Къуымбилы куыст

Национ æрмдæсныйæдтæ раздахын: Цхинвалы сног кӕндзысты къуымбилгуыст

85
(ранӕуӕггонд 15:29 02.02.2021)
Къуымбилæй аразæн ис экологион сыгъдæг,æнæниздзинадæн ахъаз чи у, ахæм уæлæдарæс æмæ æндæр дзаумæттæ. Æрмæст уыдон хъуамæ уой рæсугъд æмæ нырыккон, нымайы Дзӕгъиаты Зӕлинӕ

ЦХИНВАЛ, 2 фев — Sputnik, Дриаты Лейла. Хуссарирыстойнаг сылгоймаг Дзӕгъиаты Зӕлинӕ фӕнд кӕны национ ирон ӕрмдӕсныйӕдтӕ сног кӕнын – уый хъавы срӕвдз кӕнын Цхинвалы къуымбилы куыст.

Сылгоймаг катай кӕны, абоны бон къуымбилгуыст рохуаты кӕй аззадис. Нымæт цæгъдын æмæ стæй уымæй къахдарæс æмæ нæлгоймаджы худтæ аразын абон ничиуал зоны. Къуымбилæй аразæн ис экологион сыгъдæг,æнæниздзинадæн ахъаз чи у, ахæм уæлæдарæс æмæ æндæр дзаумæттæ. Æрмæст уыдон хъуамæ уой рæсугъд æмæ нырыккон.

"Мæ хорз зонгæ мын радзырдта, Цæгат Иры сылгоймæгты къорд хицауадмæ кӕй бахатыдысты, цæмæй сын баххуыс кæной скъола бакæнынæн, цыран "Национ æрмдæсныйæдтæ раздахыны" проекты руаджы сылгоймæгты сахуыр кæной къуымбилы куыст æмæ нымæт цæгъдыны сусæгдзинæдтыл. Æнхъæл куыннæ уыдысты, афтæ бирæ сылгоймæгтæ равдыстой уыцы хъуыддагмӕ цымыдис ӕмӕ ныр æнтыстджынæй архайынц уым", - радзырдта Зӕлинӕ.

Куыст срӕвдз кӕныны тыххӕй Зӕлинӕйӕн йӕхимӕ нӕй фаг фӕрӕзтӕ, уымӕ гӕсгӕ ацы аз паддзахадæй уый хъавы райсын хатырон кредит.

"Кæд мæ бизнес-план фæцæуа Экономикон райрæзты министрады зæрдæмæ æмæ йæ номхыгъдмæ бахæссой, уæд уал кусæн бынатæн спайда кæндзынæн, мæ хæдзары раз цы гараж ис, уымæй", - зæгъы сылгоймаг.

Къуымбилы куыст
Дриаты Лейла
Къуымбилы куыст

Зӕлинæ бизнес-план цалынмæ нæ сарæзта, уæдмæ уал ацыд Цæгат Ирыстонмæ, уым абоны онг дæр йæ куыст цы банысангонд скъола кæны, уырдӕм. Йæхи цæстæй федта, къуымбилы куыст куыд кæнынц сылгоймæгтæ, нымæт цæгъдыны рæстæджы цы мадзæлттæй пайда кæнынц, стæй уый фæстæ æрмæгæй къахы æмæ уæлæдарæс куыд аразынц, уыдӕттӕ.

Зӕлинæ куыд зæгъы, афтæмæй йын ныридæгæн ис цалдæр æмбал сылгоймаджы, кæцытæ уарзынц къуымбилы куыст æмæ разы сты йемæ кусыныл. Æрмæг æмæ, зæгъгæ, кусæнгæрзтæ куы уа, уæд кусын кæй фæнда, ахæмтæ бирæ разындзæнис ноджыдæр.

Къуымбилы куыст
Дриаты Лейла
Къуымбилы куыст

Цæгаты æрмдæснытæн цы скъола ис, уым ацы сусæгдзинæдтæ амоны Санкт-Петербургæй æрхонгæ специалист –Хæбæлаты Иринæ. Уый куыд биноныг зоны къуымбилы куыст, ахæм дæснытæ бирæ нæй.

"Ирон адæм фыдæлтæй нырмæ хуыссыдысты æрмæстдæр къуымбилæй хуыссæнты. Уый та æрмæст хъармы тыххæй нæу, фæлæ æнæниздзинадæн дæр у ахъаз. Ацы бизнес-проектæн кæд фæндаг радтой, уæд тагъд нæ горæты фæзындзæн къуымбилы куыстгæнæг куыстуат, цы ран цæттæ кæндзыстӕм экологон æгъдауæй сыгъдæг, æнæниздзинад чи хæссы, ахæм æрмæгæй рæсугъд, нырыккон уæлæдарæс æмæ хуыссæнгæрзтæ", - радзырдта йӕ фӕндты тыххӕй фидӕны амалиуӕггӕнӕг.

Зӕлинӕйы уырны, йӕ бизнес-проект ахъаз кӕй уыдзæн фыдæлты традицитæ раздахынæн, ферохгонд дæсныйæдтæ сног кæнынæн.

Къуымбилы куыст
Дриаты Лейла
Къуымбилы куыст
85
Къусраты Илья

Уазал æмæ стонгæй: куыд фервæзын кодтой иунæг лæджы Цхинвалы бархионтæ

644
(ранӕуӕггонд 11:38 01.03.2021)
Къусраты Илья ныридӕгӕн ис Хуссар Ирыстоны медико-социалон центры. Нæлгоймаг аззад адунейыл иунæгæй, нал ын ис зæрдиаг хиуæттæ. Уазал ӕмӕ стонгӕй мӕлӕтӕй нӕлгоймаджы фервӕзын кодтой Алайнаг епархийы моладзан ӕмӕ волонтертӕ

ЦХИНВАЛ, 1 мар – Sputnik, Плиты Фатимӕ. Афоныл аходӕн, хорз уавӕртӕ, хи хатӕн, ӕркаст ӕмӕ райгонд - ӕппӕт ацы хӕрзиуджытӕй ныридӕгӕн хайджын у Цхинвалы карджын цӕрӕг Къусраты Илья, кӕцы цалдӕр мӕйы размӕ фӕцӕймард уазал ӕмӕ ӕххормагӕй.

Къусраты Илья ныридӕгӕн ис Хуссар Ирыстоны медико-социалон центры. Нæлгоймаг аззад адунейыл иунæгæй, нал ын ис зæрдиаг хиуæттæ. Уазал ӕмӕ стонгӕй мӕлӕтӕй нӕлгоймаджы фервӕзын кодтой Алайнаг епархийы моладзан ӕмӕ волонтертӕ.

Илья Кусраев
© Photo : Лана Парастаева
Къусраты Ильяйы хатæн Турбазæйы

Алайнаг епархийы сӕйраг аргъуаны раздӕр ӕрвылсабаты арӕзтой ӕнӕргъ аходӕнтӕ иунӕг тыхст адӕмӕн. Ныридӕгӕн уыцы нывӕзт нӕ кусы, фӕлӕ моладзан рӕстӕгӕй-рӕстӕгмӕ уыцы адӕмы бӕрӕг кӕны сӕ цӕрӕнуӕтты.

"Туристон базӕйы иу чысыл къуымы цард. Моладзанмӕ фӕдзырдта цыппӕрӕм уӕладзыджы цӕрӕг, уый фехъусын кодта, нӕлгоймаг кӕй у иу къуыри ӕххормаг. Уыцы хабар уыд ноябры. Бацыдыстӕм ӕм ӕмӕ нын тыххӕй бакодта дуар", - радзырдта Sputnik волонтер Пæррæстаты Лана.

Йӕ ныхӕстӕм гӕсгӕ, карджын лӕг хуыссыд сынтӕгыл, йӕ цуры чысыл скъаппы уӕлтӕрхӕгыл уыд 500 сомы, уыдонмӕ нӕлгоймаг амыдта ӕмӕ куырдта дон.

"Дзырдта нын, дыууӕ бон дам доны хъӕстӕ нӕ дӕн, мæ риу дам судзы, ӕвӕццӕгӕн йӕ зӕрдӕйӕ тыхст. Уæд йæ къахыл дæр нал лæууыд", - загъта Лана.

Сылгоймӕтӕ цалдӕр хатты бабӕрӕг кодтой уым рынчыны ӕмӕ стӕй аскъуыддзаг кодтой алы амӕлттӕй дӕр уый бакӕнын Хуссар Ирыстоны медико-социалон центрмӕ.

"Хиуӕттӕ ӕмӕ йын бынтӕ нӕй. Уый центрмӕ бакӕнынӕн нын баххуыс кодта депутат Мулдарты Гарри. Дохтыр Дзуццаты Инара та йын сарӕзта рентген ӕмӕ ӕппӕт гӕххӕттытӕ", - балхынцъ кодта уый.

Илья Кусраев
© Sputnik / Natalia Airiyan
Къусраты Илья

Пӕррӕстаты Лана ма радзырдта, зӕгъгӕ, уагдоны нӕлгоймагмæ афтӕ хорз ӕркастысты, ӕмӕ ныр йӕ къӕхтыл слӕууыд.

"1942 азы гуырд Къусраты Ильяйы райстам парламенты, сӕрмагондӕй Мулдарты лӕппуйы куырдиатӕй. Цард тынг уӕззау уавӕрты, йӕ хатӕн ранӕй-рӕтты уыд тасмачъийæ ӕмпъыст. Йӕ уӕлӕ та уыйбӕрц чъизи дарӕс уыд, ӕмӕ сӕ тыххӕй раластам. Уыдон иууылдӕр бахъуыд акалын", - радзырдта Sputnik центры хистæр Теблойты Чермен.

Медико-социалон центры ныр нӕлгоймагмæ ис хорз каст, рахицӕн ын кодтой хицӕн хатӕн.

"Ӕркастыстӕм ӕм. Бакодтам ӕй рынчындонмӕ, йӕ хуыз йӕхимӕ рцыд, къахыл слӕууыд. Иннӕтимӕ ныхас кӕны", - радзырдта уагдоны хистӕр.

Илья Кусраев
© Sputnik / Natalia Airiyan
Къусраты Илья

Къусраты Ильяйӕн хӕстӕджытӕ дӕр ничи зыны. Нӕлгоймагӕн йӕ паспорты ис Къусратӕй иу нӕлгоймаджы телефоны номыр, фӕлӕ уый дӕр нӕ дзуапп кӕны.

"Бирӕтӕ мын лӕггад кодтой, Турбазайы ма куы цардтӕн, уæд - чи хӕлцадӕй, чи мигӕнӕнтӕй, чи та ӕхцайæ. Кургӕ ницы кодтон. Ир гыццыл у, фӕлӕ дзы хорз адӕм бирӕ ис. Хӕстӕджытӕ мын ис Гудзабары Кокойтӕй, нӕ ныййарджытӕ хотӕ уыдысты, стӕй дзы мӕхи мыггагӕй дӕр ис, фӕлӕ уыдонӕй мӕн никуы ничи рфарста", - радзырдта Илья.

Йæ ныхæстæм гæсгæ, уыдис ын мадызæнæгтæ дæр, фæлæ ныр уыдонæй сæрæгас ничиуал у.

"Беридзуары цардтӕн Къоркъуламӕ хӕстӕг. Фӕлӕ нӕ лидзын бахъуыд. Мӕ дыууӕ хо æмæ æфсымæр дӕр амардысты, сӕ маст мӕ бынтон бахордта", - радзырдта Илья.

Лӕг ныр сфидар ис ӕмӕ райзæрдæйæ цӕры центры, æрмæст ма катай кӕны, Турбазӕйы йӕ хатӕны цы мигӕнӕнтӕ баззад, уыдоныл.

644
Харебаты Заира йæ пациентимæ

Бузныджы аккаг дохтыр: Харебаты Заира рынчынтӕн хос кӕны дзырдӕй дӕр

187
(ранӕуӕггонд 13:51 20.02.2021)
Рынчын дохтыры хъару, зонындзинæдтæ æмæ арæхстдзинадыл куы баууæнда, йæхимидæг фидарæй куы зæгъа, адзæбæх мæ кæндзæн, уæд уымæн æнæрцæугæ нæй, нымайы нуæртты дохтыр

ЦХИНВАЛ, 20 фев – Sputnik. Дриаты Лейла. Дæсныйæдтæй æппæтæй ахсджиагдæр,  зындæр æмæ вазыгджындæр дохтыры дæсныйад у. Медицинæйы дæсныйад у уды æмæ зæрдæйы сгуыхтдзинад. Домы удуæлдайад æмæ сыгъдæг хъуыдытæ. Хорз дохтыры алы хатт дæр Хуыцауæй лæвæрд фæхонынц, ома йæм Хуыцауæй лæвæрд курдиат ис. Ахæм миниуджытæй се ‘ппæтæй дæр æххæст у нуæртты дохтыр Харебаты Заира.

Адæймаг æвзæр ныхас, тарст ныхас куы фехъусы, уæлдайдæр дохтырæй, уæд уый у маргæй фыддæр, æмæ лæг фесæфы йæ адзалæй раздæр. Лæгъз ныхас та у сой, хуры тын, цъæх арвы рухс, цин, базырджын маргъау, фидар. Лæгæн фесæфы йæ низ, дохтырæй уынгмæ куы рацæуы, уæд.

"Рæвдауæн ныхас æппæт хостæй тыхджындæр у. Ныртæккæ медицинæ стыр къахдзæфтæ акодта размæ, фæзынд бирæ ног хостæ æмæ ифтонггæрзтæ. Уый махæн фадат дæтты адæмæн хæрзхъæд лæггад кæнынæн", - зæгъы Заира.

Рынчын дохтыры хъару, зонындзинæдтæ æмæ арæхстдзинадыл куы баууæнда, йæхимидæг фидарæй куы зæгъа, адзæбæх мæ кæндзæн, уæд уымæн æнæрцæугæ нæй. Ныфсæй аразгæ у алцы дæр…

"Бузныг, Заира, дæ къухтæ фæрнæй фæдар, дæ лæггад бирæ", - ахæм зæрдæйæ цæуæг ныхæстæ арæх фехъусы рынчынтæй. Уарзынц æй йæ фæлмæндзинад æмæ арæхстдзинады тыххæй. У сыгъзæрин адæймаг æмæ фæлтæрд дохтыр. Фыццаджыдæр йæхицæй карзӕй домы куыст.

"Ныртæккæ тæссаг рæстæг у. Ацы тыхст рæстæджы кусын райдыдтон уæззау рынчынтимæ Республикон клиникон рынчындоны. Карз низимæ тохы бацæугæйæ, дохтыртæ, медицинон хотæ, æппæт медицинон персонал архайдта æххуысхъуаг адæмы фарсмæ балæууыныл", - дзуры Заира.

Æнæнцой адæймаг у Заира, ис æм рæсугъд нысæнттæ æмæ фæндтæ. Йе ‘ххуыс искæй куы бахъæуы, уæд дзы уайтагъд айрох вæййы йæ фæллад æмæ рынчынмæ атагъд кæны хæдзармæ дæр.

Цæмæй рынчынæн йæ зæрдæ ма асæтта, низ йæхицæй фæсура, уый тыххæй дохтыр йæ фарсмæ хъуамæ хъæддыхæй лæууа æмæ дзы ныфс бауадза. Ахæм у йæ хъуыды Харебаты Заирайæн.

"Дохтыр хъуамæ йæхиуыл куса, ахуыр кæна алы бон дæр, алы бон дæр исты ногдзинад хъуамæ базона, æнæ уымæй хорз дохтыр нæй", - зæгъы, æнусы æмбис медицинæйы фадыджы чи бакуыста, уыцы фæлтæрд дохтыр.

Йæхæдæг дæр йæ размæ ахæм бæрзонд нысæнттæ кæй æвæрдта, æмæ сæ кæй æххæст кодта, уый тыххæй медицинæйы йæ хъысмæт рауад амондджын. Стæй канд медицинæйы нæ. Уæздандзинад йæ алы уæнджы дæр кæмæн ис, хуымæтæг, фæлæ куырыхон сылгоймаг, дæсны æмæ фæлтæрд дохтырæн Хуыцау ракодта стыр лæвар ныййарæджы, бинонты амондæй дæр.

187
Хъӕбӕр цардуагон ӕвзарӕнты пресс кӕнынӕн фӕзуат

Хуссар Иры скусдзӕн бырондоны фӕзуат

7
Хъӕбӕр цардуагон ӕвзарӕнты пресс кӕнынӕн фӕзуаты арӕзтад балхынцъ ис – уый руаджы зынгӕ фӕкъаддӕр уыдзӕн зианхӕссӕг ӕндӕвдад экологимӕ

ЦХИНВАЛ, 5 мар — Sputnik, Хъуылымбегты Азӕмӕт. Хъӕбӕр цардуагон ӕвзарӕнты пресс кӕнынӕн фӕзуаты арӕзтад балхынцъ ис, фехъусын кодта Хуссар Ирыстоны арӕзтад, архитектурӕ ӕмӕ ЦКХ министрады минӕвар Къацты Сослан.

Фӕзуат ис ног быроны полигоны цур, кӕцы сарӕзтой Цхинвалы районы Ирыхъӕуы. Уым сарӕзтой ангар, кӕдӕм ласдзысты бырон, уый фӕстӕ та йӕ пресс кӕндзысты. Уый фӕдыл бӕстыхайы сӕвӕрдтой сӕрмагонд техникӕ.

Площадки для компактирования твердых коммунальных отходов (ТКО)
© Sputnik / Азамат Кулумбегов
Хъӕбӕр цардуагон ӕвзарӕнты пресс кӕнынӕн фӕзуат
"Ифтонггарз кусы. Ӕвзарӕнтӕ пресс кӕнынӕн фӕзуатимӕ полигон цӕттӕ у эксплуатацимӕ раттынмӕ. Тагъд рӕстӕджы скусдзӕн", - банысан кодта Къацты Сослан.

Полигоны территорийыл сӕвӕрдтой вагонтӕ персоналӕн, афтӕ ма дзы ауагътой электрохызӕгтӕ, йӕ бацӕуӕнты та ӕвӕрд ӕрцыд асфальт.

Арӕзтады министрады специалисттӕ куыд банысан кодтой, афтӕмӕй ацы методикӕйы руаджы зынгӕ фӕкъаддӕр уыдзӕн зианхӕссӕг ӕндӕвдад экологимӕ. Полигонӕй Присы иууыл ӕввахсдӕр цӕрӕг бӕстыхаймӕ у 2,5 километры. Йӕ эксплуатацийы ӕмгъуыд у 25 азы.

Объект арӕзт ӕрцыд инвестицион программӕйы фӕлгӕтты.

7