Еналдыты Барис

Еналдыты хотӕ ирон адӕмы геноциды рӕстӕджы сӕ фыды фыдӕбӕтты тыххӕй

39
(ранӕуӕггонд 14:09 11.06.2020)
Еналдыты Наташа æмæ Назирæт радзырдтой Sputnik сӕ фыд ӕмӕ дадайы фыдӕбӕтты тыххӕй 1920 азы ирон адӕмы геноциды рӕстӕджы

ЦХИНВАЛ, 14 июн – Sputnik, Дриаты Лейла. Ирон адӕмы 1920 азы геноциды тыххæй фæстаг рæстæджыты бирæ фыстæуы æмæ дзырдæуы, уæлдайдæр та ныртæккæ, йӕ 100-азон юбилейы агъоммæ. Ацы темæйыл дзурæн нæ уыд советон дуджы, уымæн æмæ Советон Цæдисы адæмтæ æфсымæрон уыдысты æмæ хæларæй хъуамæ цардаиккой, æвзæрæй цы уыд хицæн нациты ‘хсæн, уыдоны хъуамæ ферох кодтаиккой. Фæлæ адæмы хъуыды ахæм цаутæ нæ рох кæны. Хистæр фæлтæр сæ дзурынц кæстæртæн æмæ афтæмæй, фæлтæрæй-фæлтæрмæ, цæуынц, кæд дзы бирæ цыдæртæ рæстæджы фæлмæй нал зынынц, уæддæр.

Абон не ‘хсæн нал сты, уыцы геноцид чи бавзæрста, чи тох кодта Гуырдзыйы меньшевикты ныхмæ, уыдон. Фæлæ не ‘хсæн бирæ цæры, кæмæн сæ дзырдтой æмæ сæ йæ зæрдыл чи бадардтой, ахæмтæ. Уыдонæй сты Еналдыты Наташа æмæ Назирæт дæр, стæй сæ иннæ хотæ æмæ æфсымæртæ. Сæ фыд Барис æрмæст уыцы цауты нæ, фæлæ революцион змæлды дæр активон хайадисæг уыд. Æмæ йæ бирæ кæстæртæн арæх кодта уыцы уæззау азты хабæрттæ.

Дзауы районы бæрзонд хæххон хъæу Мзиуы 1892 азы райгуырд æмæ схъомыл Еналдыты Барис. 1920 азты трагикон цаутæн йæхæдæг уыд æвдисæн. Уый хайад иста фыццаг дунеон хæсты дæр. Хæстон архайдтыты рæстæджы уый бахаудта уацары æмæ Германы фæцис æртæ азы бæрц. Барис-иу йæ мысинæгты радзырдта, уым цы хъизæмæрттæ æвзæрстой, уыдоны тыххæй. Уацайрæгтæ æвзæрстой удхар æмæ хъизæмайраг бонтæ. Иумæйаг баракты сæ батардтой æмæ-иу сын æнæбары къæбæр баппæрстой. Уымæй размæ дæр куыннæ æййæфтой æххормаг рæстæджытæ, фæлæ сæ уым куыд сыдæй мардтой, афтæ никуы.

Уацайрæгты тыхтæ сихсыдысты æмæ цагъды кодтой. Барис куыд дзырдта, афтæмæй-иу сын æрвылрайсом ластой сæ мæрдтæ. 16 боны фæстæ ма уацайрæгтæй чи баззад, уыдоны Уæрæсейы уæды хицауад балхæдта. Æмæ æрыздæхт Еналдыты Барис йæ райгуырæн хъæу Мзиумæ. Æрыздæхт ахæм рæстæджы, Ирыстоны къуымты революцион змæлд тыхджынæй-тыхджындæр куы кодта. Уыцы рæстæджы архайдта зæхкусджыты революцион комитет. Барис бацыд уыцы комитеты скондмæ. Хæсты фæлтæрд лæг бастдзинад дардта Цæгат æмæ Хуссары партизанты къордтимæ. Уый-иу арæх æрымысыд зынгæ революционертæ Дзадтиаты Александр, Санахъоты Мате æмæ æндæрты. Уымæн æмæ меньшевикты архайды тыххæй зонæнтæ лæвæрдта уыдонмæ.

Барис йæ сæрибар рæстæджы хæдзарон куыстыты æххуыс кодта йæ ныййарджытæн дæр. Йæ фыд Дзамболат куыстуарзаг уыд. Цæрæг хæдзарыл нымад уыдысты. Дардтой бирæ стурвос æмæ лысттæгкъах фос. Горæты йын уыд дукани. Наташа куыд зæгъы, афтæмæй дзы æрмæст урсаджы продукттæ нæ уæй кодтой, фæлæ ма сӕхӕдӕг цы "карамель" æмæ "кис-кис" конфеттæ арæзтой, уыдон дæр. Хæлæггæнджытæ дæр бирæ уыд Дзамболатмæ æмæ йæ рахуыдтой кулак, æвзаг хастой хицауиуæгадмæ, фæлæ йыл кулачы ном сæвæрын сæ бон нæ бацис. Уымæн æмæ нæ дардта æххуырстытæ. Цы сын æнтыст царды, уый уыд сæ уæнгты тыхы руаджы. Цы дыууæ лæппу æмæ 6 чызджы хъомыл кодта, уыдон хæдзары алыгъуызон куыстытæ дæр кодтой сæхæдæг æмæ йæ нæ хъуыдис æххуырстытæ дарыны сæр.

Партизанты къорды уæвгæйæ, Барис æмæ йе ‘мбæлттæ зыдтой меньшевикты фыдвæндты тыххæй. Æмæ æрхæццæ уыцы бон дæр. 1920 азы 12 июны гуырдзиаг меньшевикты гварди æрбабырста горæт Цхинвалмæ. Горæт хъахъхъæнджытæй уæд фæмард тынг бирæ. Гæрзифтонг æфсадæн ныхкъуырд радтын нæ бафæрæзтой, уымæн æмæ сӕм уадиссаг нæ уыд æхсæнгарз. Афтæмæй меньшевикты æфсад райдыдта Хуссар Ирыстоны территори ирон цæрджытæй сыгъдæг кæнын, арт æфтыдтой ирон хъæутыл. 20 июны уыдон фехстой 13 коммунары. Гуырдзиаг меньшевиктæ-иу цы хъæумæ бабырстой, уым мардтой, алидзын кæмæн нæ бантыст, уыцы цæрджыты, стæй-иу басыгътой хæдзæртты. Знауыры районы хъæуты басудзыны фæстæ уыдон сæ фæндаг акодтой Дзауы коммæ. Уыцы рæстæджы гуырдзиаг меньшевиктæ æрцахстой Мзиуы хъæуы цæрæг Галуанты Гедеваны дæр. Уый уыд æнӕахуыргонд лæг æмæ йæ гуырдзиæгтæ куы фарстой, зæгъгæ, цæй тыххæй хæцыс, уæд сын æмбæлон дзуапп радтын йæ бон нæ бацис. Уæд æй фыднад фæкодтой æмæ йæ мардæфсон ныууагътой.

Уыцы цаутæ тасдзинад уагътой Мзиуы хъæуы цæрджыты зæрдæты æмæ хъæуы хистæр лæгтæ аскъуыддзаг кодтой, цæмæй уыдон дæр баиу уой лигъдæттимæ. Хъæуы цæрджытæй бирæтæ сæ цæхæрадæтты скъахтой уæрмытæ æмæ уым ныгæдтой, сæ муртæй æнæмæнгхъæуæгыл цы нымадтой, ахæм дзаумæтты. Афтæ Мзиуы хъæуы цæрджытæ дæр баиу сты гыццылæй-стырæй Цæгат Ирыстонмæ цæуæг лигъдæттимæ.

Барисы фыд, Еналдыты Дзамболат нæ акуымдта лигъдæттимæ, баззад хъæуы иунæгæй. Барисæн зын уыд йæ фыды хъæуы ныууадзын, фæлæ иннæ бинонты хъуыд Цæгатмæ, сæ хæстæджытæм фæхæццæ кæнын. Тарстис фæндæгтыл сыл исты бæллæхтæ æрцæуынæй, уæлдайдæр та йæ хойæн, æнхъæлцау сылгоймаг уыд.

Уæдмæ меньшевиктæ бахæццæ сты Мзиумæ дæр. Æнæзонгæ адæмы фенгæйæ Дзамболат йæхи айста хъæдмæ. Уырдыгæй сæм йæ хъус дардта æмæ бирæ рæстæг нæма рацыд, афтæмæй хъæуыл пиллон арт сирвæзтис. Æрмæстдæр нæ сыгъдис, хъæугæрон цы хæдзар уыдис, уый. Хæдзар та уыд, Мзиумæ сæ чи бакодта, уыцы уæйгæнæджы. Цалдæр боны Дзамболат арвыста арсы лæгæты. Мзиуы хъæуы дæр иннæ хъæутау æртхутæг фестын кодтой, уый фехъусгæйæ Барис æрбаздæхт сæ хъæумæ йæ фыды агурæг. Æрлæууыдис, фæздæг ма чысылтæ кæцæй цыдис, уыцы сыгъд хæдзары раз æмæ ставд цæссыгæй куыдта йæ фыдыл, йæ сыгъдæттæ йын фæнычы агургæйæ. Уыдæттæм йæ хъус даргæйæ Дзамболат рахызт хъæдæй æмæ йе ‘ргом сарæзта хъæумæ. Æрлæууыд йæ фыртмæ чъылдымы ‘рдыгæй æмæ йæ хъæрæй афарста, мæн кæд нæ агурыс, мыййаг, зæгъгæ, сыгъдонты? Фыд æмæ фырт кæрæдзийыл ныццин кодтой.

Уый фæстæ йын Барис æрхуымæй радзырдта лигъдæттæ фæндæгтыл цы хъизæмæрттæ æвзæрстой, бирæтæ дзы уазал æмæ æххормагæй бынатмæ дæр куы нæ хæццæ кодта, бирæтыл та-иу низ куыд сыстад æмæ куыд цагъды кодтой, уыдæттæ. Уыцы ныхæстæм хъусгæйæ, Дзамболат йæ зæрдæмæ ныхъхъуыста. Зæронд лæг бонæй хъæды уыдис, изæр та-иу æрхъуызыд сæ сыгъд хъæумæ. Дзамболат куыд дзырдта, афтæмæй цалдæр боны фæстæ хъæумæ æрбаздæхтысты сæ сыхæгтæ - фыд æмæ фырт, цæмæй семæ ахастаиккой, уæрмы сын ныгæд чи уыдысты, уыцы картофтæ.

Сæгъы цармæй хуыд хызын куыддæр байдзаг кодтой, афтæ атындзыдтой хъæды ‘рдæм, цæмæй сæ бинонты баййафой. Уыдон баивæрзтысты, фæлæ Дзамболаты хъæдмæ цæугæйæ меньшевиктæ бафиппайдтой æмæ йæ фæстейæ æхсын райдыдтой, йæ фæстæ гуырæй гуырмæ цæугæйæ. Зæронд лæг сæ йæхæдæг дæр æхста йе ‘хсæнгарзæй. Меньшевиктæ уыдысты бæхтыл æмæ Дзамболатæн тынг тæссаг уыд, куы йæ баййæфтаиккой, уымæй. Хъæуы ‘рдæм зулаивæй кæсгæйæ, йæхимид хæрзбон дзырдта йæ уарзон сыгъд хъæуæн, фæлæ цалдæр метры æддæдæр йæ цæст схæцыд, зымæджы зæй кæм рацыд, уыцы лæбырды иу мæнг бынатыл. Йæхи йæм баппæрста æмæ дзы ахызт иннæрдæм, йæ ных сарæзта Къусджыты хъæуы ‘рдæм. Гуырдзиæгтæ æнхъæлдтой, зæгъгæ, раджы уа, æви æрæджы, уæддæр рахиздзæн уырдыгæй, кæнæ та уым ныссæлдзæн æмæ амæлдзæн. Афтæ йæм фенхъæлмæ кастысты цалдæр сахаты æмæ æддæмæ куынæ хызт, уæд ацыдысты. Дыууæ хатты йе знæгтæй аирвæзгæйæ Дзамбол йæ хъысмæты æртыккаг хатт нал сфæлвæрдта æмæ æфцæджы сæрты ахызт Цæгат Ирыстоны ‘рдæм.

Барисы уыцы рæстæджы цалдæр хатты бахъуыд æфцæджы сæрты ахизын. Фæстаг хатт куы раздæхт фæстæмæ, уæд аскъуыддзаг кодта, цæмæй йæ фыды абæрæг кодтаид. Бирæ йæ фæцагуырдта хъæуы алывæрсты, бабæрæг кодта арсы лæгæты дæр, фæлæ йæ нал ссардта. Йæ бон куы базыдта, уæд бинонтимæ йæ цæгатмæ кæй нæ акодта, уымæй йæхи æфхæргæйæ аздæхт фæстæмæ Цæгат Ирыстонмæ, йæ бинонтæ кæмæ цардысты, уыцы хæстæджытæм. Йæ хотæ се ‘фсымæры хъуыддаг куы бамбæрстой, уæд хъазыны охыл сæ фыды æндæр хатæны бамбæхстой. Барис æнкъардæй бахызт хæдзармæ æмæ йæ цæссыгтæ сæрфгæйæ фехъусын кодта, кæй нал ссардта йæ фыды, æвæццæгæн, æй зæгъгæ, гуырдзиæгтæ амардтой. Дзамболат нал бабыхста æмæ рахызт йæ фыртмæ. Кæрæдзийыл та куыннæ фӕцинтӕ кодтаиккой!

Фыдрæстæджытæ фесты. Меньшевиктæ дæрæн æрцыдысты, лигъдæттæ фæстæмæ здæхын райдыдтой сæ сыгъд уæзгуытæм. Фæлæ дзы алкæмæн æрыздæхын нæ бантыст. 20 мин адæймагæй фылдæр баззадысты Цæгат Ирыстон æмæ æндæр рæтты цæргæйæ. Фæстæмæ чи æрыздæхтысты, уыдонимæ уыдысты Еналдыты бинонтæ дæр.

39
Хуссар Иры аивдæр хъæу: меценат аразы кувæндæттæ Знауыры районы

Хуссар Иры аивдæр хъæу: меценат аразы кувæндæттæ Цъорбисы

327
(ранӕуӕггонд 14:10 14.10.2020)
Уæгъдибар хъæбысхæстæй Уæрæсейы сæйраг тренер Тедеты Дзамболаты азы размæ бафæндыд йæ райгуырæн хъæу Цъорбисы сæрмæ къуылдымæй скæнын хæрзарæст кувæн къуым. Хъæдрæбын уыдзæн кувæндон, аргъуан, дзæнгæрæгдон, фонтан, мæсгуытæ æмæ Гомарты дзуармæ бацæуæны æрдынæг

ЦХИНВАЛ, 14 окт — Sputnik, Плиты Фатимæ. Хуссар Ирыстоны Знауыры районы Цъорбисы хъæуы сæрмæ къуылдымыл фæуд кæны егъау кувæн комплексы арæзтад. Йе сконды ис рагон мыггаджы дзуар, рæстдинон аргъуан, фæлдыст æмæ бацæуæн мæсгуытæ.

Цорбис
© Sputnik / Natalia Airiyan
Цъорбис

Цъорбисы ногдзинæдтæ арæзт цæуынц Уæрæсейы уæгъдибар хъæбысхæсты сæйраг тренер Тедеты Дзамболаты фæндон æмæ хæрдзтæй. Кувæн бынаты арæзтæдтæй дарддæр фæстаг дыууæ азы ивындзинæтæ сæ фæд ныууагътой хъæуыл дæр. Йæ тæккæ центры Пронейы доны сæртыл хид фæуд кæны цалцæг. Ӕнцойгæрæнты кæрæтты дыууæ фарс дæр æрбынат кодтой фæйнæ дыууæ æфсæн фыранкы, уыдон хъызгæ кæсынц æрбацæуæгмæ.

"Кавказаг фыранктæй цыппар сæвæрдтой хиды хъустыл. Хид йæхæдæг кæны Тедеты мыггаджы кувæн бынæттæм æмæ у Цъорбисы хъæумæ бахизæн. Дамгъæ "Т"-йæ та нысан кæнынц Тедеты мыггаг сæхи", - загъта арæзтады кусæг Рубен Абрамян.

Цорбис
© Sputnik / Natalia Airiyan
Цъорбис

Хидæй чысыл фалдæр хъæуы астæу дæр хæрзарæзт цæуы сæрибар территори хъæуы административон бæстыхæйтты цур. Ам хъуамæ арæзт æрцæуа чысыл фæзуат, йæ фидыц та уыдзæн генералиссимус Иосиф Сталины бæрзонд цырт.

"Ӕртæ метр уыдзæн йæ бæрзæнд. Дзамболаты бафæндыд, йæ хъæуы центры цы фæзуат цæттæ кæны, уый баххæст кæнын советон фæтæджы цыртæй", - загъта арæзтады къухдариуæггæнæг Тедеты Георгий.

Сæйраг арæзтæдтæ, кæцытæ ныфс дæттынц ам скæнын Хуссар Иры иууыл уындджындæр цæрæн пункт, сты хъæуы сæрмæ къуылдымыл. Ивгъуыд аз ам сæвзæргæ арæзтадон фæзуат бонæй бон уæрæхдæр кæны. Раздæр ацы уæлвонг бынаты уыд мыггаджы уæлмæрд æмæ æрдæгкалд кувæндон.

"Мыггаджы дзуар арæзт фæцис, йæ раздæры хуызы йæ сарæзтам. Ныр ма йæм хъæуы бахæссын уазнывтæ, кæцытæ сæрмагондæй саразын кодтам. Йæ фарсмæ 20 метры бæрзæндæн мыггаджы мæсыг арæзт куы фæуа, уæд сæ афлæмбылай дæр фæуындджындæр кæндзыстæм", - дзуры Тедеты Георгий.

Уæлмæрды æмбондгæрæтты ис фæлдыст мæсгуытæ арæзтады инициаторæн йæ фыд Илья, йе 'фсымæр Ибрагим æмæ фыды æфсымæр Хъазбегæн. Бахизæн хъахъхъæнынц æфсæн домбайтæ.

  • Тедеты мыггаджы кувæндоны кæлæнтæ
    Тедеты мыггаджы кувæндоны кæлæнтæ
    © Sputnik / Natalia Airiyan
  • Тедеты мыггаджы кувæндоны кæлæнтæ
    Тедеты мыггаджы кувæндоны кæлæнтæ
    Фото из архива Георгия Тедеева
  • Тедеты мыггаджы кувæндоны кæлæнтæ
    Тедеты мыггаджы кувæндоны кæлæнтæ
    Фото из архива Георгия Тедеева
  • Тедеты мыггаджы кувæндоны кæлæнтæ
    Тедеты мыггаджы кувæндоны кæлæнтæ
    Фото из архива Георгия Тедеева
  • Тедеты мыггаджы кувæндоны кæлæнтæ
    Тедеты мыггаджы кувæндоны кæлæнтæ
    Фото из архива Георгия Тедеева
  • Тедеты мыггаджы кувæндоны кæлæнтæ
    Тедеты мыггаджы кувæндоны кæлæнтæ
    Фото из архива Георгия Тедеева
  • Тедеты мыггаджы кувæндоны кæлæнтæ
    Тедеты мыггаджы кувæндоны кæлæнтæ
    Фото из архива Георгия Тедеева
  • Тедеты мыггаджы кувæндоны кæлæнтæ
    Тедеты мыггаджы кувæндоны кæлæнтæ
    Фото из архива Георгия Тедеева
1 / 8
© Sputnik / Natalia Airiyan
Тедеты мыггаджы кувæндоны кæлæнтæ

"Фыццаг уал Тедеты Дзамболаты бафæндыд, йæ рагфыдæлтæ цы уæлмæрды ссардтой се ʻнусон бынат, уый æмбæлон уагмæ æркæнын æмæ сæнидзын кæнын мыггаджы дзуар. Фæлæ куыст куы сцайдагъ ис, уæд та йæ бафæндыд ноджы фылдæр саразын", - бафтыдта Георгий.

Уыимæ иумæ ма цайдагъ цæуы инфраструктурæ дæр - суагътой электроххах, дон, фæхуыздæр кодтой фæндаджы уавæр. Дзуарæй фалдæр та агъуысты бын бакодтой Чырыстийы номыл аргъуан. Арæзтадон куыстыты агъоммæ арфæ радта алайнаг епархийы динамонæг Иаков. Фæстæдæр ам Хуыцаумæскуывдтæ уадздзæн фыд Герман.

Цорбис
© Sputnik / Natalia Airiyan
Цъорбис

"2021 азы кæронмæ, Хуыцауы фæндæй, хъуамæ фæуæм. Дыууæ километры дæрддзæфæй рауагътам дон, уыдзæн дзы фонтантæ, рухсытæ. Нывгæнджытæ Уалыты Захар æмæ Хетæгкаты Аслан цæттæ кæнынц цыппар стыр уазнывы - Чырысти, Сыгъдæг Гиуæрги, Мад Майрæм æмæ Николай Чудотворец. Уыдон сфæлынддзысты мæсгуыты фæрстæ", - загъта аразæг.

Аргъуаны цур сарæзтой дзæнгæрæгдон. Уый уыдзæн иуыл стырдæр Хуссар Иры, дæс дзæнгæрæджы скусынгæнæн уыдзæн телефоны руаджы дæр.

"Сæ уынæр хъуысдзæн комæй коммæ дæр. Иууыл хуыздæр æрмæг цы ис, уымæй скодтой дзæнгæрæгтæ", - бафтыдта Тедеты Георгий.

Цы сарæзтой, уый æмбæрц ма ам фæзындзæн фæстæдæр - дыууæ æфсæддоны цырт, сæ цырты рæбын фонтан, фæзындзæн дзы цæрæнуæттæ дæр.

"Дзамболтат, зæгъæн ис, алы бон дæр ис ам. Дзуры телефонæй æмæ йæ цæст ахæссы куыстытыл. Ноджы ма йæм фæзынд ног хъуыдытæ. Уый канд нæ сæйраг инвестор нæу, фæлæ ма проектгæнæг дæр, йæ зæрæдæ иууылдæр ам ис", - бафтыдта уый.

Храм в Цорбис
© Sputnik / Natalia Airiyan
Цъорбис

Арæзтады къухдариуæггæнæг балхынцъ кодта, уалдзæджы кæй æрхондзысты ландшафтон дизайнерты дæр. Гæнæн ис æмæ фидæны та суа молодзандонон комплекс.

Социалон хызæгты ныр дæр парахт цæуынц арæзтады хуызджын нывтæ, Цъорбисы ныридæгæн дæр фæхонынц Хуссар Иры рæсугъддæр хъæу.

327
Постхæссæг Кæрчиты Вера

Фарны хабӕрттӕ алы хӕдзармӕ дӕр: постхӕссӕг йӕ зын, фӕлӕ ахсджиаг куысты тыххӕй

45
(ранӕуӕггонд 14:12 09.10.2020)
Кæрчиты Вера постхæссæгæй кусын æрæджы райдыдта. Уый адæмæн лæггад кæны, сæ зæрдæтæм сын хæссы фарны æнкъарæнтæ, афоныл сын байуары, цы газеттæ æмæ журналтæ рафыссынц, уыдон

ЦХИНВАЛ, 9 окт – Sputnik, Дриаты Лейла. Ныры рӕстӕджы –интернет ӕмӕ массон коммуникациты дуджы уӕддӕр газеттæ, журналтæ æмæ чингуытæ æнгом баст сты адӕмы цардимæ. Зæгъæм, республикӕйы цӕрджытӕ кӕд интернеты руаджы базонынц дунейы ӕрцӕугӕ хабӕртты тыххӕй, уӕд бынӕттон мыхуырон рауагъдты фӕрцы та адæймаг лæмбынæг æмæ арфдæр базонгæ вæййы ирон æгъдæутты мидисимæ, фæзминаг адæмты цардвæндагимæ, хъомыладон фарстатимæ… Ацы хабæрттæ къухы бафтынц постхæссæджы руаджы дæр.

Кæрчиты Вера постхæссæгæй кусын æрæджы райдыдта. Уый адæмæн лæггад кæны, сæ зæрдæтæм сын хæссы фарны æнкъарæнтæ, афоныл сын байуары, цы газеттæ æмæ журналтæ рафыссынц, уыдон. Хæссы сын сæ пенситæ æмæ ӕндӕр фиддонтӕ дæр.

Вера ацы бæрнон куысты цы цыбыр рæстæг кусы, уым ыл адæм сæ цæст æрæвæрдтой, ирон сылгоймаджы миниуджытæ йæ туджы кæй сты, куыстуарзаг, хæрзæгъдау, хæрзæфсарм кæй у, уый тыххæй. Кæд иудадзыг къахыл лæууы, уæддæр æй фæлладгъуызæй ничима федта, адæмимæ дзуры фæлмæнæй, раст цыма йæ хиуæттæ сты, уыйау.

"Кæй зæгъын æй хъæуы, мæ куыст иууыл æнцонтæй нæу, уый удуæлдай фыдæбон домы сæрдæй, зымæгæй, æнтæф уа æви къæвда уара, уый нæ хатгæйæ. Уыцы уæззау хызын, газеттæ æмæ журнæлттæ йедзагæй сæккой кæнын æмæ йæ уынгты æрвылбон цалдæр километры хæссын бирæты бон нæ бауыдзæн. Ам фыццаджыдæр, адæймаг хъуамæ уа æнæниз, куыстхъом, стæй йæ исты хъуамæ разæнгард кæна, ома, адæмæн хорздзинад хæсса æмæ йын хорз мызд фидой йæ фыдæбонæн", - зæгъы Вера.

Дæргъвæтин æмæ цымыдисаг у постæн йæ истори. Адæм ын йæ лæггæдтæй пайда кæнынц 18-æм æнусæй фæстæмæ, æмæ абон дæр у ахадгæ.

Цард бирæвæрсыг у, æмæ дзы алы къабазы дæр чи цы куыстыл хæст у, уыдонæй иуæй дæр æвзæр зæгъæн нæй, иууылдæр хъæугæ кæнынц нæ царды æмæ сæрмæ хæсгæ сты. Нæ республикæйы адæмыл чи хъуыды кæны, сæ цин æмæ сын сæ зын зæрдæйæ чи æнкъары, фарны хабæрттæ сын чи хæссы сæ хæдзæрттæм, уыдонæн зæрдæбын арфæтæ.

45
Цӕрджыты фехъустой: арӕзтады министрад аивта микрорайон БАМ-мӕ фӕндагарӕзтады проект

Цӕрджыты фехъуыстой: арӕзтады министрад аивта БАМ-мӕ фӕндагарӕзтады проект

6
(ранӕуӕггонд 17:12 22.10.2020)
Фӕндаг рауӕрӕх кӕндзысты авд метры онг ӕмӕ йӕ баххӕст кӕндзысты донцӕуӕн канализацийӕ, ахӕм уыдысты цӕрджыты домӕнтӕ

ЦХИНВАЛ, 22 окт — Sputnik, Плиты Фатимӕ. Хуссар Ирыстоны столицӕйы ӕфсӕддон городокы цӕрджыты домӕнтӕ бахынцыдтой арӕзтады министрады БАМ-мӕ бацӕуӕн фӕндӕгарӕзтады рӕстӕджы.

Мӕйы райдайӕны микрорайоны цӕрджытӕ рацыдысты Инвестицион нывӕзты фӕлгӕтты арӕзтцӕуӕг проекты ныхмӕ.

"Цӕрджыты ӕппӕт домӕнтӕ бахынцыдтой. Куыстыты рӕстӕджы ма уыдзӕн ӕндӕр баххӕстгӕнинӕгтӕ", - загътой арӕзтады министрады пресс-службӕйы.

Цалцӕггӕнӕн куыстытӕ цы фадыгыл цӕуынц, уым фӕндаджы уӕлцъар рауӕрӕх кӕндзысты авд метры онг кафе "Барс"-ы зӕххы фӕрцы.

"Кафейы бардарӕг Чилӕхсаты Владимир йӕ зӕххы хай радта фӕндаг рауӕрӕх кӕнынӕн. Фӕлӕ йын йӕ ӕмбонд ногӕй сараздзыстӕм", - загъта арӕзтады къухдариуӕггӕнӕг Плиты Хох.

Районы депутат Сланты Иваны ныхӕстӕм гӕсгӕ, цӕрджытӕ райгонд сты ног рацарӕзтгонд проектӕй.

"Мах цӕттӕ уыдыстӕм тох кӕнын адӕмы бартыл, фӕлӕ нын арӕзтады министрады нӕ къух сарӕзтой президенты ӕмархайдӕй", - загъта депутат.

При  строительстве дороги в микрорайон БАМ учли пожелания жителей
© Sputnik / Фатима Плиева
Цӕрджыты фехъустой: арӕзтады министрад аивта микрорайон БАМ-мӕ фӕндагарӕзтады проект
6