Борис æмæ Соня

Хъæу дыууæйæн: Борис æмæ Соняйы Пичъиджын

444
(ранӕуӕггонд 15:19 07.02.2020)
Бинонтæ цæрынц хъæрмудæй, ис сын чысыл къæбыла Пъиф-пъиф, уый дæр зымæгон уазалæй хатгай йæхи бааууон кæны хæдзары, суджы пец æнæвгъау уары хъарм, æддæйæ митæй хæссы сыгъдæг сатæг уæлдæф

ЦХИНВАЛ, 7 фев – Sputnik, Плиты Фатимæ. Знауыры районы Пичъиджыны хъæуы цæрæг Цхуырбаты Борис бафæлмæцыд хъæууон иунæгдзинадæй æмæ уæлвæзæй фæлгæсы рбацæуæнмæ уазæгагур, хъæуы ма цы дыууæ хæдзар цæрынц, уыдон дæр фос нæ дарынц æнæ хæдзарад хъæуæн та йæ иувæрсты цæуынц бирæгътæ дæр.

Пичиджын
© Sputnik / Наталья Айриян
Пичъиджыны хъæу

Хъæуы сæрмæ уæлвæзæй Пичъиджын армытъæпæны уынæгау зыны, хъæдын хæдзæрттæ миты хъæбысы, æрмæстдæр дзы дыууæмæ ис фæд, хъæумæ бацæуæны фæндагыл дæр æмбæлынц æрмæст сырдты фæдтæ.

Хуссар Ирыстоны æдзæрæг хъæутæй дисы никæй уал бафтаудзынæ. Ивгъуыд æнусы 90-æм æзтæй фæстæмæ республикæйы цæрджытæ лыгъдысты хæст, зæххæнкъуыст æмæ фыдцардæй фæсарæнтæм. Фæстаг дæс азы та Хуссар Иры хъæууон цардыл сæ къух систой æмæ адæм ивгъуыйынц горæтмæ. Хъæуты астæуккаг скъолатæ дæсгай - æссæдзгай ахуырдзаутыл банцадысты. Раздæры нæргæ хъæуты фысымтæ ма сты хъæддаг сырдтæ æмæ карджын адæм, кæцытæ горæттаг цард не ʻруарзтой.

Пичиджын
© Sputnik / Наталья Айриян
Пичъиджыны хъæу

Цхуырбаты Борис æмæ Джиоты Соняйæн сæ зæнæг цæрынц Цхинвалы, фæлæ уыдонмæ дæр сты стæм уазæг.

"Ногаз нæ тыххæй сæхимæ ныссайдта мæ хистæр фырт, фæлæ дзы иу суткæ тыххæй бафæрæзтон. Цыма цæргæсау бæласы цъуппыл бадыс, уыйау уыдтæн фæндзæм уæладзыджы ахæсты", - дзуры Борис.

Бинонтæ сæ зæрдæ сивтой горæттаг цардыл, фæлæ хъæуы иунæгдзинадæй дæр тыхсынц.

"Ничи уал цæры хъæуы, мæ дыккаг хæдзæртты чындз ма нын ис сыхаг. Лæджы фæнды аныхас кæнын, абадын æмæ дзы адæм нæй. Къуыппæй æнхъæлмæ кæсын рбацæугæмæ, хæдтулгæйы хъæлæба куы æрбайхъуысы, уæд мæ зæрдæ хуры фарс абады", - зæгъы лæг.

Таурæгъмæ гæсгæ, хъæуы советон дуджы алкæцы хæдзар дæр кодта мыддарды куыст, уымæй рацыд йæ ном дæр. Ныридæгæн дзы налдæр мыды куыст кæнынц, нал дæр фос дарынц. Лæг кусы хъæдгæсæй æмæ мысы æндæр рæстæджытæ: хъæуы куы цард 40 хæдзары бæрц, Пичъиджыны колхоз уыд куыстхъом, хъæуы алыварс та дæлвæз зæххы гæппæлтæ дæр уыдысты тыд.

"Ныр цард æнцондæр у, уый бæрц фыдæбон нал ис, фæлæ уæддæр уæд хуыздæр цард уыд. Хъыгагæн адæм фæивтой, уыцы хæлардзинад нал ис",- бафтыдта Борис.

Борис йæ царды хицæн рæстæджыты куыста монтерæй, хъæдгæсæй, аразæгæй, колхозы. Ныридæгæн уазджытæн уый мысы йæ раздæры цард, уæд-иу хъæу хъызт миты бын кодта.

"Фыд зымæг-иу скодта, иу ахæм бон ме 'фсымæры ус ацыд йæ цæгатмæ æмæ уыцы бон фæстæмæ æрыздæхт хæдзармæ фистæгæй. 1988 азы фыд зымæг уыд, сыхаг хъæуæй цыд мæ чындз – бынтон æвзонг сылгоймаг æмæ ма йæ хъæумæ чысыл куыд хъуыд афтæ йыл схъызыд. Хъæу ма рафæдис æмæ иу къуыри кодтам агургæ, стæй йæ рувас ракъахта æмæ йыл афтæ фембæлдыстæм", - бафтыдта лæг.

Бинонтæ цæрынц хъæрмудæй, ис сын чысыл къæбыла Пъиф-пъиф, уый дæр зымæгон уазалæй хатгай йæхи бааууон кæны хæдзары, суджы пец æнæвгъау уары хъарм, æддæйæ митæй хæссы сыгъдæг сатæг уæлдæф, Борис æмæ Соня та хонынц сæ æнæмæт дунемæ.

  • Борис æмæ Соня
    Борис æмæ Соня
    © Sputnik / Наталья Айриян
  • Борис æмæ Соня
    Борис æмæ Соня
    © Sputnik / Наталья Айриян
  • Къæбыла
    Къæбыла
    © Sputnik / Наталья Айриян
  • Физонæг Цхуырбаты Борисы хæдзары
    Физонæг Цхуырбаты Борисы хæдзары
    © Sputnik / Наталья Айриян
1 / 4
© Sputnik / Наталья Айриян
Борис æмæ Соня
444
Уалыты Ирбеджы тыллæджы дуне

Бынæттон джитъри æмæ помидор: Уалыты Ирбеджы тыллæджы дуне

141
(ранӕуӕггонд 16:09 25.09.2020)
Æвзонг амалиуæггæнæг куыд зæгъы, афтæмæй цы тыллæг æркодта, уыдон ауæй кæны улæфт бонты бынæттон базары. Хатт æм æлхæнæг æрбацæуы бынатмæ дæр

ЦХИНВАЛ, 19 сен – Sputnik, Дриаты Лейла. Хуссар Ирыстоны Цхинвалы районы Дыгъуызты хъæуы цæрæг Уалыты Ирбег столицæйы базар ифтонг кæны бынæттон халсарæй, йæ джитъритæ æмæ помидортæн æлхæнæг цæуы бынатмæ дæр. Куыстуарзаг лæгæн йæ амалиуæгад скусын кæнынæн фæахъаз ис 250 мин сомы кредитон фæрæзтæ, кæцытæ хицауад дæтты чысыл амалиуæгады райрæзтæн.

"Ахæм хъуыддагыл ныххæцын баст у бæрæг зындзинæдтимæ, хатт тас дæр вæййы, цы фæрæзтæ бахардз кæнай, уыдон дæр дзæгъæлы куы фæуой", - зӕгъы Цхинвалы районы цæрæг, æвзонг арендатор Уалыты Ирбег.

Ирбег цы хъуыддаг сфæнд кодта райдайын, уымæн æм æхцайы фæрæзтæ нæ уыд. Фӕлӕ бацæттæ кодта бизнес-программæ æмæ йæ балæвæрдта дыууæ азы размæ, æвзонг амалиуæггæнджытæ æмæ фермæтæн æххуысы тыххæй Экономикон райрæзты министрад цы сæрмагонд къамис сарæзта, уырдæм. Уыдон ын рахицæн кодтой 250 мин сомы, фӕлӕ уал уæдмæ æвзонг лæппу йæхи сæрмагонд зæххы фадыгыл, цы æхцайы фæрæзтæ йæм уыд, уыдонӕй самал кодта ӕмӕ сарæзта каркастæ. Фæлæ йын дарддæр æхца нал сфаг. Кредиты хуызы цы æхцатæ райста, уыдонæй та йӕ ӕркодта ӕмбӕлон уагмæ, йæ фæрстæ йын бамбæрзта целлофанæй, бауагъта йæм донхæргæнæн дон. Йæ сæр та йын сагъуыста лексанæй.

"Фыццаг аз дзы ныссагътон помидоры садзæнтæ ӕмӕ сӕ ауӕй кодтон. Дыккаг аз хъуыддаг фæрæвдздæр ис. Ирбег ныссагъта цæхæрайы сыфтæ æмæ алыгъуызон цъæхыгтæ. Тынг зæрдиагæй сæ истой нæ горæты кæрдзынтæ цы къæбицты кæнынц, уыдон хицæуттæ", - загъта Ирбег.

Ирбег куыд зæгъы, афтæмæй йæ хъӕрмуаты цы цæхæрайы сыфтæ зад, уыдон уыдысты экологон æгъдауæй сыгъдæг. Дыккаг азы тыллæгæй дæр райгондӕй баззад Уалыйы фырт, фæлæ уæддæр йæ фæрæзтæ уый бæрц нæма сты, цæмæй йæ хъӕрмуаты фæрстæ дæр лексанæй баива. Йæ целлофантæ арæх ныскъуыдтæ вæййынц, фæивы сæ рæстæгæй-рæстæгмæ.

Æвзонг амалиуæггæнæг куыд зæгъы, афтæмæй хъармуат капиталон арæзт куыннæ уа, уæд тæссаг у, цы куыстытæ кæны, уыдон дзӕгъӕлы куы фӕуой, уымæй. Уымӕн ӕмӕ тыхдымгæтæ æмæ ихуарттытæ куы вæййы, уæд хъӕрмуаты фæрстæ цы целллофантæй æмбæрзт сты уыдон ныскъуыдтæ кæны.

Амалиуæггæнæг ма куыд зæгъы, афтæмæй зæххы куыст чи кæны, уый хъуамæ алцæмæ дæр лæууа цырд. Иу бон дæр куыннæ бахизы йæ хъӕрмуатмæ, уæддæр ыл бæрæгæй фæзыны, иу куыст, дам иннæйы æййафы.

Ацы аз та Ирбег йæ хъæрмуаты байтыдта джитритæ, ӕмӕ памидортӕ.

"Æз хъæуты хъомыл кодтон. Мæ ныййарджытæ хуымæтæг зæхкусæг адæм сты. Мæхи цæстæй уыдтон мæ мад иу æрвылаз дæр уыцы иу бынаты куыд тыдта помидортæ æмæ джитритæ. Раст зæгъгæйæ, йын æвзæр нæ задысты, фæлæ уæд æрдз дæр æндæрхуызон уыд. Интернеты хызæджы хъæууон-хæдзарадон продукттæ æрзайыны сайттæ, куыд амонынц, афтæмæй алы аз дæр ивын хъæуы халсæртты бынæттæ, уæд, дам, хуыздæр тыллæг дæтдзысты", - зæгъы Ирбег.

Æвзонг амалиуæггæнæг куыд зæгъы, афтæмæй цы тыллæг æркодта, уыдон ауæй кæны улæфт бонты бынæттон базары. Хатт æм æлхæнæг æрбацæуы бынатмæ дæр.

141
Транскам

Фондз мæйы æхгæд æмбæрзæны: куыд аиуварс кодта Хуссар Ир йæхи COVID-19-æй

54
(ранӕуӕггонд 16:12 16.09.2020)
161 боны бӕрц Хуссар Ир цард æндæр уавæрты – республикæйы цæрджытæн Уæрæсемæ ацæуыны фадæттæ фæкъуындæг сты, пандемийы рæстæг ивта царды фæтк æмæ æргътæ

ЦХИНВАЛ, 16 сен – Sputnik, Плиты Фатимæ. Хуссар Ир фондз мæйæ фылдæр цард æхгæд арæнты, ацы æмгъуыд нæ республикæйæ Уæрæсемæ ацыд 1600 адӕймаджы, фæстæмæ йæ райгуырæн бæстæмæ æрыздæхт 13 апрелӕй 31 августмӕ 1500 адӕймаджы.

Sputnik æрæмбырд кодта фондз мæйы дæргъы Хуссар Ир куыд цард COVID-19-ы пандемийы тыххæй æхгæд арæнты, уый фæдыл æрмæг.

Пандемийы æндæвдад

Дунейы коронавирусы пандемийы ӕндӕвдад Хуссар Ирыстон рахатыд ацы аз марты мӕйы. Уӕд ахуырады министрад аскъуыддзаг кодта бакӕнын ӕппӕт ахуырадон уагдӕтты карантин. Ахуырады системӕ архайдтой сцайдагъ кӕнын дистанцион формат. 5-æм апрелӕй коронавирусы апарахаты тасӕй Хуссар Ирыстон ӕмӕ Уӕрӕсейы ʻхсӕн арӕныл ӕнӕ сӕрмагонд барамындӕй ацӕуӕн нал уыд.

Рахицæн æрцыд аст категори, кæцытæн бар уыд цæуын, сæ нымæцы æфсæдонтæ, дипломатон мисситы кусджытæ æмæ æндæр категоритæ. Фæстæдæр арæн ноджы фæкарздæр ис.

161 боны бӕрц Хуссар Ир цард æндæр уавæрты – Хуссар Ирыстоны цæрджытæн Уæрæсемæ ацæуыны фадæттæ фæкъуындæг сты. Марты кæронæй республикæйы цадæггай райдыдта ивын цард - тобæтæ фæзынд массон мадзæлттæ ауадзыныл, ахуырад цадæггай цыд дистанцион форматмæ, фæивта куыстуæтты график, республикæйы фæзынд кæцыдæр медикаментты цухдзинад, дуканиты æргътæ ивтой.

COVID-19-æй рынчынтæ

Карантины рæстæг райгуырæн бæстæмæ чи здæхт, уыдон хсæн разынд коронавирусæй рынчынтæ. Вирус – иу фæбæрæг ис Уæрæсейы ахуыргæнæндæтты бынæттон цы фæсивæд ахуыр кодтой, уыдон хсæн. Рынчынтæ иууылдæр уыдысты карантины. Фыццаг рынчыны республикæйы сбæлвырд кодтой 6 майы, кæцы Хуссар Ирмæ æрцыд 30 апрелы.

"Карантины рæстæг Ӕнæниздзинад хъахъхъæнынады министрад Уæрæсейы рынчындæттæм арвыста 165 адæймаджы. Ацы æмгъуыд тестты руаджы сбæрæг кодтой 90 рынчыны коронавирусæй, уыдон иууылдæр низ хастой рог формæйы", - загътой Sputnik Ӕнӕниздзинад хъахъхъӕнынады министрады пресс-службæйы.

Пандемийы рӕстӕгыл арӕны сӕртыл адӕмы змӕлд куыд цыд, уыдоныл афӕлгӕст сарӕзта Фӕсарӕйнаг хъуыддӕгты министрад.

"Иумӕйагӕй сисгӕйӕ 13 апрелӕй 31 августмӕ РХИ ФХМ хаххыл Хуссар Ирыстонмӕ ӕрцыд 939 адӕймаджы, Уӕрӕсемӕ ацыд 1600 адӕймаджы", - дзырдæуы сæ хъусинаджы.

Уымӕй дарддӕр ма Хуссар Ирыстонмӕ цыдысты ӕндӕр министрады уылтыл. Бæстон схемæ та у ахæм:

  • Ӕнӕниздзинад хъахъхъӕнынады министрады уылты -165
  • Мидхъуыддӕгты министрады хаххыл - 74
  • Хъахъхъӕнынады министрады хаххыл - 219
  • Уӕлвӕткон уавӕрты министрады хаххыл - 6
  • Паддзахадон ӕдасдзинады комитеты хаххыл- 39
  • Паддзахады хьахъхъӕды службӕ – 3

Имӕйагӕй ӕппӕт уагдӕттӕ уылты 13 апрелӕй 31 августмӕ Хуссар Ирыстонмӕ ӕрцыд 1500 адӕймаджы.

Карантины зонæтæ

Апрелы мæйы Хуссар Ирыстонмæ æрцæуæггæгтæ цыдысты æнæмæнг карантины уылты. Хуссар Иры фыдæр кодтой ахæм зонæтæ, рынчындоны цалдæр этажы фæстæ карантинон зонæ сарæзтой Гуырæн хæдзары зæронд бæстыхай, Дзау æмæ Знауры рынчындæттæ, Уазæгдон "Алан"-ы. Югосетпотребнадзор æрцæуæггæгтæн арæзта тесттæ, æдæппæтæй сæ нымæц уыд 5173.

Коронавирусы апарахаты ныхмæ тохы оперативон штабы 28 июля аскъуыддзаг кодтой фыццæгæм августæй æнæ карантинæй æрцæуыны фадат раттын тæссаг вирусæй чи фæрынчын ис, уыдонæн.

15 сентябрæй Хуссар Ирыстон æмæ Уæрæсейы хсæн арæныл фæндагон змæлд ацыд хуымæтæг режимы.

54
Ӕвзонг теннисисткӕ Цхинвалӕй рамбылдта бронзӕ Подмосковьейы турниры

Ӕвзонг теннисисткӕ Цхинвалӕй рамбылдта бронзӕ Подмосковьейы турниры

0
(ранӕуӕггонд 16:19 25.09.2020)
Плиты Алана уыд турниры иууыл кӕстӕрдӕр хайадисӕг, фӕлӕ уӕддӕр рамбылдта бронзӕйон майдан. Афтӕ ма ӕвзонг спортсменкӕйы банымадтой турниры иууыл перспективондӕр спортсменкӕйыл

ЦХИНВАЛ, 25 сен — Sputnik. Ӕвзонг теннисисткӕ Хуссар Ирыстонӕй Плиты Алана схызт кады пьедесталы ӕртыккаг къӕпхӕнмӕ Подмосковьейы турниры, хъусын кӕны республикӕйы фӕсивӕдон политикӕ ӕмӕ спорты фӕдыл комитеты пресс-службӕ.

Дунейы дыууӕ хатты чемпионкӕ Зоя Рудневайы мысӕнӕн турниры горӕт Втдноейы тох котой спортсментӕ Мӕскуы, Мӕскуыйы область, Тверь, Калуга, Рязань, Ярославль, Воронеж ӕмӕ Уӕрӕсейы ӕндӕр горӕттӕ ӕмӕ регионтӕй.

Юная теннисистка Алана Плиева из Южной Осетии завоевала бронзу на турнире в Подмосковье
Ӕвзонг теннисисткӕ Цхинвалӕй рамбылдта бронзӕ Подмосковьейы турниры

"Фарастаздзыд Плиты Алана рамбылдта йӕ ныхмӕлӕуджыты Мӕскуы, Мӕскуыйы область ӕмӕ Калугайӕ 3:0, 3:1 ӕмӕ 3:2 хыгъдӕй ӕмӕ бацахста дыккаг бынат ӕвзарӕн этапы. Фӕлӕ уый фӕстӕ ирон спортсменкӕ фембылд 2:3 хыгъдӕй турниры фидӕны уӕлахиздзау Олеся Усовайӕн, кӕцы дзы уыд дыууӕ азы хистӕрдӕр", - дзырдӕуы хъусинаджы.

Плиты Алана уыд турниры иууыл кӕстӕрдӕр хайадисӕг, фӕлӕ уӕддӕр рамбылдта бронзӕйон майдан. Афтӕ ма ӕвзонг спортсменкӕйы банымадтой турниры иууыл перспективондӕр спортсменкӕйыл.

0