Къостайы хъӕуы раздӕры дзулфыцӕн комбинат

Цъунайраг хӕрзад дзул: цы фæцис кӕддӕры номдзыд рауагъдад

106
(ранӕуӕггонд 15:47 25.06.2021)
Цъунайраг кӕрдзын ӕлхӕдтой канд ӕгас Цхинвалы район нӕ, фӕлӕ столицӕйы дӕр. Чысыл хӕтулгӕ, кӕцыйӕ Цхинвалы цӕрджытӕ скъӕфтой хӕрзад дзул, сӕ зӕрдыл дарынц ӕвзӕнгтӕ дӕр

ЦХИНВАЛ, 25 июн — Sputnik, Плиты Фатимӕ. Хуссар Ирыстоны Цхинвалы районы Къостайы хъӕуы уӕвӕг дзулфыцӕн комбинат йӕ куыст ӕрурӕдта 2000-ӕм ӕзты, фӕлӕ ма республикӕйы цӕрджытӕ ныр дӕр сӕ зӕрдыл дарынц хӕрзад егъау дзул.

Sputnik бацымыдис кодта, цы рцыд кӕддӕры номдзыд рауагъдадыл ӕмӕ цӕмӕн сӕхгӕдта комбинат йӕ дуӕрттӕ.

Бывшая пекарня в селе Цунар
© Sputnik / Natalia Airiyan
Къостайы хъӕуы раздӕры дзулфыцӕн комбинат

Цъунайраг кӕрдзын ӕлхӕдтой канд ӕгас Цхинвалы район нӕ, фӕлӕ столицӕйы дӕр. Чысыл хӕтулгӕ, кӕцыйӕ Цхинвалы цӕрджытӕ скъӕфтой хӕрзад дзул, сӕ зӕрдыл дарынц ӕвзӕнгтӕ дӕр.

"Базармӕ хӕстӕг-иу фӕллӕуыд "Пирожок" хӕдтулгӕ ӕмӕ уым ӕлхӕдтой мӕ ныййарджыты ацы дзул. Ныр дӕр йӕ хъуыды кӕнын. Тынг дынджыр ӕмӕ мӕм хӕрзад каст", - мысы столицӕйы цӕрӕг Элина.

Къостайы хъӕуы (Цъунар) тӕккӕ центры ныр дӕр уӕвынад кæны дзулфыцӕны бӕстыхай. Иу уӕладзагон уӕрӕх хатӕнты дымгӕ зилдух кӕны, байдзаг быронӕй, хур бон йӕ агъуысты аууонмӕ тырнынц хъӕуы фос. Ӕгас бӕстыхайӕн ма йӕ иу къуым ис ӕмбӕлон уагыл, уым кусы чысыл дукани. Йӕ кусӕг Мӕдинӕ ӕмбарын кӕны, дзулфыцӕн фӕстаг рӕстӕджы пайда кæй ницыуал хаста. Уый тыххӕй ӕрурӕдта йӕ куыст. Стӕй йын уый фӕстӕ фӕхастой йӕ ифтонгад ӕмӕ исад.

Бывшая пекарня в селе Цунар
© Sputnik / Natalia Airiyan
Къостайы хъӕуы раздӕры дзулфыцӕн комбинат

Лалыты Назирӕт дзулфыцӕн комбинаты фӕкуыста бирӕ ӕзты дӕргъы. Цъунайраг дзулӕн табугӕнджытӕй бирӕтӕ ӕгӕрыстӕмӕй хицӕн кодтой, кӕцы ӕфсины конд уыд дзул, уый дӕр.

Кӕд комбинаты радгӕсон куыст ӕнцон нӕ уыд, уӕддӕр ӕй сылгоймаг мысы мидбылхудтимӕ.

"Цалынмӕ-иу рухс уыд, уӕдмӕ йын ницы уыд, фӕлӕ стӕй ноджы фӕзындӕр ис. Ӕхсӕвы радгӕсон куыст хуымæтæг нæу. Донӕй истам рухс ӕмӕ ацы электронон рухсы гуырӕнимӕ дӕр архайдтам нӕхæдӕг. Фӕлӕ дзы уӕддӕр нӕ фӕлмӕцыдыстӕм, рӕстӕг ӕвзӕр уыд, куыст дæр нæ уыд", - мысы Назирӕт.

Назират Лалиева
© Sputnik / Natalia Airiyan
Лалыты Назирӕт

Дзулфыцӕн йæ куысты рацыд цалдӕр этапы, уыд хицауады дӕлбар, Хъахъӕнынады министрады ӕмӕ хисӕрмагонд амалиуӕггӕнджыты къухы.

"Фыццаг нӕ продукци ӕххӕссыд ӕгас Цхинвалы районыл. Хӕлар коллектив уыдыстӕм, куыстой дзы Елбачиты Настя ӕмӕ Дзерассӕ, Икъоты Вера, Нартыхты Уардо, уый фӕстӕ рацыд ӕвзонг фӕлтӕр", - бафтыдта уый.

Назират Лалиева
© Sputnik / Natalia Airiyan
Лалыты Назирӕт

Кӕд бирӕ ӕзтӕ рацыд рауагъдады ӕрлӕуудӕй, уӕддӕр ӕгас республикӕйы нырма дӕр сӕ зӕрдыл дарынц егъау цъунайраг кӕрдзыны ад. Йӕ раздӕры кусӕг дзуры, уымӕн афтӕ хӕрзад хӕдзары дӕр кӕй никуы рацӕуы йӕ дзул.

"Мах ӕй арӕзтам ӕнхъизӕнӕй, ӕвӕццӕн ахӕм хорз уымӕн цыд. Алцыдӕр арӕзтам цӕстмӕ ӕмӕ баргӕйӕ. Фӕлӕ ма йӕ ифтогад ӕмӕ уавӕртӕ дӕр ӕххуыс уыдысты, уымӕн ӕмӕ хӕдзары дӕр фӕлвӕрдтон ахӕм дзул скӕнын ӕмӕ мын уыдон ӕндӕрхуызон вӕййынц", - дзуры Назирӕт.

Уый нырма дӕр бӕллы, кӕддӕры нӕргӕ рауагъдад та йӕ къахыл ногӕй куы слӕууид, уымӕ.

"Адӕм дӕр мӕ базонынц сӕхӕдӕг. Фӕрсынц, цӕннӕуал кусы нӕ комбинат. Бынатмӕ бацæуын та мæ мӕ зӕрдӕ нӕ хӕссы, афтӕ йæ раууаты куы фенын, уӕд фӕхъынцъым кӕнын. Бӕргӕ ма куы скусид, фӕлӕ мӕ нал уырны", - бафтыдта сылгоймаг.

Бывшая пекарня в селе Цунар
© Sputnik / Natalia Airiyan
Къостайы хъӕуы раздӕры дзулфыцӕн комбинат

Хъӕуы администрацийы сӕрдар Бигъуылаты Олег аннӕтау хорз хъуыды кӕны диссаджы хӕрзад дзул, фӕлӕ йӕ скусын кӕныны фадӕттӕ сты мӕгуырау.

"Куыста ӕртагӕй, йӕ хӕрдзтӕ йӕ пайдайӕ фылдӕр лӕууыдысты ӕмӕ йын ӕрлӕууын кодтой йӕ куыст", - радзырдта Бигъуылаты Олег.

Уый ма банысан кодта, ныридӕгӕн хъӕуы кӕй ис ӕртӕ аварион бӕстыхайы, уыдон сты дзулфыцӕн, интернат ӕмӕ совхозы агъуыст.

106
Юбилейон уæрмытæ: мэрийы ныфс дӕттынц Цхинвалы асфальты згъуыдтытӕ аиуварс кӕнын мӕймæ

Юбилейон уæрмытæ: мэрийы ныфс дӕттынц Цхинвалы асфальты згъуыдтытӕ аиуварс кӕнын мӕймæ

42
(ранӕуӕггонд 13:56 19.07.2021)
Советон уынг йæ уæрмимæ иунӕг нӕу, ӕвзӕр рахизӕн ис Богирийы алвӕндагыл, Джиоты Аланы проспектыл Тӕболты Сергейы уынгмӕ хӕстӕг, 8 июны ӕмӕ ӕндӕр рӕтты. Плиты Ароны уынгыл та егъау дзыхъхъ фӕзынд арӕзтадӕн аз дӕр нӕма рацыд, афтӕ

ЦХИНВАЛ, 19 июл — Sputnik, Плиты Фатимӕ. Хуссар Ирыстоны столицӕйы ногарӕзт фӕндӕгтыл сарӕх сты дзыхъхъытӕ. Аразджытӕ фӕндаджы проблемон хӕйттӕ ноджы скъахынц ӕмӕ афтӕ лӕууынц къуыригай, мӕйгай.

"Советон уынджы тӕккӕ астӕу дзыхъхъ аразджытӕ уӕрӕх скъахтой. Рагӕй афтӕ лӕууы, цыма кусджытӕ йӕ юбилеймӕ кӕсынц. Стӕй ма дзы ӕдзух лӕууы стыр уӕзласӕн машинӕ, цыма йӕ билет афтӕ ист у. Дзыхъхъы иувӕрсты ацӕуынӕн шофыртӕ раскъӕрынц ныхмӕлӕууӕг хаххмӕ. Ӕвзӕры аварион уавӕр. Нæ йæ æмбарын, цас йæм хъуамæ кæсой", - радзырдта Sputnik горӕты цӕрӕг Михаил.

Советон уынг йæ уæрмимæ иунӕг нӕу, ӕвзӕр рахизӕн ис Богирийы алвӕндагыл, Джиоты Аланы проспектыл Тӕболты Сергейы уынгмӕ хӕстӕг, 8 июны ӕмӕ ӕндӕр рӕтты.

Плиты Ароны уынгыл та егъау дзыхъхъ фӕзынд арӕзтадӕн аз дӕр нӕма рацы, афтӕ.

"Канализацийы люкмӕ хӕстӕг асфальт ныххаудта бынмӕ. Пыхсытӕй дзы ркалдтой. Исты фыдбылыз куы рцӕуа, уӕд сыл хъӕуы хъаст бахӕссын",- радзырдта ацы уынджы цӕрӕг Эльбрус.

Горӕты администрацийы цалцӕггӕнӕг-арӕзтадон хайады хистӕр Гӕззаты Инал ныфс радта 15 августмӕ ӕмбӕлон уагмӕ ӕркӕнын столицӕйы уынгтӕ.

Ямы на дорогах Цхинвала
© Sputnik / Natalia Airiyan
Юбилейон уæрмытæ

"Бӕрӕг нын у ацы проблемӕ. Нырмӕ асфальтон заводтӕ нӕ куыстой, фӕлӕ Ереды рауагъдад сцайдагъ ис ӕмӕ ӕввахс бонты бавналдзыстӕм куыстмӕ. Августы райдайӕнмӕ сӕ аиуварс кӕндзыстӕм", - загъта уый.

Цалцӕггӕнӕн куыстытӕй дарддӕр ма уагдоны бӕрны ис бирӕуӕладзыгон хӕдзӕртты кӕртытӕ. 2021 азы нывӕзты ис вокзалгӕрон уынджы ӕртӕ кӕрты.

Улица Советская. Ямки на дорогах
© Sputnik / Фатима Плиева
Мэрийы ныфс дӕттынц Цхинвалы асфальты згъуыдтытӕ аиуварс кӕнын мӕймæ
42
Тристан

Фараст азы рӕстӕгмӕ уавӕрты: куыд цӕрынц Зардиаты хъӕуы адӕм хӕрам бӕстӕты хсӕн

164
(ранӕуӕггонд 12:36 19.07.2021)
Бестауты Тристан ӕмӕ йӕ бинонты хъысмӕтыл Sputnik фыста дыууӕ азы размӕ, лӕджы царды уӕдӕй нырмӕ хорзӕрдӕм ницы фӕивта. Тристан ӕмӕ Людмила фӕстӕмӕ цӕрынц арӕнты астӕу, сӕ зӕнӕджы уынынц стӕм хатт, Ирыстонмӕ ӕрбахизыны фадат сын ис режиммӕ гӕсгӕ

ЦХИНВАЛ, 15 июл — Sputnik, Плиты Фатимӕ. Хуссар Ирыстоны 2008 азы ирон-гуырдзиаг хӕстӕй цыппар азы фӕстӕ сцайдагъ бӕстӕйы арӕнтӕ сбӕрӕг кӕнын ӕмӕ банысан кӕныны куыст. Демаркаци ӕмӕ делимитацийы фӕрдыл къамис республикӕйы фылдӕр цӕрджытӕн ӕрхаста ӕдасдзинады гарантитӕ, стӕмтӕн та - ӕдзухон проблемӕтӕ.

2012 аз Хуссар Ирыстоны Цхинвалы районы Зардитаты хъӕуы цӕрджыты бакодта проблемӕты ахӕсты. Арӕн нысангӕнджытӕ ныллыг кодтой хъӕу ӕртӕ хайыл - иутӕ ныр цӕрынц Хуссар Ирыстоны, аннӕтӕ Гуырдзыстоны, ӕртыккӕгтӕ дыууӕ арӕны хсӕн зонӕйы. Бестауты Тристаны бынтӕ та ахаудтой Гуырдзыстонмӕ.

Тристан Бестаев
© Sputnik / Natalia Airiyan
Бестауты Тристан

Бестауты Тристан ӕмӕ йӕ бинонты хъысмӕтыл Sputnik фыста дыууӕ азы размӕ, лӕджы царды уӕдӕй нырмӕ хорзӕрдӕм ницы фӕивта. Тристан ӕмӕ Людмила фӕстӕмӕ цӕрынц арӕнты астӕу, сӕ зӕнӕджы уынынц стӕм хатт, Ирыстонмӕ ӕрбахизыны фадат сын ис режиммӕ гӕсгӕ.

Ацӕргӕ нӕлгоймаг уазджытӕн ӕвдисы йӕ ирон паспорт ӕмӕ къухӕй амоны йӕ цӕрӕнуӕттӕм, кӕцытӕн сӕ адрес Хуссар Ирӕй фӕивта Гуырдзыстонмӕ.

Тристан ныр дӕр йӕ проблемӕты тыххӕй уацхӕсджытимӕ дзуры ӕфсӕн хызӕджы аннӕ фарсӕй. Дыууӕ хӕрам бӕстӕйы арӕнты хсӕн цӕрджытӕ сӕ хӕдзӕртты нӕ уыдысты иу азӕй фылдӕр - коронавирусы пандемийы рӕстӕг арӕны сӕрты цъиу атӕхын дӕр нӕ уагътой.

"Иу аз ӕмӕ ӕрдӕджы бӕрц нӕ хӕдзӕртты нӕ уыдыстӕм, нӕ муртӕ ныппаплой сты. Хуымзӕххытӕ скӕрдӕг сты. Фӕкуыстам, тыллӕг ӕркодтам ӕмӕ ныр та ног фыдбылыз - нӕ тыллӕгӕн аласӕн нын нӕй", - дзуры дыууӕ арӕны хсӕн цӕрӕг Чысиаты Мзия.

Зындзинӕдтӕ азӕй-азмӕ кӕнынц карздӕр. Ныридӕгӕн ма ацы бинонты сӕйраг проблемӕ у сӕ тыллӕджы базары уӕй кӕныны хъуыддаг. Иу мӕй арӕны сӕртыл рахӕссӕн ис ӕрмӕст 50 килограммы.

"Кӕд горӕты дыргъ сӕдӕ сом у, уӕд ӕй мах та 50 сомыл уӕй кӕндзыстӕм. 50 килограммы махӕн цы у, мӕнӕргъы, фӕткъуы ӕмӕ цывзы ӕркӕнӕм тонгай мӕ сӕ стӕй цы фӕкӕнӕм? Бон мӕнӕргъы ӕртонын 25 ведрайы. Зӕгъынц, зӕгъгӕ сӕ мах ӕлхӕнӕм Гуырдзыстоны, фӕлӕ ӕрбацӕуӕт мӕ нын фенӕт нӕ дыргъдӕттӕ, ӕрмӕст цывзы ныссагътам цалдӕр гектары. 8 тонны ӕркӕнӕм сӕнӕфсир", - нымайы йӕ тыллӕг Мзия.

Хъӕуы цӕрджытӕ хицауадмӕ ныффыстой фыстӕг дӕр, цӕмӕй сын сисой сӕ тобӕ, фӕлӕ нырма дзуапп нӕ райстой.

Хелчуа
© Sputnik / Natalia Airiyan
Цывзы

Тристан карантины рӕстӕджы цард Дзӕуджыхъӕуы йӕ фыртимӕ, фӕлӕ цӕгаттаг климат лӕг ӕмӕ йе 'мкъайыл ӕвзӕрӕрдӕм ӕндавы.

"Нӕдӕр дзы мӕхӕдӕг фӕразын, нӕдӕр ме 'мкъай. Ам уӕддӕр фылдӕр уарзын. Аннӕ проблемӕтыл хъӕцӕм, ӕрмӕст нын ацы тобӕ куы сисиккой, уӕд нӕ фыдӕбон ӕмӕ нӕ фӕллой ӕнӕхъуаджы нӕ кӕниккой", - дзуры Бестауты Тристан.

Нӕлгоймаджы цардыл гӕнӕн ис ӕмӕ ахуыр кӕной Ирыстоны истори - уый цалдӕр хатты бахъуыд алидзын ӕмӕ ныууадзын йӕ муртӕ ӕмӕ бынтӕ, стӕй та иу ӕбаздӕхт фӕстӕмӕ. Йӕ муртӕ фесӕфта, йӕхи цӕстӕй федта, сыхаг цӕрӕн хъӕу Гуырдзы фӕнык куыд фестын кодтой, фӕлӕ нӕлгоймаг ныр дӕр тырны ӕрмӕстдӕр сабырадмӕ.

"Бирӕ ӕвзӕрдзинӕдтӕ рцыд, фӕлӕ цы гӕнӕн ис. Мӕн фӕнды, цӕмӕй уа сабырад, ам дӕр ӕмӕ ӕппӕт дунейы дӕр", - дзуры уый.

Кусаг нӕлгоймаг куыд нысан кӕны, афтӕмӕй Гуырдзиаг арӕннысангӕнджытӕ дӕр алыхатт иу зӕрдӕйы уагыл нӕ вӕййынц ӕмӕ йӕ бахъӕуы йӕ тыллӕг быдыртыл рахизын кӕнын.

"Хуымтыл рацӕуын, мӕ тыллӕг раласын тачкӕйыл, цъыфдзастты ныххауын, фӕлӕ цы бакӕнон", - бафтыдта Тристан.

Хелчуа
© Sputnik / Наталья Айриян
Ирыстонмӕ ӕрбахизыны фадат цӕрджытӕн ис режиммӕ гӕсгӕ

Хуыздӕр уавӕрты нӕй йӕ сыхаг Мзия дӕр. Йӕ ныхӕстӕм гӕсгӕ, Зардиаты хъӕу, кӕцы скарста арӕны дих, цард 45 ирон ӕмӕ цалдӕр гуырдзиаг бинонтӕ. Цалынмӕ арӕнтӕ нӕ банысан кодтой, уӕдмӕ Гуырдзыстон газ уагътой хъӕутӕм.

"Уӕд газ сӕхи хъӕу Меретӕй мидӕгдӕр нӕ рауагътой - Зардиаты хъӕу нымадтой ирон территорийыл, фӕлӕ стӕй сӕ пост нӕ хъӕуы сӕвӕрдтой", - радзырдта сылгоймаг.

Арӕнӕхсӕн хибардзинадӕн ма ис иу ӕппӕрццӕг ӕндӕвдад - тыхст рӕстӕджы цӕрджытӕм нӕ хӕццӕ кӕны тагъд медицинон ӕххуыс.

"Иу карджын лӕг фӕтыхст, фӕлӕ нӕм тагъд ӕххуыс не 'рбацыд. Уыцы лӕг ныр сӕрӕгас дӕр нал у, фӕлӕ ахӕм уавӕрты цардӕй дӕр тыхсӕм", - бафтыдта уый.

Тристан Бестаев
© Sputnik / Natalia Airiyan
Бестауты Тристан

Зардиаты хъӕуы цӕрджыты сыхаг Хелчуайы цӕрджытимӕ бӕтты ноджы иу проблемӕ - дыууӕ цӕрӕн пункты цӕрӕгад дӕр тыхсынц мобилон бастдзинады хъуагдзинадӕй.

"Мах бахъуыд балхӕнын Гуырдзыстоны sim-картӕтӕ, бынӕттон бастдзинад ӕрмӕст ранӕй рӕтты чысыл ӕрцахсы", - дзуры Хелчуайы цӕрӕг Уалыты Фатимӕ.

Уый ма бафтыдта, фӕстаг рӕстӕджы сӕ хъӕуы кӕй ис ӕвӕрццӕг ивындзинӕдтӕ дӕр - сӕвӕрдтой рухсы цӕджындзтӕ, ивынц кӕцыдӕр хӕдзӕртты агъуыстытӕ, фӕзынд донхӕры дон.

Хелчуайы хъӕуы ныр дӕр дзӕвгар адӕм цӕры, фӕлӕ ам дӕр советон дугмӕ абаргӕйӕ бирӕ хӕдзӕртты дуӕрттӕ сӕхгӕдтой гуыдырыл. Цӕрджыты ма ам уромынц тыллӕгджын дыргъдӕттӕ ӕмӕ столицӕмӕ ӕввахс ӕвӕрд.

164
Бесаты Дана

Бесаты Дана: ирон зарæг адæймаджы удæн дæтты тых

0
(ранӕуӕггонд 13:24 30.07.2021)
Музыкант, скърипæйæдзæгъдæг, къорд "Монзæл"-ы уæнг Бесаты Дана радио Sputnik Хуссар Ирыстоны эфиры радзырдта, ирон зарæгæн цы нысаниуæг ис йӕ царды, уый тыххæй
Бесаты Дана: ирон зарæг тых дæтты адæймаджы удæн

Фæстаг æзты Ирыстоны прогрессивон фæсивæд йæ хъусдард аздæхта ирон зарæгмæ. Музыкант Бесаты Данайы хъуыдымæ гæсгæ, уымæн йæ аххосаг у генетикæ.

"Æвæццæгæн, уый генетикæимæ дæр у баст, уый тыххæй ӕмæ адæймагæн йæ миддунемæ хæстæг цы уа, уымæ æлвасы йæхи. Ирон зарæг тых дæтты ирон адæймаджы удæн, цардмæ разæнгард кæны æмæ йæм энерги фæзыны", - загъта Дана.

Музыкант куыд банысан кодта, уымæ гæсгæ ирон зарæджы уыд бирæ æнæивгæ традицитæ дзæвгар рæстæг æмæ уый тыххæй фæсивæд сæхи иуварс кодтой уыцы зарджытæй.

"Англисаг æмæ уырыссаг æвзагыл бирæтæ зарынц, минтæ мæ минтæ дунейы мидæг, æмæ уыдон æхсæн англисагау куы азарай, уæд ницæмæй равдисдзынæ дæхи, уый уыдзæн мин фыццӕгæм зарæг. Ирон æвзаг та у экзотикон æвзаг днейы, ничи йæ зоны, афтæ ирон музыкæйы дæр ис индивидуалон зæлтæ, æмæ уыцы мелоди æндæр жанримæ куы сбæттай, уæд дзы райгуыры ног здæхт музыкæйы", - бафиппайдта Дана.

Уый бахахх кодта, алы музыкантæн дæр кæй у ахсджиаг уникалон уæвын, цæмæй макæй хуызæн уа йæ аивад.

0
Темӕтӕ:
Радио иронау