Цхинвал

Мӕ сабиты ӕрдӕг аз нӕ федтон: цӕмӕннӕ у таджикӕгтӕн ацӕуын сӕ бон Ирыстонӕй

18
(ранӕуӕггонд 17:42 16.11.2020)
Хуссары Ирыстонмӕ куыстагур Таджикистанӕй цы ӕмбӕстӕгтӕ ӕрцыдысты, уыдонӕн сӕ бон нал у аздӕхын сӕ райгуырӕн бӕстӕмӕ, бинонтӕ фӕхицӕн сты се ‘нахъом сабитӕй, нал сын ис фӕцӕрыны фадӕттӕ дӕр

ЦХИНВАЛ, 16 ноя - Sputnik, Плиты Фатимӕ. Хуссар Ирыстон ӕмӕ Уӕрӕсейы коронавирусы апарахаты тасӕй цы тобӕтӕ бакодтой, уыдон арӕнты ахӕсты бакодтой ӕртыккаг бӕстӕты минӕвӕртты. Уалдзӕгӕй нырмӕ Таджикистаны цӕрджытӕн, кӕцытӕ Хуссар Ирыстонмӕ ӕрхаудысты куыстагур, сӕ бон нал у ацӕуын сӕ хӕдзӕрттӕм. Тыхст бинонтӕй кӕй хъӕуы хос кӕнын, кӕцыдӕртӕ та сӕ ӕнахъом сабиты нӕ федтой ӕрдӕгазӕй фылдӕр. 

Коронавирусы апарахаты аххосӕй азы райдайӕны дыууӕ бӕстӕ сӕвӕрдтой арӕны сӕртыл хизыны тобӕтӕ, уыдонӕй кӕцыдӕртӕ нырма дӕр нӕ аивтой. Афтӕ Хуссар Ирыстон йӕ арӕн бакодта ӕрмӕст йӕхи ӕмӕ Уӕрӕсейы ӕмбӕстӕгтӕн. Уымӕ гӕсгӕ Уӕрӕсемӕ бацӕуын дӕр нырма ӕппӕт бӕстӕты минӕвӕрттӕн сӕ бон нӕу.

Таджикистаны цӕрӕг Алиджон Сафаров ныр цалдӕр мӕйы бӕллы фӕстӕмӕ хӕдзармӕ аздӕхынмӕ.

"Иу аз ӕмӕ ӕрдӕг дӕн Хуссар Ирыстоны. Мӕн хъӕуы хос кӕнын, мӕ сӕр ӕмӕ мӕ уыргтӕ риссынц. Фӕнды мӕ Мӕскуымӕ хос кӕнынмӕ, фӕлӕ мӕ нӕ уадзынц",- радзырдта Sputnik нӕлгоймаг.

Алиджон Сафаров фӕстаг рӕстӕджы архайы, цӕмӕй самал кӕна ацӕуыны бар.

"Хуссар Ирыстоны ФХМ, Уӕрӕсейы минӕвӕрады - кӕм ма нӕ уыдтӕн. Мӕ амондӕн мӕ иу бинонтӕ ӕрфысым кодтой, ӕндӕра мын цы хордтаин, уый дӕр нӕ уыд", - бафтыдта уый.

Ӕнгӕс уавӕрты сты ноджы иу бинонтӕ Таджикистанӕй. Бинонты хистӕр раджы ӕрцыд Ирыстонмӕ куыстагур. Уалдзӕджы йе ‘мкъайы уынӕг ӕрцыд сылноймаг дӕр. Уӕдмӕ Уӕрӕсе йӕ арӕн сӕхгӕдта. Сӕ райгуырӕн бӕстӕстӕйы ӕркастхъуаг баззадысты ӕ ртӕ ӕнахъом сывӕллоны. 

"Мӕнмӕ цӕрынц хӕдзары. Ус ӕм ӕрцыд бӕрӕггӕнӕг ӕмӕ ам баззад. Сӕхимӕ ӕртӕ ӕнахъом сабийы. Мӕ бон нал у сӕ тӕригъӕдмӕ кӕсын. Сӕ зӕнджы мысынц, фӕлӕ сын нӕ зонын куыд баххуыс кӕнон", - радзырдта Sputnik Цхинвалы цӕрӕг Нанули Алексейы чызг.

Сылгоймаг ма радзырдта, йӕ уазджытӕн мӕйы кӕрон кӕй хъуамӕ райгуыра сывӕллон.

"Зилынц уагдӕттыл, фӕлӕ сӕ нӕ уадзынц. Чызджы уавӕр хынцгӕйӕ йӕ рынчындоны хыгъдыл сӕвӕрдтон. Цалынмӕ ам уыдысты, уӕдмӕ ӕфсин дӕр амард ӕмӕ бынтон ӕнӕхицау баззадысты сӕ сывӕллӕттӕ. Телефонӕй сын уырдыгӕй фӕлӕхстӕ кӕнынц, цӕмӕй ӕрцӕуой", - бафтыдта сылгоймаг.

Хуссар Ирыстоны Уӕрӕсейы минӕварады кусӕг Сергей Алексеев бамбарын кодта Sputnik, куыд гӕнӕн ис ацӕуын, уый фадӕттӕ.

"Фӕсарӕйнаг ӕмбӕстӕгтӕ Уӕрӕсемӕ цӕуынц хицауады барамынды домӕнтӕм гӕсгӕ. Кӕд хос кӕнынмӕ цӕуынц, уӕд сӕм хъомӕ уа уӕрӕсейаг хосгӕнӕн уагдонӕй бӕлвырдгӕнӕн гӕххӕттытӕ. Уый хъӕуы равдисын арӕнхъахъхъӕнджытӕн.Таджикистанимӕ визӕйон режим нӕй, уымӕ гӕсгӕ уӕлӕмхас документтӕ нӕ хъӕуы", - загъта уый.

Йӕ ныхӕстӕм гӕсгӕ, йӕ райгуырӕн бӕстӕмӕ аздӕхын кӕй фӕнды, уыдон та хъӕуы Мӕскуыйы уӕвӕг Таджикистаны минӕварадмӕ ныффыссын.

"Ӕнӕ уӕлӕмхас документтӕй транзитӕй ацӕуыны бар ис ӕрмӕст уӕлдӕфон транспортӕй. Науӕд та хъӕуы ныффыссын сӕ минӕвӕрадмӕ Уӕрӕсейы. Сӕ сайтыл ис бӕстондӕр зонӕнтӕ, уым бамбарын кӕндзысты, цы гӕххӕттытӕ хъӕуы саразын", - бамбарын кодта Сергей Алексеев.

Уый ма бафтыдта, фӕстаг рӕстӕджы сӕм ахӕм куырдиӕттӕ арӕх кӕй ӕрбацӕуын ӕмӕ сӕ аскъуыддзаг кӕнын бантысы минӕварады кусджыты ӕмархайдӕй.

18
Харебаты Заира йæ пациентимæ

Бузныджы аккаг дохтыр: Харебаты Заира рынчынтӕн хос кӕны дзырдӕй дӕр

181
(ранӕуӕггонд 13:51 20.02.2021)
Рынчын дохтыры хъару, зонындзинæдтæ æмæ арæхстдзинадыл куы баууæнда, йæхимидæг фидарæй куы зæгъа, адзæбæх мæ кæндзæн, уæд уымæн æнæрцæугæ нæй, нымайы нуæртты дохтыр

ЦХИНВАЛ, 20 фев – Sputnik. Дриаты Лейла. Дæсныйæдтæй æппæтæй ахсджиагдæр,  зындæр æмæ вазыгджындæр дохтыры дæсныйад у. Медицинæйы дæсныйад у уды æмæ зæрдæйы сгуыхтдзинад. Домы удуæлдайад æмæ сыгъдæг хъуыдытæ. Хорз дохтыры алы хатт дæр Хуыцауæй лæвæрд фæхонынц, ома йæм Хуыцауæй лæвæрд курдиат ис. Ахæм миниуджытæй се ‘ппæтæй дæр æххæст у нуæртты дохтыр Харебаты Заира.

Адæймаг æвзæр ныхас, тарст ныхас куы фехъусы, уæлдайдæр дохтырæй, уæд уый у маргæй фыддæр, æмæ лæг фесæфы йæ адзалæй раздæр. Лæгъз ныхас та у сой, хуры тын, цъæх арвы рухс, цин, базырджын маргъау, фидар. Лæгæн фесæфы йæ низ, дохтырæй уынгмæ куы рацæуы, уæд.

"Рæвдауæн ныхас æппæт хостæй тыхджындæр у. Ныртæккæ медицинæ стыр къахдзæфтæ акодта размæ, фæзынд бирæ ног хостæ æмæ ифтонггæрзтæ. Уый махæн фадат дæтты адæмæн хæрзхъæд лæггад кæнынæн", - зæгъы Заира.

Рынчын дохтыры хъару, зонындзинæдтæ æмæ арæхстдзинадыл куы баууæнда, йæхимидæг фидарæй куы зæгъа, адзæбæх мæ кæндзæн, уæд уымæн æнæрцæугæ нæй. Ныфсæй аразгæ у алцы дæр…

"Бузныг, Заира, дæ къухтæ фæрнæй фæдар, дæ лæггад бирæ", - ахæм зæрдæйæ цæуæг ныхæстæ арæх фехъусы рынчынтæй. Уарзынц æй йæ фæлмæндзинад æмæ арæхстдзинады тыххæй. У сыгъзæрин адæймаг æмæ фæлтæрд дохтыр. Фыццаджыдæр йæхицæй карзӕй домы куыст.

"Ныртæккæ тæссаг рæстæг у. Ацы тыхст рæстæджы кусын райдыдтон уæззау рынчынтимæ Республикон клиникон рынчындоны. Карз низимæ тохы бацæугæйæ, дохтыртæ, медицинон хотæ, æппæт медицинон персонал архайдта æххуысхъуаг адæмы фарсмæ балæууыныл", - дзуры Заира.

Æнæнцой адæймаг у Заира, ис æм рæсугъд нысæнттæ æмæ фæндтæ. Йе ‘ххуыс искæй куы бахъæуы, уæд дзы уайтагъд айрох вæййы йæ фæллад æмæ рынчынмæ атагъд кæны хæдзармæ дæр.

Цæмæй рынчынæн йæ зæрдæ ма асæтта, низ йæхицæй фæсура, уый тыххæй дохтыр йæ фарсмæ хъуамæ хъæддыхæй лæууа æмæ дзы ныфс бауадза. Ахæм у йæ хъуыды Харебаты Заирайæн.

"Дохтыр хъуамæ йæхиуыл куса, ахуыр кæна алы бон дæр, алы бон дæр исты ногдзинад хъуамæ базона, æнæ уымæй хорз дохтыр нæй", - зæгъы, æнусы æмбис медицинæйы фадыджы чи бакуыста, уыцы фæлтæрд дохтыр.

Йæхæдæг дæр йæ размæ ахæм бæрзонд нысæнттæ кæй æвæрдта, æмæ сæ кæй æххæст кодта, уый тыххæй медицинæйы йæ хъысмæт рауад амондджын. Стæй канд медицинæйы нæ. Уæздандзинад йæ алы уæнджы дæр кæмæн ис, хуымæтæг, фæлæ куырыхон сылгоймаг, дæсны æмæ фæлтæрд дохтырæн Хуыцау ракодта стыр лæвар ныййарæджы, бинонты амондæй дæр.

181
Джиоты Анатолий

Машинӕты дохтыр: куыд фӕивы бӕллӕххы бахауӕг хӕдтулгӕ Джиоты Анатолийы къухты

412
(ранӕуӕггонд 13:15 08.02.2021)
Куыстуарзаг лæппу йæ къухмæ райста дзæбуг æмæ цыбыр рæстæгмæ фæхæст йæ дæсныйадыл, 6 мæйы фæстæ æнæ искæй æххуысæй æххæст кодта фæлхасгæнджыты домæнтæ

ЦХИНВАЛ, 8 фев – Sputnik, Дриаты Лейла. Хæдтулгæйы хицауы кæддæриддæр фæнды, цæмæй йæ бæрныуæвæг техникæ йæ куыст кæна æнæкъуылымпыйæ, уыимæ йе ‘ддаг бакастæй дæр рухс кæна куыд йæхи, афтæ æддагон адæймæгты зæрдæ дæр. Фæлæ хатт бæрæг аххосæгтæм гæсгæ шофыр уыцы хæрзиуджытæй фæцух вæййы æмæ уæд æххуысы охыл балæууы, зест чи раст кæны, уыцы арæхстджын кусæджы разы.

Ацы зын, фæлæ æнæмæнгхъæуæг дæсныйад равзæрста йæхицæн Цхинвалы районы Къостайы хъæуы цæрæг Джиоты Анатолий.

"Хæрзæвзонгæй бауарзтон хæдтулгæтимæ архайын, сæ бакастæй кæддæриддæр истон æхцондзинад. Уый, нывыл-иу куы уыд, уæд, фæлæ алкæд афтæ кæцæй уыдаид, хатт-иу хӕдтулгӕ бахауд бæллæхы æмæ уæд ды бакæс æмæ уымæ", - дзуры нӕлгоймаг.

Фæлæ уӕдмӕ ацы хъæуы фæзынд, хæдтулгæты сæ раздæры гаччы чи æрбадын кодтаид, ахæм фæлтæрд кусджытæ -æфсымæртæ Тегкаты Рудик æмæ Лева.

"Сæ ном айхъуыст æмæ сæ цехы æрлæууæнтæ дæр нæ уыд аразинаг машинæтæй. Мæндæр бафæндыд уым бафæллой кæнын æмæ мæ хъуыды бамбарын кодтон æфсымæртæн", - мысы йӕ фӕллойадон фӕндаджы райдиан Анатолий.

Джиоты Анатолий
© Photo : Дриаты Лейла
Джиоты Анатолий

Уæд куыстуарзаг лæппу йæ къухмæ райста дзæбуг æмæ цыбыр рæстæгмæ фæхæст йæ дæсныйадыл, 6 мæйы фæстæ æнæ искæй æххуысæй æххæст кодта фæлхасгæнджыты домæнтæ. Уæдæй нырмæ рацыд 27 азы æмæ дзы уал азы дæргъы райгонд вæййынц, кæй бæрны бацæуы, уыцы хæдтулгæты хицæуттæ.

"Иу бакастæй афтæ зыны, цыма æнцон куыст у. Фæлæ бынтон афтæ нæу, хатт бахъæуы æфсæйнаг тыхджын æрцæвын, стæй та дзæбугæй райхъуысы чысылдæр зæлланг. Уыдон дыууæ дæр хъæуы хатын, цæмæй дзы ма рантыса уæлдай, æнæраны цæф. Дзæбуджы архайдимæ иумæ фæстæдæр сæ куыст бакæнынц къухы æнгуылдзтæ æмæ фæбæрæг кæнынц зесты раст æмæ аивдзинад", - банысан кодта машинӕты дохтыр.

Анатолий æмбары, йæ сæххæстгонд куысты фæстæ хæдтулгæмæ дарддæр кæй фæхæццæ вæййынц ахорæджы къухтæ. Зæгъын хъæуы, ахорæджы дырыс æмæ æнæаипп куыст кæнгæ кæй у зестгуыстгæнæгæй.

Джиойы фырт никуы хъуыды кæны, йæ сæххæстгонд куыстмæ йын ахорæг искуы фау æрхаста. Афтæ æмæ йæ дæргъвæтин æмæ æнæзивæг фезмæлдæй алы хатт дæр бузныг æмæ райгондæй баззайы, йæ хæрзифтонг хæдтулгæйыл ногæй чи бабады, уый.

412
Дзауы районы фӕбӕрӕг сты хуыздӕр шахматисттӕ скъоладзауты хсӕн

Дзауы районы фӕбӕрӕг сты хуыздӕр шахматисттӕ скъоладзауты хсӕн

11
Ерысты иууыл ӕнтыстджындӕр разындысты Цхуырбаты Георгийы, Санахъоты Георгийы ӕмӕ Цхуырбаты Азӕмӕт

ЦХИНВАЛ, 25 фев – Sputnik, Плиты Фатимӕ. Гуфтайы скъолайы ахуырдзау Цхуырбаты Георгийы ӕмӕ Дзауы скъолайы ахуырдзаутӕ Санахъоты Георгийы ӕмӕ Цхуырбаты Азӕмӕт рамбылдтой шахмӕттӕй районы турнир, уый тыххӕй фехъусын кодта Sputnik районы пресс-службӕйы кусӕг Тедеты Лиана.

Турнир среди школьников Дзауского района по шахматам
Пресс-служба Дзауского района
Дзауы районы фӕбӕрӕг сты хуыздӕр шахматисттӕ скъоладзауты хсӕн

Районы фыццагады хайад райсын сӕ бон не ссис дӕрддзӕф районы ахуырдзаутӕ -Къуаиса, Синагур ӕмӕ Кировы скъолатӕй. Уыдон бахъыгдардта рцӕуын ӕвзӕр боныгъӕд.

"Уӕлахиздзаутӕ ӕмӕ призертӕ райстой лӕвӕрттӕ, призтӕ ӕмӕ грамотатӕ. Сӕхи рдыгӕй бузныг дзырдтой организатортӕн", - загъта уый.

Йӕ ныхӕстӕм гӕсгӕ, шахмӕттӕм фӕстаг ӕзты тынг цымыдис кӕсынц скъоладзаутӕ, рӕзы сӕ арӕхстдзинад дӕр.

Спортивон мадзал ацыд районы сывӕллӕтты сфӕлдыстады галуаны.

Турнир среди школьников Дзауского района по шахматам
Пресс-служба Дзауского района
Дзауы районы фӕбӕрӕг сты хуыздӕр шахматисттӕ скъоладзауты хсӕн

 

11