Нафи Джусоев и Таймураз Хаджеты

Хуссар Иры сӕнусон кӕндзысты Джусойты дыууӕ ӕфсымӕр Нафи ӕмӕ Таймуразы нӕмттӕ

35
(ранӕуӕггонд 16:17 08.06.2021)
Хаджеты Таймураз ӕмӕ Джусойты Нафийы нӕмттӕ ратдзысты сӕ райгуырӕн Къуыдаргомы дыууӕ скъолайӕн

ЦХИНВАЛ, 8 июн – Sputnik, Плиты Фатимæ. Хуссар Ирыстоны Къуыдаргомы дыууӕ скъолайӕн фӕнд кӕнынц раттын дыууӕ номдзыд ӕфсымӕр Джусойты Нафи ӕмӕ Хаджеты Таймуразы нӕмттӕ.

Дзауы районы Къуыдаргомы горӕт Къуаисайы ӕмӕ Кировы хъӕуы астӕуккаг скъолатӕ сты нырма ӕнӕном. 

Горӕт Къуайсайы астӕуккаг скъола у Дзауы районы стырдӕр ахуырадон уагдӕттӕй сӕ иу, ам ахуыр кӕны 150 ахуырдзауы.

"Фыццаг хъавыдыстӕм раттын скъолайӕн Хуыгаты Доментийы ном, Георгийы дзуары ӕххӕст кавалерӕн стыр сты йӕ лӕггӕдтӕ ирон адӕмы раз 1920 геноциды рӕстӕджы лигъдӕтты Цӕгат Ирыстоны ӕрфысым кӕныны хъуыддаджы. Фӕлӕ ацы лӕджы ном сӕнусон кодтой Ногиры скъолайы. Уымӕ гӕсгӕ, мах фӕнды скъолайӕн раттын XX ӕнусы хуыздӕр поэттӕй иу Хаджеты Таймуразы ном. Уый фӕдыл бацӕттӕ кӕндзыстӕм гӕххӕттытӕ", - загъта уагдоны директор Хуыгаты Суликъо.

Дзауы районы Кировы уӕвӕг астӕуккаг скъолайӕн та фӕнд кӕнынц раттын академик Джусойты Нафийы ном.

"Сӕ гӕххӕттытӕ баццӕттӕ кодтой, сӕ рауагъдон уыд Джусойты Нафи ӕмӕ скъолайы номӕй фӕнд кӕнынц сӕнусон кӕнын сӕ номдзыд рауагъдоны ном",- загътой Sputnik районы ахуырады хайады.

Джусойты Нафийы ӕмӕ йӕ ӕфсымӕр Таймураз райгуырдысты Къуыдаргомы. Таймураз уыд 20 азы кӕстӕр йе 'фсымӕр Нафийӕ. Официалон биографи куыд амоны, афтӕмӕй Таймуразы фӕндыд, цӕмӕй йӕ йӕ номдзыд ӕфсымӕры кадӕй ма буц кӕной, фӕлӕ йӕхи ӕныстытӕм тырнгӕйӕ, кӕстӕр ӕфсымӕр райста сӕ фыдӕлы номӕй псевдоним "Хаджеты". Дыууӕ ӕфсымӕр дӕр уыдысты ӕнтыстджын литературӕйы, уыдысты иттӕг хорз иртасджытӕ, тӕлмацгӕнджытӕ, поэттӕ, ныууагътой стыр бынтӕ. Таймураз нымад цӕуы Ирыстоны хуыздӕр поэттӕй иуыл. Нафийы ном сӕнусон кодтой йӕ амӕлӕты фӕстӕ - Цхинвалы уынгтӕй иу хӕссы академикы ном, йӕ номыл лӕвӕрд цӕуы преми, бавӕрдтой йӕ национ пантеоны.

35
Сергей Меняйло

Сергей Меняйлойы равзæрстой Цæгат Иры сæргълæууæгæй

10
Меняйлойæ дарддæр кандидатты нымæцы уыдысты регионы депутаттæ Баликъоты Валерий æмæ Медея Элдзарова

ЦХИНВАЛ, 19 сен - Sputnik. Цæгат Ирыстоны депутаттæ сусæг хъæлæсæппæрсты руаджы равзæрстой Сергей Меняйлойы регионы къухдариуæггæнæгæй.

"Меняйлойы тыххæй схъæлæс кодтой - 57, ныхмæ - 0, не ʻсхъæлæс кодтой - 0", - загъта Цæгат Ирыстоны парламенты нымайæн къамисы сæрдар Гæбæраты Юрий.

Цæгат Ирыстон комкоммæ æвзæрстытæ нæ уадзы, регионы разамонæджы æвзары парламент УФ президенты бавдыстгонд кандидатурæты нымæцæй.

"Ӕз æй зонын, Ирыстоны цæрджытæ махмæ æнхъæлмæ кæсынц раст къахдзæфтæм. Ӕнхъæлмæ кæсынц ног скъуыддзæгтæ æмæ рæстдзинадмæ. Нæ хæс та у саразын афтæ, цæмæй алкæцы адæймагæн дæр йæ цард цæуа сабыр æмæ фадатджынæй. Регионы цæрджытæ хъуамæ уыной мах кæй архайæм иумæйаг хæрзиуæгл. Ууыл кусдзæн æз уæ æххуысæй", - загъта Сергей Меняйло.

10
Хуссар Иры столицæйы ацыд Республикӕйы боны цытӕн парады æлхынцъгæнæн генералон репетици

Хуссар Иры столицæйы ацыд Республикӕйы боны цытӕн парады æлхынцъгæнæн генералон репетици

6
(ранӕуӕггонд 15:26 18.09.2021)
Иннæ репетицитæй уæлдай сабаты æфсæддонтæ рацыдысты парадон дарæсы. Театры раз байдзаг æфсæддон конд адæмæй, уыдон слæууыдысты дамгъæ "П"-йы хуызы

ЦХИНВАЛ, 18 сен — Sputnik, Плиты Фатимæ. Цхинвалы сæйраг фӕзуаты ацыд парады фæстаг æлхынцъгæнæн генералон репетици, кӕцы нывонд у Республикикӕйы бонӕн.

Иннæ репетицитæй уæлдай сабаты æфсæддонтæ рацыдысты парадон дарæсы. Театры раз байдзаг æфсæддон конд адæмæй, уыдон слæууыдысты дамгъæ "П"-йы хуызы.

"Иу мæй нæхи цæттæ кæнæм, репетици та уы ныр æртыккаг хатт. Нæ тыхтæ радтам, цæмæй бæрæгбон ацæуа нывыл,уый у сæйрагдæртæй иу, хъуамæ йæ арвитæм рæсугъд æмæ нывыл", - загъта цытджын хъараулы тырысахæссæг Сæрмæт.

Цытджын мадзал ацӕудзӕн къуырисӕры, 20 сентябры. Театралон фӕзуатыл рацӕудзысты Хъахъхъӕнынады, Мидхъуыддӕгты, Уӕлвӕткон уавӕрты ӕмӕ Юстицийы министрӕдты парадон къордтӕ, стӕй ма Паддзахадон ӕдасдзинады комитеты арӕнхъахъхъӕнджытӕ ӕмӕ Уӕрӕсейы 4-ӕм ӕфсӕддон базӕйы службӕгӕнджытӕ ӕмӕ Уӕрӕсейы федералон ӕдасдзинады службӕйы арӕнгӕрон хайады кусджытӕ. Уымӕй дарддӕр ма парады рацӕудзысты Хъахъхъӕнынады министрады танкисттӕ, кӕцытӕ архайдтой "Танковый биатлон"-ы.

Генеральная репетиция Парада ко Дню республики
© Sputnik / Natalia Airiyan
Хуссар Иры столицæйы ацыд Республикӕйы боны цытӕн парады æлхынцъгæнæн генералон репетици

20 сентябыры 1990 азы Адӕмон депутаты совет рахаста уынаффӕмӕ Хуссар Ирыстоны автономон областы статус скӕнын Хуссар Ирыстоны Демократон Республикикӕмӕ Советон цӕдисы сконды. Ацы къахдзӕф уыд фыццаг хӕдбардзинадмӕ фӕндагыл. 20 сентябырь та ссис сӕйраг паддзахадон бӕрӕгбонтӕй сӕ иу.

6