Ӕрдзынарӕг

Фыдæлты куырой, знæгты хæларад æмæ президентæн агитацигæнæг: куыд цæры Ӕрдзынарæджы хъæу

108
(ранӕуӕггонд 17:10 06.11.2019)
Ацы хъæу раздæр хуыд Чнарет, æвæрд у Ленингоры трассæмæ хæстæг. Цалдæр азы размæ йын йæ ном сæрмагонд къамис раивта Ӕрдзынарæджы хъæумæ

ЦХИНВАЛ, 6 ноя — Sputnik, Плиты Фатимæ. Хуссар Иры Цхинвалы районы Ӕрдзынарæджы хъæу баззад æртæ бинонтæ. Стæм цæрджытæ комы нарæджы сæ бонтæ æрвитынц æнæхъусдардæй, телефонон бастдзинадæй пайда кæнынæн сæ хъæуы къуылдыммæ ссæуын, æхсæнадон транспорты размæ цæуынц тракторыл, стæм уазджытæ та сæм бахауынц æрмæстдæр архаикон доны куырой уынæг æмæ фос æлхæнæг.

Ӕрдзынарӕг
© Sputnik / Наталья Айриян
Ӕрдзынарӕг

Фæстаг Хуссар Ирыстоны

Рагон Ром æмæ Грецийы дуджы æрымысгæ мигæнæн куыстхъом у Ӕрдзынарæджы хъæу ныр дæр. Ацы комы ма кусы Хуссар Иры иунæг доны куырой, аннæ рæтты раджы рахызтысты электроэнергийæ кусгæ куырæйттæм. Стæй сæ æнæмæнгхъæуындзинад дæр афтæ ахадгæ нал у - ныры дуджы адæм ссад æлхæнынц цæттæйæ.

"Ӕз ма йæ мæхæдæг хъуыды кæнын, ацы комы адæмæй азмæлæн куы нæ уыд. Хъæуы алкæцы мыггагæн дæр уыд йæхи куырой. Сæ дуртæ та сæ зилынæй нæ лæууыдысты", - дзуры хъæуы цæрæг Утарты Венера.

Куыройы хъæдын хъуырдзæуæны нартхор цадæггай бынмæ цæуы. Сахаты мидæг рагон "рауагъдад" дæтты иу килограммы бæрц ссад. Æлхæнгæ ссады уæлдай митау урсæй æрттивы æмæ дзы къуыбар ссарæн нæй.

Ӕрдзынарӕг
© Sputnik / Наталья Айриян
Ӕрдзынарӕг

Сылгоймаг æй арæхстджынæй æмбырд кæны æмæ уырнын кæны, зæгъгæ, уымæй цавæр хæрзад кæрдзын рауайа, ахæм æндæр никæмæ ис.

"Ӕрæджы дзы уæймæ ахастон Цхинвалмæ, чи дзы бафæлвæрдта, уыдон мæ ныр дæр ноджы домынц, фæлæ горæтмæ стæм хатт афтын", - бафтыдта Венера.

Хъæумæ æхсæнадон транспорт нæ цæуы. Ӕввахсдæр хъæу Бихъармæ автобусы размæ ныццæуынмæ хъæуы æртæ километры басæттын.

"Тракторыл æй акæнын, фæндаг дард у. Автотранспорты управлени нæм уыдысты, сæрмагонд рейс нын баныфсæвæрдтой, фæлæ цыппар цыды фæстæ мах уый уынæг нал стæм", - загъта Венерайы æмкъай Чиаты Василий.

Ӕрдзынарӕг
© Sputnik / Наталья Айриян
Ӕрдзынарӕг

Знæгты хæларад

Проблематæм æнæкæсгæйæ, бинонтæ цæрынц хъæрмудæй, хæлардзинад æгæрыстæмæй æрфысым ис æнæбафидаугæ знæгтæ - гæды æмæ куыдзы æхсæн дæр. Ӕбацæуæгмæ сæрæй хъыхъхъаг цæстæй кæсæг Тугъан, йе рагъыл уазал рæстæг тавы йæ цæдисон æмбалы.

Ӕрдзынарӕг
© Sputnik / Наталья Айриян
Ӕрдзынарӕг

"Мæ фырт мæм горæтмæ сиды, фæлæ цы хъуамæ аразон уым? Тæдзынæгæй цыхцырæгмæ чи цæуы? Цæугæдон мæ цæхæрадоны цурты цæуы, алцыдæр нæм зайы. Дарæм фос, цæг нæм арс дæр кæддæрты фæуазæг вæййы, фæлæ æвзæр нæ цæрæм", - зæгъы Чиаты Василий.

Ӕхсæз хъæлæс президентæн æмæ кæлæддзаг агъуыст

Бинонты æнæмæт цардмæ æнкъарддзинады аууон дæтты æрмæст сæ хæдзары мæгуырау уавæр. Агъуыстæй дон бынмæ сæх-сæх кæны, сынтæг хъæццулы сæрты æмбæрзт у целлофанæй, цар хъулæттæй лæууы. Хæдзары сис цыхцырæджы бын кæлы.

  • Ӕрдзынарӕг
    Ӕрдзынарӕг
    © Sputnik / Наталья Айриян
  • Ӕрдзынарӕг
    Ӕрдзынарӕг
    © Sputnik / Наталья Айриян
1 / 2
© Sputnik / Наталья Айриян
Ӕрдзынарӕг
"Хæсты рæстæджы ардæм гуырдзиаг адæймаг йæ къах не ʻрбавæрдта. Æгас сыхаг хæуы цæрджыты æз бааууон кодтон, нæ агъуысты дæргъæй дæргъмæ фынгыл нæдæр цыдысты æмæ-иу дыууæ хатты æрбадтысты. Абон дæр ма мын бузныгтæ дзурынц. Æз та ныр дæн тыхст уавæры, хицауадæй тынг курæг дæн, мæ хæдзары агъуыст мын куы раивиккой", - зæгъы Венера.

Йæ проблемæйы тыххæй сылгоймаг фыстæг дæр ныффыста, фæлæ йын дзуапдæттæг нæй. Сæхи тыхтæй йæ саразын сæ бон нæу, сылгоймагæн йæ къахыл хъæуы операци, йæ пенси та уый бæрц дæр нæ кæны.

"Куырдиатæй мæ ныфс нæй, фæлæ президентмæ фембæлдмæ куы бахауин, уæд мæ хъуыддаг чизоны сырæзит. Стæй уымæн дæр хорздзинады бацыдтæн, ам æввахс цæрджыты сразы кодтон уымæн схъæлæс кæнын æвзæрстыты. Æхсæз хъæлæс райста мæ фæрцы", - балхынцъ кодта Венера.

Ӕрдзынарӕг
© Sputnik / Наталья Айриян
Ӕрдзынарӕг
108
Федтон мӕ Ир ӕмӕ бакастӕн чиныг: спортсмен ӕмӕ студент карантины тыххӕй 

Федтон мӕ Ир, бакастӕн чиныг: спортсмен ӕмӕ студент карантины тыххӕй 

65
(ранӕуӕггонд 14:16 27.05.2020)
Коронавирусы апарахаты фӕстӕ Уӕрӕсейы ӕфсӕддон ахуыргӕнӕндӕттӕ уыдысты карантины марты кӕронӕй. Уый фӕстӕ студентты ӕрвитын райдыдтой сӕ райгуырӕн бӕстӕтӕм. Плиты Батрадз дӕр ӕрыздӕхт Ирыстонмӕ майы райдайӕны

ЦХИНВАЛ, 27 май - Sputnik, Плиты Фатимӕ. Санкт-Петербурджы уӕвӕг Михайловскы ӕфсӕддон артиллерион академийы студент, армспортӕй дуне ӕмӕ ӕппӕтуӕрӕсеон турнирты уӕлахиздзау Плиты Батрадз йӕ райгуырӕн бӕстӕмӕ ӕрцыд ӕмӕ дыууӕ къуыри арвыста карантины. Спортсмен радзырдта Sputnik, куыд арвыста ацы ӕмгъуыд, уый тыххӕй.

Спортсмен и студент Батрадз Плиев рассказал  о карантине в больнице
Фото из личного архива Батрадза Плиева
Плиты Батрадз

Коронавирусы апарахаты фӕстӕ Уӕрӕсейы ӕфсӕддон ахуыргӕнӕндӕттӕ уыдысты карантины марты кӕронӕй. Уый фӕстӕ студентты ӕрвитын райдыдтой сӕ райгуырӕн бӕстӕтӕм. Плиты Батрадз дӕр ӕрыздӕхт Ирыстонмӕ майы райдайӕны.

"Ацы академийы Цхинвалӕй ахуыр кӕнӕм 15 адӕймагӕй. Мах ӕрцыдыстӕм 5 майы ӕмӕ рынчындоны ӕрбынат кодтам. Алы палатайы дӕр уыдыстӕм фондзӕй. Интернет нын уыд, бынтон хорз гъӕдимӕ нӕ уыд, фӕлӕ нӕхи куыддӕрты ирхӕфстам", - дзуры уый.

Батрадз банысан кодта, ӕвӕндӕй изоляцийӕн кӕй ис ӕвӕрццаг ӕууӕлтӕ дӕр. 

"Дыууӕ къуыри лӕг цы хъуамӕ арӕзтаид, ӕмӕ райстон ӕмӕ бакастӕн англисаг фыссӕг Мария Кореллийы чиныг "Скорбь Сатаны". Ӕнӕ изоляци мӕ уымӕ не рывдӕлдаит", - худы лӕппу.

Ахуырмӕ ацӕуыны размӕ Батрадз архайдта армспорты, у Уӕрӕсейы ӕмӕ дунейы фыццагадты ӕвзист призер. 85 кг архайгӕйӕ уыд Хуссар Ирыстоны армрестлингы секцийы хуыздӕр спортсментӕй иу.

Спортсмен и студент Батрадз Плиев рассказал  о карантине в больнице
Фото из личного архива Батрадза Плиева
Плиты Батрадз

Лӕппуйӕн Санкт-Петербурджы академийы дӕр бар радтой, цӕмӕй спорты дӕр йӕ архайд ма ныууадза. Ацӕугӕ аз ссис ацы горӕты чемпион армрестлингӕй, фӕлӕ йӕ дарддӕр ерыстӕм нал ауагътой.

"Плиты Батрадз у мӕ хъомылгӕнинӕгты фидардӕртӕй сӕ иу, уымӕй раппӕлинагдӕр та у куыд адӕймаг афтӕ - иу азмӕ хорз ном скодта йӕ ахуыргӕнӕндоны дӕр. Йӕ ахуыр, физикон цӕттӕдзинад ӕмӕ зондахаст сты уым дӕр фӕзминаг. Кӕд нӕ секцийӕ фӕиппӕрд, уӕддӕр спортыл дӕр йӕ зӕрдӕ не 'сивта", - радзырдта лӕппуйы тренер Джиоты Валерий.

Батрадзы ныхӕстӕ гӕсгӕ, уый бирӕ рӕстӕг баззад ӕцӕгӕлон бӕстӕйы ӕмӕ тынг ӕрымысыд Ирыстон. 

"Ацы вирус куыннӕ уыдаид, уӕд августмӕ уым уыдаин. Иуӕй мын ӕхсызгон у, раздӕр кӕй ӕрцыдтӕн Ирыстонмӕ, мӕ риуы бӕрц сулӕфыдтӕн. Мӕ бӕстӕ федтон ӕмӕ мӕхимӕ 'рцыдтӕн", - загъта Батрадз.

Спортсмен и студент Батрадз Плиев рассказал  о карантине в больнице
Фото из личного архива Батрадза Плиева
Плиты Батрадз

Лӕппуйӕн йӕ карантины ӕмгъуыд фӕцис ӕмӕ ныр сӕрибарӕй тезгъо кӕны республикӕйы рӕсугъд къуымты.

65
Едысы донӕмбырдгӕнӕн

Чъизи ӕмӕ цъус: Цхинвалы цӕрджытӕ хъаст кӕнынц донифтонгадӕй

85
(ранӕуӕггонд 14:58 26.05.2020)
Адӕм се 'нӕразыдзинад ӕвдисынц социалон хызӕгты ӕмӕ ныхасы рӕстӕджы. Проблемӕ бӕрнон кусджытӕ бӕттынц уалдзыгон миттад ӕмӕ доны гуырахсты фӕкъаддӕримӕ

ЦХИНВАЛ, 26 май - Sputnik, Плиты Фатимӕ. Хуссар Ирыстоны столицӕйы цӕрджытӕ та ацы уалдзыгон мӕйты дӕр тыхсынц доны цухдзинадӕй. Цхинвайлӕгты крӕнттӕй куы чъизи дон рацӕуы, куы та доны муртӕ бинонты хӕрдзтыл не хӕссынц. Проблемӕ бӕрнон кусджытӕ бӕттынц уалдзыгон миттад ӕмӕ доны гуырахсты фӕкъаддӕримӕ. Адӕм сӕ ӕнӕразыдзинад ӕвдисынц социалон хызӕгты ӕмӕ ныхасы рӕстӕджы.

Донуарӕн уагдон "Водоканал" уалдзӕджы райдайӕны срӕвдз кодта донифтонгады схемӕ, кӕцымӕ гӕсгӕ изӕры дон лӕвӕрд цӕуы столицӕйы хуссар хаймӕ, райсомӕй та - цӕгаттагмӕ.

"Джиоты Аланы проспекты кӕрон цӕрын ӕмӕ нӕм сабат ӕмӕ хуыцаубоны дон нӕ рацыд. Къуырисӕры райсомӕй дон радтой, фӕлӕ цалынмӕ сыхӕгты бактӕ йедзаг кодтой, уӕдмӕ ӕрлӕууыд", - загъта Цхинвалы цӕрӕг Мӕдинӕ.

Ӕнгӕс уавӕры бахауд Гудзабары хъӕу дӕр, кӕцы кӕд территоримӕ гӕсгӕ хауы Цхинвалы районмӕ,  уӕддӕр дон исы столицӕйӕ.

"Дыууӕ бон нӕ рацыд дон ӕмӕ стӕй стыр хӕдтулгӕтыл нӕхӕдӕг ӕрластам", - загъта хъӕуы цӕрӕг Батрадз.

Цхинвалы цӕгаттаг микрорайонтӕ Мӕскуыйаг, Цӕгаттаг, Хурзӕрин ӕмӕ БАМ-ы цӕрджытӕ дӕр, кӕцытӕ дон истой комкоммӕ магистралон хаххӕй ӕмӕ сӕм уыд ӕдзух донифтонгад, ныр сӕ режимӕй хъазт кӕнынц.

"Дыууӕ мӕй чъизи донӕй нал фӕразӕм. Дыццӕджы райсом та бынтон ахицӕн. Бафӕлладыстӕм ацы уавӕрӕй", - дзуры  БАМ-ы цӕрӕн Анна.

Донифтонгады уагдоны хистӕр Цхуырбаты Аланы ныхӕстӕм гӕсгӕ, цӕгаттаг микрорайонтӕ ӕмӕ Дзау ахицӕн кӕнынц, цӕмӕй резервуартӕ йедзаг кӕной ӕмӕ дон горӕтыл ӕххӕсса.

Магистральная линия Едис-Цхинвал
© Sputnik / Фатима Плиева
Едысы донӕмбырдгӕнӕн

"Водоканал"-ы ӕмбарын кӕнынц, зӕгъгӕ, кӕд доны цухдзинад ӕрмӕст иу фатеры ӕмбӕлы, уӕд гӕнӕн ис ӕмӕ сӕ бакы фильтр байдзаг чъизийӕ. Ӕмткӕй та горӕты доны цухдзинад ахӕссы июны кӕронмӕ.

"Сӕйраг лини - Едыс никуы ӕрлӕууы. Дыууӕ резервуар нын лӕууы Тулдзы къохы, иу дзы у 5 мин кубон. Боныгъӕдӕй бирӕ аразгӕ у, куыддӕр къӕвда райдайы, афтӕ чъизи къалиутӕ ахицӕн кӕнӕм", - дзуры Цхуырбаты Алан.

Едысы донӕмбырдгӕнӕны хъусдарӕг Дзесты Игорь куыд радзырдта Sputnik, афтӕмӕй Едысы доны гуырахст сбирӕ вӕййы июлы ӕмӕ афтӕ ахӕссы октябры кӕронмӕ.

"Стӕй та къаддӕр райдайы. Кӕд ацы рӕстӕг магистралон доны хахх баххӕст кӕнынц Дзомагъ ӕмӕ Брытъаты доны хӕххытӕ, уӕд уыдон гом кӕй сты, уымӕ гӕсгӕ уалдзӕджы сты чъизи ӕмӕ сӕ ахицӕн кӕнынц", - банысан кодта Игорь.

Сотрудник Водоканала Игорь Дзесов
© Sputnik / Фатима Плиева
Дзесты Игорь

Ацы азмӕ ныфс ӕвӕрдтой Уанаты доны хӕтӕлӕй, зӕгъгӕ, уый аскъуыддзаг кӕндзӕн доны проблемӕ Цхинвалы, фӕлӕ йӕ арӕзтад нырма нӕ фӕуд кӕны.

"Нывӕзтмӕ гӕсгӕ ноябры хъуамӕ баиу кодтаиккам Уанат-Цхинвал, фӕлӕ арӕзтад вирусы тыххӕй лӕууы. 
Цӕмӕй дон ӕххӕсыдаид горӕтыл, уый тыххӕй бафӕлвӕрдтам Дменисы дон рӕстӕгӕй-рӕстӕгмӕ хицӕн кӕнын ӕмӕ дон раттын Цхинвалмӕ. Фӕлӕ уым зӕронд хӕтӕлтӕ кӕй ис, уымӕ гӕсгӕ стыр тыхимӕ дон куы рацӕуы, уӕд сӕ тоны", - загъта Цхуырбаты Алан.

Йӕ ныхӕстӕм гӕсгӕ, Уанат-Цхинвал арӕзт цӕуы дыууӕ этапӕй ӕмӕ ӕмткӕй дӕтдзӕн горӕтӕн 15 мин куб дон. Дыккаг этап ӕххӕст цӕуы ацы аз, ныр архайынц донгуырӕнтыл, цӕмӕй доны гуырахст фестырдӕр уа. 

"Кӕд июнӕй куыст райдайа, уӕд ӕмгъуыдмӕ сцӕттӕ уыдзӕн", - ныфс бавӕрдта "Водоканал"-ы хистӕр.

Магистральная линия Едис-Цхинвал
© Sputnik / Фатима Плиева
Едысы донӕмбырдгӕнӕн
85
Цхинвал

Хуссар Иры ӕнӕкусӕгон бонтӕ нӕ адарддӕр кӕндзысты

0
(ранӕуӕггонд 16:08 28.05.2020)
Июны кӕрӕттӕм баззайдзысты арӕнӕвӕрдтӕ, кӕцытӕ хауынц кусджыты кӕцыдӕр категоритӕм

ЦХИНВАЛ, 28 мая – Sputnik, Козаты Диана. Хуссар Ирыстоны ӕнӕкусӕгон бонтӕ, кӕцытӕ расидтысты коронавирусы пандемийы тасӕй, нӕ адарддӕр кӕндзысты, загъта Sputnik президенты пресс-секретарь Гасситы Дина.

Хуссар Ирыстоны ӕнӕкусӕгон бонтӕ расидтысты 8 апрелы, уый фӕстӕ сӕ дыууӕ хатт адарддӕр кодтой 11 ӕмӕ 28 майы онг.

"Райсгӕ мадзӕлтты руаджы фӕкъаддӕр ис коронавирусы апарахаты тас. Инфекци нӕ рахызт медицинон уагдӕттӕй, цы ран сизоляци кодтой ӕмбӕстӕгты карантины. Уавӕр ис хъусдарды бын. Уый фӕдыл ӕнӕкусӕгон бонтӕ нӕ адарддӕр кодтой", - загъта Гасситы Дина.

Фӕлӕ баззадысты арӕнӕвӕрдтӕ, кӕцытӕ хауынц кусджыты кӕцыдӕр категоритӕм. Куыстӕй ссӕрибар кодтой ӕвгъӕдджын сылгоймӕгты, 65 азы карӕй хистӕрдӕр адӕмы, ӕмӕ иугӕндзойнон низтӕй рынчын ӕмбӕстӕгты. Уыдонӕн фиддзысты сӕ мызд дӕр.

Афтӕ ма бар ис ссӕрибар кӕнын ныййарджытӕй иуы, кӕцы зилы 10 азы кары онг сывӕллонмӕ.

0