Хуссарирыстойнаг армрестлертӕ

Цыппар тыхджындӕры: чи стох кӕндзӕн Цхинвалӕй дунейы ерысты армспортӕй

37
(ранӕуӕггонд 11:28 16.07.2021)
Спортсменты тренер Джиоты Валерийы ныхӕстӕм гӕсгӕ, дунейы ерысты майдантӕм претенденттӕ сты Гасситы Сослан, Плиты Батрадз, Хӕбӕлаты Арсен ӕмӕ Дыгъуызты Милена

ЦХИНВАЛ, 16 июл — Sputnik, Плиты Фатимӕ. Хуссар Ирыстоны ӕрмхӕсты скъолайы раззагондӕр минӕвӕрттӕ цыппарӕй стох кӕндзысты дунейы ерысты Уӕрӕсейы командӕйы сконды.

Спортсменты тренер Джиоты Валерийы ныхӕстӕм гӕсгӕ, дунейы ерысты майдантӕм претенденттӕ сты Гасситы Сослан, Плиты Батрадз, Хӕбӕлаты Арсен ӕмӕ Дыгъуызты Милена. 

"Ацы фӕсивӕд развӕлгъау расгуыхтысты Уӕрӕсейы фыццагад ӕмӕ чемпионаты, сты республикӕйы армрестлингы фидынц", - загъта тренер.

Гасситы Сослан у Хуссар Ирыстоны архайгӕ ӕрмхӕцджытӕй иууыл ӕнтыстджындӕр. Ӕхсӕз азы дӕргъы уыд фӕсивӕды хсӕн Цӕгат Ирыстон, Уӕрӕсе, Европӕ ӕмӕ дунейы ерысты ӕдзух лидер 90 уӕзы категорийы. Фӕстаг дыууӕ азы рахызт хистӕр кармӕ, фӕфылдӕр кодта йӕ уӕзы категори дӕр. Ам дӕр йӕхи равдыста фӕзминаг спортсменӕй, фӕлӕ йын ацы категорийы нырма ӕнӕсаст ерыстӕ  ис.

Хуссар Ирыстоны армрестлингӕн 2016 азӕй фӕстӕмӕ ис сылгоймаджы цӕсгом. Уӕд республикӕйӕн фыццаг хорзӕхтӕ ӕрхаста ӕрыгон спортсменкӕ Дыгъуызты Милена. Ӕрдзӕй лӕваргонд чызг иу аз тренировкӕты фӕстӕ райдыдта ӕмбулын бӕрзонд ӕмвӕзады турниртӕ. Фондз азы фӕстӕ дӕр чызг йӕ бӕрзонд ӕмвӕзад нӕ уадзы бынмӕ.

Плиты Батрадз у Хуссар Ирыстоны хуыздӕр ӕрмхӕцджытӕй иу. Спортыл фӕцайдагъ ис скъолайы рӕстӕджы. Йӕ хӕзнадоны ис Уӕрӕсейы, дуне ӕмӕ Европӕйы фыццагады майдантӕ. Ныридӕгӕн ахуыр кӕны Санкт-Петербурджы Михайловскы ӕсфӕддон артиллерион академийы, фӕлӕ спортыл йӕ зӕрдӕ не 'сивта. Архайы ӕхсӕнадӕмон ерысты ӕмӕ горӕты фыццагады.

Хӕбӕлаты Арсен йӕ хистӕр ӕфсымӕр Эдуарды фӕдыл бацыд спорты ацы хуызмӕ. Цыбыр ӕмгъуыдмӕ баййӕфта йе 'фсымӕры ӕнтыстытӕ. Йӕ тренеры ныхӕстӕм гӕсгӕ, цӕсты хауы йӕ куыстуарзондзинадӕй тренировкӕты ӕмӕ тагъд ӕнтыстытӕй.  У армрестлингы ӕрыгӕтты хсӕн иууыл бӕрзонддӕр призты хицау.

37
Тедеты Дзамболат

Гауыз ӕй равдисдзӕн: Тедеты Дзамболат УФ богалты хайадисты тыххӕй Олимпиадӕйы

15
(ранӕуӕггонд 13:04 30.07.2021)
Уӕрӕсейаг хъӕбысхӕцджыты фыццаг рахызт Токиойы Олимпиаг хъӕзтыты гауызмӕ ацӕудзӕн 4 августы

ЦХИНВАЛ, 30 июл – Sputnik, Козаты Диана. Уӕрӕсейы ӕмбырдгонд уӕгъдибар хъӕбысхӕстӕй йӕхи цӕттӕ кӕны Японимӕ атӕхынмӕ Олимпиадӕ-2020 хайадисты нысанӕн. Ӕмбырдгонды сӕйраг тренер Тедеты Дзамболат куыд фехъусын кодта, афтӕмӕй спортсментӕ хъавынц ӕрхӕссын ӕрмӕстдӕр сыгъзӕрин майдантӕ.

Токиойы олимпиадӕ уагъд цӕуы 23 июлӕй 8 августы онг. Уый нымад у иууыл егъаудӕрыл спорты хуызты нымӕцмӕ гӕсгӕ - 33 ӕмӕ категоритӕм гӕсгӕ - 339. Хайад сӕ исынц 19 мин спортсмены онг. Олимпиадӕ коронавирусы пандемийы тыххӕй цӕуы ӕнӕ фӕсарӕйнаг кӕсджытӕй.

"Ныртӕккӕ стӕм рӕвдзыты Владивостокы. Фӕсивӕд ныридӕгӕн ауагътой контролон тохтӕ, уыдон сты хорз спортивон формӕйы", - банысан кодта Тедеты Дзамболат йӕ интервьюйы Sputnik.

Уый банысан кодта, уӕрӕсейаг хъӕбысхӕцджыты фыццаг рахызт Токиойы Олимпиаг хъӕзтыты гауызмӕ кӕй ацӕудзӕн 4 августы. 

"Гауыз алцыдӕр равдисдзӕн. Богалтӕ развӕлгъау никуы фӕдзурынц, рамбулдзысты ӕви нӕ. Ныфс мӕ ис, нӕ фарсхӕцджыты зӕрдӕтӕ кӕй барухс кӕндзыстӕм", - загъта тренер.

Тедеты Дзамболат ма радзырдта, спортсментӕн кӕй ис серьезон ахаст коронавирусы пандемийы фӕдыл арӕнӕвӕрдтӕ, уыдон никӕимӕ ӕбӕлынц, ӕрмӕстдӕр уадзынц тренировкӕтӕ.

"Залӕй дарддӕр никуыдӕм цӕуӕм. Не 'мбырдгонд у бирӕнационалон, уымӕ гӕсгӕ нӕм ӕрбацӕуынц сӕ минӕварады уӕнгтӕ, фӕлӕ, хъыгагӕн абон ахӕм уавӕртӕ сӕвзӕрд, уымӕ гӕсгӕ мах никӕимӕ ӕмбӕлӕм. Дӕттӕм анализтӕ ӕмӕ ӕнхъӕлмӕ кӕсӕм нӕ атахтмӕ", - фехъусын кодта тренер.

Уый раарфӕ кодта Таймӕзты Мӕдинӕйӕн дӕр Олимпион хъӕзтыты йӕ бронзӕйон майданы фӕдыл ӕмӕ банысан кодта, сӕрыстыр кӕй у Ирыстоны фӕсивӕдӕй.

Уыимӕ Тедеты Дзамболат банысан кодта, абоны бон спорты кӕй ис фылдӕр политикӕ политикӕимӕ абаргӕйӕ, уымӕн ирд дӕнцӕг та у Таймӕзты Мӕдинӕйы тох япойнаг спортсменкӕимӕ, цы ран ирон дзюдоисткӕйӕн нӕ банымадтой иу зыгъуытт.

15
Таймӕзты Мӕдинӕ

Таймӕзты Мӕдинӕ ссис Токиойы Олимпиадӕйы бронзӕйон призер

20
(ранӕуӕггонд 16:21 28.07.2021)
Ирон дзюдоисткӕйы бронзӕ ссис Токиойы уӕрӕсейаг олимпиаг ӕмбырдгонды хӕзнадоны дыууынӕм майдан

ЦХИНВАЛ, 28 июл — Sputnik, Хъуылымбегты Азӕмӕт. Ирыстойнаг дзюдоисткӕ Таймӕзты Мӕдинӕ бацахста ӕртыккаг бынат Токиойы Олимпиадӕйы.

Ӕртыккаг бынаты сӕраппонд тохы 70 килограммы онг категорийы Таймӕзты чызг рамбылдта хорватийаг Барбара Матичы вазари нысанмӕ гӕсгӕ.

Ирон спортсменкӕ ӕрдӕгфиналы фӕхӕрд Японийӕ спортсменкӕ, дунейы дыууӕ хатты чемпионкӕ Тидзуру Араийӕн. Ныхмӕлӕуд цыд 16 минут ӕмӕ 41 секунды.

Ирон дзюдоисткӕйы бронзӕ ссис Токиойы уӕрӕсейаг олимпиаг ӕмбырдгонды хӕзнадоны дыууынӕм майдан.

Токиойы олимпиадӕ ахастӕуыд иу аз фӕстӕдӕр пандемийы тыххӕй ӕмӕ уагъд цӕуы 23 июлӕй 8 августы онг. Уый нымад у иууыл егъаудӕрыл спорты хуызты нымӕцмӕ гӕсгӕ - 33 ӕмӕ категоритӕм гӕсгӕ - 339. Хайад сӕ исынц 19 мин спортсмены онг. Олимпиадӕ цӕуы ӕнӕ фӕсарӕйнаг кӕсджытӕй.

20
Бесаты Дана

Бесаты Дана: ирон зарæг адæймаджы удæн дæтты тых

0
(ранӕуӕггонд 13:24 30.07.2021)
Музыкант, скърипæйæдзæгъдæг, къорд "Монзæл"-ы уæнг Бесаты Дана радио Sputnik Хуссар Ирыстоны эфиры радзырдта, ирон зарæгæн цы нысаниуæг ис йӕ царды, уый тыххæй
Бесаты Дана: ирон зарæг тых дæтты адæймаджы удæн

Фæстаг æзты Ирыстоны прогрессивон фæсивæд йæ хъусдард аздæхта ирон зарæгмæ. Музыкант Бесаты Данайы хъуыдымæ гæсгæ, уымæн йæ аххосаг у генетикæ.

"Æвæццæгæн, уый генетикæимæ дæр у баст, уый тыххæй ӕмæ адæймагæн йæ миддунемæ хæстæг цы уа, уымæ æлвасы йæхи. Ирон зарæг тых дæтты ирон адæймаджы удæн, цардмæ разæнгард кæны æмæ йæм энерги фæзыны", - загъта Дана.

Музыкант куыд банысан кодта, уымæ гæсгæ ирон зарæджы уыд бирæ æнæивгæ традицитæ дзæвгар рæстæг æмæ уый тыххæй фæсивæд сæхи иуварс кодтой уыцы зарджытæй.

"Англисаг æмæ уырыссаг æвзагыл бирæтæ зарынц, минтæ мæ минтæ дунейы мидæг, æмæ уыдон æхсæн англисагау куы азарай, уæд ницæмæй равдисдзынæ дæхи, уый уыдзæн мин фыццӕгæм зарæг. Ирон æвзаг та у экзотикон æвзаг днейы, ничи йæ зоны, афтæ ирон музыкæйы дæр ис индивидуалон зæлтæ, æмæ уыцы мелоди æндæр жанримæ куы сбæттай, уæд дзы райгуыры ног здæхт музыкæйы", - бафиппайдта Дана.

Уый бахахх кодта, алы музыкантæн дæр кæй у ахсджиаг уникалон уæвын, цæмæй макæй хуызæн уа йæ аивад.

0
Темӕтӕ:
Радио иронау