Икъаты Ибрагим Дменисы сӕндидзын кодта зӕхкуыст

Фӕткъуы, сӕнӕфсир ӕмӕ халсар: Икъаты Ибрагим Дменисы сӕндидзын кодта зӕхкуыст

113
(ранӕуӕггонд 11:28 10.04.2020)
Икъаты Ибрагим дыккаг аз зилы ацы дыргъдонмæ æмæ йын ныридæгæн йæ хуыз скалдта. Хæрзгуыст быдыры бæлæсты рæгъты ‘хсæн ма Ибрагим ныссагъта сæнæфсиртæ дӕр - хъæууон лæг аргъ кæнын зоны зæххы алы гæппæлæн дæр

ЦХИНВАЛ,  10 апр – Sputnik, Дриаты Лейла. Цхинвалы район кæддæриддæр хæрзвадат уыд дыргъгуыст рыйтынг кæнынæн. Уымӕ гæсгæ 2014 азы Хъæууон-хæдзарады министрад Дменисы хъæуы сфæнд кодта дыргъдон саразын.

Дменисы дыргъдонæн бындур бæргæ æрæвæрдта Хъæууон хæдзарады министрад, фæлæ хъуыд ссарын арендатор, кæцы счъилдысæй бавнæлдтаид æмæ цалдæр азмæ дыргъдон йæ къахыл слæууын кодтаид. Цæмæй ма дзы бынæттон цæрджытæн дæр фæзындаид кусæгон бынæттæ.

Дыргъдон райстой арендæйы цалдæр бынæттон лæппуйы. Райдианы дзæбæх бавнæлдтой - зылдысты бæлæстæм. Фæлæ дыккаг аз лæппутæ ныддихтæ сты. Талатæ кæрдæджы бын фесты, донхæр сæ кæй нæ кодтой, уымæ гæсгæ сæ фылдæр бахус. Уыйадыл Хъæууон хæдзарады министрад арендаторимæ йӕ бадзырд фехæлдта.

Æхгæд æрцыд дыргъдоны территори, цæмæй йæм фос ма цæуа æмæ талатæ ма цъæл кæной. Хæстæг ӕм арæзт æрцыд донхæргæнæн бассейн дæр.

Хъæууон-хæдзарады министрадмæ æрбацыд бынæттон æвзонг лæппу Икъаты Ибрагим. Уый бацымыдис кодта дыргъдон æгуыст цæмæн у, куырдта, цæмæй йын радтой фадат талатæм базилыны тыххæй.

Икъаты Ибрагим дыккаг аз зилы ацы дыргъдонмæ æмæ йын ныридæгæн йæ хуыз скалдта.

"Ацы быдыр арендæйы куы райстон, уæд талатæн сæ фылдæр уыд хус. Фæткъуы бæлæстæй иуæй-иутæ зæххы дзæбæх фидар нæ уыдысты æмæ уымæ гæсгæ бахус сты. Мæ размæ цы арендатортæ уыд дыргъдонæн, уыдон сæ афоныл нæ пырх кодтой æмæ талатæ къуыдыртæй лæууыдысты. Æз бацархайдтон кæцытæ бахус, уыдон бынаты ногтæ ныссадзын", - зæгъы Икъаты Ибрагим.

 Цæмæй талатæн хуыздæр уавæртæ арæзт æрцыдаид, бынӕттон климатыл сахуыр уыдаиккой, уый тыххæй сæ лӕппу фæззæджы æрласта Цæгат Ирæй.

"Ныртæккæ интернеты тыгъдады бирæ информаци ис, фæткъуы бæлæстæм куыд зилын хъæуы, уый тыххӕй. Стæй æз мæхæдæг хъæуты схъомыл дæн. Уыдтон, хистæртæ куыд куыстой, æмбисонд Дменисы хъæуы дыргъдæттæ уыдысты. Æппæт уыцы фæлтæрддзинад мын бабæззыд. Цы нæ зонын уымæй та хъæуы хистæрты бафæрсын, - радзырдта арендатор.

Яблоневые сады в селе Дменис Цхинвальского района Южной Осетии
Из личного архива Лейлы Дриаевой
Икъаты Ибрагим Дменисы сӕндидзын кодта зӕхкуыст

Ибрагим цин кӕны, йæ бæлæстæ сæхиуыл кӕй схæцыдысты, йӕ зæрдæ сæ рухс кæны.

"Æхсæвæй-бонæй уыдтæн дыргъдоны. Нырма мын кусджытæ нæй, уымæн æмæ уал æххæссын мæхæдæг мæ куыстыл. Фæстæдæр дыргъдон тыллæг дæттын куы райдайа, уæд мæм фæзындзæн куысты бынæттæ дæр", - банысан кодта уый.

Лӕппу куыд зæгъы, афтæмæй, уый арендæйы райста дыргъдоны фарсмæ хицауадæн цы афтид зæхх уыд, уый дæр. Уым та хъавы ныссадзын 20 мин пъамидор æмæ капустæйы бын. Сæрды уыдон ратдзысты цалдæр тонны тыллæг.

Хæрзгуыст быдыры бæлæсты рæгъты ‘хсæн ма Ибрагим ныссагъта сæнæфсиртæ дӕр. Хъæууон лæг аргъ кæнын зоны зæххы алы гæппæлæн дæр. Æрæджы балхæдта мини-трактор, кæцы йын фӕрог кӕны йӕ къух.

Ибрагимæн ма йæ зæрды ис, хицауад чысыл æмæ астæуккаг бизнесы тыххæй цы хатырон кредиттæ дæтты, уыдонæй райсын дæр.

"Марты кæрон хъуамæ уæрст æрцыдаиккой уыцы кредиттæ. Фæлæ, ныртæккæ дунейыл цы вирусы фæзынд, уый аххосæй хъуыддаг фæкъуылымпы ис. Мæ инвестицион проект арæзт у ставдкъах фосы тыххæй. Стæй ма быдыры фарсмæ мæ зæрды уыд хъармуат саразын дæр, цæмæй зымæджы дæр зайын кæнон цъæхæгтæ", - ранымадта йӕ фӕндтӕ ӕвзонг лӕппу.

113
Хъабанты бинонты хӕдзарад

Куыст цардӕн фӕрӕз: цӕй фӕрцы дидин калы Хъабанты бинонты хӕдзарад

47
(ранӕуӕггонд 13:00 01.06.2020)
Хъабанты Хъазбег æмæ йе ‘ртæ фырты сæ хæдзарады фæллой кæнынц иузæрдионæй, зындзинæдтæ мурмæ дæр нæ дарынц æмæ уымæ гæсгæ иу æнтыст иннæйы фæдыл æфты сæ къухты

ЦХИНВАЛ, 1 июн — Sputnik, Дриаты Лейла. Хъабанты бинонты фермерон хæдзарад Цхинвалы районы Къостайы хъæуы афтæ бирæ рæстæг дæр нæ уæвынад кæны, фæлæ куыстуарзаг адæймаг йæ куыстмæ бæрндзинады цæстæй куы кæса, уæд ын кæддæриддæр уыдзæн æнтыст, йæ куысты фæстиуджытæй рухс кæндзæн йæ зæрдæ.

Хъабанты Хъазбег æмæ йе ‘ртæ фырты сæ хæдзарады фæллой кæнынц иузæрдионæй, зындзинæдтæ мурмæ дæр нæ дарынц æмæ уымæ гæсгæ иу æнтыст иннæйы фæдыл æфты сæ къухты. Сæ зæххы фадыджы ныссагътой фæткъуы, кæрдо, бал, атъамийы талатæ, афтæ ма сæнæфсир дæр æмæ уыдон ныридæгæн райдыдтой тыллæг дæттын,. Цух нæ вæййы сæ зæххы фадыг пъамидор, джитъри æмæ æндæр цæхæрадоны культурæтæй дæр, базилынц сæм хорз æмæ тыллæгæрзадæй барухс вæййы сæ зæрдæ.

Хъабанты бинонты хӕдзарад
© Sputnik / Дриаты Лейла
Хъабанты бинонты хӕдзарад

Ивгъуыд аз бинонтӕ сарæзтой 6-хатæнон цæрæн хæдзар, хъæуы ма дзы арæзтадон-цалцæггæнæн куыстытæ мидæгæй. Сæхи тыхтæй æруагътой рухсы хахх æмæ ныр ууыл дæр нал тыхсынц. Дзæвгар фыдæбон кодтой доны цухдзинады тыххæй, кæстæр фырт Батрадз дард ранæй дон ласгæ кодта æмæ тынг тыхстысты.

Сфæнд кодтой уыцы хъуагдзинад дæр аиуварс кæнын æмæ сын æнтысгæ дæр бакодта сæхи тыхтæ æмæ фæрæзты фæрцы. Ныр пайда кæнынц, йæ гъæдмæ гæсгæ иттæг хорз чи у, ахæм нуазыны донæй, пайда дзы кæнынц хардз кæнынæн дæр. Батрадз фæкæсы сыхæгтæм дæр, баласы сын йæхи техникæйыл дон.

Æнæмæнгхъæуæг уыд æркæнгæ тыллæг æмбæлон бынаты бафснайын æмæ уый дæр срæвдз кодтой. Уый фæрцы се ркæнгæ хъæууонхæдзарадон культурæтæ бабæстон кæнынц егъау бынаты.

Сæ зæххы фадыг нырмæ уыд 0,40 га, фæлæ ма йæм ноджыдæр бафтыдтой æмæ йæ иумиаг фæзуат у 0,70 га Ацы бонты кусынц йӕ сæмбонд кæныныл æмæ дзы уæд та райдайдзысты хуыдæттæ аразын.

ФОСДАРДЫ КЪАБАЗ

Хæдзарадмæ хъуццытæ ис 4, уыдонæй уал ноггуырд родтæ ис дыууæйæн, сты хæрзхаст. Ӕввахс рæстæджы ма ноггуырдтæм бафтдзæн ноджыдæр иу ахæм. Сæ хъуыдыйы ис, цæмæй стурты нымæц дæр фæфылдæр кæной. Нæу æнцон хуыдарды куыст кæнын, бирæ тых домы йæ хицауæй, фæлæ зындзинæдтæй нæ тæрсынц хæдзарады уæнгтæ.

Хъабанты бинонты хӕдзарад
© Sputnik / Дриаты Лейла
Хъабанты бинонты хӕдзарад

Дзæргъытæ сæм нымадæуы 8 æмæ уыдонæй æхсæзæн æввахс рæстæджы уыдзæн хъыбылтæ.. Хъыбылтæй фæлхасгæнджытæ ахастой 30, сæ домæнтæ ма сæххæст кæндзысты 20 фæлхасгæнæгæн. Хæдзарад кæны фысдарды куыст дæр æмæ азæй-азмæ сæ нымæцыл æфты. Ныртæккæ сæм фыстæ ис 140 æмæ уæрыччытæ та 70. Уалдзыгон хъарм бонты кæрдæг хорз сырæзт æмæ сæумæрайсомæй суанг изæрмæ фæхизынц сæрвæты.

ÆФСИРОН КУЛЬТУРÆТÆ

Ацы фермерон хæдзарад йæ уæвынадæй фæстæмæ алы аз дæр байтауы æфсирон культурæтæ æмæ сæ тыллæгæй барухс вæййы сæ зæрдæ. Ивгъуыд аз тыхджын ихуард кæй уыд, уый фæстиуæгæн хуымты тынг бахъыгдардта æмæ сæ тыллæг нæ райста.

Уӕд Мæздæджы сфæрæз кодтой мæнæуы хорз мыггаг, уый æртæ азы дæргъы дæтты хъæздыг тыллæг, стæй та йæ ногæй хъæуы баивын. Уæд фæззæджы рæстæгыл фæцырд сты æмæ фæззыгæнд мæнæу байтыдтой 12 гектары фæзуатыл, а-уалдзæджы та сын хъæбæрхоры культурæ тыд æрцыд 15 га. Байтыдтæ цæмæй æмбæлон æгъдауæй рæзой, хызт уой алыгъуызон зианхæссæг уырынгонтæй, уый тыххæй дæр сæххæст кодтой агротехникæйы фæткойтæ. Хæдзарады уæнгтæм дарддæры куысты хуыздæр фæстиуджытæ бафтын кæныны тыххæй ис бирæ фæндтæ æмæ сын уæд æнтыстытæ.

47
Федтон мӕ Ир ӕмӕ бакастӕн чиныг: спортсмен ӕмӕ студент карантины тыххӕй 

Федтон мӕ Ир, бакастӕн чиныг: спортсмен ӕмӕ студент карантины тыххӕй 

150
(ранӕуӕггонд 14:16 27.05.2020)
Коронавирусы апарахаты фӕстӕ Уӕрӕсейы ӕфсӕддон ахуыргӕнӕндӕттӕ уыдысты карантины марты кӕронӕй. Уый фӕстӕ студентты ӕрвитын райдыдтой сӕ райгуырӕн бӕстӕтӕм. Плиты Батрадз дӕр ӕрыздӕхт Ирыстонмӕ майы райдайӕны

ЦХИНВАЛ, 27 май - Sputnik, Плиты Фатимӕ. Санкт-Петербурджы уӕвӕг Михайловскы ӕфсӕддон артиллерион академийы студент, армспортӕй дуне ӕмӕ ӕппӕтуӕрӕсеон турнирты уӕлахиздзау Плиты Батрадз йӕ райгуырӕн бӕстӕмӕ ӕрцыд ӕмӕ дыууӕ къуыри арвыста карантины. Спортсмен радзырдта Sputnik, куыд арвыста ацы ӕмгъуыд, уый тыххӕй.

Спортсмен и студент Батрадз Плиев рассказал  о карантине в больнице
Фото из личного архива Батрадза Плиева
Плиты Батрадз

Коронавирусы апарахаты фӕстӕ Уӕрӕсейы ӕфсӕддон ахуыргӕнӕндӕттӕ уыдысты карантины марты кӕронӕй. Уый фӕстӕ студентты ӕрвитын райдыдтой сӕ райгуырӕн бӕстӕтӕм. Плиты Батрадз дӕр ӕрыздӕхт Ирыстонмӕ майы райдайӕны.

"Ацы академийы Цхинвалӕй ахуыр кӕнӕм 15 адӕймагӕй. Мах ӕрцыдыстӕм 5 майы ӕмӕ рынчындоны ӕрбынат кодтам. Алы палатайы дӕр уыдыстӕм фондзӕй. Интернет нын уыд, бынтон хорз гъӕдимӕ нӕ уыд, фӕлӕ нӕхи куыддӕрты ирхӕфстам", - дзуры уый.

Батрадз банысан кодта, ӕвӕндӕй изоляцийӕн кӕй ис ӕвӕрццаг ӕууӕлтӕ дӕр. 

"Дыууӕ къуыри лӕг цы хъуамӕ арӕзтаид, ӕмӕ райстон ӕмӕ бакастӕн англисаг фыссӕг Мария Кореллийы чиныг "Скорбь Сатаны". Ӕнӕ изоляци мӕ уымӕ не рывдӕлдаит", - худы лӕппу.

Ахуырмӕ ацӕуыны размӕ Батрадз архайдта армспорты, у Уӕрӕсейы ӕмӕ дунейы фыццагадты ӕвзист призер. 85 кг архайгӕйӕ уыд Хуссар Ирыстоны армрестлингы секцийы хуыздӕр спортсментӕй иу.

Спортсмен и студент Батрадз Плиев рассказал  о карантине в больнице
Фото из личного архива Батрадза Плиева
Плиты Батрадз

Лӕппуйӕн Санкт-Петербурджы академийы дӕр бар радтой, цӕмӕй спорты дӕр йӕ архайд ма ныууадза. Ацӕугӕ аз ссис ацы горӕты чемпион армрестлингӕй, фӕлӕ йӕ дарддӕр ерыстӕм нал ауагътой.

"Плиты Батрадз у мӕ хъомылгӕнинӕгты фидардӕртӕй сӕ иу, уымӕй раппӕлинагдӕр та у куыд адӕймаг афтӕ - иу азмӕ хорз ном скодта йӕ ахуыргӕнӕндоны дӕр. Йӕ ахуыр, физикон цӕттӕдзинад ӕмӕ зондахаст сты уым дӕр фӕзминаг. Кӕд нӕ секцийӕ фӕиппӕрд, уӕддӕр спортыл дӕр йӕ зӕрдӕ не 'сивта", - радзырдта лӕппуйы тренер Джиоты Валерий.

Батрадзы ныхӕстӕ гӕсгӕ, уый бирӕ рӕстӕг баззад ӕцӕгӕлон бӕстӕйы ӕмӕ тынг ӕрымысыд Ирыстон. 

"Ацы вирус куыннӕ уыдаид, уӕд августмӕ уым уыдаин. Иуӕй мын ӕхсызгон у, раздӕр кӕй ӕрцыдтӕн Ирыстонмӕ, мӕ риуы бӕрц сулӕфыдтӕн. Мӕ бӕстӕ федтон ӕмӕ мӕхимӕ 'рцыдтӕн", - загъта Батрадз.

Спортсмен и студент Батрадз Плиев рассказал  о карантине в больнице
Фото из личного архива Батрадза Плиева
Плиты Батрадз

Лӕппуйӕн йӕ карантины ӕмгъуыд фӕцис ӕмӕ ныр сӕрибарӕй тезгъо кӕны республикӕйы рӕсугъд къуымты.

150
Рауагъдон бал

Хуссар Ирыстоны равзӕрстой фӕстаг дзӕнгӕрӕг ӕмӕ рауагъдон балы датӕтӕ

139
(ранӕуӕггонд 21:26 02.06.2020)
Хуссар Иры рауагъдонты сӕйраг бӕрӕгбонон мадзӕлтты датӕтӕ не 'нтыст сбӕлвырд кӕнын коронавирусы апарахаты тасӕй тобӕтӕ хынцгӕйӕ

ЦХИНВАЛ, 2 июн - Sputnik, Плиты Фатимӕ. Хуссар Ирыстоны ахуырады министрады равзӕрстой фӕстаг дзӕнгӕрӕг ӕмӕ рауагъдон балы датӕтӕ, фехъусын кодтой Sputnik уагдоны пресс-службӕйы.

Хуссар Иры рауагъдонты сӕйраг бӕрӕгбонон мадзӕлтты датӕтӕ не 'нтыст сбӕлвырд кӕнын коронавирусы апарахаты тасӕй тобӕтӕ хынцгӕйӕ.

"Развӕлгъау сбӕлвырд кодтам 17 июны ауадзын фӕстаг дзӕнгӕрӕг ӕмӕ 18 июны та рауагъдон бал. Раздӕрау та йӕ организаци фӕнд кӕнӕм бакӕнын сывӕллӕтты сфӕлдыстадон галуаны бӕрны. Фӕлӕ уыдон дырыс датӕтӕ не сты ӕмӕ сӕ ауадзын баст уыдзӕн коронавирусы фӕдыл уавӕримӕ", - загътой пресс-службӕйы.

Рауагъдон бал хицӕнӕй ауадзынц ӕрвылаз Дзауы районы дӕр.

"Дзауы районы ахуырдзаутӕн сӕ бал республикӕйы скъолатимӕ иумӕ Цхинвалы банхъардзысты ауадзын, фӕлӕ ацы фарст нырма скъуыддзаг нӕу", - загътой ахуырады министрады.

Хуссар Ирыстоны ацы аз скъолайӕн хӕрзбон зӕгъдзысты 468 ахуырдзауы, уыдонӕй цыппар иттӕг хорз нысӕнттыл. Иу чызг у сызгъӕрин майданмӕ претендент. Цыппар иууыл хуыздӕр бӕрӕггӕнӕнтимӕ ахуырдзауы сты гимназитӕ "Рухс" ӕмӕ "Альбион"-ӕй.

139