Футболон клуб Алани-йы æнусон юбилейæн Дзæуджыхъæуы снывонд кодтой ног граффити

Футболон клуб "Алани"-йы æнусон юбилейæн Дзæуджыхъæуы снывонд кодтой ног граффити

24
(ранӕуӕггонд 16:39 18.08.2021)
Ацы аз "Алани"-йыл æххæст кæны 100 азы. Æввахс рæстæджы клубы юбилеймæ бацæттæ уыдзæн киноныв, амынд кинонывы æвдыст æрцæудзæн Булгаковимæ граффити дæр

ЦХИНВАЛ, 18 авг — Sputnik. Дзæуджыхъæуы республикон стадион "Спартак"-ы бацæуæны футболон клуб "Алани"-йы сæдæ азы бонмæ фæзынд граффити Михаил Булгаковы портрет æмæ йæ раныхасимæ: "Ацы сахары байгом ис клуб номдзыд фидæнимæ". Уый тыххæй хъусын кæны 15 регион.

Арт-объектыл куыста нывгæнæг Цæгæраты Давид.

"Ацы аз нæ уарзон "Алани"-йыл æххæст кæны 100 азы. Æввахс рæстæджы клубы юбилеймæ бацæттæ уыдзæн киноныв, амынд кинонывы æвдыст æрцæудзæн Булгаковимæ граффити дæр. Йæ автобиографион уацау "Записки на манжетах"-ы (амынд уацмысы нывæфтыд цæуы фыссæджы цард Дзæуджыхъæуы) Булгаков дзуры, фæстæдæр "Алани" чи сси, уыцы футболон командæйы фыццаг хъазт куыд бабæрæг кодта, уый", – радзырдта "15-æм Регион"-æн нывгæнæг.

Фæбæрæг кæнын хъæуы, номдзыд уырыссаг фыссæг æмæ драматургы ныхæстæ æцæг разындысты. Йæ сæдæ азы историйы дæргъы ирон клубы къухы бафтыд бирæ æнтыстытæ, уыцы æнтыстыты бындурыл клуб æвæрд цæуы бæстæйы æппæты титулджындæр клубты рæнхъы.

24
РБМЦ сырх зонӕ

Хуссар Иры хицауад медиктӕн фиддонтӕн рахицӕн кодта 10 милуан сомӕй фылдӕр

2
(ранӕуӕггонд 16:09 16.09.2021)
Фӕрӕзтӕ рахицӕн кӕныны фӕдыл скъуыддзаг рахастӕуыд цыппӕрӕмы республикӕйы хицауады ӕнӕрадон рабадтыл

ЦХИНВАЛ, 16 сен - Sputnik. Хуссар Ирыстоны хицауад рахицӕн кодта йӕ фӕстауӕрцон фондӕй 10,2 милуан сомы сӕрмагонд социалон фиддонтӕн медиктӕн ӕмӕ ӕндӕр кусджытӕн коронавирусимӕ тохы тыххӕй, хъусын кӕны министрты кабинеты пресс-службӕ.

Скъуыддзаг рахастӕуыд хицауады ӕнӕрадон рабадтыл. Фӕрӕзтӕ байуӕрстой афтӕмӕй:

  • Республикон бирӕпрофилон медицинон центр 2021 азы 1 майӕ 31 августы онг периоды тыххӕй райсдзӕн 9 425 210 сомы
  • Дзауы районон рынчындон 1 апрелӕй 31 августы онг периодӕн райсдзӕн 350 750 сомы
  • Къуайсайы рынчындон 22 июнӕй 31 августы онг периодӕн райсдзӕн – 347 833 сомы
  • Знауыры районон рынчындон 1 июнӕй 31 августы онг периодӕн райсдзӕн – 79 250 сомы
  • Цхинвалы районы амбулаторон ӕххуысы центр 1 июлӕй 31 августы онг периодӕн райсдзӕн 73 750 сомы

Хицауады сӕрдар Бекъойты Геннадий бахӕс кодта Ӕнӕниздзинад хъахъхъӕнынады министрадӕн хъус дарын рахицӕнгонд фӕрӕзты хардз кӕнынмӕ ӕмӕ бавдисын Финансты министрадӕн хыгъдлӕвӕрд уый фӕдыл.

2
хъӕууонхӕдзарадон техникӕ

Хуссар Иры хъӕууон хӕдзарад баххӕст ис ног техникӕйӕ

3
(ранӕуӕггонд 16:09 16.09.2021)
Ног техникӕйы нымӕцы ис ахӕмтӕ, кӕцытӕ республикӕйы фӕзындысты фыццаг хатт, сӕ нымӕцы дуруидзӕн ӕмӕ картофӕфснайӕн хӕдтулгӕ

ЦХИНВАЛ, 16 сен – Sputnik, Плиты Фатимӕ. Хуссар Ирыстоны хъӕууон хӕдзарады министрад баххӕст кодта йӕ техникон базӕ ног ифтонгадӕй. 2021 азы уагдоны къухы бафтыд ноджы 42 иууӕджы, фехъусын кодта Sputnik министрады кусӕг Мулдарты Игорь.

Ног техникӕйы нымӕцы ис ахӕмтӕ, кӕцытӕ республикӕйы фӕзындысты фыццаг хатт, сӕ нымӕцы дуруидзӕн ӕмӕ картофӕфснайӕн хӕдтулгӕ. 

"Фыццаг хатт самал кодтам дуруидзӕн ӕмӕ картофӕфснайӕн машинӕ. Уымӕй размӕ нӕм уыд картофкъахӕн, фӕлӕ ног ифтонгад у егъаудӕр авналӕнтимӕ", - загъта уый.

Мулдарты Игоры ныхӕстӕм гӕсгӕ, ног техникӕйыл кусын бынӕттонтӕн амыдтой ӕрцӕуӕггаг специалисттӕ.

"Техникӕ цы амалиуӕгад рауагъта, уый кусджытӕ рцыдысты, ам бынаты сӕмбырд кодтой хъӕууонхӕдзарадон техникӕ ӕмӕ бацамыдтой бынӕттонтӕн сӕ куыст. Стӕй ма рӕстӕгӕй-рӕстӕгмӕ цӕудзысты ӕмӕ бӕлвырд кӕндзысты сӕ техникон уавӕр", - бафтыдта министрады кусӕг.

3