Гуыбаты Аза

Пациент ӕмӕ медик: Гуыбаты Аза "сырх зонӕйы" куысты тыххӕй коронавирусмӕ ӕнӕкӕсгӕйӕ

7
(ранӕуӕггонд 11:58 12.11.2020)
Цхинвайлаг медицинон хо рынчынӕй куыд куыста "Сырх зонӕйы", уый тыххӕй фӕрсут Sputnik Хуссар Ирыстоны ӕрмӕджы

ЦХИНВАЛ, 12 ноя - Sputnik, Хъуылымбегты Зӕлинӕ. Цхинвалы цӕрӕг Гуыбаты Аза дыууӕ мӕйӕ фылдӕр кусы "сырх зонӕйы" коронавирусӕй рынчынтимӕ. Уӕрӕсеимӕ арӕны баконды фӕстӕ сылгоймаджы туберкулезон рынчындоны ӕндӕр медицинон кусджытимӕ арвыстой коронавирусӕй рынчынтӕн хос кӕнынмӕ.

Рӕстӕг куы рацыд, уӕд Аза йӕхӕдӕг дӕр фӕрынчын ис коронавирусӕй. Низмӕ ӕнӕкӕсгӕйӕ, уый дарддӕр ӕххуыс кодта ковид-пациенттӕн.

"Мӕ тӕвд куы схызт, уӕд мӕ уавӕр февзӕрдӕр ӕмӕ мын мӕхи дӕр схыссын кодтой рынчындоны", - радзырдта Гуыбайты Аза.

Фӕлӕ низы рӕстӕджы дӕр Аза нӕ ныууагъта йӕ куыст. Рынчынты нымӕц кӕй фылдӕр кодта бонӕй бонмӕ, ӕмӕ кусджытӕ та нӕ фаг кодтой, уый фӕдыл уый адарддӕр кодта йӕ куыст.

"Ныртӕккӕ мӕ уавӕр бирӕ хуыздӕр у, рнычынтимӕ кусын та мын ӕнцондӕр у", - бафтыдта уый.

Пациенткӕтӕй иу, Цхинвалы цӕрӕг Ирмайы ныхӕстӕм гӕсгӕ, Гуыбаты Аза тынг зӕрдиагӕй кусы.

"Ӕз бацыдтӕн рынчындонмӕ, Аза куы февзӕр ис, уыцы ӕхсӕв. Уӕд уымӕн йӕ тӕвд схызт, райсом фӕхуыздӕр ӕмӕ та ногӕй ацыд йӕ пациенттӕм. Аза ӕрвылбон йӕ куыст зӕрдиагӕй ӕххӕст кӕны. Нӕ йӕ зонын, ӕнӕ уымӕй цы арӕзтаиккам", - банысан кодта Ирма.

Йӕ ныхӕстӕм гӕсгӕ, пациенттӕн-иу сӕ уавӕр фӕхуыздӕр, Аза-иу сӕм йӕ хъус куы дардта, уӕд. Уыдоны уырныдта, сӕ ӕнӕмӕнг процедурӕтӕ сын иууылдӕр рӕстӕгыл кӕй сараздзысты.

7
Харебаты Заира йæ пациентимæ

Бузныджы аккаг дохтыр: Харебаты Заира рынчынтӕн хос кӕны дзырдӕй дӕр

181
(ранӕуӕггонд 13:51 20.02.2021)
Рынчын дохтыры хъару, зонындзинæдтæ æмæ арæхстдзинадыл куы баууæнда, йæхимидæг фидарæй куы зæгъа, адзæбæх мæ кæндзæн, уæд уымæн æнæрцæугæ нæй, нымайы нуæртты дохтыр

ЦХИНВАЛ, 20 фев – Sputnik. Дриаты Лейла. Дæсныйæдтæй æппæтæй ахсджиагдæр,  зындæр æмæ вазыгджындæр дохтыры дæсныйад у. Медицинæйы дæсныйад у уды æмæ зæрдæйы сгуыхтдзинад. Домы удуæлдайад æмæ сыгъдæг хъуыдытæ. Хорз дохтыры алы хатт дæр Хуыцауæй лæвæрд фæхонынц, ома йæм Хуыцауæй лæвæрд курдиат ис. Ахæм миниуджытæй се ‘ппæтæй дæр æххæст у нуæртты дохтыр Харебаты Заира.

Адæймаг æвзæр ныхас, тарст ныхас куы фехъусы, уæлдайдæр дохтырæй, уæд уый у маргæй фыддæр, æмæ лæг фесæфы йæ адзалæй раздæр. Лæгъз ныхас та у сой, хуры тын, цъæх арвы рухс, цин, базырджын маргъау, фидар. Лæгæн фесæфы йæ низ, дохтырæй уынгмæ куы рацæуы, уæд.

"Рæвдауæн ныхас æппæт хостæй тыхджындæр у. Ныртæккæ медицинæ стыр къахдзæфтæ акодта размæ, фæзынд бирæ ног хостæ æмæ ифтонггæрзтæ. Уый махæн фадат дæтты адæмæн хæрзхъæд лæггад кæнынæн", - зæгъы Заира.

Рынчын дохтыры хъару, зонындзинæдтæ æмæ арæхстдзинадыл куы баууæнда, йæхимидæг фидарæй куы зæгъа, адзæбæх мæ кæндзæн, уæд уымæн æнæрцæугæ нæй. Ныфсæй аразгæ у алцы дæр…

"Бузныг, Заира, дæ къухтæ фæрнæй фæдар, дæ лæггад бирæ", - ахæм зæрдæйæ цæуæг ныхæстæ арæх фехъусы рынчынтæй. Уарзынц æй йæ фæлмæндзинад æмæ арæхстдзинады тыххæй. У сыгъзæрин адæймаг æмæ фæлтæрд дохтыр. Фыццаджыдæр йæхицæй карзӕй домы куыст.

"Ныртæккæ тæссаг рæстæг у. Ацы тыхст рæстæджы кусын райдыдтон уæззау рынчынтимæ Республикон клиникон рынчындоны. Карз низимæ тохы бацæугæйæ, дохтыртæ, медицинон хотæ, æппæт медицинон персонал архайдта æххуысхъуаг адæмы фарсмæ балæууыныл", - дзуры Заира.

Æнæнцой адæймаг у Заира, ис æм рæсугъд нысæнттæ æмæ фæндтæ. Йе ‘ххуыс искæй куы бахъæуы, уæд дзы уайтагъд айрох вæййы йæ фæллад æмæ рынчынмæ атагъд кæны хæдзармæ дæр.

Цæмæй рынчынæн йæ зæрдæ ма асæтта, низ йæхицæй фæсура, уый тыххæй дохтыр йæ фарсмæ хъуамæ хъæддыхæй лæууа æмæ дзы ныфс бауадза. Ахæм у йæ хъуыды Харебаты Заирайæн.

"Дохтыр хъуамæ йæхиуыл куса, ахуыр кæна алы бон дæр, алы бон дæр исты ногдзинад хъуамæ базона, æнæ уымæй хорз дохтыр нæй", - зæгъы, æнусы æмбис медицинæйы фадыджы чи бакуыста, уыцы фæлтæрд дохтыр.

Йæхæдæг дæр йæ размæ ахæм бæрзонд нысæнттæ кæй æвæрдта, æмæ сæ кæй æххæст кодта, уый тыххæй медицинæйы йæ хъысмæт рауад амондджын. Стæй канд медицинæйы нæ. Уæздандзинад йæ алы уæнджы дæр кæмæн ис, хуымæтæг, фæлæ куырыхон сылгоймаг, дæсны æмæ фæлтæрд дохтырæн Хуыцау ракодта стыр лæвар ныййарæджы, бинонты амондæй дæр.

181
Джиоты Анатолий

Машинӕты дохтыр: куыд фӕивы бӕллӕххы бахауӕг хӕдтулгӕ Джиоты Анатолийы къухты

412
(ранӕуӕггонд 13:15 08.02.2021)
Куыстуарзаг лæппу йæ къухмæ райста дзæбуг æмæ цыбыр рæстæгмæ фæхæст йæ дæсныйадыл, 6 мæйы фæстæ æнæ искæй æххуысæй æххæст кодта фæлхасгæнджыты домæнтæ

ЦХИНВАЛ, 8 фев – Sputnik, Дриаты Лейла. Хæдтулгæйы хицауы кæддæриддæр фæнды, цæмæй йæ бæрныуæвæг техникæ йæ куыст кæна æнæкъуылымпыйæ, уыимæ йе ‘ддаг бакастæй дæр рухс кæна куыд йæхи, афтæ æддагон адæймæгты зæрдæ дæр. Фæлæ хатт бæрæг аххосæгтæм гæсгæ шофыр уыцы хæрзиуджытæй фæцух вæййы æмæ уæд æххуысы охыл балæууы, зест чи раст кæны, уыцы арæхстджын кусæджы разы.

Ацы зын, фæлæ æнæмæнгхъæуæг дæсныйад равзæрста йæхицæн Цхинвалы районы Къостайы хъæуы цæрæг Джиоты Анатолий.

"Хæрзæвзонгæй бауарзтон хæдтулгæтимæ архайын, сæ бакастæй кæддæриддæр истон æхцондзинад. Уый, нывыл-иу куы уыд, уæд, фæлæ алкæд афтæ кæцæй уыдаид, хатт-иу хӕдтулгӕ бахауд бæллæхы æмæ уæд ды бакæс æмæ уымæ", - дзуры нӕлгоймаг.

Фæлæ уӕдмӕ ацы хъæуы фæзынд, хæдтулгæты сæ раздæры гаччы чи æрбадын кодтаид, ахæм фæлтæрд кусджытæ -æфсымæртæ Тегкаты Рудик æмæ Лева.

"Сæ ном айхъуыст æмæ сæ цехы æрлæууæнтæ дæр нæ уыд аразинаг машинæтæй. Мæндæр бафæндыд уым бафæллой кæнын æмæ мæ хъуыды бамбарын кодтон æфсымæртæн", - мысы йӕ фӕллойадон фӕндаджы райдиан Анатолий.

Джиоты Анатолий
© Photo : Дриаты Лейла
Джиоты Анатолий

Уæд куыстуарзаг лæппу йæ къухмæ райста дзæбуг æмæ цыбыр рæстæгмæ фæхæст йæ дæсныйадыл, 6 мæйы фæстæ æнæ искæй æххуысæй æххæст кодта фæлхасгæнджыты домæнтæ. Уæдæй нырмæ рацыд 27 азы æмæ дзы уал азы дæргъы райгонд вæййынц, кæй бæрны бацæуы, уыцы хæдтулгæты хицæуттæ.

"Иу бакастæй афтæ зыны, цыма æнцон куыст у. Фæлæ бынтон афтæ нæу, хатт бахъæуы æфсæйнаг тыхджын æрцæвын, стæй та дзæбугæй райхъуысы чысылдæр зæлланг. Уыдон дыууæ дæр хъæуы хатын, цæмæй дзы ма рантыса уæлдай, æнæраны цæф. Дзæбуджы архайдимæ иумæ фæстæдæр сæ куыст бакæнынц къухы æнгуылдзтæ æмæ фæбæрæг кæнынц зесты раст æмæ аивдзинад", - банысан кодта машинӕты дохтыр.

Анатолий æмбары, йæ сæххæстгонд куысты фæстæ хæдтулгæмæ дарддæр кæй фæхæццæ вæййынц ахорæджы къухтæ. Зæгъын хъæуы, ахорæджы дырыс æмæ æнæаипп куыст кæнгæ кæй у зестгуыстгæнæгæй.

Джиойы фырт никуы хъуыды кæны, йæ сæххæстгонд куыстмæ йын ахорæг искуы фау æрхаста. Афтæ æмæ йæ дæргъвæтин æмæ æнæзивæг фезмæлдæй алы хатт дæр бузныг æмæ райгондæй баззайы, йæ хæрзифтонг хæдтулгæйыл ногæй чи бабады, уый.

412
Дзауы районы фӕбӕрӕг сты хуыздӕр шахматисттӕ скъоладзауты хсӕн

Дзауы районы фӕбӕрӕг сты хуыздӕр шахматисттӕ скъоладзауты хсӕн

11
Ерысты иууыл ӕнтыстджындӕр разындысты Цхуырбаты Георгийы, Санахъоты Георгийы ӕмӕ Цхуырбаты Азӕмӕт

ЦХИНВАЛ, 25 фев – Sputnik, Плиты Фатимӕ. Гуфтайы скъолайы ахуырдзау Цхуырбаты Георгийы ӕмӕ Дзауы скъолайы ахуырдзаутӕ Санахъоты Георгийы ӕмӕ Цхуырбаты Азӕмӕт рамбылдтой шахмӕттӕй районы турнир, уый тыххӕй фехъусын кодта Sputnik районы пресс-службӕйы кусӕг Тедеты Лиана.

Турнир среди школьников Дзауского района по шахматам
Пресс-служба Дзауского района
Дзауы районы фӕбӕрӕг сты хуыздӕр шахматисттӕ скъоладзауты хсӕн

Районы фыццагады хайад райсын сӕ бон не ссис дӕрддзӕф районы ахуырдзаутӕ -Къуаиса, Синагур ӕмӕ Кировы скъолатӕй. Уыдон бахъыгдардта рцӕуын ӕвзӕр боныгъӕд.

"Уӕлахиздзаутӕ ӕмӕ призертӕ райстой лӕвӕрттӕ, призтӕ ӕмӕ грамотатӕ. Сӕхи рдыгӕй бузныг дзырдтой организатортӕн", - загъта уый.

Йӕ ныхӕстӕм гӕсгӕ, шахмӕттӕм фӕстаг ӕзты тынг цымыдис кӕсынц скъоладзаутӕ, рӕзы сӕ арӕхстдзинад дӕр.

Спортивон мадзал ацыд районы сывӕллӕтты сфӕлдыстады галуаны.

Турнир среди школьников Дзауского района по шахматам
Пресс-служба Дзауского района
Дзауы районы фӕбӕрӕг сты хуыздӕр шахматисттӕ скъоладзауты хсӕн

 

11