Карсанты Гурам: бирӕнымӕц туристтыл нӕма нӕ фӕтых уыдзыстӕм
Фӕстаг рӕстӕджы Хуссар Ирыстон цымыдис кӕнын райдыта ӕддагон туристты. Карсанты Гурамы хъуыдымӕ гӕсгӕ, фӕсарӕнтӕм афтӕ ӕнцонтӕй кӕй нӕу афтӕн, уый дӕр сразӕнгард кодта туристты равзарын Ирыстоны территори.
"Ӕрмӕст мӕ компанийы уылты ӕрцыд цалдӕр сӕдӕ туристы. Уыдон ӕврылаз дӕр кӕдӕмдӕр цыдысты ӕмӕ сын ацы аз ахӕм фадат нӕй, уымӕ гӕсгӕ сын Цӕгат Ирыстоны туроператортӕ банхъардтой хуссармӕ дӕр ӕрцӕуын, уый тыххӕй сӕ стыр бузныг дӕн", - загъта гид.
Карсанты Гурамы ныхӕстӕм гӕсгӕ, ахсджиаг у развӕлгъау базонын туристты домӕнтӕ.
"Уазӕг нӕм куы ‘рцӕуы, уӕд мах ахуыр стӕм иумӕйаг фынг ӕрӕвӕрыныл, фӕлӕ туристӕн ис йӕхи домӕнтӕ, чи карчы фыдӕн ӕрмӕстдӕр йӕ урс дзидза хӕры, кӕй та ӕнӕхъӕн уӕлибых нӕ хъӕуы, ӕмӕ уымӕ та не ‘сты цӕттӕ нӕдӕр хӕрӕндӕттӕ, нӕдӕр адӕм", - бафиппайдта уый.
Гурам куыд банысан кодта, уымӕ гӕсгӕ бирӕнымӕц туристты райсыныл нырма республикӕ нӕ фӕтых уыдзӕн.
