл фæфæстиат стæм", - радзырдта Багаты Георгийы æфсымæр Олег.

Багаты Георгийы Хуссар Иры бахъуыды кодтой курдиатджын актерæй, куыстыл æнувыд лæгæй, диссаджы юморист, рæстдзинад уарзаг адæймагæй. Хуссар Иры паддзахадон драмон театры сценæйыл сæххæст кодта дæсгай фæлгонцтæ.

Остъаты Аланимæ сфæлдыстадон тандем Кошты Къостайы къухдариуæгадæй райгуырын кодта Хуссар Иры иууыл уарзондæр алæвæрттæй иу - "Сасинка æмæ Ладикъо". Багаты Георгий ма уыд арæхстджын спортсмен дæр - хъазыд футболон клубы сконды.

Цӕгат ӕмӕ Хуссар Ирыстоны сгуыхт артист Багаты Георгий ахицæн йæ цардæй 2018 азы 47-аздзыдӕй уӕззау низы фӕстӕ.

155
Ирон хъазт

Сног кӕндзысты традици: Цхинвалы райдайдзысты уадзын "Ирон хъазт"

2
(ранӕуӕггонд 10:11 07.07.2020)
Ирон кафты изӕртӕ райдайдзысты 7 июлӕй ӕмӕ уагъд цӕудзысты ӕнӕхъӕнӕн сӕрдыгон сезоны дӕргъы

ЦХИНВАЛ, 7 июл – Sputnik, Гӕбӕраты Элина. Цхинвалы сног кӕндзысты националон кафты изӕртӕ "Ирон хъазт", фехъусын кодтой столицӕйы администрацийы пресс-службӕйы.

Ивгъуыд ӕзты уагъд цыдысты ахӕм кафӕн изӕртӕ, кӕцытӕ уыдысты тынг популярон Цхинвалы фӕсивӕды хсӕн.

"Столицӕ ӕмӕ районты фӕсивӕдӕн уыдзӕн фадат равдисын сӕ кафыны курдиат", - банысан кодтой пресс-службӕ.

Администрацийы бафтыдтой, зӕгъгӕ, националон кафты изӕртӕ райдайдзысты 7 июлы ӕмӕ уагъд цӕудзысты ӕнӕхъӕн сӕрдыгон сезоны дӕргъы. Изӕрты организатор у горӕты администрацийы культурӕйы хайад.

Цхинвалы карантинон мадзӕлттӕ сисыны фӕстӕ ацыд ацы аз фыццаг "Ирон хъазт", уый снывонд кодтой Фӕсивӕды бонӕн, мадзал сорганизаци кодта горӕты администраци фӕсивӕдон организаци "Иугонд Алани"-йы ӕмархайдӕй.

2
ХИПУ

ХИПУ-йы йӕ куыст райдыдта исӕн къамис

5
(ранӕуӕггонд 12:28 07.07.2020)
Уӕлдӕр ахуыргӕнӕн уагдон цы 12 факультеты ис, уыдонмӕ ма бафтыд ацы аз ноджы иу - театралон

ЦХИНВАЙЛ , 7 июл — Sputnik, Плиты Фатимӕ. Хуссар Ирыстоны паддзахадон университеты йӕ куыст срӕвдз кодта исӕн къамис. Бӕстӕйы сӕйраг уӕлдӕр ахуыргӕнӕндон абитуриенттӕн ӕнхъары равзарын 13 дӕсныйадӕй боны хайады, ахуырад райсӕн ис фӕсаууонмӕ хайадты дӕр, хъусын кӕны вузы пресс-службӕ.

Ацы аз ХИПУ-йы уӕлӕмхасӕй бакодтой ног факультет - театралон хаххыл.

Уӕлдӕр ахуыргӕнӕн уагдоны ис боны хайады ис 13 дӕсныйады, фӕсаууонмӕ хайады ис 7 хаххӕй равзарӕн, ноджы ма ацы формӕйы уӕлдӕр ахуырад райсӕн ис коммерцион бындурыл - ам та ис фарст профессийы.

Уагдоны хъусинагмӕ гӕсгӕ, майданимӕ ахуыр чи фӕцис, уыдон дӕттынц фыццаг фӕлварӕн, кӕд ӕй фондзыл ратта, уӕд сӕрибар у иннӕ фӕлварӕнтӕй.

Исӕн къамис йӕ куыст срӕвдз кодта июлы райдайӕны ӕмӕ гӕххӕтытӕ ист цӕудзысты 15 июльмӕ.

5