ЦХИНВАЛ, 20 июл — Sputnik, Козаты Дианӕ. Дунейы алы паддзахады дӕр минӕварад у ӕхгӕд уагдон. Дипмисситӕм бацӕуын у, куыд фӕсарӕйнаг паддзахады мини-территоримӕ бацыд ӕмӕ у карзӕй регламентацигонд. Фӕлӕ Sputnik журналисттӕн сарӕзтой уӕлвӕтк. Агентады кусджытӕ фӕуазӕг сты уӕрӕсейаг дипломатон минӕварадмӕ Цхинвалы, сӕхи цӕстӕй федтой, куыд цӕрынц ӕмӕ кусынц уӕрӕсейаг дипломаттӕ Хуссар Ирыстоны.
Экскурсигӕнӕгӕй Sputnik кусджытӕн ралӕууыд Уӕрӕсейы ӕххӕстбарджын минӕвар Хуссар Ирыстоны Къарджиаты Эльбрус йӕхӕдӕг.
Уӕрӕсейаг минӕварад республикӕйы ӕрбайгом 2009 азы апрелы кӕрон, 2008 азы хӕстон архӕйдтытӕй чысыл фӕстӕдӕр. Уымӕ гӕсгӕ дипломатты ӕрбынатӕн пырхытӕ Цхинвалы ӕмбӕлон уавӕртӕ нӕ уыд. Уыдон арендӕйы истой фатертӕ, сӕрмагонд хӕдзӕрттӕ. Уым ӕрбынат кодтой минӕварад дӕр ӕмӕ консулад дӕр.
"Тынг ӕхсызгонӕй ныл сӕмбӕлдысты уӕд Хуссар Ирыстоны. Уыцы бонты нын стыр ӕххуыс бакодтой бынӕттон хицауад, коллегӕтӕ фӕсарӕйнаг хъуыддӕгты министрады ӕмӕ йӕ уӕды сӕргълӕууӕг Джиоты Мурӕт", — дзуры Къарджиаты Эльбрус.
Цавӕрдӕр рӕстӕг фӕстӕдӕр рацырд бардзырд Цхинвалы бӕстыхӕйтты комплекс саразыны фӕдыл, ӕмӕ 2012 азы сӕрды дипломаттӕ ӕрбынат кодтой Леуахийы цӕугӕдоны былгӕрон, ӕмкъайадты галуаны раздӕры бӕстыхайы. Абон дипломаттӕ ӕмӕ сӕ бинонтӕн арӕзт ӕрцыдысты алы уавӕртӕ ӕнцонвадат цард, улӕфт ӕмӕ ӕнтыстджын куысты тыххӕй.
Ацы азты мидӕг минӕварад банысан кодта бирӕ цытджын цаутӕ — ӕмкъайады регистрацитӕ, сывӕллӕтты райгуырд, ногазон бӕрӕгбонтӕ, Уӕрӕсейы бонтӕ ӕмӕ ӕндӕр зӕрдылдарӕн бонтӕ. Ацы цаутӕн сӕ фылдӕрӕй къамтӕ сты ауыгъд цытджын мадзӕлттӕ ӕмӕ официалон мадзӕлтты залы систыл.
Залы фарсмӕ ис чысыл кабинет ӕбӕстӕгты химӕ исыны тыххӕй. Кӕцытӕ арӕх ӕрбахатынц алыгъуызон фарстыты фӕдыл.
Ӕххӕстбарджын минӕвар нын уынын кӕны минӕварады мидӕггагон кӕрт. Цы ран ис сывӕллӕтты фӕзуӕттӕ, бандӕттӕ ӕмӕ чысыл сабитӕн бассейн. Уыдон алыварс ис дидинджыты тахтатӕ.
"Минӕварады территори у ӕрмӕстдӕр ӕрдӕг гектары бӕрц, уымӕ гӕсгӕ дзы стыр агъуыстытӕ нӕй, ӕрмӕстдӕр иууыл ӕнӕмӕнгхъӕуӕг. Ис нӕм 14 сывӕллоны. Сӕйраджыдӕр скъолаагъоммӕ ӕмӕ райдиан скъолайы кары. Ӕцӕг ныр уыдон сӕрдыгон рӕстӕгмӕ апырхытӕ сты нанатӕ-дадатыл", — дарддӕр дзуры минӕвар.
Кӕрты, сисыл фидар ис баскетболон къалати, ӕмӕ Къарджиайы фырт йӕхӕдӕг ацы спорты хуыз бирӕ кӕй уарзы, уымӕ гӕсгӕ арӕх фӕамоны ӕрыгӕттӕн, куыд хъӕуы пурти раст ӕппарын къалатийы.
Минӕварады фарсмӕ ис ӕхсӕзуӕладзыгон цӕрӕн комплекс нырыккон, хӕрзифтонг фатертимӕ дипломаттӕ ӕмӕ сӕ бинонтӕн. Алцыдӕр дзы ис бынаты. Фыццаг уӕладзыгыл ис спортзал, кӕцы тынг популярон у сылгоймӕгты ӕхсӕн, ис ма дзы чысыл хатӕн стъолы теннисӕй хъазынӕн.
Минӕвары уарзондӕр спорт у бильярд, кӕцыйӕ хъазын уый базыдта 13 азы йыл куы цыд, уӕд. Sputnik уацхӕсджытӕн уый равдыста мастер-класс, бильярдӕй парти ахъазгӕйӕ. Минӕварад цалдӕр хатт ауагъта турнир бильярдӕй, фыццаг турниры рӕстӕджы уый ссис ӕвзист призер.
"Дыккаг бынатыл тынгдӕр фӕцин кодтон, уымӕн ӕмӕ алчидӕр ахъуыды кодтаид, ома минӕвар кӕй дӕн, уый тыххӕй мын радтой уӕлахиз", — худы уый.
Ис дзы сывӕллӕтты хатӕн, ӕмӕ чысыл библиотекӕ, цы ран ӕмбырд сты уырыссаг ӕмӕ фӕсарӕйнаг фысджыты уацмыстӕ. Уӕлдай бынат дзы ахсы Хетӕгкаты Къостайы тыххӕй чиныг. Къарджиайы фырт дзуры, кӕй уарзы "ныхасӕй пайда кӕнын чи зоны", уыцы фысджыты кӕсын.
"Мӕхӕдӕг дӕр бирӕ фыссын, фӕлӕ уыдон иууылдӕр сты бюрократон ныхӕстӕ", — банысан кодта минӕвар.
Sputnik бацыд минӕварады консулон хайадмӕ дӕр, цы ран ӕрвылбон лӕггад кӕнынц 30 ӕмбӕстагӕн. Консул Цидайты Сослан радзырдта, цы куыст кӕны хайад. Ӕнӕмӕнгхъӕуӕг информаци ис конд стендыл дӕр, цы ран алцыдӕр у лӕмбынӕг фыст.
"Адӕм тынг активонӕй пайда кӕнынц нӕ лӕггӕдтӕй. Кӕй зӕгъын ӕй хъӕуы, паспорттӕ дӕттынӕй дарддӕр ма исӕм ӕмбӕстагадтӕ, ис нӕм фадат сывӕллӕттӕн ӕууӕнкдартӕ райсӕн, уый та тынг актуалон свӕййы сӕрдыгон рӕстӕг", — дзуры уый.
Цидайты Сослан консулон хайады сӕргъ лӕууы 3,5 азы. Дзуры, кусӕгон карьерӕ кӕй райдыдта "йӕ нанайы хӕдзарады", уый фӕстӕ ацыд бизнес ӕмӕ экономикӕ ахуыр кӕнынмӕ нырма Германимӕ, уый фӕстӕ та Англисмӕ. 2008 азы райдыдта кусын УФ фӕсарӕйнаг хъуыддӕгты министрады системӕйы. Хуссар Ирыстон ссис Сосланӕн фыццаг дӕргъвӕтин командировкӕ.
"Англисы баззайын мӕ ӕппындӕр нӕ фӕндыд, Германи — ӕндӕр хъуыддаг у. Уыдис мын фадат уым баззайын, фӕлӕ раздӕхтӕн. Цхинвалы ӕз исын ницӕимӕ абаргӕ куысты ӕмӕ адӕмимӕ кусыны фӕлтӕрддзинад. Тынг хӕлар коллектив нын ис — иумӕ улӕфӕм, нысан кӕнӕм гуырӕнбонтӕ", — дзуры уый.
Къуыри ӕртӕ хатты Сослан хъазы футболӕй, уарзы бадминтон ӕмӕ бильярд.
Минӕварады уынаффӕгӕнӕг Виталий Сошнин Хуссар Ирыстоны кусы ныр ӕртӕ азы. 38-азон дипломатон архайды рӕстӕджы куыста бирӕ бӕстӕты — Болгари, Кипр, Греци, Черногори, Боснийы, зоны фондз ӕвзаджы. Йӕ ныхӕстӕм гӕсгӕ, Хуссар Ирыстоны куыст хицӕн кӕны йӕ нюанстӕй.
"Ӕртӕ-цыппар азы размӕ дӕр ма минӕварад кодта консультацион куыст, ӕххуыс кодта Хуссар Ирыстонӕн йӕ къӕхтыл слӕууын, фӕлӕ ныр уыцы ӕнӕмӕнгхъӕуӕгдзинад нал ис. Уым кусынц хорз специалисттӕ ӕмӕ дипломаттӕ. Уымӕй дарддӕр ма, ам архайынц Инциденттӕ ма ӕруадзыны ӕмӕ сӕ аиуварс кӕныны фӕдыл механизмтӕ, кӕцы иунӕг ӕндӕр бӕстӕйы дӕр нӕй", — дзуры уый.
Минӕварады уынаффӕгӕнӕг Сергей Манько ахуыры фӕстӕ бахъахъхъӕдта диссертаци, йӕ темӕ ссис Фӕскавказ фӕссоветон дуджы. Дзуры, зӕгъгӕ йын ӕхсызгон уыд йӕ диссертацийӕ Хуссар Ирыстоны спайда кӕнын, кӕцыйӕн ис цымыдисон истори. Йӕ нымадмӕ гӕсгӕ, абон республикӕ хъуамӕ йӕ тыхтӕ аздаха экономикон ӕмӕ инвестицион райрӕзтмӕ.
"Хуссар Ирыстонӕн ис стыр хъомысад аграрон секторы райрӕзты, уымӕн ӕмӕ ам ис фадат экологон ӕгъдауӕй сыгъдӕг продукци уадзын, кӕцыйӕн ӕппӕт дунейы ис сыгъзӕрины аргъ. Ууыл ис фадат стыр ӕхцатӕ саразын", — дзуры уынаффӕгӕнӕг.
Манько фыссы ӕмбарынгӕнӕн чиныг Хуссар Ирыстоны тыххӕй. Йӕ ныхӕстӕм гӕсгӕ, ацы чиныг фыст уыдзӕн хуымӕтӕг ӕмӕ ӕнцонӕмбарӕн ӕвзагыл, "фыст цӕуы, цӕмӕй Хуссар Ирыстонмӕ кӕй фӕнда ӕрцӕуын, уый йӕ бакӕса ӕмӕ бамбара, цавӕр адӕм сты ирон адӕм".
