Герсан

Миллионер интернатæй

863
(ранӕуӕггонд 15:21 03.12.2019)
Джыгкайты Герсан ис хицауады æвджид раздæры зæрæтты хæдзары, лæппуйы æнахуыр хъысмæтыл, уæззау царды тыххæй Sputnik радзырдтой йæ хъомылгæнджытæ

ЦХИНВАЛ, 3 дек - Sputnik, Плиты Фатимæ. Цхинвалы скъола-интернаты коррекцион къласы рауагъдон цыппар мæйы иппæрды фæстæ фембæлд, бирæ æзты дæргъы йæ цы коллектив фæхъомыл кодта, уыимæ. Джыгкайты Герсанæн скъолайы хъомылгæнджытæ баивтой йæ ныййарджыты, уагдон та 17 азы дæргъы ссис йæ хæдзар. Лæппуйы хъысмæт æрымысгæ сюжетæй у карздæр.

Мысы йæ "бинонты"

Хуссар Иры зæрæтты хæдзар 2019 азы уалдзæджы  рацарæзтой Хуссар Иры медико-социалон центрмæ, ног статусимæ объект райста ног бæстыхай дæр. Иунæг æмæ низæфхæрд адæмы ног хæдзар æрбынат кодта столицæйы цæгатфарс микрорайонтæм хæстæг. Сæрды 19-аздзыд Джыгкайты Герсан дæр ссис йæ цæрæг. Лæппу фæстæ кæны йæ размæцыды, иунæгæй цæрæн ын нæй, зæрдæдзургæ хиуæттæ дæр ын нæ разынд.

Герсан
© Sputnik / Наталья Айриян
Герсан

"19 азы йыл сæххæст ис æмæ йын интернаты цæрыны бар нал уыд. Бынтон сидзæртæн хицауад хъуамæ радта фатер, фæлæ Герсанæн иунæгæй цæрæн нæй. Медико-социалон центр нæ уавæры бацыд æмæ лæппуйы айстой сæхимæ", - загъта скъолайы директор Тедеты Роланд.

Герсан
© Sputnik / Наталья Айриян
Герсан

Директоры сцыдмæ лæппу цæттæйæ уынджы рауай-бауай кодта, йæхицæн бынат нал уардта. Чысыл фæстæдæр уый ацыд интернатмæ, æгас ахуырадон уагдоны коллектив æмæ йæ ахуырдзаутæ иууылдæр ракалдысты Герсикы уынынмæ, сылгоймæгтæ сæ цæссыг нал урæдтой.

"Мысы хъомылгæнджыты, рагæй йæ фæнды æмæ йæ абон ракодтон, цæмæй фена йæ "бинонты", - бафтыдта директор.

Фыдбылызтæ æмæ Хъахъхъæнæг Зæд

Ӕнахуыр цардвæндагимæ лæппуйы иутæ хонынц амондджын стъалыйы бын гуырд, аннæтæ уырнын кæнынц, йæ цард йемыдзаг кæй у бæллæхтæй. Ӕцæг дæр рынчын лæппуйы царды æмдзу кæнынц фыдбылызтæ æмæ амонд – дыууæаздзыдæй йыл æнахъомты фæдыл инспекци бамбæлд 2000-æм æзты райдайæны. Нозтуарзаг сылгоймаг сабийы дардта къоппы, æнæркаст дыууæаздзыд сывæллон уыд дыууæ килограммы.

Герсан
© Sputnik / Наталья Айриян
Герсан

"Лæппуйæн йæ бон нæ уыд вертикалон хуызы слæууын. Цавæрдæр вагоны цард йæ мад, сывæллон та уыд æнæркаст", - загъта директор.

Ӕнамонд сывæллоны нырма сæндидзын кодтой рынчындоны, стæй йæ йе ʻвджид райста скъола-интернат. Зын зæгъæн у, йæ царды райдианы зындзинæдтæ бафтыдтой лæппуйыл низтæ æви сæ гуырцæй рахаста, фæлæ сæ ахъаззаг фæхайджын. Уæззау зæрдæйы низ лæппуйæн йæ цард дыууæйыл куы кодта, уæд йæ амондæн фæзынд Уæрæсейы вице-премьер Татьяна Голиковайы сæрмагонд нывæзт, йæ фæлгæтты акодтой хос кæнынмæ Герсаны.

"Уыд ын зæрдæйы дыууæварсон порок, улæфт–иу ын нал фаг кодта, ныххаудта-иу сынтæгыл дæлгоммæ æмæ иу ныссау ис. Йæ амондæн уæд фæзынд ацы программæ æмæ йын сарæзтой вазыгджын операци", - мысы Тедеты Роланд.

Лæппуйы операцимæ акодта интернаты хъомылгæнæг Дзанайты Заира. Уый бæрны уыд разыдзинады гæххæттытæ сфидар кæнын дæр.

Герсан
© Sputnik / Наталья Айриян
Джыгкайты Герсан

"Операци уыд дыууæйыл – лæппу фервæздзæн, науæд нæ. Дохтыр уыд гуырдзиаг. Мæн хъуыд бафыссын разыдзинады гæххæттытæ. Уæд Хуссар Иры тæккæ фæцис хæст. Ахъуыды кодтон, уæд та лæппу операцийæ нал рахызт, уæд Ирыстонмæ фæстæмæ куыд æрыздæхон? Гуырдзиаг дохтырыл æй нæ баууæндыдтæн. Ныллæхстæ сын кодтон æмæ мæ уавæры бацыдысты - æндæр дохтырмæ нæ ракодтой. Уыцы бон фондз рынчын сывæллонæй иу дæр нæ рахызт операцийæ. Герсанæн та цалдæр боны фæстæ æнтыстджынæй сарæзтой операци", - радзырдта Дзанайты Заира.

Ныййарæгимæ бастдзинад

Джыгкайты Герсанæн йæ мад амард цалдæр азы размæ, фæлæ лæппу нырма дæр нæ зоны, йæ иунæг æввахс адæймаг дæр æй адунейыл иунæгæй кæй ныууагъта. Кæд дзы лæггад ницы зыдта саби, уæддæр æм алыхатт дæр æнæрхъæцæй æнхъæлмæ каст. Интернаты кусджыты ныхæстæм гæсгæ, уагдон-иу гуманитарон æххуыс куы райста, уæд-иу фыццаг рады лæппу агуырдта йæ мадæн рæсугъд дарæс.

Герсан
© Sputnik / Наталья Айриян
Герсан

"Мæгуыр, йæхæдæг та дзы цы зыдта, фæлæ-иу иууыл Ангейы (Ангелина хуынд йæ мад) агуырдта. Каталогы иу заказ кодта ахорæнтæ, æххуыс-иу куы рбацыд, уæд та дарæс æвзæрста Ангейæн. Ныр дæр æй уый æнхъæлы сæрæгас", - зæгъы интернаты кусæг Плиты Мæдинæ.

Интернаты иууыл хъæзныг рауагъдон

Дæргъвæтин æзты лæппуйæн цы æххуыс лæвæрд цыд, уыдон сты йæ хыгъдыл. Зæгъæн ис, лæппу у миллионер.

"Йæ хыгъдыл ис 800 мин сомæй фылдæр, йæ пенси дæр цæуы уырдæм. Бавналыны бар сæм никæмæн ис", - загъта Тедеты Роланд.

Герсан
© Sputnik / Наталья Айриян
Джыгкайты Герсан

Лæппуйæн ныр та йæ цард цæуы медико-социалон центры, цыбыр æмгъуыдмæ ам дæр персонал бауарзтой Герсикы.

"22 июлы йæ райстам скъола-интернаты коррекцион къласы фæуды фæстæ, куыд инвалид сабибонтæй, афтæ. Хорз каст æм ис, дыууæбынатон хатæны цæры йæхицæй чысыл хистæр нæлгоймагимæ. Акæнæм æй горæтмæ, исты йæ куы хъæуы, уæд. Йæ пенсимæ дæр ын не ʻвналæм, кæд уагæвæрдмæ гæсгæ нæ бон у йæ 70% бæрц исын, уæддæр ", - загъта уагдоны хистæр Теблойты Чермен.

Уæззау фæндæгтыл рацыд Герсан, кæд нырма бынтон æвзонг у, уæддæр. Хъысмæт æй цымæ иу къухæй лæгъзытæ кодта, иннæмæй та цæвгæ, фæлæ уæддæр лæппуйы зæрдæ нæ фæхъæбæр, у уарзæгой æмæ хъæлдзæг. Ныр та ма æнхъæлмæ кæсы йæ радон бæлиццы сæххæстмæ - хъæуы йæ машинæ.

863
 Кӕсойты Лаврентийы равдыст

Уарзон ахуыргӕнӕг, хӕларзӕрдӕ ӕмгар, диссаджы нывгӕнӕг: куыд мысынц Кӕсойты Лаврентийы

18
(ранӕуӕггонд 12:32 04.08.2020)
Номдзыд гоймаг йӕ цардӕй ахицӕн къуырисӕры, ныридӕгӕн скъуыддзаг цӕуы нывгӕнӕджы бавӕрыны фарст, ныхас цӕуы, цӕмӕй уый ӕрласой Цхинвалмӕ

ЦХИНВАЛ, 3 авг– Sputnik, Плиты Фатимӕ. Хӕларзӕрдӕ адӕймаг, аивӕдты лицейы бындурӕвӕрӕг ӕмӕ уарзон ахуыргӕнӕг, афтӕ бахъуыды кодтой Хуссар Ирыстоны Адӕмон нывгӕнӕг Кӕсойты Лаврентийы.

Номдзыд гоймаг йӕ цардӕй ахицӕн къуырисӕры, ныридӕгӕн скъуыддзаг цӕуы нывгӕнӕджы бавӕрыны фарст, ныхас цӕуы цӕмӕй уый ӕрласой Цхинвалмӕ.

Аивӕдты лицейы бындурӕвӕрӕг

Йӕ мӕлӕты хабар къуырисӕры ӕрыхъуыст йӕ райгуырӕн бӕстӕмӕ Мӕскуыйӕ, цы ран уый фӕстаг рӕстӕджы уыд хоскӕнынмӕ.

"Зын у дзурын. Мах фесӕфтам тынг хӕларзӕрдӕ адӕймаджы, ӕгас заманы гоймаджы", - загъта йе 'мкусӕг, лицейы ахуыргӕнӕг Плиты Нелли.

Кӕсойты Лаврентийы сгуыхтдзинӕдты хсӕн рахицӕн кӕнӕн ис Колыты Аксойы номыл аивӕдты лицейы бындурӕвӕрд ивгъуыд ӕнусты 90-ӕм ӕзты хӕццӕ рӕстӕджы.

"19 сентябры 1991 азы Пухаты Фатимӕ рухсады министр уӕвгӕйӕ, Кӕсойты Лаврентийы хъӕппӕрисӕй бакодтой Цхинвалы ирон аивады лицей - афтӕ йӕ схуыдтой фыццаг. Уый бакодта ахуырадон уагдон зын рӕстӕджы, цӕмӕй сывӕллӕттӕ цайадагъ кӕной аивадыл, уӕд скъолатӕ цыдысты ӕхгӕд, адӕм лыгъдысты Хуссар Ирыстонӕй", - банысан кодта Нелли ароны чызг.

Уарзон ахуыргӕнӕг

Плиты Нелли ма ранымадта къорд рауагъдоны, кӕцытӕ Кӕсойты Лаврентийы фӕрцы сӕ фӕндаг скодтой нывкӕнынады аивадмӕ. Сӕ нымӕцы Къацты Вадим, Кокойты Мария, Джиоты Магрез, Джиоты Вадим, Саулохты Георгий, Дзигойты Карина, Гаглойты Дзерассӕ, Уалыты Сабина ӕмӕ ӕндӕртӕ.

"Республикӕ ӕмӕ культурӕйы стыр зиан - Лаврентий Павелы фырт уыд диссаджы нывгӕнӕг ӕмӕ ахуыргӕнӕг. 90-ӕм ӕзты нӕ бӕстӕйы хъысмӕт куы скъуыддзаг кодтой, уӕд уый та фыдӕбон кодта культурӕ бахъахъхъӕныныл. Куыд нывгӕнӕг, ахуыргӕнӕг ӕмӕ куыд директор, уый стыр хайбавӕрд бахаста нӕ бӕстӕ сӕндидзын кӕнынмӕ", - загъта Аивӕдты лицейы рауагъдон, нывгӕнӕг Саулохты Георгий.

Ахуыргӕнӕджы куыстӕй дарддӕр ма стыр сты йӕ бынтӕ Ирыстоны аивады, куыд хуызфыссӕг, график ӕмӕ къамисӕг дӕр. Йе 'мгар, адӕмон нывгӕнӕг Гӕбӕраты Борисимӕ уыдон иу рӕстӕг ахуыр кодтой Тугъанты Махарбеджы номыл нывгӕнӕн ахуыргӕнӕндоны.

"Уӕд дзы директор уыд адӕмон нывгӕнӕг Хъотайты Григорий. Фидар фӕлтӕр ахуыр кодтой, фӕлӕ Лаврентий се хсӕн хицӕн кодта. Рӕвдз уыд спортмӕ, хорз рӕхстис къамисынмӕ, фӕлӕ иууыл хуыздӕр уыд нывгӕнӕг. Уый фӕстӕ бацыд Тбилисы академимӕ, уым профессор йӕ куыст фенгӕйӕ дзырдта, ахӕм фӕсивӕд кӕй хъӕуы исын ӕнӕ фӕлварӕнтӕй", - загъта Гӕбӕраты Борис.

Третьяковы номыл галерейы ӕмвӕзадыл

Лаврентийы ӕмгары ныхӕстӕм гӕсгӕ, уый уыд дыккаг нывгӕнӕг Ирыстонӕй, кӕцыйы куыстытӕ бахаудтой Третьяковы номыл галереймӕ.

"Йӕ дипломон куыст "Приготовление к свадьбе" ист ӕрцыд ацы ӕмбырдгӕнӕнмӕ. Арӕхстджын нывгӕнӕгӕй дарддӕр ма йӕм бирӕ уыд теоретикон зонындзинӕдтӕ, уый сахуыр кодта бирӕ фӕсарӕйнаг нывгӕнджыты сфӕлдыстад", - бафтыдта Борис.

Йе 'мгары ныхӕстӕм гӕсгӕ, уӕлдай ахадгӕ сты нывкӕнынады аивады размӕцыды Кӕсойы фырты сгуыхтдзинадтӕ.

"Уый ӕрӕвӕрдта бындур лицейӕн, йӕ къахыл ӕй слӕууын кодта ӕмӕ ма мӕнӕн дӕр баххуыс кодта Цъунары бакӕнын нывкӕнӕн студи", - загъта уый.

Кӕсойты Лаврентий райгуырд Цхинвалы 1948 азы. Куыста хицӕн жанрты - хуызфыссынад, графикӕ ӕмӕ ӕндӕр здӕхӕнты. Йӕ куыстыты сюжеттӕ фылдӕр бӕрцӕй ист сты Нарты кадджытӕй, уымӕй уый дарддӕр кодта Тугъанты Махарбеджы традицитӕ. Аивӕдты лицейы кусгӕйӕ схъомыл кодта арӕхстджын нывгӕнджыты цалдӕр фӕлтӕры. Йӕ фӕстаг куыстыты нымӕцы ис Хуссар Ирыстоны паддзахадон драмон театры фойейы сфӕлыст. Уыд Советон цӕдисы ӕмӕ Уӕрӕсейы нывгӕнджыты цӕдисты уӕнг, Хуссар Ирыстоны Адӕмон нывгӕнӕг, Цӕгат Ирыстоны сгуыхт нывгӕнӕг, архайдта Европӕйы бирӕнымӕц равдыстты.

18
Спортивон фæзуат Тулдзы къохы

Цхинвалы "Тулдзы къох": сыгъдæг уæлдæф æмæ æвдадзы хос

58
(ранӕуӕггонд 13:40 20.07.2020)
Æрвылбон дæр "Тулдзы къох"-мæ цы бирæ адæм ссæуы, сыгъдæг уæлдæфмæ чи фæтезгъо кæны, уыдон ‘хсæн вæййы сылгоймæгтæ æмæ нæлгоймæгтæ, æрыгæттæ æмæ хистæр кары адæм дæр

ЦХИНВАЛ, 20 июл — Sputnik, Дриаты Лейла. Цхинвалы ныгуылæйнаг хайы "Тулдзы къох"-мæ цæуджытæ дзæвгар фæфылдæр сты фæстаг рæстæджы. Уый та уымæн æмæ ам фæзынд ногарæзт спортивон дзаумæттæ. Сæвæрдта сæ Цхинвалы дзулфыцæн комбинаты директор Цхуырбаты Вадим.

Йæ  ныхæстæм гæсгæ, уый æвзонгæй арæх цыд къохмæ – куы йе 'мбæлттимæ, куы та иунæгæй.

"Фæлæ мыл цыдæр аххосæгтæ стых сты æмæ иу рæстæг нал цыдтæн. Нал цыдтæн, фæлæ ардæм цæуын мæ хъуыдыйæ никуы аппæрстон. Ацы аз, иу уалдзыгон бон, цалдæр æмбалимæ ссыдыстæм ардæм. Фæтезгъо дзы кодтам йæ сыгъдæг æмæ рæсугъддзинадæй барухс сты нæ зæрдæтæ, райстам стыр æхцондзинад", - радзырдта Цхуырбаты Вадим.

Нæлгоймаг куыд банысан кодта, афтæмæй йæ цæст схæцыд, чидæртæ бæлæстыл лæдзгуытæ кæй бахуыдтой, турниктæ дзы кæй сæрызтой, ууыл æмæ уæд аскъуыддзаг кодта ам спортивон дзаумæттæ сæвæрын.

"Фæстæдæр мæ хъуыды раргом кодтон Годжыцаты Павел, Джиоты Рудик, Плиты Шота æмæ Хъуылымбегты Иванæн. Балхæдтам, цы хъуыд, ахæм æфсæйнæгтæ, сарæзтам сæ спортивон дзаумæттæ, сластам сæ æмæ сæ ныфидар кодтам, цы бынат равзæрстам, уым. Мæнæн тынг æхсызгон вæййы, куы ссæуын æмæ дзы искæй куы фенын, уæд", - загъта Цхуырбаты Вадим.

© Sputnik / Дриаты Лейла
Спортивон фæзуат Тулдзы къохы

Æрвылбон дæр "Тулдзы къох"-мæ цы бирæ адæм ссæуы, сыгъдæг уæлдæфмæ чи фæтезгъо кæны, уыдон ‘хсæн вæййы сылгоймæгтæ æмæ нæлгоймæгтæ, æрыгæттæ æмæ хистæр кары адæм дæр. Се хсæн Цхинвалы поликлиникæйы дохтыр Гояты Валентинæ дæр.

"Райсом раджы сыстын, сыгъæг уæлдæфмæ рахизын æмæ тезгъо кæнын адæймагæн æвдадзы хосæй хъауджыдæр нæу. Уымæй адæймаджы æнæниздзинад кæны хуыздæр æмæ хъæддыхдæр, йæ куыстхъомдзинад дæр фæфылдæр вæййы, уæлдайдæр та у йæ рæуджытæ хъыгдард кæмæн сты, йæ зæрдæйæ чи хъæрзы, ахæм адæймæгтæн", - дзуры дохтыр.

Дохтырты амындтæм гæсгæ къохмæ æрвылбон дæр ссæуы столицæйы цæрæг Плиты Гимзер дæр. Йæ ныхæстæм гæсгæ, иу рæстæджы фæцудыдта йе ‘нæниздзинад, нæлгоймаг сфæлмæцыд хостæй, рынчындæттæй.

"Уæд мын мæ дохтыртæй сæ иу бацамыдта, зæгъгæ, бафæлвар æмæ сæумæрайсомты, цалдæр мæйы бæрц цу "Тулдзы къох"-мæ. Æнцон мын нæ уыдис дохтыры ацы хæс æххæст кæнын, фæлæ адæймаг йæ ‘нæниздзинады тыххæй цæттæ у цыфæнды зындзинæдтæм дæр æмæ æз дæр райдыдтон цæуын. Куыдфæстагмæ бауарзтон ардæм цæуын æмæ уыимæ фæхатыдтæн, ме ‘нæниздзинад кæй фæхуыздæр ис, уый дæр", - банысан кодта уый.

Куыдфæстагмæ Гимзер æгæрыстæмæй райдыдта згъорын дæр, арæх гомкъахæй, аразын райдыдтаспортивон фæлтæрæнтæ. Цалдæр аз хос цы у, уый та зонгæ дæр нал кæны.

"Ныр арæх аныгъуылын хъуыдыты æмæ зæгъын, хорз у æмæ нæ фæзивæг кодтон сæумæрайсом сыстынмæ, ардæм ссæуынмæ, æндæра цы бауыдаин афонмæ?..", - балхынцъ кодта Гимзер.

Спортивон фæзуатæй дарддæр ма Цхуырбаты Вадим фæнд кæны, къохы раздæр цы доны цад уыд, уый сцалцæг кæнын, дон æм бауадзын. Цад куы срæвдз уа, уæд, йæ хъуыдымæ гæсгæ, ардæм цæудзысты бирæ фылдæр адæм.

58
Цхинвалы авд уынгыл цæуынц цалцæггæнæн куыстытæ

Цæттæ сæ кæнынц асфальтмæ: Цхинвалы авд уынгыл цæуынц цалцæггæнæн куыстытæ

8
(ранӕуӕггонд 13:21 04.08.2020)
Республикæйы Арæзтад æмæ архитектурæйы министры хæдивæг Гаглойты Сергейы ныхæстæм гæсгæ, развæлгъау уал уынгтыл ивд цæуынц газы, нуазыны доны æмæ канализацийы хæххытæ

ЦХИНВАЛ, 4 авг – Sputnik, Дриаты Лейла. Хуссар Ирыстоны социалон-экономикон рæзтæн ахъазгæнæг Инвестицион программæйы фæлгæтты ацы аз Цхинвалы цы аст уынджы хъуамӕ ӕрцӕуой цалцӕг, уыдонӕй авдыл ныртӕккӕ активонӕй уагъд цӕуынц куыстытӕ

Республикæйы Арæзтад æмæ архитектурæйы министры хæдивæг Гаглойты Сергейы ныхæстæм гæсгæ, развæлгъау уал уынгтыл ивд цæуынц газы, нуазыны доны æмæ канализацийы хæххытæ.

"Авд уынгыл активонæй кусынц зæххы бын коммуникацитæ ивыныл. Газы хæтæлтæ ивыныл кусы паддзахадон унитарон куыстуат "Энергоресурс", доны æмæ канализацийы хæххытæ ивыныл та – "Водоканал", - банысан кодта Гаглойты Сергей.

Цхинвалы Белинскийы уынджы ныртæккæ аразджытæ кусынц газ уадзыныл, магистралон трубæтæ æвæрыны фæдыл куыстытæ æххæст æрцыдысты 75 процентæй. Доны æмæ канализацийы фæдыл куыстытæ та – 80 процентæй.

"Газуадзæн куыстытæ ныртæккæ фесты Хъайтарты æмæ Кимы уынгты. Ныртæккæ Кимы уынджы цæуынц хæрзарæзтадон куыстытæ – калынц ыл ставд цъæлдур æмæ лыстæг хуырдур. Тротуарты та цæттæ кæнынц плиткæ сæвæрынмæ. Табуйы фырты уынджы уадзынц магистралон газы хахх, хæдзæрттæм бауагътой газ, æвæрд цæуынц газнымайæнтæ. Æвæрд æрцыдысты магистралон канализацион трубæтæ дæр æмæ аразджытæ хæдзæрттæм уадзынц канализацион æмæ донуадзæн хæххытæ", - ранымадта Гаглойты Сергей.

Йæ ныхæстæм гæсгæ, Революцийы уынджы дæр цæуынц газуадзæн куыстытæ, фæуд кæны канализацион хахх, кусынц доны хахх уадзыныл æмæ цъайтæ аразыныл дæр.

Базарадон уынджы æвæрынц магистралон газуадзæн, газ уадзынц хæдзæрттæм, æвæринаг ма сты газынымайæнтæ, доны æмæ канализацийы фæдыл куыстытæ фесты.

Нæузæххонты уынджы фæуд кæнынц газуадзæн куыстытæ, монтаж кæнынц газрегуляторгæнæн пункттæ. Куыст цæуы дон æмæ канализацийы хæххытæ хæдзæрттæм уадзыныл.

Гаглойты Сергей ма куыд зæгъы, афтæмæй Плиты Ароны уынджы дæр аразджытæ рæхджы æрывналдзысты хæрзарæзтадон куыстытæм.

Инвестпрограммæмæ хаст объекттæй дарддæр ма "Водоканал"-æн хæсгонд у, цæмæй Джиоты Аланы проспекты кæрон 130, 130 а, 128, 128 а æмæ 128 б бирæфатерон корпусты территорийыл раивой зæронд канализацион хæтæлтæ.

Азы райдианæй ма Сталины уынджы 96 æмæ 98-æм хæдзæрттæ, Фидауынгæнджыты уынджы 5, 6, 8 æмæ 10-æм хæдзæрттæ, Путины уынджы 2-æм хæдзары дæр ма цалцæг æрцыдысты канализацион хæххытæ.

8