Лолоты Альберт  (астӕуӕй) йӕ хӕлӕрттимӕ

"Фервӕзын ӕнхъӕл нал уыдтӕн": куыд фехӕлдта Хуссар Иры хӕст Лолоты Альберты цард

57
(ранӕуӕггонд 13:42 06.08.2020)
Дменисы хъӕуы цӕрӕг фӕцӕф ис хӕсты, нырма Фондзбонон хӕст нӕ райдыдта, афтӕ. Гуырдзыстоны ӕфсады ӕрбабырст уый ӕрӕййӕфта рынчындоны, уым ӕй ссардтой гуырдзиаг сармадзантӕ дӕр

Гӕбӕраты Элина, Sputnik 

Старшина Лолоты Альберт фӕцӕф ис 2008 азы августы фыццаг бонты. Уый уӕд куыста Хуссар Ирыстоны Хъахъхъӕнынады министрады. Хӕст уый арвыста рынчындоны, кӕцы уыд ӕппынӕдзух ӕсты бын. Альберты иннӕ цӕфтимӕ аластой Дзӕуджыхъӕумӕ ӕрмӕстӕр Цхинвалы хъахъхъӕнджытӕ гуырдзиаг ӕфсады куы фӕсырдтой, уӕд.

"Снайпер мӕ фехста фыццӕгӕм августы Дменисмӕ бахизӕны. Нӕмыг сӕмбӕлд мӕ фӕсонтыл ӕмӕ мын бахъыг дардта мӕ рагъыстӕг. Ӕз уыдтӕн фӕстаг, кӕцыйы ныххизын кодтой рынчындоны ныккӕндмӕ. 8 августы нырма уыдтӕн ӕртыккаг уӕладзыгыл палатӕйы", - радзырдта Альберт.
Альберт Лолоев
© Sputnik / Natalia Airiyan
Лолоты Альберт

Дохтыртӕ куыстой ӕнӕрлӕугӕйӕ, ӕхсӕвӕй-бонӕй, банысан кодта уый. Рынчындомӕ ластой тынг бирӕ адӕмы - куыд ӕфсӕддонты, афтӕ хуымӕтӕг цӕрджыты дӕр.

"Ныккӕнды уыд тынг ӕвзӕр уавӕртӕ. Талынг, рыг, зӕххыл-иу дон куы бакалдтой, цӕмӕй ма рыг кӕна, уӕд та-иу сцъыф ис. Иу ахӕмы та мын мӕ цӕф бастой, ӕмӕ уыцы рӕстӕджы цары сӕрст ӕркалд. Мӕ хъӕдгомыл ӕркалд сыджыт, уый адыл мӕ туг фӕхъӕстӕ ис. Бамбӕрстон, кӕй нал фервӕздзынӕн ӕмӕ дзырдтой дохтыртӕн, зӕгъын, мӕныл уӕ рӕстӕг мауал хардз кӕнут, иннӕ рынчынтӕ ӕркӕсут", - мысы йӕ царды уӕззау бонтӕ Альберт.

Рынчындӕтты уый фӕстӕ Альберт арвыста бирӕ мӕйтӕ: Цхинвалӕй йӕ арвыстой Дзӕуджыхъӕумӕ, уым реанимацийы загътой, кӕй нӕ фервӕздзӕн. Уый фӕстӕ йӕ арвыстой Мӕскуымӕ. Нӕлгоймаг асайдта мӕлӕты ӕмӕ рыздӕхт йӕ бинонтӕм. Ныр ӕм ӕнхъӕлмӕ каст реабилитаци, ногӕй йӕ бахъуыд ахуыр кӕнын цӕрын.

Фӕлӕ бинонты амондджын цард бирӕ нӕ ахаста. Дыууӕ азы фӕстӕ амард йӕ цардӕмбал - бабын ӕй кодта онкологи.

"Уым, ныккӕнды мӕ бинойнаг уыд мӕ фарсмӕ. Мӕн схуыссын кодтой ӕфсӕйнаг дуары комкоммӕ. Уый тынг тарст уыцы дуарӕй, цыма йӕ йӕ зӕрдӕ хатыд... "Град"-ы ӕхстӕй дуар баскъуыд, палатӕ байдзаг ис ӕфсӕн схъистӕй. Мӕ бинойнаджы срӕмыгъды уылӕн аппӕрста цалдӕр метры, ӕз дӕр фестадтӕн зӕххыл. Уӕдӕй фӕстӕмӕ фӕцудыдта ме 'мкъайы ӕнӕниздзинад", - дзуры нӕлгоймаг.

Супруга Альберта Лолоева
© Sputnik
Лолоты Альберты цардӕмбал

Дыууӕ азы фыдӕбоны фӕстӕ сылгоймаг амард, ныр дӕс азы дӕргъы Лолоты бинонтӕ цӕрынц ӕнӕ мадӕй.

"Мӕ бинойнаг куы амард, уӕд нӕ лӕппуйыл цыд ӕртӕ азы. Ныр ахуыр кӕны ӕстӕм къласы. Тынг хорз ахуыр кӕны, иу цыппар дӕр ын нӕй. Нӕ чызг та ацы аз фӕцис скъола ӕмӕ бацыд университетмӕ, равзӕрста юристпруденци ӕмӕ кӕстӕр кълӕсты ахуыргӕнӕджы дӕсниад", - сӕрыстыр у фыд йӕ цотӕй.

Сывӕллӕттӕ фылдӕр вӕййынц Цхинвалы сӕ хӕстӕджытӕм, лӕппу ахуыр кӕны интернаты.

Альбертӕн ис чысыл зӕронд хӕдзар Дменисы, йӕ агъуыст у тынг ӕдзӕллаг уавӕры, рудзгуытыл та ӕвджыты бӕсты ис конд полиэтилен. Хӕдзары хицау куыд дзуры, афтӕмӕй ӕвзӕр боныгъӕдты ӕддейӕ куыд фӕуары, мидӕгӕй дӕр афтӕ.

"Хицауадмӕ бахатыдтӕн профнастилы тыххӕй, цӕмӕй мӕ хӕдзары агъуыст раивон. Нӕйы мын нӕ загътой, фӕлӕ сӕ нырма ницы хъуысы", - катай кӕны уый.

Дом Альберта Лолоева
© Sputnik / Natalia Airiyan
Альберты хӕдзар
57
Къусраты Илья

Уазал æмæ стонгæй: куыд фервæзын кодтой иунæг лæджы Цхинвалы бархионтæ

644
(ранӕуӕггонд 11:38 01.03.2021)
Къусраты Илья ныридӕгӕн ис Хуссар Ирыстоны медико-социалон центры. Нæлгоймаг аззад адунейыл иунæгæй, нал ын ис зæрдиаг хиуæттæ. Уазал ӕмӕ стонгӕй мӕлӕтӕй нӕлгоймаджы фервӕзын кодтой Алайнаг епархийы моладзан ӕмӕ волонтертӕ

ЦХИНВАЛ, 1 мар – Sputnik, Плиты Фатимӕ. Афоныл аходӕн, хорз уавӕртӕ, хи хатӕн, ӕркаст ӕмӕ райгонд - ӕппӕт ацы хӕрзиуджытӕй ныридӕгӕн хайджын у Цхинвалы карджын цӕрӕг Къусраты Илья, кӕцы цалдӕр мӕйы размӕ фӕцӕймард уазал ӕмӕ ӕххормагӕй.

Къусраты Илья ныридӕгӕн ис Хуссар Ирыстоны медико-социалон центры. Нæлгоймаг аззад адунейыл иунæгæй, нал ын ис зæрдиаг хиуæттæ. Уазал ӕмӕ стонгӕй мӕлӕтӕй нӕлгоймаджы фервӕзын кодтой Алайнаг епархийы моладзан ӕмӕ волонтертӕ.

Илья Кусраев
© Photo : Лана Парастаева
Къусраты Ильяйы хатæн Турбазæйы

Алайнаг епархийы сӕйраг аргъуаны раздӕр ӕрвылсабаты арӕзтой ӕнӕргъ аходӕнтӕ иунӕг тыхст адӕмӕн. Ныридӕгӕн уыцы нывӕзт нӕ кусы, фӕлӕ моладзан рӕстӕгӕй-рӕстӕгмӕ уыцы адӕмы бӕрӕг кӕны сӕ цӕрӕнуӕтты.

"Туристон базӕйы иу чысыл къуымы цард. Моладзанмӕ фӕдзырдта цыппӕрӕм уӕладзыджы цӕрӕг, уый фехъусын кодта, нӕлгоймаг кӕй у иу къуыри ӕххормаг. Уыцы хабар уыд ноябры. Бацыдыстӕм ӕм ӕмӕ нын тыххӕй бакодта дуар", - радзырдта Sputnik волонтер Пæррæстаты Лана.

Йӕ ныхӕстӕм гӕсгӕ, карджын лӕг хуыссыд сынтӕгыл, йӕ цуры чысыл скъаппы уӕлтӕрхӕгыл уыд 500 сомы, уыдонмӕ нӕлгоймаг амыдта ӕмӕ куырдта дон.

"Дзырдта нын, дыууӕ бон дам доны хъӕстӕ нӕ дӕн, мæ риу дам судзы, ӕвӕццӕгӕн йӕ зӕрдӕйӕ тыхст. Уæд йæ къахыл дæр нал лæууыд", - загъта Лана.

Сылгоймӕтӕ цалдӕр хатты бабӕрӕг кодтой уым рынчыны ӕмӕ стӕй аскъуыддзаг кодтой алы амӕлттӕй дӕр уый бакӕнын Хуссар Ирыстоны медико-социалон центрмӕ.

"Хиуӕттӕ ӕмӕ йын бынтӕ нӕй. Уый центрмӕ бакӕнынӕн нын баххуыс кодта депутат Мулдарты Гарри. Дохтыр Дзуццаты Инара та йын сарӕзта рентген ӕмӕ ӕппӕт гӕххӕттытӕ", - балхынцъ кодта уый.

Илья Кусраев
© Sputnik / Natalia Airiyan
Къусраты Илья

Пӕррӕстаты Лана ма радзырдта, зӕгъгӕ, уагдоны нӕлгоймагмæ афтӕ хорз ӕркастысты, ӕмӕ ныр йӕ къӕхтыл слӕууыд.

"1942 азы гуырд Къусраты Ильяйы райстам парламенты, сӕрмагондӕй Мулдарты лӕппуйы куырдиатӕй. Цард тынг уӕззау уавӕрты, йӕ хатӕн ранӕй-рӕтты уыд тасмачъийæ ӕмпъыст. Йӕ уӕлӕ та уыйбӕрц чъизи дарӕс уыд, ӕмӕ сӕ тыххӕй раластам. Уыдон иууылдӕр бахъуыд акалын", - радзырдта Sputnik центры хистæр Теблойты Чермен.

Медико-социалон центры ныр нӕлгоймагмæ ис хорз каст, рахицӕн ын кодтой хицӕн хатӕн.

"Ӕркастыстӕм ӕм. Бакодтам ӕй рынчындонмӕ, йӕ хуыз йӕхимӕ рцыд, къахыл слӕууыд. Иннӕтимӕ ныхас кӕны", - радзырдта уагдоны хистӕр.

Илья Кусраев
© Sputnik / Natalia Airiyan
Къусраты Илья

Къусраты Ильяйӕн хӕстӕджытӕ дӕр ничи зыны. Нӕлгоймагӕн йӕ паспорты ис Къусратӕй иу нӕлгоймаджы телефоны номыр, фӕлӕ уый дӕр нӕ дзуапп кӕны.

"Бирӕтӕ мын лӕггад кодтой, Турбазайы ма куы цардтӕн, уæд - чи хӕлцадӕй, чи мигӕнӕнтӕй, чи та ӕхцайæ. Кургӕ ницы кодтон. Ир гыццыл у, фӕлӕ дзы хорз адӕм бирӕ ис. Хӕстӕджытӕ мын ис Гудзабары Кокойтӕй, нӕ ныййарджытӕ хотӕ уыдысты, стӕй дзы мӕхи мыггагӕй дӕр ис, фӕлӕ уыдонӕй мӕн никуы ничи рфарста", - радзырдта Илья.

Йæ ныхæстæм гæсгæ, уыдис ын мадызæнæгтæ дæр, фæлæ ныр уыдонæй сæрæгас ничиуал у.

"Беридзуары цардтӕн Къоркъуламӕ хӕстӕг. Фӕлӕ нӕ лидзын бахъуыд. Мӕ дыууӕ хо æмæ æфсымæр дӕр амардысты, сӕ маст мӕ бынтон бахордта", - радзырдта Илья.

Лӕг ныр сфидар ис ӕмӕ райзæрдæйæ цӕры центры, æрмæст ма катай кӕны, Турбазӕйы йӕ хатӕны цы мигӕнӕнтӕ баззад, уыдоныл.

644
Харебаты Заира йæ пациентимæ

Бузныджы аккаг дохтыр: Харебаты Заира рынчынтӕн хос кӕны дзырдӕй дӕр

187
(ранӕуӕггонд 13:51 20.02.2021)
Рынчын дохтыры хъару, зонындзинæдтæ æмæ арæхстдзинадыл куы баууæнда, йæхимидæг фидарæй куы зæгъа, адзæбæх мæ кæндзæн, уæд уымæн æнæрцæугæ нæй, нымайы нуæртты дохтыр

ЦХИНВАЛ, 20 фев – Sputnik. Дриаты Лейла. Дæсныйæдтæй æппæтæй ахсджиагдæр,  зындæр æмæ вазыгджындæр дохтыры дæсныйад у. Медицинæйы дæсныйад у уды æмæ зæрдæйы сгуыхтдзинад. Домы удуæлдайад æмæ сыгъдæг хъуыдытæ. Хорз дохтыры алы хатт дæр Хуыцауæй лæвæрд фæхонынц, ома йæм Хуыцауæй лæвæрд курдиат ис. Ахæм миниуджытæй се ‘ппæтæй дæр æххæст у нуæртты дохтыр Харебаты Заира.

Адæймаг æвзæр ныхас, тарст ныхас куы фехъусы, уæлдайдæр дохтырæй, уæд уый у маргæй фыддæр, æмæ лæг фесæфы йæ адзалæй раздæр. Лæгъз ныхас та у сой, хуры тын, цъæх арвы рухс, цин, базырджын маргъау, фидар. Лæгæн фесæфы йæ низ, дохтырæй уынгмæ куы рацæуы, уæд.

"Рæвдауæн ныхас æппæт хостæй тыхджындæр у. Ныртæккæ медицинæ стыр къахдзæфтæ акодта размæ, фæзынд бирæ ног хостæ æмæ ифтонггæрзтæ. Уый махæн фадат дæтты адæмæн хæрзхъæд лæггад кæнынæн", - зæгъы Заира.

Рынчын дохтыры хъару, зонындзинæдтæ æмæ арæхстдзинадыл куы баууæнда, йæхимидæг фидарæй куы зæгъа, адзæбæх мæ кæндзæн, уæд уымæн æнæрцæугæ нæй. Ныфсæй аразгæ у алцы дæр…

"Бузныг, Заира, дæ къухтæ фæрнæй фæдар, дæ лæггад бирæ", - ахæм зæрдæйæ цæуæг ныхæстæ арæх фехъусы рынчынтæй. Уарзынц æй йæ фæлмæндзинад æмæ арæхстдзинады тыххæй. У сыгъзæрин адæймаг æмæ фæлтæрд дохтыр. Фыццаджыдæр йæхицæй карзӕй домы куыст.

"Ныртæккæ тæссаг рæстæг у. Ацы тыхст рæстæджы кусын райдыдтон уæззау рынчынтимæ Республикон клиникон рынчындоны. Карз низимæ тохы бацæугæйæ, дохтыртæ, медицинон хотæ, æппæт медицинон персонал архайдта æххуысхъуаг адæмы фарсмæ балæууыныл", - дзуры Заира.

Æнæнцой адæймаг у Заира, ис æм рæсугъд нысæнттæ æмæ фæндтæ. Йе ‘ххуыс искæй куы бахъæуы, уæд дзы уайтагъд айрох вæййы йæ фæллад æмæ рынчынмæ атагъд кæны хæдзармæ дæр.

Цæмæй рынчынæн йæ зæрдæ ма асæтта, низ йæхицæй фæсура, уый тыххæй дохтыр йæ фарсмæ хъуамæ хъæддыхæй лæууа æмæ дзы ныфс бауадза. Ахæм у йæ хъуыды Харебаты Заирайæн.

"Дохтыр хъуамæ йæхиуыл куса, ахуыр кæна алы бон дæр, алы бон дæр исты ногдзинад хъуамæ базона, æнæ уымæй хорз дохтыр нæй", - зæгъы, æнусы æмбис медицинæйы фадыджы чи бакуыста, уыцы фæлтæрд дохтыр.

Йæхæдæг дæр йæ размæ ахæм бæрзонд нысæнттæ кæй æвæрдта, æмæ сæ кæй æххæст кодта, уый тыххæй медицинæйы йæ хъысмæт рауад амондджын. Стæй канд медицинæйы нæ. Уæздандзинад йæ алы уæнджы дæр кæмæн ис, хуымæтæг, фæлæ куырыхон сылгоймаг, дæсны æмæ фæлтæрд дохтырæн Хуыцау ракодта стыр лæвар ныййарæджы, бинонты амондæй дæр.

187
Хъӕбӕр цардуагон ӕвзарӕнты пресс кӕнынӕн фӕзуат

Хуссар Иры скусдзӕн бырондоны фӕзуат

7
Хъӕбӕр цардуагон ӕвзарӕнты пресс кӕнынӕн фӕзуаты арӕзтад балхынцъ ис – уый руаджы зынгӕ фӕкъаддӕр уыдзӕн зианхӕссӕг ӕндӕвдад экологимӕ

ЦХИНВАЛ, 5 мар — Sputnik, Хъуылымбегты Азӕмӕт. Хъӕбӕр цардуагон ӕвзарӕнты пресс кӕнынӕн фӕзуаты арӕзтад балхынцъ ис, фехъусын кодта Хуссар Ирыстоны арӕзтад, архитектурӕ ӕмӕ ЦКХ министрады минӕвар Къацты Сослан.

Фӕзуат ис ног быроны полигоны цур, кӕцы сарӕзтой Цхинвалы районы Ирыхъӕуы. Уым сарӕзтой ангар, кӕдӕм ласдзысты бырон, уый фӕстӕ та йӕ пресс кӕндзысты. Уый фӕдыл бӕстыхайы сӕвӕрдтой сӕрмагонд техникӕ.

Площадки для компактирования твердых коммунальных отходов (ТКО)
© Sputnik / Азамат Кулумбегов
Хъӕбӕр цардуагон ӕвзарӕнты пресс кӕнынӕн фӕзуат
"Ифтонггарз кусы. Ӕвзарӕнтӕ пресс кӕнынӕн фӕзуатимӕ полигон цӕттӕ у эксплуатацимӕ раттынмӕ. Тагъд рӕстӕджы скусдзӕн", - банысан кодта Къацты Сослан.

Полигоны территорийыл сӕвӕрдтой вагонтӕ персоналӕн, афтӕ ма дзы ауагътой электрохызӕгтӕ, йӕ бацӕуӕнты та ӕвӕрд ӕрцыд асфальт.

Арӕзтады министрады специалисттӕ куыд банысан кодтой, афтӕмӕй ацы методикӕйы руаджы зынгӕ фӕкъаддӕр уыдзӕн зианхӕссӕг ӕндӕвдад экологимӕ. Полигонӕй Присы иууыл ӕввахсдӕр цӕрӕг бӕстыхаймӕ у 2,5 километры. Йӕ эксплуатацийы ӕмгъуыд у 25 азы.

Объект арӕзт ӕрцыд инвестицион программӕйы фӕлгӕтты.

7