Æвзонг техникты станц

Æвзонг техникты станц куыд фидæны специалистты гуырæн Цхинвалы

57
(ранӕуӕггонд 12:36 06.03.2020)
Фæсурокты станцмæ цы 150 скъоладзауы æрбацæуы, уыдоны фылдæр сты лæппутæ. Иууыл тынгдæр сæ цымыдис кæны робототехник æмæ 3D модельтæ аразыны кружоктæ

ЦХИНВАЛ, 6 мар — Sputnik, Дриаты Лейла. Хуссар Иры столицæ æмæ районты скъолаты ахуыргæнинæгтæн Æвзонг техникты станц ссис сæ уарзондæр бынат. Скъолайы уроктæ куы фæвæййынц, уæд ардæм æрбацæуынц сæ уарзон кружоктæм æмæ сæ цы техникон предметтæ цымыдис кæны, уым практикон æгъдауæй фæархайынц. Ныртæккæ станцы архайы ахæм къордтæ, куыд робототехникæ, арæхстджын къухтæ, хъæдырмæджы куыст, электроникæ, математикæ, компьютерон класс, 3 D модельтæ аразæн, хъæдырмæгыл нывæфтыдтæ кæныны къордтæ.

Æвзонг техникты станц
Дриаты Лейлайы архивæй къам
Æвзонг техникты станц

Фæсурокты ардæм цы 150 скъоладзауы æрбацæуы, уыдоны фылдæр сты лæппутæ. Иууыл тынгдæр сæ цымыдис кæны робототехник æмæ 3D модельтæ аразыны кружоктæ. Чызджытæ та фылдæр цымыдис кæнынц арæхстджын къухты кружоктæм. Æцæг хъæдырмæгыл нывæфтыдтæ кæй цымыдис кæны, ахæм чызджытæ дæр ис.  

Станцы ахуыргæнджытæ куыд загъынц, афтæмæй уыдон сæ сæйраг хæсыл нымайынц, цæмæй сæм цæуой фылдæр æвзонг лæппутæ æмæ чызджытæ, уымæн æмæ ныртæккæ техникты станц ифтонг у æппæт атрибуттæй дæр. Цалдæр азы размæ Æвзонг техникты станц цалцæг æрцыд æмæ уый фæстæ алы аз дæр Ахуырад æмæ зонады министрады хъæппæрисæй кружоктæ баххæст вæййынц нырыккон ифтонггæрзтæй.

Цæмæй сын фылдæр сывæллæттæ зоной сæ кружокты архайды тыххæй, уый нысанæн та ахуыргæнджытæ алы ног ахуыры аз райдианы дæр азилынц скъолатыл куыд горæты, афтæ районты дæр æмæ сын бамбарын кæнынц кружокты ахадындзинад. Райдианы кружокты уагъд фæцæуы теори, уый фæстæ ахизынц практикон архайдтытæм.

Sputnik уацхæссæг фæуазæг станцы робототехникæйы къордмæ.

"Нæ кружок нырма ивгъуыд азы байгом. Тынгдæр нæм цымыдис кæнынц ахуыргæнинæгтæ, уымæн æмæ махмæ ис роботтæ, ис сын сæрмагонд конструктор æмæ йæ хъуамæ сæмбырд кæнай. Фыст ын цæуы компьютерон программæ æмæ афтæмæй робот кусы программæ æмæ удæгас принципмæ гæсгæ, йæ арæзт у автоматикон", - зæгъы ацы кружокы ахуыргæнæг Плиты Инал.

Робот куы скусы, банысан кодта Инал, уæд развæлгъау бацæттæгонд программæмæ гæсгæ æххæст кæны, цы хæстæ йын кæныс, уыдон.

"Уый сывæллæттæм æвзæрын кæны стыр цымыдис æмæ махмæ зæрдиагæй дæр уымæн цæуынц", - бамбарын кодта ахуыргæнæг.

Æвзонг нытуралистты педколлектив сæрыстыр у, сæ хъомылгæнинæгтæ арæх кæй свæййынц Цæгат Ирыстон-Аланийы техникон центр "Квантори"-йы конкурсты призертæ.

Плиты Инал куыд загъта, афтæмæй, йæ ахуыргæнинæгты Цæгат Ирыстонмæ уый акæны практикæ рацæуыны нысанæн дæр, уымæн æмæ уым ис нырыккондæр робототехникæ. Цæгаттаг коллегæтæ æрвылхатт дæр хорз райсынц сабиты, ауадзынц сын мастер-класстæ.

Раздæр Æвзонг техникты станцы уыд радиокружок дæр. Фæлæ фæстаг 10 азты йæ куыст банымæг, ифтонгæд æмæ дзы специалист кæй нæ уыд, уый аххосæй. Ныр сæм фæзынд ахуыргæнæг, кружок дæр сифтонг кодтой æнæмæнгхъæуæг техникæйæ. Педколлектив куыд нысан кæны, афтæмæй нæ дуджы ацы кружок æрбакæнынæн стыр ахадындзинад ис,  уымæн æмæ республикæйы арæзт æрцыд нымæцон телеуынынад, ис нæм радиоалæвæрдтæ дæр.

"Ацы профессийыл куыннæ цайдагъ кæнæм хъомылгæнинæгты, уæд фидæны нæ уыдзæн, уыдоныл чи куса, ахæм специалисттæ", - банысан кодта ахуыргæнджытæй иу.

Æвзонг техникты станц интенсивон куыст кæны, районты сын цы къордтæ ис, уыдонимæ дæр. Цæмæй ахуыргæнинæгтæ æмбæлой æмæ кæрæдзи зоной, уый тыххæй сæ арæх æрбаласынц, станцы цы равдыстытæ вæййы, уырдæм. Уыцы хъуыддаджы сын ахъаз у Æрыгонты станцæн республикæйы хицауад цы машинæ балхæдта, уый.

Хъæдырмæджы æмæ арæхстджын къухты кружокты сывæллæттæ цы дзаумæттæ саразынц, уыдон æлхæнынмæ дæр арæх æрбацæуынц  цæрджытæ. Сæ иууыл хуыздæртæ та æфснайд æрцæуынц Æрыгон техникты станцы музейы.

Æвзонг техникты станц
Дриаты Лейлайы архивæй къам
Æвзонг техникты станц
57
Къусраты Илья

Уазал æмæ стонгæй: куыд фервæзын кодтой иунæг лæджы Цхинвалы бархионтæ

643
(ранӕуӕггонд 11:38 01.03.2021)
Къусраты Илья ныридӕгӕн ис Хуссар Ирыстоны медико-социалон центры. Нæлгоймаг аззад адунейыл иунæгæй, нал ын ис зæрдиаг хиуæттæ. Уазал ӕмӕ стонгӕй мӕлӕтӕй нӕлгоймаджы фервӕзын кодтой Алайнаг епархийы моладзан ӕмӕ волонтертӕ

ЦХИНВАЛ, 1 мар – Sputnik, Плиты Фатимӕ. Афоныл аходӕн, хорз уавӕртӕ, хи хатӕн, ӕркаст ӕмӕ райгонд - ӕппӕт ацы хӕрзиуджытӕй ныридӕгӕн хайджын у Цхинвалы карджын цӕрӕг Къусраты Илья, кӕцы цалдӕр мӕйы размӕ фӕцӕймард уазал ӕмӕ ӕххормагӕй.

Къусраты Илья ныридӕгӕн ис Хуссар Ирыстоны медико-социалон центры. Нæлгоймаг аззад адунейыл иунæгæй, нал ын ис зæрдиаг хиуæттæ. Уазал ӕмӕ стонгӕй мӕлӕтӕй нӕлгоймаджы фервӕзын кодтой Алайнаг епархийы моладзан ӕмӕ волонтертӕ.

Илья Кусраев
© Photo : Лана Парастаева
Къусраты Ильяйы хатæн Турбазæйы

Алайнаг епархийы сӕйраг аргъуаны раздӕр ӕрвылсабаты арӕзтой ӕнӕргъ аходӕнтӕ иунӕг тыхст адӕмӕн. Ныридӕгӕн уыцы нывӕзт нӕ кусы, фӕлӕ моладзан рӕстӕгӕй-рӕстӕгмӕ уыцы адӕмы бӕрӕг кӕны сӕ цӕрӕнуӕтты.

"Туристон базӕйы иу чысыл къуымы цард. Моладзанмӕ фӕдзырдта цыппӕрӕм уӕладзыджы цӕрӕг, уый фехъусын кодта, нӕлгоймаг кӕй у иу къуыри ӕххормаг. Уыцы хабар уыд ноябры. Бацыдыстӕм ӕм ӕмӕ нын тыххӕй бакодта дуар", - радзырдта Sputnik волонтер Пæррæстаты Лана.

Йӕ ныхӕстӕм гӕсгӕ, карджын лӕг хуыссыд сынтӕгыл, йӕ цуры чысыл скъаппы уӕлтӕрхӕгыл уыд 500 сомы, уыдонмӕ нӕлгоймаг амыдта ӕмӕ куырдта дон.

"Дзырдта нын, дыууӕ бон дам доны хъӕстӕ нӕ дӕн, мæ риу дам судзы, ӕвӕццӕгӕн йӕ зӕрдӕйӕ тыхст. Уæд йæ къахыл дæр нал лæууыд", - загъта Лана.

Сылгоймӕтӕ цалдӕр хатты бабӕрӕг кодтой уым рынчыны ӕмӕ стӕй аскъуыддзаг кодтой алы амӕлттӕй дӕр уый бакӕнын Хуссар Ирыстоны медико-социалон центрмӕ.

"Хиуӕттӕ ӕмӕ йын бынтӕ нӕй. Уый центрмӕ бакӕнынӕн нын баххуыс кодта депутат Мулдарты Гарри. Дохтыр Дзуццаты Инара та йын сарӕзта рентген ӕмӕ ӕппӕт гӕххӕттытӕ", - балхынцъ кодта уый.

Илья Кусраев
© Sputnik / Natalia Airiyan
Къусраты Илья

Пӕррӕстаты Лана ма радзырдта, зӕгъгӕ, уагдоны нӕлгоймагмæ афтӕ хорз ӕркастысты, ӕмӕ ныр йӕ къӕхтыл слӕууыд.

"1942 азы гуырд Къусраты Ильяйы райстам парламенты, сӕрмагондӕй Мулдарты лӕппуйы куырдиатӕй. Цард тынг уӕззау уавӕрты, йӕ хатӕн ранӕй-рӕтты уыд тасмачъийæ ӕмпъыст. Йӕ уӕлӕ та уыйбӕрц чъизи дарӕс уыд, ӕмӕ сӕ тыххӕй раластам. Уыдон иууылдӕр бахъуыд акалын", - радзырдта Sputnik центры хистæр Теблойты Чермен.

Медико-социалон центры ныр нӕлгоймагмæ ис хорз каст, рахицӕн ын кодтой хицӕн хатӕн.

"Ӕркастыстӕм ӕм. Бакодтам ӕй рынчындонмӕ, йӕ хуыз йӕхимӕ рцыд, къахыл слӕууыд. Иннӕтимӕ ныхас кӕны", - радзырдта уагдоны хистӕр.

Илья Кусраев
© Sputnik / Natalia Airiyan
Къусраты Илья

Къусраты Ильяйӕн хӕстӕджытӕ дӕр ничи зыны. Нӕлгоймагӕн йӕ паспорты ис Къусратӕй иу нӕлгоймаджы телефоны номыр, фӕлӕ уый дӕр нӕ дзуапп кӕны.

"Бирӕтӕ мын лӕггад кодтой, Турбазайы ма куы цардтӕн, уæд - чи хӕлцадӕй, чи мигӕнӕнтӕй, чи та ӕхцайæ. Кургӕ ницы кодтон. Ир гыццыл у, фӕлӕ дзы хорз адӕм бирӕ ис. Хӕстӕджытӕ мын ис Гудзабары Кокойтӕй, нӕ ныййарджытӕ хотӕ уыдысты, стӕй дзы мӕхи мыггагӕй дӕр ис, фӕлӕ уыдонӕй мӕн никуы ничи рфарста", - радзырдта Илья.

Йæ ныхæстæм гæсгæ, уыдис ын мадызæнæгтæ дæр, фæлæ ныр уыдонæй сæрæгас ничиуал у.

"Беридзуары цардтӕн Къоркъуламӕ хӕстӕг. Фӕлӕ нӕ лидзын бахъуыд. Мӕ дыууӕ хо æмæ æфсымæр дӕр амардысты, сӕ маст мӕ бынтон бахордта", - радзырдта Илья.

Лӕг ныр сфидар ис ӕмӕ райзæрдæйæ цӕры центры, æрмæст ма катай кӕны, Турбазӕйы йӕ хатӕны цы мигӕнӕнтӕ баззад, уыдоныл.

643
Харебаты Заира йæ пациентимæ

Бузныджы аккаг дохтыр: Харебаты Заира рынчынтӕн хос кӕны дзырдӕй дӕр

187
(ранӕуӕггонд 13:51 20.02.2021)
Рынчын дохтыры хъару, зонындзинæдтæ æмæ арæхстдзинадыл куы баууæнда, йæхимидæг фидарæй куы зæгъа, адзæбæх мæ кæндзæн, уæд уымæн æнæрцæугæ нæй, нымайы нуæртты дохтыр

ЦХИНВАЛ, 20 фев – Sputnik. Дриаты Лейла. Дæсныйæдтæй æппæтæй ахсджиагдæр,  зындæр æмæ вазыгджындæр дохтыры дæсныйад у. Медицинæйы дæсныйад у уды æмæ зæрдæйы сгуыхтдзинад. Домы удуæлдайад æмæ сыгъдæг хъуыдытæ. Хорз дохтыры алы хатт дæр Хуыцауæй лæвæрд фæхонынц, ома йæм Хуыцауæй лæвæрд курдиат ис. Ахæм миниуджытæй се ‘ппæтæй дæр æххæст у нуæртты дохтыр Харебаты Заира.

Адæймаг æвзæр ныхас, тарст ныхас куы фехъусы, уæлдайдæр дохтырæй, уæд уый у маргæй фыддæр, æмæ лæг фесæфы йæ адзалæй раздæр. Лæгъз ныхас та у сой, хуры тын, цъæх арвы рухс, цин, базырджын маргъау, фидар. Лæгæн фесæфы йæ низ, дохтырæй уынгмæ куы рацæуы, уæд.

"Рæвдауæн ныхас æппæт хостæй тыхджындæр у. Ныртæккæ медицинæ стыр къахдзæфтæ акодта размæ, фæзынд бирæ ног хостæ æмæ ифтонггæрзтæ. Уый махæн фадат дæтты адæмæн хæрзхъæд лæггад кæнынæн", - зæгъы Заира.

Рынчын дохтыры хъару, зонындзинæдтæ æмæ арæхстдзинадыл куы баууæнда, йæхимидæг фидарæй куы зæгъа, адзæбæх мæ кæндзæн, уæд уымæн æнæрцæугæ нæй. Ныфсæй аразгæ у алцы дæр…

"Бузныг, Заира, дæ къухтæ фæрнæй фæдар, дæ лæггад бирæ", - ахæм зæрдæйæ цæуæг ныхæстæ арæх фехъусы рынчынтæй. Уарзынц æй йæ фæлмæндзинад æмæ арæхстдзинады тыххæй. У сыгъзæрин адæймаг æмæ фæлтæрд дохтыр. Фыццаджыдæр йæхицæй карзӕй домы куыст.

"Ныртæккæ тæссаг рæстæг у. Ацы тыхст рæстæджы кусын райдыдтон уæззау рынчынтимæ Республикон клиникон рынчындоны. Карз низимæ тохы бацæугæйæ, дохтыртæ, медицинон хотæ, æппæт медицинон персонал архайдта æххуысхъуаг адæмы фарсмæ балæууыныл", - дзуры Заира.

Æнæнцой адæймаг у Заира, ис æм рæсугъд нысæнттæ æмæ фæндтæ. Йе ‘ххуыс искæй куы бахъæуы, уæд дзы уайтагъд айрох вæййы йæ фæллад æмæ рынчынмæ атагъд кæны хæдзармæ дæр.

Цæмæй рынчынæн йæ зæрдæ ма асæтта, низ йæхицæй фæсура, уый тыххæй дохтыр йæ фарсмæ хъуамæ хъæддыхæй лæууа æмæ дзы ныфс бауадза. Ахæм у йæ хъуыды Харебаты Заирайæн.

"Дохтыр хъуамæ йæхиуыл куса, ахуыр кæна алы бон дæр, алы бон дæр исты ногдзинад хъуамæ базона, æнæ уымæй хорз дохтыр нæй", - зæгъы, æнусы æмбис медицинæйы фадыджы чи бакуыста, уыцы фæлтæрд дохтыр.

Йæхæдæг дæр йæ размæ ахæм бæрзонд нысæнттæ кæй æвæрдта, æмæ сæ кæй æххæст кодта, уый тыххæй медицинæйы йæ хъысмæт рауад амондджын. Стæй канд медицинæйы нæ. Уæздандзинад йæ алы уæнджы дæр кæмæн ис, хуымæтæг, фæлæ куырыхон сылгоймаг, дæсны æмæ фæлтæрд дохтырæн Хуыцау ракодта стыр лæвар ныййарæджы, бинонты амондæй дæр.

187
Цхинвалы райдайдзӕн авд уынджы капиталон цалцӕг

Цхинвалы райдайдзӕн авд уынджы капиталон цалцӕг

1
Республикӕйы столицӕйы ныридӕгӕн раивтой зӕххы бын коммуникациты 70 проценты, ӕввахс рӕстӕджы куыстытӕ райдайдзысты ноджы авд уынгыл

ЦХИНВАЛ, 4 мар - Sputnik, Хъуылымбегты Азӕмӕт. Хуссар Ирыстоны столицӕйы ӕввахс рӕстӕджы ногӕй райдыдтой зӕронд коммуникацион хӕтӕлтӕ раивыны фӕдыл цалцӕггӕнӕн куыстытӕ, фехъусын кодта Sputnik арӕзтад, архитектурӕ ӕмӕ ЦКХ министрады минӕвар Къацты Сослан.

Республикӕйы ӕрвылаз Инвестпрограммӕйы хаххыл ивынц доны, канализацион ӕмӕ газы зӕронд хӕтӕлтӕ.

"Цхинвалы ацы аз нывӕндынц авд уынджы капиталон цалцӕг: Плехановы, Санахъоты Гришикы, Сабырады, Едысы ӕмӕ Саулохты Мухтары уынгтӕ. Афтӕ ма, сцалцӕг кӕндзысты Нарты уынджы алвӕндаг Плиты Ароны уынджы онг. Нырма раивдзысты зӕххы бын коммуникацитӕ, уый фӕстӕ та дзы сӕвӕрдзысты асфальт", - радзырдта Къацты Сослан.

Генералон нардуатон организацитӕ уыдзысты паддзахадон унитарон куыстуӕттӕ "Водоканал" ӕмӕ "Энергоресурс-Хуссар Ирыстон".

Амӕйразмӕ "Водоканал"-ы хъусын кодтой, республикӕйы столицӕйы ныридӕгӕн кӕй раивтой зӕххы бын коммуникациты 70 проценты.

1