Сырх зонӕ

Ӕнӕмӕнг амӕлдзӕн ӕмӕ медиктӕй хуыздӕр адӕм нӕй: куыд тох кодта Гӕззаты Антон COVID-19-имӕ

398
(ранӕуӕггонд 11:33 05.11.2020)
38-аздзыд нӕлгоймаг стӕм хатт цыд рынчындонмӕ, нӕ хаудта, ныр куыд фӕзӕгъынц, коронавирус тӕссаг кӕмӕн у, уыдон нымӕцмӕ

ЦХИНВАЛ, 5 ноя - Sputnik, Плиты Фатимӕ. Цхинвалы цӕрӕг Гӕззаты Антон 20 боны дӕргъы уыд коронавирусимӕ тохы. Ацы рӕстӕджы ӕвзонг нӕлгоймаг бавзӕрста рыст, амӕлыны тас ӕмӕ медиктӕм бузныджы ахаст.

Уырныдта мӕ коронавирус

38-аздзыд нӕлгоймаг стӕм хатт цыд рынчындонмӕ, нӕ хаудта, ныр куыд фӕзӕгъынц, коронавирус тӕссаг кӕмӕн у, уыдон нымӕцмӕ.

"Ӕз уыдон нымӕцӕй нӕ уыдтӕн, коронавирус кӕй нӕ уырныдта. Фӕлӕ дзы мӕ фидар ӕнӕниздзинад ӕмӕ кар хынцгӕйӕ тӕрсгӕ дӕр нӕ кодтон. 12 октябры фæстæ мӕ тӕвд ӕрфидар 37,2 -37,5 ӕмӕ тынг хид кодтон, фӕлӕ зӕгъын ӕвӕццӕгӕн суазал дӕн. Цыппӕрӕм бон мӕхи ӕвзӕр хатын райдыдтон. Мӕ хъуыры къӕбӕр нал хызт, фыр æххормагæй мæ зæрдæ хæццæ кодта", - мыссы лӕппу.

Уӕдмӕ йӕ хӕстӕг дохтыр уымæн рафыста витаминтӕ, антибиотиктӕ ӕмӕ туг тӕнӕг кӕнӕн хостӕ.

"Фӕсонтыл хуссын гӕнӕн нӕй, ӕз уый нӕ зыдтон, уымæ гæсгæ рæужыты уавæр ноджы фæкарздæр ис. Уӕдмӕ стыхстӕн, фӕдзырдтон мӕ хӕстӕгмӕ рынчындонмӕ ӕмӕ мын рафыстой хостӕ. Стӕй мын саразын кодтой КТ ӕмӕ тест", - радзырдта Антон.

Ӕнӕмӕнг амӕлдзӕн 

Цалынмӕ басгӕрсты хатдзӕгтӕ райстой, уӕдмӕ лӕппуйы уавӕр фӕкарздӕр ис. Йӕ хӕстӕджы фӕрцы йӕ схуыссын кодтой рынчындоны.

"Уӕд дӕр йедзаг уыд рынчындон, сӕвӕрдтой мын палатӕйы уӕлӕмхас тӕрхӕг. Уыд мын паника. Уӕлдӕф  нӕ фаг кодта, тынг-иу куы сулӕфыдтӕн, уӕд та-иу хуфынмӕ фӕдӕн, цыма авджы цъӕлтӕ ныхсынц улӕфӕнты, афтӕ-иу уыдтӕн. Рысты тасӕй тынг улӕфын дӕр нӕ уӕндыдтӕн. Фидарӕй мӕ уырныдта, кӕй амӕлдзӕн", - дзуры лӕппу.

Рынчындоны хуысгӕйӕ уый базыдта, йӕ тестӕн кӕй ис ӕвӕрццӕг дзуапп ӕмӕ КТ та равдыста, рӕуджытӕ 48% кӕй сты джиздард. Уыцы бæрæггæнæнтæй тынгдæр лӕппуйы тасы ӕфтыдта йӕ ӕдыхдзинад.

"Фондз къахдзӕфы фӕстӕ иу мын уӕлдӕф нал фаг кодта. Мӕ цӕсгом схъулонгонд ис, зӕрондхуыз райста мӕ царм. Рынчындоны иу сӕм хуынтӕ куы хастой, уӕд иу сӕ бӕндӕнӕй истам ӕмӕ уый дӕр рӕстмӕ нӕ фӕрӕзтон. Мӕ ӕдыхдзинад мӕ бынтон мардта", - бафтыдта Антон. 

Фӕстӕдӕр Антон фӕцайдагъ ис тымбылӕгтӕ дымсыныл ӕмӕ рӕуджытӕ фӕфидар сты. Иумӕйагӕй йӕ рынчын ахаста дыууӕ къурийӕ фылдӕр, уыдонӕй 11 боны арвыста рынчындоны.

Медиктæй хуыздæр адæм нæй

Ковидзонӕйы раздӕры пациент ма ӕрымысыд, ацы рӕстӕджы уый кӕй ссис ӕвдисӕн бирӕты адӕймагдзинадӕн. Уӕдлай рахицӕн кодта дохтыртӕ ӕмӕ астӕуккаг медицинон персоналы.

"Дохтыртӕ Мӕргъиты Марина, Цхуырбаты Ирма ӕмӕ Гаглойты Жанна цы ныффӕрӕзтой ацы рӕстӕджы, уый у диссаг. Стӕй ма медхотӕ Гӕбӕраты Людмила ӕмӕ Козаты Альбина. Дохтыртӕ сӕ хатӕн радтой пациенттӕн ӕмӕ иу сӕхӕдӕг ӕрхуыссыдысты коридорты тӕрхджытыл. Хатт иу сӕ хостӕ дӕр фесты. Сӕ хъахъхъӕнӕн костюмты скъуыдтытӕ ӕмпъыстой скотчӕй, фӕрӕзтой рынчынты буцтӕ. Райсомӕй изӕрмӕ та сын ӕрлӕуд нӕ уыд. Медиктæй хуыздæр адæм нæй!", - дзуры лӕппу.

Медикты æмрæнхъ ма уый рахицæн кодта, рынчындоны æххуысмæ цы бархионтæ цæуынц, уыдон дæр.

COVID-19-имӕ дыууӕ къуырийы цард Антоны рацух кодта 12 кг уӕзӕй, фӕивын кодта йæ ахаст медиктӕм æмæ иумæйгæй цардмæ.

398
Зæххæнкъуыст мын фæивта мæ цард: Дзауы бæллæх Цхуырбаты Ренатайы мысинæгты

Ныр раздæр базонын, зæххæнкъуыст кæй уыдзæн: Цхуырбаты Рената Дзауы бæллæхы тыххæй

45
(ранӕуӕггонд 15:32 29.04.2021)
Уый бæрц æзты фæстæ Ренатайы бон ссис йæ сывæллоны тастæ басæттын, фæлæ йын лифтмæ кæцыфæнды бахызт дæр свæййы егъау стресс. 29 апрелы æрцæугæ бæллæх фæивта чызджы цард - ныр уый цалдæр уысм раздæр банкъары, кæй уыдзæн зæххæнкъуыст

ЦХИНВАЛ, 29 апр - Sputnik, Плиты Фатимӕ. Дзауы районы 30 азы размæ зæххæнкъуыст кардиналонæй фæивта Хслебы цæрæг Цхуырбаты Ренатайы цард. Уæдæй нырмæ чызг тæрсы æхгæд тыгъдадæй, стыр бæстыхæйттæй æмæ развæлгъау базоны æрдзон бæллæхы тагъд æрбацыд.

1991 азы Цхуырбаты Рената ахуыр кодта Дзауы скъола-интернаты æвдæм къласы. Зæххæнкъуысты бон – 29 апрелы адæм ацыдысты митингмæ. Æгас скъолайы ма баззадысты æрмæст дыккæгæм æмæ æртыккæгæм къласы ахуырдзаутæ. Æртыккаг къласы ахуыргæнæг сывæллæтты бафæдзæхста раздзог Цхуырбаты Ренатайæн.

Рената Цховребова
Цхуырбаты Рената

"Мах уыдыстæм, скъолайы ма цы къуым нæ ныккалд, уыцы хайы. Хъазыдыстæм "Поле чудес"-æй. Тынг дымгæ сыстад, уынджы бæрзбæлæсты ниуын æмæ æнахуыр уынæр цыд. Мæхæдæг дæр ницы æмбæрстон, фæлæ сывæллæттæн загътон, уый вертолет кæй у", - мысы чызг.

Ренатайы ныхæстæм гæсгæ, 30 азы фæстæ дæр уый уыцы рæстæг хъуыды кæны куыд знон, афтæ.

"Уæдмæ рыгæй ницыуал зынд. Ме ʻфсымæры рог къурткæйы уыдтæн æмæ сывæллæттæ мæныл ныттыгуыр сты æмæ мын мæ къурткæйыл хæцыдысты. Цæстытæ бакæнæн нал уыд рыгæй, фæлæ дуары рдæм архайдтам ахизын. Нæ амондæн, кълас уыд тæккæ асины цур", - загъта Цхуырбаты Рената.

Зæххæнкъуысты кæлæнтæ сæхгæдтой ахуыргæнæн уагдоны рахизæн, скъоладзауты бахъуыд асины цур рудзынгæй гæпп кæнын.

"Фыццаг уæладзыджы дуарæй ахизæн нал уыд, уымæ гæсгæ бацыдыстæм куыддæрты асины цур рудзынгмæ. Йæ авг æмæ æфсæн хызæг уыдысты нырма йæ уæлæ, фæлæ бæстыхай уыд лæмæгъ æмæ æнцонæй ахаудтой. Уæдмæ рудзынджы цур февзæрдысты мæ фыд Шота æмæ сыхаг лæг Руслан, уыдон нын æххуыс кодтой бæстыхайæ рахизынæн", - бафтыдта уый.

Рената ныр дæр, кæд 30 азы рацыд, уæддæр ацы бонтæ æнæ цæссыгæй нæ мысы. Уыцы рæстæджы йæм афтæ каст, бынтон æнцонæй кæй аирвæзт, фæлæ цы фыдбылыз бавзæрста, уый фæстиуджытæ йыл фæстæдæр æртæфстысты.

Сывæллæтты бæстыхайæ куы райстой, уымæй 20 минуты фæстæ ног æнкъуыст бæстыхай бынтондæр сраст кодта зæххимæ. Йæ мидæг баззадысты дыккæгæм къласы цыппар ахуырдзауы. Уыдон фæстæдæр дурты бынæй систой, æрмæст ма сæ иу аирвæзт, аннæ æртæйæн сæ нæмттæ бафыстой Дзауы зæххæнкъуысты амæттæгты хсæн.

Ацы бон кардиналонæй фæивта Ренатайы цард дæр. Йæ тас ыл æртæфст фæстæдæр, чызг хæдзармæ бахизын нал уæндыд, æрдæгаз цард хъæдын цатыры, фондз азы дæргъы та стыр бæстыхæйттæм йæ бон бахизын нæ уыд.

"Университетмæ бацыдтæн ахуырмæ, фæлæ уæддæр нырма Богирийы цы универмаг уыд, уырдæм бахизын нæ уæндыдтæн. Зондæй йæ æмбæрстон, ницы тас мын у, фæлæ мæ бон мæ тас басæттын нæ уыд", - дзуры чызг.

Уый бæрц æзты фæстæ Ренатайы бон ссис йæ сывæллоны тастæ басæттын, фæлæ йын лифтмæ кæцыфæнды бахызт дæр свæййы егъау стресс. Зæххæнкъуыст кæй уыдзæн, уый та банкъары цалдæр уысм раздæр.

45
 Хуссар Иры 30 азы размæ зæххæнкъуыст Козаты Ренайы мысинæгты

Мæ фыды сæр иу æхсæвмæ сурс ис: Хуссар Иры 1991 азы зæххæнкъуыст Козаты Ренайы мысинæгты

94
(ранӕуӕггонд 14:31 29.04.2021)
Чызг æрымысыд 1991 азы 29 апрелы зæххæнкъуыст, йæ цæстыты раз йæ скъола куыд ныккалд, йæ райгуырæн район нал зынд рыгæй, йæ фыдæн та фыр мæтæй иу суткæмæ сурс ис йæ сæр

ЦХИНВАЛ, 29 апр - Sputnik, Плиты Фатимӕ. Хуссар Иры Дзауы районы 30 азы размæ уалдзæджы ницы рагзагъд кодта, стыр фыдбылыз кæй æрцæудзæн Ирыстоныл, æрмæст дыууæ бон раздæр æнахуыр тынг сарæх сты кæлмытæ, мысы Дзауы скъола-интернаты уæды фæндзæм къласы ахуырдзау Козаты Рена.

Хуссар Ирыстоны 30 азы размæ æрцыд егъау æрдзон бæллæх, иууыл тынгдæр зæххæнкъуысты тых уыд Дзауы районы (8,5 баллы). Иу уысммæ зæххы къорийæ фæтары Хахеты хъæу. Бæллæх ахаста æмткæй 59 адæймаджы цард, уыдонæй 21 уыдысты сывæллæттæ.

Козаты Рена 1991 азы 29 апрелы 12 сахат æмæ 13 минутыл иннæ скъоладзаутимæ хъазыд сæ скъола-интернаты уынджы. Уыцы бон Козатæ æгас бинонтæй - ныййарджытæ сæ æртæ чызгимæ - уыдысты скъолайы. Ренайы фыд уæд куыста интернаты директорæй, йæ мад та ахуыргæнæгæй. Фæлæ хистæртæ ацыдысты митингмæ. Хæстæфхæрд Ирыстон ралæууыд Гуырдзыстоны фæнды ныхмæ - уæд хъавыдысты Дзау æмæ Знауыры статустæ аивын. Сывæллæттæ та хъазыдысты кæрты.

"Митинг хъавыдысты ауадзын фæссихор, фæлæ йæ стæй аргъæвтой 12 сахатмæ, уый фæрцы фыдбылыз æрæййæфта адæмы уынгты æмæ аирвæзтысты", - радзырдта Рена.

Ренайы ныхæстæм гæсгæ, зæххæнкъуыстæй дыууæ бон раздæр æнахуыр тынг сарæх сты кæлмытæ. Скъоладзутæ–иу сæ ахсгæ дæр æркодтой цалдæргæйттæй.

"Иутæ дзырдтой, ома райхъал сты æмæ рабырыдысты, фæлæ сæ нымæц уыд æнахуыр бирæ. Хистæртæ дæр дзырдтой, уый бæрц дзы кæй никуы федтой. Уый фæстæ ацы хабар дæр бастой зæххæнкъуыстимæ", - мысы Козаты Рена.

Последствия землетрясения в поселке Дзау и Хахет, произошедшего в 1991 году
Хуссар Иры 30 азы размæ зæххæнкъуыст

Зæххæнкъуысты рæстæджы цы арæзтæдтæ ныккалдысты Дзауы районы, уыдон нымæцы уыд интернат дæр. Фæлæ мин ахуырдзауæй фылдæрæй уыцы уысм скъолайы разындысты æрмæстдæр дыууæ къласы ахуырдзаутæ. Уыдонæй æртæ дыккагкъласоны амардысты кæлæнты бын.

"Уроктæй нæ ссæрибар кодтой æмæ хъазыдыстæм уынджы. Ӕвзæр æй хъуыды кæнын, фæлæ райдыдта æнхуыр гуыбар-гуыбур. Стæй кæлын райдыдтой интернаты ныхмæ базарадон центры рудзгуытæ, сыстад æнхуыр рыг", - мысы чызг.

Сывæллæттæ тасы бахаудтой æмæ лидзын райдыдтой скъолайы æмбонды рдæм, уым хистæртæ сæ размæ ратындзыдтой æмæ сæ истой йæ сæрты.

"Лидзгæ-лидзын афæлдæхтæн æмæ фæстæмæ акастæн. Интернаты дыууæуæладзыгон корпусæй ма аззад йæ дыууæ кæроны, аннæ иууылдæр ныккалд", - загъта уый.

Уый фæстæ цаутæ Рена хъуыды кæны æвзæрдæр, йæ зæрдыл ма лæууы æрмæст, ахуыргæнджытæ сæ куыд æмбырд кодтой фæткъуыбæлæсты аууонмæ.

Зæххæнкъуысты фæстæ йæ фыд Козаты Роланд уыд бæллæхы фæстиуджыты хъуыддæгты, уымæ гæсгæ йæ йæ бинонтæ федтой æрмæстдæр дыккаг изæр.

"Зæххæнкъуысты фæстæ нæм мæ фыд бацыд æмæ нæ бафарста, куыд стæм, стæй дыккаг изæрмæ мах уый нал федтам. Хæдзармæ куы æрбацыд, уæд æй нал базыдтам - йæ сæр иууылдæр уыд урс-урсид. Уæд ыл цыд æрмæст 41 азы. Мæ хо æнхъæлдта, рыгæй йын кæй сурс ис æмæ йын æй сæрфын райдыдта. Цасдæр рæстæджы фæстæ та йæ сæры хъуынтæ фæстийæ чысыл фæсау сты, фæлæ уæддæр урсхилæй баззад", - радзырдта Рена.

Хуссар Ирыстоны 1991 азы зæххæнкъуыст иууыл стырдæр зиан æрхаста Дзауы районæн. Стыр хъыгдард ма баййæфта Знауыры район дæр.

94
Харебаты Вадим

Харебаты Вадим: ныффыстон бирæ ног зарджытæ

2
(ранӕуӕггонд 12:48 06.05.2021)
Хуссар Ирыстоны адæмон артист, ансамбль "Бонвæрон"-ы уæнг Харебаты Вадим радио Sputnik эфиры радзырдта йе сфæлдыстадон нывæзты тыххæй
Харебаты Вадим: уырыссаг æвзагыл сценæйыл рагæй нал зарыдтæн

Хуссар Ирыстоны сæйраг сахары æрæджы уагъд æрцыд концерт "Советская песня", цы ран æххæст кодтой уæды дуджы зарджытæ. Хайадисджытæй сæ иу уыд Хуссар Ирыстоны адæмон артист Харебаты Вадим. Уый куыд банысан кодта, уымæ гæсгæ репертуар цæттæгæнгæйæ тыхстис, уымæн æмæ сценæйыл уырыссагау рагæй нал зарыд.

"Мæ зарджытæ иууылдæр сты ирон æвзагыл æмæ мын ацы концерты хайадист уыд ног хабар. Фæлæ адæмæн сæ зæрдæмæ тынг фæцыд", - загъта Вадим.

Адæмон артисты ныхæстæм гæсгæ, фæстаг рæстæджыты уый бирæ ног зарджытæ ныффыста, кæцытыл хъæуы дзæбæх бакусын.

"Кæм пандеми уыд, кæм æндæр аххосæгтæ, фæлæ сæ сабыргай амайын æмæ дзы ныридæгæн цалдæр зарæг ис цæттæ", - банысан кодта музыкант.

Харебаты Вадим ма куыд бафиппайдта, афтæмæй ацы аз ансамбль "Бонвæрон"-ыл æххæст кæны 50 аз, æмæ уыцы рæстæджы ахæм къорд æгæрыстæмæй æнæхъæн Цæгат Кавказы дæр нæ уыд. Уымæ гæсгæ ацы датæйæн æнæбанысангæнгæ нæй.

2
Темӕтӕ:
Радио иронау