Кæсагдарды хæдзарад

Хуссар Иры кæсагдарджытæ: нæхи доны цы кæсаг сырæзы, уый хæрзаддæр у

96
(ранӕуӕггонд 16:54 12.02.2020)
Паддзахадæй æххуыс чи райста, уыдоны ‘хсæн сты, кæсагдард чи кæны, ахæм амалиуæггæнджытæ дæр æмæ ныр сæ хъуыддæгтæ размæ цæуынц

ЦХИНВАЛ, 12 фев – Sputnik, Дриаты Лейла. Хуссар Ирыстоны районты фæстаг æзты райтынг сты кæсагдарды хæдзарадтæ. Ацы фæзынд у ногдзинад республикæйы. Кæд советон рæстæджы дæр фадат уыд кæсагдард райтынг кæнынæн, уæддæр æм хъусдард здæхт нæ цыдис.

Ныртæккæ республикæйы территорийыл ис цыппар кæсагдарды хæдзарады - Дзау, Знауыр æмæ Цхинвалы районты. Ацы куыст райтынг кæнын кæй фæнды, уыдонæн кредиты хуызы æххуыс цæуы бæстæйы разамынады ‘рдыгæй. 2019 азы ахæм кредиттæ лæвæрд æрцыд 49 адæймагæн.

Кæсагдарды хæдзарадтæй сæ иу ис Гуфта-Къуайсайы фæндаджы был. Йæ саразæг у Гæджиты Леонид. Уый куыд зæгъы, афтæмæй йæм кæсаджы бассейнтæ саразыны хъуыды æрцыд 25 азы размæ, рæстæг куы сызмæст, уыцы æзты. Уый уæд куыста экономистæй.

"Уыцы рæстæджы дуг уæззау уыдис, куыст нал уыд, æмæ хъуыд амæлттæ кæнын. Сфæнд кодтон дурцъæлгæнæн куыстуат æрбакæнын. Балхæдтон, куыстæн цыдæриддæр хъуыдис, уыдон, фæлæ мын сæ адавтой", - мысы амалиуæггæнæг.

Фæхъыг кодта Леонид æмæ сфæнд кодта æндæр исты къабазмæ ахизын æмæ æрæвнæлдта кæсагдардмæ. Райдианы цад сарæзта сæхи хъæуы. Цæмæй кæсæгты сбирæ кодтаид, уый тыххæй-иу цæугæдоны кæсæгтæ æрцахста æмæ-иу сæ йæ цады ауагъта. Иу афон уалдзæджы зæй рацыд æмæ йын йæ цад æд кæсæгтæ аласта.

Ацы куыстыл кæй фæцайдагъ, уымæ гæсгæ йæ нал фæндыд йæ ныууадзын æмæ сфæнд кодта, Дзауы комы цы дæттæ ис, уыдонæй искæцы бындурыл бассейн саразын. Систа 8 чысыл цæугæдонæй анализтæ æмæ сæ ахаста Цæгат Ирыстонмæ.

"Уыдонæй специалисттæ иууыл хуыздæрыл банымадтой, ныртæккæ бассейнтæ кæм сарæзтон, уыцы цæугæдон. Уым æрбынат кодтон æмæ абон куыд у, ахæм уагмæ йæ æркодтон. Фæлæ уый тыххæй бирæ фыдæбæтты бахаудтæн, кæм дзы лæгдых хъуыд, кæм – финанстæ", - радзырдта уый.

Ныр Гæджиты Леониды хæдзарад йæ къахыл фидарæй лæууы. Уый Цæгат Ирыстонæй æрласы хæрзчысыл кæсæгтæ, бынаты сæм базилы æмæ 3-5 килограммы бæрц куы свæййынц, уæд сæ ауæй кæны. Уырдæм æм, бынатмæ бацæуынц æлхæнджытæ.

Знауыры районы Сихиаты хъæуы цы кæсагдарды хæдзарад ис, уый та сæндидзын кодта Цхуырбаты Сослан. Лæппу куыд зæгъы, афтæмæй кæсагдард æнцон куыст нæу. Цæмæй сæндидза, уый тыххæй хорз доныгъæдæй дарддæр хъуамæ арæзт æрцæуа цалдæр бассейны. Стæй хъуамæ зонай, мах климаты уавæрты кæсаджы цахæм хуызтæ тынгдæр рæзы.

"Кæсæгтæн дæр сæхи низтæ ис æмæ сæ хъахъхъæнын хъæуы. Иу кæсагыл низ куы фæзына, уæд гæнæн ис сыскъуына се ‘ппæты дæр. Кæсæгты иу хуызтæ арæх бахæрынц æндæрты, уымæ гæсгæ сæ ахицæн кæнын фæхъæуы. Æппæт ацы сусæгдзинæдтæ куынæ зона кæсагдарæг, уæд йæ хæдзарадæй пайда нæ исдзæн", - раргом кодта Сослан.

Цхинвалы районы Къохатмæ хæстæг дæр ис кæсагдарды хæдзарад, уый та йæ къахыл слæууын кодта Дменисы хъæуы цæрæг Сагкаты Роман.

Раздæр дæр ам, Уанаты хъæуы, гуырдзиаг цæрджытæ дардтой кæсаг. Цæмæй бассейнты фæстæмæ æмбæлон уагмæ æркодтаид æвзонг амалиуæггæнæг, уый тыххæй бирæ фæрæзтæ хъуыд. Цæгат Ирыстоны цы кæсагдарды хæдзарадтæ ис, уым балхæдта æхсæз мин лæппын кæсаджы. Уыдон, сæйраджыдæр, уыдысты хъулон кæсæгтæ.

Райдианы Роман уыдон уæй нæ кодта, байуæрста-иу сæ йæ зонгæтыл. Ныр уымæ стыр хъуыдытæ ис фидæны. Цæмæй хæдзарад фидарæй йæ къахыл слæууа, уый тыххæй хъуамæ сараза сæрмагонд кæсагæфснайæн ныккæнд, уым уыдзæн уазалгæнæнтæ, кæсагæфснайæн вакуумтæ, уымæн æмæ удæгас кæсагæй дарддæр ма уый фæнд кæны кæсаджы фыд цæхджын кæнын, стæй йæ ныллыгтæ æмæ фынгмæ æрхæссыны æввонг æркæнын.

Ныртæккæ Романмæ цы кæсаг ис, уый уæй кæны бынаты. Амалиуæггæнæг куыд зæгъы, афтæмæй йæм Цæгат Ирыстонæй дæр æрцæуы æлхæнджытæ. Зæгъынц, зæгъгæ, нæхи доны чи схъомыл вæййы, уыдонæн сæ фыд бирæ хуыздæр ад фæкæны.

96
Волонтер Тедеты Анжела

"Алы рынчыны хуыз дӕр баззад мӕ зӕрдыл": волонтер Тедеты Анжела "сырх зонӕйы" тыххӕй

5
(ранӕуӕггонд 12:19 01.12.2020)
Хуссар Ирыстоны "сырх зонӕты" волонтертæй дæр æмæ дохтыртæй дæр рынчынтæн алчидæр кæны йæхирдыгонау, фæлæ се ‘ппæты дæр иу кæны иу хъуыды, сæ куысты нысан у иу - нæ респубикæйы æмбæстæгтæн æмбæлон æххуыс афоныл бакæнын æмæ низæй куыдтагъддæр ссæрибар кæнын

ЦХИНВАЛ, 1 дек – Sputnik, Дриаты Лейла. Цхинвалы скъола-интернаты хъомылгæнæг Тедеты Анжела йæ рæстæджы райста ахуыргæнæджы дæсныйад, никуы куыста рынчынтимæ дæр, фæлæ куы фехъуыста, РММЦ-йы инфекцион хайады дохтыртæн æххуыс кæнын хъæуы, уæд æнæ рахъуыды-бахъуыдыйæ уайтагъд йæхи барæвдз кодта йе ‘ххуысы къух сæм фæдаргъ кæнынмæ. Анжела куыд загъта, афтæмæй уал фыццаджыдæр уый адзырдта сывæллæтты рынчындоны, ныртæккæ инфекцион хайады сæйраг дохтыр Хæныкъаты Ларисамæ æмæ сбæлвырд кодта, æнæ медицион зонæнтæй йе ‘ххуыс бахъæудзæнис, æви нæ.

 "Кастæн нæ адӕмы тыхст уавæрмæ, чи сæ уыд уæззау уавæры, чи та фæкæсæджы хъуагдзинадæй ацыд а-дунейæ. Тынг сыл рыстис мæ зæрдæ, фæлæ нæ зыдтон, æнæ медахуырдзинадæй сын цы хъуамæ баххуыс кодтаин. Мæ бон не ссис æмæ сæм дардæй кастаин. Хæныкъаты чызг мын куыд загъта, афтæмæй уыдон хъуыд алыгъуызон æххуыс дæр, фæлæ низ хæцгæ æмæ удæн тæссаг кæй у, уымæ гæсгæ алчи йæ ныфс нæ хæссы "сырх зонæйы" кусынмæ", - радзырдта волонтер.

Анжела бацыд рынчындонмæ æмæ стыр фæндондзинадимæ балæууыд рынчынтæ æмæ дохтырты фарсмæ. Зонæмæ бахизгæйæ фыццаджыдæр банкъардта æххуысы къухты хъуагдзинад. Куыд рабæрæг, афтæмæй медкусджытæй бирæтæ сӕхӕдӕг уыдысты рынчын, бирæтæ та низæй тæрсгæйæ нæ рахызтысты сæ куыстытæм.

Волонтер Тедеты Анжела
© Sputnik / Дриаты Лейла
Волонтер Тедеты Анжела

"Дыууæ къуырийы дæргъы райсом фараст сахатæй изæры æхсæз сахатмæ æххуыс кодтам, цы нæ бон уыд, уый. Сæрмагонд дарæсы кæд æнцон нæ уыд, уæддæр быхстам, уымæн æмæ мах уавæрæй рынчынты уавæр уыд бæрæг æвзæрдæр. Уыдоны тыхст, æххуысмæ æнхъæлмæгæсæг цæстытæм-иу куы бакастæн, уæд-иу мæ æппæт дæр айрох, фæндыд мæ æрмæстдæр уыдонæн исты феххуыс кæнын", - мысы Анжела.

Йӕ ныхӕстӕм гӕсгӕ, уыдон кодтой алыгъуызон куыст дæр - райсомæй рынчынтæн бахæрын кæнын, хостæ сын бадарын, бафснайын æмæ æндæр ахæм куыстытæ дæр.

"Æппæт уыдæтты æмрæнхъ мæ фæндыд алы рынчынимæ дæр хицæнæй аныхас кæнын, уымæн æмæ æнкъардтон, семæ иу куы аныхас кодтой, уæд-иу сын кæй фенцондæр ис. Мах не ‘ппæт дæр иугъуызон сæрмагон дарæсы уыдыстæм, нæ зындысты нæ цæсгæмттæ æмæ рынчынтæ нæ зыдтой, чи нæу дохтыр, чи у санитаркæ. Уымæ гæсгæ сын махæй алчи дæр уыд иугъуызон ныфс æмæ-иу нæ алкæмæн дæр радзырдтой сæ тыхстдзинад", - банысан кодта уый.

Ахæм психологон беседæтæ та, Анжелайы хъуыдымӕ гӕсгӕ, æнæмæнгхъæуæг сты алы рынчынæн дæр, уæлдайдæр та цардæн тæссаг низтæй рынчынтæн.

"Уыдонæй бирæтæ сæхи æнкъардтой тынг æвзæр, æгæрыстæмæй сын нæ уыд, удæгас баззайой, уый ныфс дæр. Тас æнкъаргæйæ-иу сцъиувæдис сты æмæ сæ уавæр кодта æвзæрдæр. Алы рынчыны хуыз дæр дзы баззадис мæ зæрдыл, сæ тыхст цæстæнгас. Сæ хъуыдытæ-иу куы загътой, уæд-иу адæймаджы уæнгтæ барызтысты", - радзырдта волонтер.

Коронавирусæй рынчынтимæ архайгæйæ тæссаг у фæрынчынæй дæр, науæд æй æввахс адæмыл бахæцын кæнынӕй. Анжелæйæн кæд йæ бинонты ‘хсæн ис кардзыд адæймæгтæ, æнахъом сабитæ, уæддæр йæ ӕнкъараг, аудаг удыхъæды руаджы ахсджиагдæрыл нымадта рынчынтæн æххуыс кæнын æмæ йæ аразгӕ дӕр кодта.

Анжела куыд дзуры, афтӕмӕй уый æрмæстдæр йæ зæрдæйы, йæ уды домæнмæ гæсгæ бацыд "сырх зонæмæ" æмæ цы сарæзта, уый та нæ нӕ нымайы стыр хӕрзиуӕгон хъуыддагыл.

"Пандемийы фæстиуæгæн сæвзæргæ уавæры мæ бон цы уыд, уый куы нæ баххуыс кодтаин мæ адæмæн, уæд мын нæ уыдаид æнцойад. Зын у, тынг зын у адæймаджы цæстæнгасмæ уӕззау уавӕры кæсын… Алы адæймаг дæр, чи фæнды ма уа, уæддæр у зынаргъ. Цард алкæмæн дæр иу у. Мах мæлæты раз æдых стæм, фæлæ алчи дæр хæсджын у, цæмæй нæ бон куыд у, афтæ ахæм уавæрты æрбалæууæм кæрæдзийы фарсмæ. Æз æрмæстдæр сæххæст кодтон ме ‘мбæстагон хæс", - загъта волонтер.

Санитарон æмæ психологон æххуысæй дарддæр рынчынæн, кæй зæгъын æй хъæуы, сæйрагдæр у гъæдджын медицинон æххуыс бакæнын. Анжела куыд зæгъы, афтæмæй рынчындоны йемæ цы медхотæ æмæ дохтыртæ уыд сменæйы, уыдон се ‘ппæт дæр куыстой рынчынтимæ сæ удыл æнауæрдгæйæ.

 "Алчи дæр сæ йæ хæстæ æххæст кодта бæрнонæй, арæзтой æппæт дæр, зæгъæн ис, сæ бон куыд уыд æмæ куыд нæ уыд, афтæ. Иу сменæйы куыстон Хæныкъаты Ларисаимæ дæр æмæ федтон йæ аудгæ ахаст рынчынтæм. Боны дæргъы-иу сыл азылдис цалдæргай хæттыты, сбæрæг-иу сын кодта сæ уавæр æмæ-иу сын афоныл бакодта медицинон æххуыс. Ахæм бæрнон ахаст уыд медхотæн дæр рынчынтæм", - банысан кодта уый.

Тедион катай кӕны, зӕгъгӕ, ныртæккæйы царды, хъыгагæн, адæм кæд стыр аргъ кæнынц бирæ мулк, зынаргъ машинæтæ æмæ дардыл амад хæдзæрттæн, уæддæр уыдон не сты æмæ ма хъуамæ уой адæймагдзинадæй уæлдæр бынаты.

"Кæрæдзийыл аудын æмæ адæймаджы цардæн аргъ кæнын сты æппæты зынаргъдæр æмæ ахсджиагдæр миниуджытæ. Уый алчи дæр хъуамæ бамбарид, ныртæккæ æппæт дунейы цы уавæр сæвзæрдис, уый хынцгæйæ. Фæнды мæ, цæмæй ирон адæм зоной кæрæдзийæн аргъ кæнын, уой æнгомдæр æмæ сыл макуы фæтых уа кæрæфдзинад. Æрмæстдæр æмдых æмæ æнгомæй ис рахизæн æппæт зындзинæдтæй дæр", - балхынцъ кодта Тедеты Анжела.

5
Ирон кафт

Гаглойты Ростик: ирон адӕмӕн кафт семӕ райгуырд

43
(ранӕуӕггонд 11:49 25.11.2020)
Ирон кафты аивад ахсджиаг бынат æрцахста адæмы царды, уымæн ӕмӕ ирон кæфтытæ куыд хуызæй, афтæ мидисæй дæр æнгом баст æрцыдысты царды уавæртимæ æмæ æвдисынц фыдæлты цардвæндагы ирд оптимизм, зæрдæйы бæллицтæ æмæ зæрдæбын æнкъарæнтæ

ЦХИНВАЛ, 25 ноя – Sputnik, Дриаты Лейла. Раздæр адæм кæд мæгуыр цардысты, уæддæр хъæлдзæгдæр ӕмӕ æмуддæр уыдысты. Искæуыл-иу исты хъæлдзæгдзинад куы æрцыд, кæнæ-иу хъæубæстæн исты иумиаг бæрæгбон куы уыд, уæд-иу сарæзтой куывд. Куывд та æнæ хъазт нæ фидыдта. Фæсивæд-иу сылгоймагæй, нæлгоймагæй æрбамбырд сты æмæ-иу чи кафгæ кодта, чи та кæсгæ. Уæдæ, ацы хъуыддаг дæр дзурæг ирон адæмы национ культурæйы кафты аивад кæй ахсы ахсджиаг бынат. Кафт дæр ирон адæмы поэтикон сфæлдыстадау тынг рагон кæй у, уый тыххæй Sputnik бæстондæрæй радзырдта Цхинвалы культурæйы хайады сæргълæууæг Гаглойты Ростик.

"Нæ адæмæн кафт семæ кæй райгуырд, уый бæрæгæй зыны фольклоры, уæлдайдæр та Нарты эпосы. Нарт æрмæст æнæбасæтгæ хъайтартæ нæ уыдысты, фæлæ ма рæвдз уыдысты кафынмæ, зарынмæ дæр", - банысан кодта уый.

Ирон кафты аивад ахсджиаг бынат кæй æрцахста нæ адæмы царды, уымæн ма æвдисæн у уый дæр, æмæ ирон кæфтытæ куыд хуызæй, афтæ мидисæй дæр æнгом баст æрцыдысты царды уавæртимæ æмæ æвдисынц фыдæлты цардвæндагы ирд оптимизм, зæрдæйы бæллицтæ, æмæ зæрдæбын æнкъарæнтæ.

Руководитель Госансамбля Симд Ростик Гаглоев
© Sputnik
Гаглойты Ростик

Ирон аив, мидисджын кæфтытæ, Гаглойты Ростикы хъуыдымӕ гӕсгӕ,  фæзындысты æмæ равзæрдысты куысты бындурыл, цины æмæ масты æнкъарæнты зæлтимæ - зарджытимæ.

"Куыд зонæм, афтæмæй куыстæй улæфтмæ, улæфтæй куыстмæ тындзыдтой цæргæ цæрæнбонты адæм æмæ уый бæрæгæй йæ фæд ныууагъта ирон кæфтытыл. Ахæм рагон кæфтытæм хауынц "Сандрахъ", "Чепена" æмæ æндæртæ дæр. Ис нæм фæзмæн кæфтытæ дæр", - ранымадта хайады сӕргълӕууӕг.

Уый ма банысан кодта, зӕгъгӕ, уыцы уагыл цы кæфтытæ равзæрдысты, уыдон цæмæй ма рох кæной адæмæй, уый тыххæй Цхинвалы районы ансамбль "Амонд" архайы йæ репертуар ахæм кæфтытæй баххæст кæныныл.

Гаглойты Ростик ма куыд радзырдта, афтæмæй ирон адæмон кæфтытæ æмæ зарджытæ дæр кæнынц дыууæ дихы: нæлгоймæгты æмæ сылгоймæгтыл. Ирон сылгоймаг фынджы уæлхъус куыд хицæн кодта, афтæ хицæн уыдысты сæ зарджытæ, сæ кæфтытæ дæр. Уыцы рæстæджы ирон хъазты æмпъызтытæ, зæронд дарæсы балæууын худинаг нæ уыдис. Уæдæ мæгуыр æмæ бонджыны дæр не ‘взæрстой, æрдзæй фыдуынд æмæ хæрзконды дæр кæрæдзийыл нæ барстой. Æппæт хуызты дæр хъазты бартæ æмæ хæстæ домдтой иунæг æгъдау - ирон намыс. Ирон намыс домдта иумиаг æгъдау æмæ фæтк.

"Ирон адæммæ стыр худинагыл нымад цыдис æнæ худ, æнæ ронæй ракафын. Сылгоймагæн та æнæ кæлмæрзæнæй æмæ бæгъæмзæнгæй хъазтмæ рахизын. Уæдæ пыхцылсæртæй, гомхъуыртæ, къуырддымджытæй, æнæдыстæ хæдæтты къабаты кафын дæр нымадтой нæ фыдæлтæ худинагыл. Рæстæджытæ ивынц æмæ, кæй зæгъын æй хъæуы, ныр ирон хъазты ахæм æгъдæуттæ хынцыд нал цæуынц, фæлæ уыцы арæнтæй ахизæн нæй нæ ансамбылтæн сценæйыл сæ арæхстдзинад æвдисгæйæ", - бафиппайдта Гаглойы фырт.

Концерт Государственного ансамбля  Симд имени Б. А. Галаева
© Sputnik / Наталья Айриян
Ирон кафт

Ирон кæфтытæй иууыл зындгонддæр у "Симд". Йæ нæргæ кад хъуыстис дӕрддыл. "Симд" кæд иу кафт уыдис, уæддæр æй æххæст кодтой алы æмæ алы хуызты. Уыди тымбыл дæларм - уæлармæй хæцгæйæ, сылгоймæгтæ æмæ нæлгоймæгтæн къæйттæй лæугæйæ. Уыди дывæрсыг симд рахис фарсы нæлгоймæгтæ æмæ галиу фарсы та сылгоймæгтæн ерысы хуызы. Уыдис къæйттæй симд æмæ фæуд кодта кæронбæттæны цыбыр тымбыл кафтыл.

"Симд кафгæйæ нæ фидыдта уæлдай хъæлæба, тæлтæг фезмæлдтытæ. Симд æвдыста ирон царды мидис цины, ныфсы, æмзонддзинады, адæмы иумиаг тых. Ирыстоны кæмтты, хъæуты уыдис сæрмагонд фæзтæ симынæн. Уыдон нæмттæ баззадысты бынтон æрæджыйы онг дæр. Кæй зæгъын æй хъæуы симыныл ахуыр цыдысты рæзгæ фæсивæд сыхгай, хъæугай, комгай алы уавæрты, кæм мусты, кæм астæууынгты", - радзырдта культурон архайӕг.

Фæлæ иумиаг бæрæгбæтты та Иры дзылæттæ æмбырд кодтой дзуæртты, кувæндæтты фæзтæм, уæд стыр симды уаг уыди уæрæхдæр, ахадгæдæр, куыд хуызæй, афтæ мидисæй дæр.

"Фæлæ абон уыцы æгъдау дæр байрох. Æмæ йæ цæмæй нæ кæстæртæн сæ зæрдыл æрлæууын кæнæм, уыцы нысанæн нæ районы культурæйы хайады ансамбль "Амонд" ӕрӕджы Джеры дзуары кувæндоны бын сарæзта хъазт ирон æгъдаумæ гæсгæ", - зӕрдыл ӕрлӕууын кодта уый.

Открытый урок хореографического кружка Кафт
© Sputnik / Наталья Айриян
Кафт

Ирон кафт æппæтæй дæр баст уыдис æгъдауимæ. Кафгæ-кафын нæлгоймаг æнæнхъæлæджы дæр куы баныдзæвдаид сылгоймаджы дарæсыл, уæддæр-иу ын æй йæ цæстмæ бадардтой, бауайдзæф иу ын кодтой. Ахæм хъуыддаг иу раджы заманы расайдта тугкалдмæ дæр.

Хъазты мидæг уæлдай дзырдæппарæнтæ, хъæлæсыдзагæй худын, ирон адæммæ стыр æгады бынаты уыдысты æмæ сæ æхсæнад никæмæн барста. Цасфæнды дæсны кафджытæ ма уыдаиккой сылгоймаг æмæ нæлгоймаг, уæддæр ирон æфсармы фæлгæттæй нæ хызтысты. Къах-къухтыл кафын йæ зæрды ис нæлгоймагæн, уæд бæрæг бынаты, бæрæг афоныл, уымæй дæр сылгоймаг разыйы дзуапп хъуамæ радтаид.

Ирон кафты аивады нæлгоймæгтæн уыдис сæхи кæфтытæ дæр. Цæвиттон ирон адæммæ æддæгуæлæ кафт уыдис симды бæрзонддæр, уæлцмондæр кæронбæттæн хай. Ацы хайы архайдтой æрмæстдæр нæлгоймæгтæ куыд кæстæртæй, рогдæрæй, арæхстджындæрæй. Æддæгуæлæ кафт уыди хæстон кафт фыдæлты уагыл. Тыгъд быдырмæ цæугæйæ хæстон фæсивæдæн арæзтой фæндарасты æгъдау Уастырджийы кувæндоны раз. Куывдтой сын бæрæг фæткыл æртæ кæрдзын æмæ бæгæныйы кæхцæй, стæй хъисфæндыры цагъдмæ цыдысты бæрæг къордтæй сæ фæндагыл. Хæстæй уæлахизæй æрбаздæхтысты, зæгъгæ, уæд-иу сыл сæмбæлдысты арфæтимæ, фæндыры цагъдимæ Уастырджийы кувæндоны раз фæзы.

"Хæстон кафты – симды уагæн ма нæм йæ фæстаг зонæнтæ æрхæццæ сты кæм хистæрты мысинæгты, кæм фæзмæн кæфтыты, иннæ мидис байрох. Мидхæсты архайджытæ куыд дзырдтой, афтæмæй ма æртæ æддæгуæлæйæ акафыдысты 1921 азы Сау денджызы былгæрон Хуссар Иры бархионтæ æмæ Гæджиты Бадилайы бæхджын полчы ирæттæ гуырдзиаг меньшевиктыл фæуæлахизы кадæн", - загъта Гаглойты Ростик.

Ирон адæмы царды бæрæг бынат ахстой хъæлдзæггæнæн фæзмæн кæфтытæ дӕр. Архайдтой сæ фæсивæд æхсæны куывдты, бæрæгбæтты заманты. Уыцы уавæрты чызджытæ лæппуты фæлысты кафыдысты, фæзмыдтой зæронд лæгты æмæ устыты, уазæг лæппуты, фæзмыдтой сæ куысты æмæ улæфты, хæсты æмæ фæдисы уагыл.

"Адæмон кæфтытæ ахуыргæнгæйæ, адæймаг æрцæуы ахæм хатдзæгмæ, зæгъгæ, ацы сфæлдыстад фæзынд куысты процессы рæстæджы æмæ йын æнгом бастдзинад уыдис адæмы цардимæ. Уыдоны ирдæй æвдыст цæуы ирон сæрибаруарзаг адæмы истори, сæ уарзондæр бæллицтæ, националон характеры хуыздæр æууæлтæ", - банысан кодта культурӕйы хайады сӕргълӕууӕг.

Отчетный концерт Госансамбля Симд
© Sputnik / Лана Чибирова
Ирон кафт

Уый ма радзырдта, ирон адæмы кæфтытæ фæхъæздыгдæр æмæ фæхуыздæр кæныныл стыр куыст кӕй бакодтой Гуырдзыстоны ССР-ы сгуыхт архайæг Галаты Барис, Ирыстоны адæмон нывгæнæг Тугъанты Махарбег, ГССР сгуыхт артисттæ Хетæгкаты Владимир, Тедеты Георги, Гаглойты Хазби, Саулохты Мэлс, Дзадтиаты Уакка, Битеты Павел, Цыбырты Володя æмæ æндæртæ.

43
Цхинвал

Бибылты Анатолий раарфӕ кодта Хуссар Иры банкон фадыджы кусджытӕн

0
(ранӕуӕггонд 14:36 02.12.2020)
Бузныг уын стыр профессионализм ӕмӕ уӕ куыстӕн иузӕрдыгдзинады тыххӕй, банысан икодта президент йӕ арфӕйы банкон фадыджы кусджытӕн

ЦХИНВАЛ, 2 дек — Sputnik. Хуссар Ирыстоны банкон фадыджы кусынц бӕрзонд квалификациимӕ специалисттӕ. Уыдон иудадзыг хуыздӕр кӕнынц сӕ профессионализм. Уый тыххӕй дзырдӕуы Бибылты Анатолийы арфӕйы телы банкон фадыджы кусджытӕн, кӕцытӕ абон нысан кӕнынц сӕ профессионалон бӕрӕгбон.

Бибылты Анатолий фидарӕй загъта, банкон кусджытӕ дарддӕр дӕр алцыдӕр кӕй араздзысты къабазы райрӕзтӕн, ӕнтыстджынӕй ӕххӕст кӕндзысты сӕ хӕслӕвӕрдтӕ.

Паддзахады сӕргълӕууӕджы цӕст бауарзта банкон фадыджы специалисттӕн фидар ӕнӕниздзинад, амонд ӕмӕ ног ӕнтыстытӕ сӕ Фыдыбӕстӕйы хӕрзӕбонӕн.

0