Донхосгæнæндон

Авд дзуары, суаргуырæнтæ æмæ комфорт: цæмæй æлвасы йæхимæ Згъубиры донхосгæнæндон

172
(ранӕуӕггонд 15:05 13.03.2020)
Хосгæнæн пансионат æрбынат кодта Леуахийы донгуырæнмæ хæстæг. Улæфæндоны ис 8 бынаты, интернет, бастдзинад, сæрмагонд къæбиц, камин, хъармгæнæн системæ æмæ æндæр фадæттæ

ЦХИНВАЛ, 13 мар — Sputnik, Плиты Фатимæ. Хуссар Ирыстоны Дзауы районы Згъубиры хъæумæ хæстæг уалдзæджы райдайæны йæ дуæрттæ бакодта республикæйы æртыккаг донхосгæнæндон. Сабырдзинады æмæ хорз уавæрты баулæфынæй дарддæр ма ам хоскæнæн ис артроз, диабет æмæ цармы кæцыдæр низтæн, иу æхсады фæстæ сæрæй фæтары вæййы себорея, уырнын кæны йæ бардарæг Босыкты Владимир.

Водолечебница в Згубир
© Sputnik / Наталья Айриян
Донхосгæнæндон

Хосгæнæн пансионат æрбынат кодта Згъубиры хъæуы цур Леуахийы донгуырæнмæ хæстæг. Ӕвæрд у денджызы æмвæзадæй 1 550 метр бæрзонддæр, температурæ та зынгæ ныллæгдæр столицæйæ. Пансионаты ис 8 бынаты, интернет, бастдзинад, сæрмагонд къæбиц, камин, хъармгæнæн системæ.

"Кæд пансионатмæ адæм цæуой, уæд æй ноджы рауæрæхдæр кæндзынæн", - дзуры Босыкты Владимир.

Хосгæнæн процедурæтæ цæуынц цалдæр минералон доны гуырæнæй – душ исынц минералон дон "Аландон"- ы суадонæй, ваннæтæ та сты æндæр гуырæнæй, уымæн дæр йæ диссаджы æууæлтæ сфæлвæрдтой адæмыл.

Водолечебница в Згубир
© Sputnik / Наталья Айриян
Донхосгæнæндон

"Улæфджытæ душ исынц "Аландонæй", уый ахъаз у цармы низтæн, нуазгæйæ та игæр æмæ уыргтæн. Ваннæтæ та исынц æндæр донæй, кæцы ахъаз у æрхæджыты низтæн - артроз, артрит æмæ варикозæн. Ацы низтæн дон кæй æххуыс кæны, уый сбæлвырд кодтон адæмыл фæлваргæйæ", - загъта Босыкты Владимир.

Хосгæнæндонæй 200 метр фалдæр дæлвæзы зæххы бынæй абухынц æндæр æмæ æндæр ад æмæ æууæлтимæ донгуырæнтæ, уыдонæн сæ фадæттæ нырма не ʻсты ахуыр.

"Иу дон сахуыр кæнынæн хъæуы 80 мин сомы, ахуыртæ саразтон æрмæстдæр донрауагъдад цы суадонæй сарæзтон уымæн. Хосгæнæн дон цæуы Кавказы хохырагъæй æмæ йæм никæцы дон хæццæ кæны", - бафтыдта уый.

Хосгæнæндонæн йæ алыварс ис цымыдисон бынæттæ – километр дарддæр ис хъæу Згъубир, зымæг ма уым цæры æрмæстдæр æртæ хæдзары, сæрд баавд вæййынц. Раздæр ам цард цыппар мыггаджы – Саулохтæ, Сиукъатæ, Абайтæ, Дзаттиатæ. Ныр дæр ма къуылдымæй фæлгæсынц мыггаджы фидары кæлæнтæ.

"Гуырдзы æрвылаз арæзтой æрбабырсттæ хохæгты басæттыны оххыл - цæмæй истаиккой хъалонтæ, кодтиаикой сæ æфсадмæ. Ӕрмæстдæр иу хатт Челиаты ком бацахстой – инæлар Ренненкампфы стыр экспедицийы рæстæджы", - радзырдта уый.

Ацы бынæттæ чи бауарзта, уыдон уырнын кæнынц, ам доны тых бынаты кæй бадывæр вæййы, уымæн æмæ хъæуы алыварс хæхтыл ис авд дзуары.

"Нæ алыварс хæхтыл ис кувæндæттæ. Иу фарсæй фæлгæсы зæдбадæн – Бурхох, стæй ма Уæлхъæуы дзуар, Уастырджыйы кувæндон, Цæгаты дзаур, Реком, Дуарау дзуар æмæ Сызгъæрин дзуар", - ранымадта Владимир.

Ивгъуыд къуыри улæфæндон райста йæ фыццаг улæфджыты. Цинвалæй ардæм фæуазæг сты Уалыты Ибрагим йе ʻмкъай Хъоцыты Галинаимæ. Нæлгоймаг хъæрзыд йæ къæхтæй.

Водолечебница в Згубир
© Sputnik / Наталья Айриян
Суар

"Цæгат Ирыстоны цыдæриддæр хосгæнæндæттæ ис, уыдоныл æрзылдтæн. Ам фыццаг фæцыд мæ зæрдæмæ йæ бынат, стæй мæ æртыккаг бон къæхты рыст суагъта. Ӕвæццæгæн, æххуыс кæны дон дæр æмæ дзуæрттæ дæр, чысыл фалдæр та алкæцы дыууæ метры дæр абухынц минералон суæрттæ", - загъта Уалыты Ибрагим.

Йæ ныхæстæм гæсгæ, уый ныр фæсарæйнаг хосгæнæндæттæм йæ къах дæр нал авæрдзæн.

"Турчы ма мæн ныр цы хъуыддаг ис, ам бынæттон лæппу мæнæ диссæгтæ куы сарæзта. Ваннæ иу донæй, ныуазгæ дыккагæй, душ æртыккагæй, мæ къухтæ та æндæр донæй ахысын, стæй иу сахаты цыд у горæтæй. Ис ма дзы парилкæ дæр. Мæхи фондзстъалыйон уазæгдоны хатын. Иу дзырæй, ноггуыры хуызæнæй аздæхдзæн", - бафтыдта уый.

Босыкты Владимир нырмæ дæр нæ республикæйы зынгонд уыд, куыд минералон дон "Аландон" уадзæн куыстуаты сæргълæууæг. Цалдæр азы размæ уый Згъубиры суаргуырæны бындурыл бакодта ацы куыстуат, паддзахадæй кредит райсгæйæ. Йæ саразыны фæнд та йæм фæзынд, Згъубиры суарæй цалдæр азы размæ Пятигорскы курортологийы зонад-иртасæн институтмæ иртасынмæ куы ахаста æмæ йæ анализтимæ куы базонгæ, уый фæстæ.

  • Згъубир
    Згъубир
    © Sputnik / Наталья Айриян
  • Донхосгæнæндон
    Донхосгæнæндон
    © Sputnik / Наталья Айриян
  • Уалыты Ибрагим
    Уалыты Ибрагим
    © Sputnik / Наталья Айриян
  • Згъубир
    Згъубир
    © Sputnik / Наталья Айриян
  • Михаил
    Михаил
    © Sputnik / Наталья Айриян
1 / 5
© Sputnik / Наталья Айриян
Згъубир
172
Джиоты Ирбег

Зӕронд мигӕнӕнтӕн ног цард: куыд ӕххӕст кӕнынц Джиоты Роланд æмæ Ирбег цæрджыты домӕнтӕ

75
(ранӕуӕггонд 10:32 08.04.2021)
Дыууæ æрвады - Роланд æмæ Ирбег цæстуарзонæй сæ лæггады хай кæнынц, æххуысы охыл сæм чи баулæфы, уыцы адæймæгтæн

ЦХИНВАЛ, 11 апр – Sputnik, Дриаты Лейла. Хæдзарон ифтонггæрзтæ ӕмӕ мигӕнӕнтӕ дæр хæлын зонынц æмæ дзуапп нал фæдæттынц сæ хицауы домæнтæн. Ахæм рæстæджы адæймагæн йе скаст вæййы, чи сæ фæцалцæг кæны, уымæ. Мæнæ бахауд фæлтæрд къухты хицаумæ, бавнæлдта йæ аразынмæ æмæ йæ арæхстдзинады фæрцы уымæн бантыст хӕлд мигӕнӕн куыстæввонг скæнын.

Уымæй æхсызгондæр ма цы хъуамæ уа йæ хицауæн, ныр та йын раздæрау кæндзæн йæ лæггады хай æмæ йын, арфæтæ ракæныны фæстæ, хъæлдзæг зæрдæйы равгимæ рацæуы.

Æмæ цал вæййынц æрвылбон дæр, Цхинвалы Цардуагон лæггæдты хæдзарæй райгондæй æмæ бузныджы ныхæстимæ чи раздæхы, уыдон. Арфæйы ныхæстæ кæй номыл арвитынц, уыдон нымæцмæ хауынц ацы куыстуаты кусджытæ Джиоты Роланд æмæ Ирбег дæр.

"Мах архайæм æмæ цалцæг кæнæм, газы фæрцы хъарм чи кæны, ахæм цалдæр хуызы агрегатты", - зæгъынц кусджытæ.

Цæмæй уыдон æнæкъуылымпыйæ кусой, цалцæгкæнинаг та йæ раздæры гаччы æрбада, фæлхасгæнджытæн сæ домæнтæ æххæст кæной, уый тыххæй Джиоты Ирбег рацыд ахуыртӕ ӕмӕ йæ райгуырæн къуыммæ æрыздæхт цæттæ дæсны кусæгæй. Уый фæстиуæгæн дыууæ æрвады - Роланд æмæ Ирбег цæстуарзонæй сæ лæггады хай кæнынц, æххуысы охыл сæм чи баулæфы, уыцы адæймæгтæн.

"Зæгъын хъæуы уый, æмæ ахæм хъармгæнæн ифтонггæрзтæй пайда кæнынц канд нæ горæты цæрджытæ нæ, фæлæ ма республикæйы хъæууон æмбæстæгтæ дæр. Уыдонæй иуты æмбæлон уагмæ æркæнæм нæ кусæнуаты, æндæртæн та сæ уавæртæ бахынцæм, ацæуæм сæм бынатмæ", -  радзырдта Джиоты Ирбег.

Хъуамæ алчидæр тырна уымæ, цæмæй йын адæмы ‘хсæн уа кад, аргъ ын кæной, йæ алыварс чи ис, уыдон. Ном лӕгӕн йӕ кад у, йӕ царды сӕр.

75
Убоженкоты бинонтӕ

Убоженкоты династи Хуссар Ирыстоны

139
(ранӕуӕггонд 10:47 08.04.2021)
Хуссар Ирыстоны къам исыны истори комкоммæдæр баст у Убоженкойы бинонтимæ. Суанг районты æмæ дæрддзæф хъæуты цæрджытæ дæр къам исынмæ цыдысты ардæм

ЦХИНВАЛ, 10 апр – Sputnik, Дриаты Лейла. Хуссар Ирыстоны ахӕм адӕймаг стӕм разындзӕн, Убоженкоты бинонты чи нӕ зоны. Ахӕм бинонтӕ стӕмтӕ сты, кӕцыты альбомты нӕй ацы къамисджыты ист нывтӕ. Убоженкоты фотостуди ныр дæр, 50 азы размæ куыд уыд, афтæ ис Цхинвалы 8-æм июны уынгыл. Фæлæ-иу æрдæг æнусы размæ кæд студийы раз радтæ уыд, уæд ма ныр сæ къæсæрæй боны мидæг бахизы 5-10 адæймаджы.

Хуссар Ирыстоны къам исыны истори комкоммæдæр баст у Убоженкойы бинонтимæ. Суанг районты æмæ дæрддзæф хъæуты цæрджытæ дæр къам исынмæ цыдысты ардæм. Владимир Убоженко бинонты хистæр арæх цыд хъæутæм, цæмæй алкæмæн дæр уа уавæр йæ къам кæимæ йæ фæнды, уыимæ сисынæн. Æмæ-иу æм куыд æнхъæлмæ кастысты йе ‘рбацыдмæ... Хистæр кары адæмæй искæйы куы афæрсай, уæд уайтагъд æрхъуыды кæнынц Владимир Убоженкойы, сæ зæрдыл дарынц йæ æртæкъахон къамисæнимæ-иу куыд зылд Ирыстоны къуымты. Уый фотоаппараты объективы бахаудысты мингай адæймæгты хуызтæ, бæстыхæйттæ, административон уагдæттæ ӕмӕ æрдзы нывтæ. Цыфæнды хъуыддагон гæххæттытæн дæр къам исынмæ сæрмагондæй Владимир Убоженкойы агуырдтой.

Убоженкотæ Ирыстонмæ куыд æмæ цы гъдауæй æрхаудысты, уый тыххæй нын сæ чындзытæй иу Людмила афтæ радзырдта:

"Ивгъуыд æнусы 30-æм азты мæ бинонтæ цардысты Уæрæсейы. Советон хицауад куы æрфидар, уæд бинонты банымадтой кулактыл æмæ сын сæ мулк байстой. Уæд уыдон сæхи æфхæрдыл банымадтой æмæ рафтыдысты Кавказмæ. Сæ зæрдæмæ цæрынæн фæцыд Хуссар Ирыстон æмæ дзы æрбынат кодтой. 1938 азы Владимир Убоженко кусын райдыдта Цхинвалы горæты къамисæгæй", - банысан кодта Людмила.

Фæстæдæр фыды дæсныйадыл ныххæцыд йæ фырт Николай дæр, фæлæ уæдмæ райдыдта Стыр Фыдыбæстæйон хæст æмæ Убоженкоты къмисыны хъуыддаг дæр рæстæгмæ фæкъухцы. Владимирæн йæ сывæллæттæ Лидия æмæ Николай ацыдысты хæстмæ. Хъыгагæн, чызг хæсты быдырæй нал æрыздæхт, æбæрæгæй фесæфт. Николай æрыздæхт фронтæй æмæ та фыдимæ адарддæр кодтой сæ архайд. Бантыст сын Цхинвалы фыццаг фотостуди бакæнын. Студийы уыд иунæг хъæдын бандон, къулыл - фонæн урс хъуымац, кæсæны раз хъуынтæ алæгъз кæнынæн сæрвасæн. Николай ма уæд куыста ирон газеты фотоуацхæссæгæй дæр.

Ныр дæр уыцы фотостудтийы кусынц Убоженкоты фæлтæр - Людмила æмæ Татьяна Убоженко.

"Раздæрау арæх нал цæуынц адæм къамтæ исынмæ. Ныр фæзынд смартфонтæ æмæ сæ къамтæ дæр уымæй сисынц. Раздæр-иу студийы къæсæрыл æгас бинонтæ æрбалæууыдысты. Фæлæ нæм ныр фылдæр цæуынц паспорт æмæ æндæр документтæн къамтæ куы бахъæуы, уый тыххæй", - зæгъы Людмила.

Ацы дæсныйадыл хæст у Владимиры иннæ фырт Василий дæр. Къамисæджы дæсныйадмæ цымыдис кæнынц ацы бинонты кæстæр фæлтæр дæр. Ныр студи рæстæджы цыдимæ цадæггай йæ хуыз ивын райдыдта. Сабитæн дзы ис аргъæутты персонажтæ, мотороллертæ. Раздæрау къаммæ æнхъæлмæ кæсын нал хъæуы дыууæ æртæ бон. Сахат кæнæ æрдæг сахатмæ дæ къам цæттæ.

Ныртæккæ студийы кусынц Владимир Убоженкойы цоты цыппæрæм фæлтæр, кæрæдзийы ивынц дыууæ æфсымæры зæнæг. Къамисджытæй сæ иу Елена Убоженко зæгъы, зæгъгæ, раздæрау кæд бирæ адæм нал цæуы Убоженкоты студимæ, уæддæр куыстæй райгонд у.

"Архайæм гъæдджын æрмæг æлхæныныл, цæмæй къам бирæ фæлæууа. Ныртæккæ бирæ æрмæг уæййаг ис, фæлæ уыдонæй къамæн цалдæр азы фæстæ йæ хуыз фесæфы. Мах æлхæнæм япойнаг æрмæг, мæ бон у фидарæй зæгъын ахæм къам 50 азы дæр кæй фæлæудзæнис. Сæйраг хорз уавæртæ не сты, махмæ ис ахæм лæггæдтæ, кæцытæ Цæгат Иры дæр зынтæй сардзысты. Махмæ реставраци цæуынц зæронд къамтæ, нæ бон у хицæн къамтæй бинонтæн иумæйаг къам саразын. Рауагъдонтæн аразæм гъæдджын альбомтæ", - зæгъы Вова Убоженко.

Нӕлгоймаг ныфс ӕвӕры, персоналон студи саразыныл та кӕй бакусдзӕн бинонты иннæ фæлтæр.

139
Милици

Хуссар Иры ПАИ сног кодта скъӕрыны бартӕ ӕмӕ номыртӕ дӕттыны куыст

1
Республикӕйы фӕстаг рӕстӕджы сӕвзӕрд проблемӕтӕ ацы бланктӕ аразын ӕмӕ республикӕмӕ ӕрласыны фӕдыл. Мидхъуыддӕгты министрад ныфс ӕвӕрдтой цыбыр ӕмгъуыдмӕ аскъуыддзаг кӕнын фарст

ЦХИНВАЛ, 14 апр - Sputnik, Козаты Диана. Хуссар Ирыстоны Паддзахадон автоинспекцийы сног кодтой хӕдтулгӕтӕн номырон нысӕнттӕ, скъӕрыны бартӕ ӕмӕ транспортон фӕрӕзты регистрацийы фӕдыл документтӕ дӕттын. Уый тыххӕй хъусын кӕны республикӕйы Мидхъуыддӕгты министрады (МХМ) пресс-службӕ.

Республикӕйы фӕстаг рӕстӕджы сӕвзӕрд проблемӕтӕ ацы бланктӕ аразын ӕмӕ республикӕмӕ ӕрласыны фӕдыл. Мидхъуыддӕгты министрад ныфс ӕвӕрдтой цыбыр ӕмгъуыдмӕ аскъуыддзаг кӕнын фарст.

"Ацы проблемӕ фӕзынд уый тыххӕй, ӕмӕ бланктӕ цы компани цӕттӕ кӕны, уый кусджытӕ иууылдӕр фӕрынчын сты коронавирусӕй. Ныр ногӕй райдыдтам дӕттын скъӕрыны бартӕ, номыртӕ ӕмӕ техпаспорттӕ", - радзырдтой МХМ.

Уагдоны бафтыдтой, транспорт срегистраци кӕныны фӕдыл ӕвдисӕндар бланктӕ республикӕмӕ кӕй ӕрхӕццӕ уыдзысты ӕввахс 2-3 боны.

1