Зассеты Арсæмæг

Хъуамæ бафæразай: дунейы чемпион Зассеты Арсæмæг йе 'нтысты тыххæй

180
(ранӕуӕггонд 15:39 10.12.2019)
Зассеты Арсæмæг радзырдта Sputnik йæ "спортивон" бинонты, æнтыстытæм бырсгæйæ фæразын æмæ быхсын куыд хъæуы æмæ кæд рамбулдзæн олимпиаг майдан, уыдæтты тыххæй

ЦХИНВАЛ, 10 дек - Sputnik, Плиты Фатимæ. Хуссарирыстойнаг богал Зассеты Арсæмæг æрæджы ссис Андиаты Сосланы номыл турниры уæлахидзау. 17-аздзыд лæппу турниры историмæ бацыд куыд ерысты иууыл æрыгонддæр уæлахиздзау.

Уæрæсейы æмæ дунейы фыццагады уæлахиздзау, æхсæнадæмон ерысты чемпион спортмæ æрбацыд 10 азы размæ йе ʻфсымæр, зындгонд богал, дунейон ерысты æвзист призер, олимпиаг хъæзтыты архайæг Зассеты Алены фæстæ.

Арсамаг Зассеев
© Sputnik / Наталья Айриян
Зассеты Арсæмæг

"Цæттæ мæ кæны мæ тренер Коцты Тамерлан, æххуыс мын кæны ме ʻфсымæр, уый йæхæдæг ныууагъта йæ карьерæ, ныр æй æз баивдзæн спорты", - радзырдта Арсæмæг.

Дунейы чемпион юношаты ʻхсæн сæрæзта цыппар азмæ йæхицæн нывæзт, цы ран бынат ис æрмæст æппынæдзух цæттæ кæнынæн æмæ йæ фыдæбоны хорзæх - олимпиаг майданæн.

"Аннæ богалты уæлдай мæн дæр ницы хъæуы, æрмæст олимпиаг сызгъæрин", - худы Арсæмæг.

Ацы азы та спорты æнтыстытыл буцахуыр Ирыстонæн ногæй уыд фадат сæрыстыр уæвынæн. Уæгъдибар хъæбысхæсты спортмæ бабырстой æртæ бынæттон лæппуйы – Зассеты Арсæмæг, Бестауты Андрей æмæ Дзæгъиаты Сослан. Дыууæ фыццаг Уæрæсейы фыццагады финалы 110 кг уæзы дих кодтой уæлахиздзауы ном. Финалы тыхджындæр уыд Арсæмæг. Уый ацыд "дунемæ", Андрей - "Европамæ". Ног æмвæзадыл дæр та ссисты уæлахиздзаутæ. Дзæгъиаты Сослан дæр  рамбылдта Уæрæсейы фыццагад, фæлæ йын дунейон ерыстæм фысым бæстæ визæ нæ радта.

Секция борьбы
© Sputnik / Наталья Айриян
Коцты Тамералан йæ хъомылгæнинæгтимæ

"Уæрæсейы фыццагады уæлахиздзау цæуы "дунемæ", æвзист призер – "Европæмæ". Афтæ адих кодтам балцæгтæ. Царды стæм хорз хæлæрттæ, кæд гауызыл ныхмæлæуджытæ стæм, уæддæр", - дзуры Арсæмæг.

Лæппутæ ног спортивон сезоны юношатæй хизынц фæсивæды категоримæ, стæй ма ивынц сæ уæзтæ дæр – Арсæмæг архайдзæн 97 кг, йе ʻмгар Андрей йæ ных сæвæрдта 120 кгмæ.

"Фидар у ме ʻмгар, асæй та дыууæ метрмæ æввахс (1, 92). Æрæджы уый рамыблдта Андиаты Сосланы номыл турнир æмæ ссис ацы турниры историйы иууыл æрыгондæр уæлахиздзау", - зæгъы Андрей.

Кæд лæппуйæ сæрыстыр у æгас республикæ, уæддæр бинонты ʻхсæн йе ʻнтыстытæ уадиссаг ахадгæ не ʻсты. Йæ хистæр æфсымæр Зассеты Ален цадлæр азы уыд Украинайы æмырдгонды сконды, рамыблдта Европæйы, уыд Рио-де-Жанейройы олимпиаг хъæзтыты архайæг.

"Дунейы æмвæзадыл Ален техникон æгъдауæй цæттæдæр спортсментæй иу. Арсæмæг дæр хорз размæ цæуы, нырма йæ йе 'фсымæрмæ бирæ хъæуы, фæлæ хорз бæрæггæнæнтæ æвдисы", - дзуры лæппуйы фыд Таймураз.

Арсамаг Зассеев с отцом
© Sputnik / Наталья Айриян
Зассеты Арсæмæг йæ фыдТаймуразимæ

Арсæмæг йæхæдæг та йе 'нтысты сусæгдзинад хоны фыдæбоны фæстиуæг.

"Дæс азы хъæуы бафæразын, стæй уый фæстæ уыдзысты уæлахизтæ, арфæтæ æмæ æнтыстытæ. Фыццаг чи бацыд гауызмæ, уыдонæн дæр мæ фæнды зæгъын - хъæуы бафæразын иу дæс азы бæрц", - балхынцъ кодта уый.

Лæппу ног азæй райдайдзæн йæ тох Уæрæсейы фыццагады ныр та фæсивæд ʻхсæн. Йе 'мгæрттæ Дзæгъиаты Сослан æмæ Бестауты Андрейимæ иумæ цæттæ кæнынц Коцты Тамерланмæ. Куыд Цæгат Иры æмырдгонды уæнгтæ афтæ сæ цæттæкæнын иу хай цæуы Дзæуджыхъæуы.

180
Дзӕгъиаты Сослан

Хуссарирыстойнаг богал стох кӕндзӕн Европӕйы фыццагады

5
Ивгъуыд аз Уӕрӕсейы уӕлахиздзау суӕвгӕйӕ Сослан райста балцӕг Европӕйы фыццагадмӕ, фӕлӕ уӕд ерысты фысым - Болгари лӕппуйӕн нӕ радта виза

ЦХИНВАЛ, 3 авг– Sputnik, Плиты Фатимӕ. Хуссарирыстойнаг богал, Уӕрӕсейы 2019 азы уӕгъдибар хъӕбысхӕсты фыццагады уӕлахиздзау Дзӕгъиаты Сослан стох кӕндзӕн Европӕйы фыццагады, фехъусын кодта Sputnik спортсмены тренер Коцты Тамерлан.

Ерыстӕ ацӕудзысты октябры Польшӕйы. Ивгъуыд аз Уӕрӕсейы уӕлахиздзау суӕвгӕйӕ Сослан райста балцӕг Европӕйы фыццагадмӕ, фӕлӕ уӕд ерысты фысым - Болгари лӕппуйӕн нӕ радта виза.

"Ныртӕккӕ Дзӕгъиаты Сосланы командӕ цӕттӕ кӕны лӕппуйы документтӕ виза райсыны тыххӕй", - загъта Коцты Тамерлан.

Тренеры ныхӕстӕм гӕсгӕ, йӕ аннӕ ӕнтыстджын хъомылгӕнинӕгтӕ - Зассеты Арсӕмӕг ӕмӕ Бестауты Андрей дӕр сӕхи цӕттӕ кӕныныц ӕрбалӕугӕ ерыстӕм.
"Пандемиимӕ ӕнӕкӕсгӕйӕ, мах кусӕм раздӕрау. Лӕппутӕ цӕттӕ кӕнынц ерыстӕм. Арсӕмӕджы фӕнд кӕнӕм раразмӕ кӕнын хистӕрты ӕмӕ фӕсивӕды хсӕн дӕр", - бафтыдта уый.

5
Тыбылты Алик

"Ӕнцон тох уыд": Тыбылты Алик ногӕй рамбылдта рингыл

8
(ранӕуӕггонд 14:51 30.07.2020)
Тыбылты Алик ногӕй рамбылдта. Ацы хатт уый фембӕлд рингыл фӕлтӕрд боксеримӕ Рязанӕй

ЦХИНВАЛ, 30 июл – Sputnik, Хъуылымбегты Азӕмӕт. Профессионалон боксер Ирыстонӕй Тыбылты Алик радон хатт рамбылдта боксы изӕры Дзӕуджыхъӕуы.

Спортсмен тох фӕцис ӕмгъуыдӕй раздӕр дыккаг раунды – уый нокауты арвыста йӕ ныхмӕлӕууӕджы Рязанӕй Денис Азарченковы.

"Ӕнцон тох уыд, уымӕн ӕмӕ фӕцис дыккаг раунды. Фыццаг раунды ӕз дыууӕ хатт нокдауны арвыстон мӕ ныхмӕлӕууӕджы, фӕлӕ уый фӕлӕууыд гонгы онг", - радзырдта Тыбылты Алик.

Тыбылты Алик архайы 63 килограммы уӕзы категорийы. Ӕвзонг спортсмен ауагъта авд тохы ӕнӕ фембылдтӕй. Боксер тренировкӕ кӕны Уӕрӕсейы сгуыхт тренер Сланты Виталийы къухдариуӕгады бын.

8
Цхинвалы авд уынгыл цæуынц цалцæггæнæн куыстытæ

Цæттæ сæ кæнынц асфальтмæ: Цхинвалы авд уынгыл цæуынц цалцæггæнæн куыстытæ

8
(ранӕуӕггонд 13:21 04.08.2020)
Республикæйы Арæзтад æмæ архитектурæйы министры хæдивæг Гаглойты Сергейы ныхæстæм гæсгæ, развæлгъау уал уынгтыл ивд цæуынц газы, нуазыны доны æмæ канализацийы хæххытæ

ЦХИНВАЛ, 4 авг – Sputnik, Дриаты Лейла. Хуссар Ирыстоны социалон-экономикон рæзтæн ахъазгæнæг Инвестицион программæйы фæлгæтты ацы аз Цхинвалы цы аст уынджы хъуамӕ ӕрцӕуой цалцӕг, уыдонӕй авдыл ныртӕккӕ активонӕй уагъд цӕуынц куыстытӕ

Республикæйы Арæзтад æмæ архитектурæйы министры хæдивæг Гаглойты Сергейы ныхæстæм гæсгæ, развæлгъау уал уынгтыл ивд цæуынц газы, нуазыны доны æмæ канализацийы хæххытæ.

"Авд уынгыл активонæй кусынц зæххы бын коммуникацитæ ивыныл. Газы хæтæлтæ ивыныл кусы паддзахадон унитарон куыстуат "Энергоресурс", доны æмæ канализацийы хæххытæ ивыныл та – "Водоканал", - банысан кодта Гаглойты Сергей.

Цхинвалы Белинскийы уынджы ныртæккæ аразджытæ кусынц газ уадзыныл, магистралон трубæтæ æвæрыны фæдыл куыстытæ æххæст æрцыдысты 75 процентæй. Доны æмæ канализацийы фæдыл куыстытæ та – 80 процентæй.

"Газуадзæн куыстытæ ныртæккæ фесты Хъайтарты æмæ Кимы уынгты. Ныртæккæ Кимы уынджы цæуынц хæрзарæзтадон куыстытæ – калынц ыл ставд цъæлдур æмæ лыстæг хуырдур. Тротуарты та цæттæ кæнынц плиткæ сæвæрынмæ. Табуйы фырты уынджы уадзынц магистралон газы хахх, хæдзæрттæм бауагътой газ, æвæрд цæуынц газнымайæнтæ. Æвæрд æрцыдысты магистралон канализацион трубæтæ дæр æмæ аразджытæ хæдзæрттæм уадзынц канализацион æмæ донуадзæн хæххытæ", - ранымадта Гаглойты Сергей.

Йæ ныхæстæм гæсгæ, Революцийы уынджы дæр цæуынц газуадзæн куыстытæ, фæуд кæны канализацион хахх, кусынц доны хахх уадзыныл æмæ цъайтæ аразыныл дæр.

Базарадон уынджы æвæрынц магистралон газуадзæн, газ уадзынц хæдзæрттæм, æвæринаг ма сты газынымайæнтæ, доны æмæ канализацийы фæдыл куыстытæ фесты.

Нæузæххонты уынджы фæуд кæнынц газуадзæн куыстытæ, монтаж кæнынц газрегуляторгæнæн пункттæ. Куыст цæуы дон æмæ канализацийы хæххытæ хæдзæрттæм уадзыныл.

Гаглойты Сергей ма куыд зæгъы, афтæмæй Плиты Ароны уынджы дæр аразджытæ рæхджы æрывналдзысты хæрзарæзтадон куыстытæм.

Инвестпрограммæмæ хаст объекттæй дарддæр ма "Водоканал"-æн хæсгонд у, цæмæй Джиоты Аланы проспекты кæрон 130, 130 а, 128, 128 а æмæ 128 б бирæфатерон корпусты территорийыл раивой зæронд канализацион хæтæлтæ.

Азы райдианæй ма Сталины уынджы 96 æмæ 98-æм хæдзæрттæ, Фидауынгæнджыты уынджы 5, 6, 8 æмæ 10-æм хæдзæрттæ, Путины уынджы 2-æм хæдзары дæр ма цалцæг æрцыдысты канализацион хæххытæ.

8