ЦХИНВАЛ, 22 окт — Sputnik, Плиты Фатимæ. Æртæ хуссарирыстойнаг боксеры рамбылдтой дунейы экс-чемпион Гасситы Мурæты призтыл гом турнир Дзæуджыхъæуы, фехъусын кодта Sputnik боксы тренер, спорты мастер Дзигойты Ацæмæз.
Ерыстæ цыдысты Дзæуджыхъæуы спортивон галуан "Динамо"-йы, тох дзы кодтой 2005-2006 æзты гуырд 88 боксеры.
"Мæ хъомылгæнинæгтæ Гæджиты Гурам (52 кг) æмæ Багаты Марат (48 кг) та радон хатт равдыстой спортивон цæттæдзинады бæрзонд æмвæзад. Турниры фæлгæтты тох кодтой æртæ боны дæргъы, æрдæгфиналон тохты сæ ныхмæлæуджытæ бафæрæзтой æрмæст иугай раундтæ. Хуыцаубоны уыдон рамбылдтой финалтæ дæр", — загъта Дзигойты Ацæмæз.
Тренеры ныхæстæм гæсгæ, йæ хъомылгæнинæгты æнтыст ма сфæлхатт кодта Хаситы Владислав æмæ Санахъоты Асланы хъомылгæнинаг Зæгъойты Алан дæр (68 кг).
"Финалы Зæгъойты Алан рамбылдта йæ ныхмæлæууæджы æмæ ссис 68 кг уæзы категорийы уæлахиздзау. Сывæллæтты боксы скъолайы хъомылæнинаг Къæбысты Георгий æмæ спорты галуан "Олимп"-аг Яралов Ян та турниры рамбылдтой бронзæйон майдантæ", — бафтыдта тренер.
Дунейы экс-чемпион IBF æмæ WBA верситæм гæсгæ Гасситы Мурæт фæрæхд Боксы æппæтдунейон суперсерийы (WBSS) финалы украинайаг боксер Александр Усикæн.
