Мамытаты Геннадий

Мамытаты Геннадийы "Аивадон балц": фыдӕлты истори, хъӕууон цард ӕмӕ ивгъуыйгӕ фӕзындтӕ

108
(ранӕуӕггонд 11:22 11.08.2020)
Мамытаты Геннадий радзырдта Sputnik, хӕдахуыр телеоператорӕй куыд ссис популярон телеамонӕг ӕмӕ блогер, кӕцыйы алӕвӕрдтӕ исынц рекордон бакастытӕ социалон хызӕгты ӕмӕ ӕгас бинонты ӕмбырд кӕнынц ПТРК "Ир"-ы экраны раз

ЦХИНВАЛ, 4 авг– Sputnik, Плиты Фатимӕ. Стыр стажимӕ телеоператор Мамытаты Геннадий цалдӕр азы размӕ йӕ ных скодта уӕрӕх экранмӕ - лӕппу йӕ хӕсыл нымайы Ирыстоны хуысгӕ хъӕуты бахъахъхъӕнын видеокамерӕйы фӕрцы. Цыбыр рӕстӕгмӕ йӕ алӕвӕрд "Аивадон балцы" тынг спопулярон, Хуссар Ирыстоны паддзахадон телеуынады экранты раз ӕрӕмбырд кӕны ӕнӕхъӕн бинонты, социалон хызӕгты та бынӕттон контентӕн уый райсы рекордон бакасттӕ.

Телеуынадмӕ операторӕй кусынмӕ Гена бацыд ивгъуыд ӕнусы.

"27 размӕ бацыдтӕн телеуынадмӕ кусынмӕ, уӕды уацхӕссӕг Уазӕгты Марфайы амындмӕ гӕсгӕ. Фӕлӕ йӕ уарзгӕ нӕ кодтон мӕ куыст. Темӕ куы ахизы фыдӕлты истори ӕмӕ хъӕутӕй, уӕд ӕй нӕ уарзын, ӕмбырдтӕ, арӕзтад ӕмӕ интервьютӕ мӕн нӕ цымыдис кӕнынц", - дзуры телеамонгӕг.

Мамытаты Геннадий ныры онг систа Ирыстоны 35 хъӕуы, уыдонӕй фондзы фӕстаг цӕрджытӕ аивгъуыдтой се 'нусон бынатмӕ, науӕд та хуыздӕр цардагур ӕмӕ дзы ныр ӕрфысым сты сырдтӕ.

Геннадий Мамитов
© Sputnik / Natalia Airiyan
Мамытаты Геннадий

"Хъӕууон адӕймаг райгуырдӕй фӕстӕмӕ кӕны фыдӕбон. Канд йӕхицӕн, йӕ зӕнӕгӕн нӕ, фӕлӕ ма йӕ фӕллоййӕ рӕдауӕй дӕтты искӕмӕн дӕр. Ахӕм адӕймагӕн ӕз тынг кад кӕнын. Уымӕн райдытон ацы куыст дӕр - кӕсджытӕн ӕвдисон хъӕууон царды тыххӕй", - банысан кодта амонӕг.

Геннадийы алӕвӕрд у иунӕг Хуссар Ирыстоны, кӕцы арӕзт цӕуы иууылдӕр йӕхи тыхтӕй. Уый у йӕхицӕн режиссёр, оператор, шофыр ӕмӕ амонӕг дӕр.

"Мӕнӕн иунӕгӕй ӕнцондӕр у кусын, уый уымӕн нӕу, ӕмӕ иууыл хуыздӕр кусӕг ӕз дӕн. Кадр хъуамӕ ист ӕрцӕуа, ӕз ӕй куыд уынын, афтӕ", - нымайы Гена.

Телеамонӕг дзуры сӕрибар стилы, цыма уыцы иу уысмы йӕ хъуыдыйы цы фӕвӕйы, уый зӕгъы, фӕлӕ, уйӕ ныхӕстӕм гӕсгӕ, уый йӕ алӕвӕрдтӕм йӕхи фӕцӕттӕ кӕны бирӕ рӕстӕг.

"Развӕлгъау бадзурын нӕ уарзын - ахуыргонд дзырд кӕной, сӕ хуыздӕр хӕдон скӕной - уый мӕ нӕ фӕнды. Уыд ахӕм цаутӕ ӕмӕ иу ӕмбисбон фӕцыдтӕн хъӕумӕ ӕмӕ-иу рабӕрӕг, йӕ иунӕг цӕрӕгӕн йӕ дзӕргъ фесӕфт ӕмӕ йӕ бынаты нӕ баййӕфтон. Агуырдта-иу ӕй кӕмдӕрты. Ӕмӕ та-иу ӕз дӕр фӕстӕмӕ раздӕхтӕн. Текст нӕ фыссын, фӕлӕ алкӕцы хъӕу дӕр развӕлгъау сахуыр кӕнын", - бафтыда уый.

Геннадий Мамитов
© Sputnik / Natalia Airiyan
Мамытаты Геннадий

Популярондӕр телеамонӕджы географи хизы Хуссар Ирыстоны арӕнтӕй дӕр - уый фӕнд кӕны суанг туркаг ирон хъӕутӕм дӕр ацӕуын.

"Турчы ис цыппар ирон хъӕуы, уыдон фӕнд кодтон сисын, билеттӕ дӕр мын уыдысты ист. Ныр ӕнхъӕлмӕ кӕсынц фӕндаджы ӕрбакодмӕ. Уымӕй дарддӕр хъуамӕ ӕрзилон Цӕгат Иры цымыдисон бынӕттыл дӕр", - бафтыдта лӕппу.

Цалынмӕ дунейы бирӕ тобӕтӕ ис коронавирусы пандемиийы фӕдыл, уӕдмӕ уал Генайӕн Хуссар Ирыстоны дӕр бирӕ ис фенинаг, ӕрзилинаг.

"Ленингоры районы Дзимыргом ныр сӕдзӕрӕг ис, фӕлӕ ам йӕ рӕстӕджы уыд нӕргӕ хъӕутӕ. Ӕгас Чысангом сты урдыгӕй рацӕугӕ. Ӕз дзы хъуамӕ равдисон аст хъӕуы цард, ӕрмӕг ӕрммбырд кӕнынӕн мӕ бахъӕудзӕн мӕ къуырийы фылдӕр", - дзуры йӕ ӕввахс нывӕндтӕ уый.

Дзимыры коммӕ балцы размӕ ссардта, ацы комӕй ӕндӕр рӕттӕм бирӕ ӕзты размӕ чи фӕлыгъд, ахӕм адӕмы дӕр, цӕмӕй радзурой, сӕ райгуырӕн хъӕуты цард куыд цыд, уыдӕттӕ.

"Дзимыры комы уыд Тогойты хъӕу, уырдыгӕй ацӕугӕ ссардтон иу сылгоймаджы Цӕгат Иры. Уый мын радзырдта хъӕуы истори. Сӕ комӕй ма йын арвыстон суар дӕр фондз литры. Йӕхӕдӕм мӕм стӕй дзырдта, ацы ӕрвитӕггаджы ӕбӕрц дам фыр цинӕй фӕкалдтон цӕссыг. Тынг цымыдисон гоймаг у, уый ӕвгъӕдджын уӕвгӕйӕ рамбылдта бӕхты дугътӕ сӕ комы", - бафтыдта уый.

Гена йӕхӕдӕг райгуырд Цхинвалы районы Сатихъары хъӕуы, фӕлӕ уырдӕм йӕ техникӕимӕ никуы фӕуазӕг.

"Мӕ хъӕу горӕты уӕлӕ ис. Ӕз та ӕвдисын, цы хъӕутӕ фӕххуысынц, уыдон. Хуссар Ир у Цхинвал ӕмӕ йӕ уидӕгтӕй (хъӕутӕй), ӕнӕуидаг йын уӕвӕг нӕй", - бафтыдта уый.

Телеамонӕг кӕд йӕ куысты тыххӕй исы ӕрмӕст чысыл мызд, уӕддӕр ын уый йӕ нывӕзттыл не 'ндавы.

"Фӕнды мӕ Цӕгат Ирыстоны национ телеуынынад "Осетия-Ирыстон", науӕд Спутник Хуссар Ирыстонимӕ ӕмгуыстад кӕнын. Ӕрмӕст кабинеты бадын мӕ бон нӕу, ӕз хъуамӕ цӕуон хӕхтӕм ӕмӕ хъӕутӕм", - балхынцъ кодта уый.

Геннадий Мамитов
© Sputnik / Natalia Airiyan
Мамытаты Геннадий

Мамытаты Геннадийы камерӕйы объективы бахауынц хъӕуты фӕстаг цӕрджытӕ, ирон ӕхсӕнады цардуагы цӕугӕ фӕзындтӕ, ногдзинӕдтӕ кӕй баивтой, ахӕм мигӕнӕнтӕ, ӕрмдӕсныйӕдтӕ, хицӕн хъӕуы ӕгъдӕуттӕ - уыдон иууылдӕр ӕвдыст цӕуынц йӕ алӕвӕрд "Аивадон балцы".

108
Транскам

Фондз мæйы æхгæд æмбæрзæны: куыд аиуварс кодта Хуссар Ир йæхи COVID-19-æй

49
(ранӕуӕггонд 16:12 16.09.2020)
161 боны бӕрц Хуссар Ир цард æндæр уавæрты – республикæйы цæрджытæн Уæрæсемæ ацæуыны фадæттæ фæкъуындæг сты, пандемийы рæстæг ивта царды фæтк æмæ æргътæ

ЦХИНВАЛ, 16 сен – Sputnik, Плиты Фатимæ. Хуссар Ир фондз мæйæ фылдæр цард æхгæд арæнты, ацы æмгъуыд нæ республикæйæ Уæрæсемæ ацыд 1600 адӕймаджы, фæстæмæ йæ райгуырæн бæстæмæ æрыздæхт 13 апрелӕй 31 августмӕ 1500 адӕймаджы.

Sputnik æрæмбырд кодта фондз мæйы дæргъы Хуссар Ир куыд цард COVID-19-ы пандемийы тыххæй æхгæд арæнты, уый фæдыл æрмæг.

Пандемийы æндæвдад

Дунейы коронавирусы пандемийы ӕндӕвдад Хуссар Ирыстон рахатыд ацы аз марты мӕйы. Уӕд ахуырады министрад аскъуыддзаг кодта бакӕнын ӕппӕт ахуырадон уагдӕтты карантин. Ахуырады системӕ архайдтой сцайдагъ кӕнын дистанцион формат. 5-æм апрелӕй коронавирусы апарахаты тасӕй Хуссар Ирыстон ӕмӕ Уӕрӕсейы ʻхсӕн арӕныл ӕнӕ сӕрмагонд барамындӕй ацӕуӕн нал уыд.

Рахицæн æрцыд аст категори, кæцытæн бар уыд цæуын, сæ нымæцы æфсæдонтæ, дипломатон мисситы кусджытæ æмæ æндæр категоритæ. Фæстæдæр арæн ноджы фæкарздæр ис.

161 боны бӕрц Хуссар Ир цард æндæр уавæрты – Хуссар Ирыстоны цæрджытæн Уæрæсемæ ацæуыны фадæттæ фæкъуындæг сты. Марты кæронæй республикæйы цадæггай райдыдта ивын цард - тобæтæ фæзынд массон мадзæлттæ ауадзыныл, ахуырад цадæггай цыд дистанцион форматмæ, фæивта куыстуæтты график, республикæйы фæзынд кæцыдæр медикаментты цухдзинад, дуканиты æргътæ ивтой.

COVID-19-æй рынчынтæ

Карантины рæстæг райгуырæн бæстæмæ чи здæхт, уыдон хсæн разынд коронавирусæй рынчынтæ. Вирус – иу фæбæрæг ис Уæрæсейы ахуыргæнæндæтты бынæттон цы фæсивæд ахуыр кодтой, уыдон хсæн. Рынчынтæ иууылдæр уыдысты карантины. Фыццаг рынчыны республикæйы сбæлвырд кодтой 6 майы, кæцы Хуссар Ирмæ æрцыд 30 апрелы.

"Карантины рæстæг Ӕнæниздзинад хъахъхъæнынады министрад Уæрæсейы рынчындæттæм арвыста 165 адæймаджы. Ацы æмгъуыд тестты руаджы сбæрæг кодтой 90 рынчыны коронавирусæй, уыдон иууылдæр низ хастой рог формæйы", - загътой Sputnik Ӕнӕниздзинад хъахъхъӕнынады министрады пресс-службæйы.

Пандемийы рӕстӕгыл арӕны сӕртыл адӕмы змӕлд куыд цыд, уыдоныл афӕлгӕст сарӕзта Фӕсарӕйнаг хъуыддӕгты министрад.

"Иумӕйагӕй сисгӕйӕ 13 апрелӕй 31 августмӕ РХИ ФХМ хаххыл Хуссар Ирыстонмӕ ӕрцыд 939 адӕймаджы, Уӕрӕсемӕ ацыд 1600 адӕймаджы", - дзырдæуы сæ хъусинаджы.

Уымӕй дарддӕр ма Хуссар Ирыстонмӕ цыдысты ӕндӕр министрады уылтыл. Бæстон схемæ та у ахæм:

  • Ӕнӕниздзинад хъахъхъӕнынады министрады уылты -165
  • Мидхъуыддӕгты министрады хаххыл - 74
  • Хъахъхъӕнынады министрады хаххыл - 219
  • Уӕлвӕткон уавӕрты министрады хаххыл - 6
  • Паддзахадон ӕдасдзинады комитеты хаххыл- 39
  • Паддзахады хьахъхъӕды службӕ – 3

Имӕйагӕй ӕппӕт уагдӕттӕ уылты 13 апрелӕй 31 августмӕ Хуссар Ирыстонмӕ ӕрцыд 1500 адӕймаджы.

Карантины зонæтæ

Апрелы мæйы Хуссар Ирыстонмæ æрцæуæггæгтæ цыдысты æнæмæнг карантины уылты. Хуссар Иры фыдæр кодтой ахæм зонæтæ, рынчындоны цалдæр этажы фæстæ карантинон зонæ сарæзтой Гуырæн хæдзары зæронд бæстыхай, Дзау æмæ Знауры рынчындæттæ, Уазæгдон "Алан"-ы. Югосетпотребнадзор æрцæуæггæгтæн арæзта тесттæ, æдæппæтæй сæ нымæц уыд 5173.

Коронавирусы апарахаты ныхмæ тохы оперативон штабы 28 июля аскъуыддзаг кодтой фыццæгæм августæй æнæ карантинæй æрцæуыны фадат раттын тæссаг вирусæй чи фæрынчын ис, уыдонæн.

15 сентябрæй Хуссар Ирыстон æмæ Уæрæсейы хсæн арæныл фæндагон змæлд ацыд хуымæтæг режимы.

49
Гасситы Анна

Хуссар Иры сомбон аразджытæй сæ иу Гасситы Анна

32
(ранӕуӕггонд 14:20 24.08.2020)
Сæйраг уый у, æмæ мæ зæрдæмæ цæуы мæ ахуыр, нæ фæфæсмон кодтон, кæй æрбацыдтæн нæ паддзахадон университетмæ, уымæй, банысан кодта чызг

ЦХИНВАЛ, 29 авг — Sputnik, Дриаты Лейла. Хуссар Ирыстоны Паддзахадон университеты курдиатджын æмæ æвзыгъддæр рауагъдонтæй иу у, йæ ахуыргæнджытæн æмæ йе ʻмкурсонтæн уарзон чи у, уыцы бафæзминаг уæздан, рæсугъд чызг Гасситы Анна.

Анна ахуыр кодта иу рæстæджы фæсарæйнаг æвзæгты æмæ ирон филологийы факультетты фæсаууонмæ хайады. Каст фæцис Цхинвалы 9-æм астæуккаг скъола æнтыстджынæй. Скъоладзау уæвгæйæ дæр ахуырмæ уыдис зæрдæргъæвд. Аннæ куы рахъомыл æмæ йæ сомбоны дæсныйадыл куы хъуыды кодта, ома, скъола каст фæуыны фæстæ йæ ахуыр кæм хъуамæ адарддæр кæна, уæд йæ зæрдæ фылдæр дзырдта мадæлон æвзаг хуыздæр базонын æмæ йæ бæстонæй сахуыр кæнынимæ. Равзæрста ирон филологийы факультет æмæ йæ зыдта, уырдæм æнæмæнгдæр кæй бацæудзæнис ахуыр кæнынмæ.

"Чысылæй фæстæмæ йæ зыдтон, ирон филологийы факультетмæ кæй бацæудзынæн, уый. Фылдæр мæ хъус дардтон ирон литературæмæ æмæ кастæн ирон классикты уацмыстæ. Ацы хъуыддаджы егъау уыдис мæ ахуыргæнджыты хайбавæрд дæр", - загъта Гасситы чызг.

Анна куыд банысан кодта, афтӕмӕй йæ зæрдæмæ нæ цæуы, не ‘взагæй арвистон кæй аразæм, ирон æвзагæн æцæгæлон чи сты, ахæм дзырдтæй кæй пайда кæнæм.

"Тынг бауарзтон ирон дзырд. Ис нæм ахæм уацмыстæ æмæ сæ мæ бон у сæвæрын зындгонд фæсарæйнаг классикты уацмысты æмрæнхъ", - дзуры уый.

Гасситы Анна йæ хæларимæ
© Sputnik / Дриаты Лейла
Гасситы Анна йæ хæларимæ

Рауад афтæ, æмæ чызг иуæндæсæм къласы куы уыдис, уæд йæ разы сæвæрдта хæс, иумиаг паддзахадон фæлварæн кæй хъуамæ радта тынг хорз нысаныл. Бахъуыд æй уæлæмхас англисаг æвзаг сахуыр кæнын, иуæй йæ зонындзинæдтæ фæарфдæр кæныны тыххæй, аннæмæй та, цæмæй фæлварæн хуыздæр радтаид. Æмæ уæд йæхи цæттæ кæнын райдыдта йæ репетитор, университеты фæсарæйнаг æвзæгты факультеты ахуыргæнæг Цхуырбаты Ланамæ.

 Æрыгон чызг уæд арфдæр аныгъуылд фæсарæйнаг æвзаджы сусæгдзинæдтæ базоныны, бамбæрста, дарддæр дæр æй кæй ахуыр кæндзæн скъола каст фæуыны фæстæ.

"Уый размæ дæр æй хатыдтæн, фæлæ æрмæстдæр уæд бамбæрстон æвзагæн йе ʻцæг тых. Стыр бузныг дæн мæ репетиторæй, уый руаджы бауарзтон фæсарæйнаг æвзаг. Фæлæ уæддæр æмæ уæддæр ирон дзырдæн æндæр ад ис. Стæй сæ барын дæр цæмæн хъæуы? Мæнмæ гæсгæ, адæймаг æрмæст иу æвзаг куы зоны, уæд æрмæстдæр иуæрдæм кæсы. Æмæ цалдæр æвзаджы та куы зонай, уæд та уæрæхдæр кæны дæ дунеæмбарынад дæр æмæ иумиагæй дæ хъуыды дæр. Алы æвзагæн дæр ис йæхи музыкæ, алы æвзаг дæр хæссы йæхи дунеæмбарынад", - банысан кодта Анна.

Æнтыстджынæй радта Хуссар Иры университеты бацæуæн фæлварæнтæ æмæ ссис дыууæ факультеты хуыздæр студенттæй сæ иу. Цымыдисон хъуыддаг ма уый у, æмæ Анна кæд ирон филологийы фæсаууонмæ хайады ахуыр кодта, уæддæр афтæ сарæзта æмæ барвæндæй лекцитæм цыд ирон филологийы боны хайадмæ.

Ахæм студентты, куыд фæзæгъынц, цырагъы рухсæй фæагурынц, æмæ æрыгон чызг йæ деканмæ куы бахатыд ацы хъуыддаджы фæдыл, уæд ын йæ ныхасыл дыууæ нал загътой æмæ ма йыл цин дæр бакодтой.

"Сæйраг уый у, æмæ мæ зæрдæмæ цæуы мæ ахуыр, нæ фæфæсмон кодтон кæй æрбацыдтæн нæ паддзахадон университетмæ, уымæй", - дзуры чызг.

Уæдæ адæймаг йæ ахуыры мидæг æнтыстджын куы вæййы æмæ йын æхсæнадон цардмæ дæр уæлæнгай ахаст куы нæ вæййы, уæд ахæм "удæгас" адæймагæн куыст ссарын проблемон никуы вæййы. Гасситы Анна дæр раст у ахæм адæймаг æмæ ныридæгæн кæны сфæлдыстадон куыст дæр. Кусы паддзахадон радиойы информацион хайады дикторæй. Ис ын хорз дикци æмæ ныхас та кæны сыгъдæг литературон æвзагыл.

Гасситы Аннæ йæ сæрибар рæстæджы кæсы æмдзæвгæтæ, уарзы музыкæмæ хъусын æмæ иунæгæй тезгъо кæнын.

32
Дзиццойты Юрий

Дзиццойты Юрий: Ирон тырыса райгуырд хуссары, уый фæстæ ссис æппæтирон

0
(ранӕуӕггонд 16:45 18.09.2020)
Филологон зонæдты кандидат Дзиццойты Юрий радио Sputnik Хуссар Ирыстоны паддзахадон тырысайы фæзынды тыххæй
Дзиццойты Юрий: Ирон тырыса райгуырд хуссары, уый фæстæ ссис æппæтирон

Æрвылаз 19 сентябры нæ республикæ нысан кæны паддзахадон тырысайы бон. Дзиццойты Юрийы куыд радзырдта, уымæ гæсгæ паддзахадон тырыса фæзынд фыццаг Хуссар Ирыстоны 1989 азы, фæлæ уый фæстæ ссис æппæтирон.

"Мах ног дугæн дзуапп чи хъуамæ радтаид, ахæм тырысайыл куы райдыдтам кусын, уæд историмæ аздæхтам нæ хъусдард. Индоевропæйаг адæмтæн сæ фылдæр хаймæ ис хуызты символикæ", - загъта Дзиццойты Юрий.

Юрийы ныхæстæм гæсгæ, индоевропайаг адæмтæн сæ фылдæр хайæн урс хуыз амоны – зонды куыст чи кодта уый, сырх та, йæ хъаруйæ чи куыста, уыдон хуыз.

"Мах, куыд индоевропæйаг адæмæн йæ иу къабаз, афтæ уыцы символикæ йæ фæд ныууагъта нæ историйы. Тырысайы хуыз æвзаргæйæ дискусситæ цыд æрмæстдæр æртыккаг хуыз æвзарыны рæстæджы, æмæ бур хуызыл аскъуыддзаг", - банысан кодта Юрий.

Дзиццойты Юрий бафиппайдта, хуызон сиволикæ нарты кадджыты дæр кæй ныууагъта йæ фæд, зæгъæм, Алæгатæн сæ хæдзар уыд урс, Æхсæртæггатæн та сæ дарæсы уыд сырх хуыз, æртыккаг социалон стратæ сты Борæтæ, уыдон ма фæхонынц Буртæ дæр. Ацы æртæ символикон нысаниуæджы ссисты вазыгджын аргумент тырысайы хуызтæ æвзарыны рæстæджы.

0
Темӕтӕ:
Радио иронау