ЦХИНВАЛ, 19 фев — Sputnik, Плиты Фатимæ. Краснодары уагъд цæуæг æппæтуæрæсейон ерыстæ "Кубаны кубок" рамбылдта цхинвайлаг каратисткæ Дудайты Донна. Ирон чызг æртæ нокаутимæ схызт пьедесталы фыццаг къæпхæнмæ, фехъусын кодта йæ тренер, Хуссар Ирыстоны киокусин-кан федерацийы сæйраг тренер Созаты Владимир.
Ерыстæ уыдысты цхинвайлаг каратисттæн сæ фыццаг старт, марты сæм æнхъæлмæ кæсы Цæгат Кавказы федералон зылды турнир.
"Астæуккаг къорды тох кодтой фондз спортсмены, уыдоны хсæн рагуыхт Дудайты Донна. Дæрзæг тох кодта, æртæ тохы рамбылдта нокауттæй æмæ аккаг уæлахиз райста. Донна уымæй бафидар кодта йæ фыццаг спортивон къæпхæн. Йе 'нтысты уыд хорз физикон цæттæдзинад æмæ уæлахизмæ тырнындзинад", — загъта тренер.
Ахуыргæнæджы ныхæстæм гæсгæ, Донна йе 'нтыст снывонд кодта йæ фыд Дудайты Марикæн, кæцы æрæджы фæмард трагикон æгъдауæй.
"Ерысты размæ мæм æрбацыд æмæ загъта: Сенсей (ахуыргæнæг япойнагау), фараст боны фæстæ мæ фыды дыууиссæдзæм бон у, æнæмæнг рамбулдзæн ацы ерыстæ æмæ ацы уæлахиз снывонд кæндзæн мæ фыды рухс номæн", — загъта Созаты Владимир.
Ӕппæуæрæсейон ерыстæ "Кубаны кубок"-ы хайад райста 17 регионы. Ерысты архайдта 280 спортсмены, уыдон дих уыдысты 48 командæйыл. Каратисттæ архайдтой æртæ дæлкъордæй: 8-11, 12-17 азы æмæ хистæр кар.
