Куыд ӕрцахстой хуссарирыстойнаг нӕлгоймаджы, кӕцы азым цӕуы дыууӕ адӕймаджы амарыны- видео

8
(ранӕуӕггонд 13:39 12.03.2021)
Нӕлгоймаджы ӕрцахстой Мӕскуыйы, уый 2000 азӕй фӕстӕмӕ ӕмбӕхст рӕсттӕрхонӕй, бансан кодтой Уӕрӕсейы МХМ. Уагдоны ма лӕмбынӕг радзырдтой 20 азы размӕ хъӕу Уӕллаг Ручъы саразгӕ фыдракӕнды тыххӕй, кӕцыйы аххосджын цӕуы уый

ЦХИНВАЛ, 12 мар – Sputnik. Уӕрӕсейы мидхъуыддӕгты министрад ныммыхуыр кодта Хуссар Ирыстонӕй рацӕугӕ 47-аздзыд нӕлгоймаджы ӕрцахсыны видео, кӕцы азымджын цӕуы 20 азы размӕ йӕ зонгӕ ӕмӕ уый мады амарыны.

Тыхон структурӕйы пресс-службӕ куыд хъусын кӕны, фыдракӕнды зардӕхсайгӕ нӕлгоймаг раивта йӕ документтӕ ӕмӕ ӕмбӕхст Мӕскуыйаг регионы территорийыл. Уый ӕрурӕдтой уӕрӕсейаг уголовон агуырды оперативниктӕ иумӕйаг координацион центрӕй хуссарирыстойнаг коллгӕтимӕ ӕмгуыстады фӕлгӕтты.

УФ МХМ официалон минӕвар Ирина Волк фехъусын кодта фыдракӕнды лыстӕг хӕйттӕ.

Йӕ ныхӕстӕм гӕсгӕ, 2000 азы сентябры Хуссар Ирыстоны хъӕу Уӕллаг Хъемултайы фыдгӕнӕг хылы рӕстӕджы фехста йӕ зонгӕйы лыстӕгкалиберон винтовкӕйӕ.

"Хъӕлӕбамӕ ӕрбалыгъд фӕмардуӕвӕджы мад ӕмӕ бафӕлвӕрдта байсын фыдгӕнӕджы хӕцӕнгарз, фӕлӕ уый дыууӕ хатты фехста сылгоймаджы рдӕм ӕмӕ йӕ фӕцӕф кодта. Уый фӕстӕ ма фигурант ноджы цалдӕр цӕф фӕкодта йӕ оппоненты сӕр ӕмӕ йӕхи бааууон кодта", - радзырдта Волк.

Цӕфтӕй нӕлгоймаг амард. Йӕ мады ма йын фӕхӕццӕ кодтой рынчындонмӕ, фӕлӕ дохтырты бон нал бацис йӕ фервӕзын кӕнын, бафтыдта уый.

Фыдракӕнды фӕдыл Хуссар Иры МХМ байгом кодтой уголовон хъуыддаг, нӕлгоймаджы радтой агуырдмӕ.

"Оперативон-сгарӕн мадзӕлтты рӕстӕджы полицӕйӕгтӕ Росгвардийы ӕххуысӕй ӕрцахстой 47-аздзыд фыдгӕнӕджы Мӕскуыйы. Ацы онформаци адӕттой агуырды инициатортӕм дӕр", - бафтыдта УФ МХМ минӕвар.

Йӕ ныхӕстӕм гӕсгӕ, ныртӕккӕ ацы хъуыддаджы фӕдыл уагъд цӕуынц ӕнӕмӕнгхъӕуӕг процессуалон архӕйдтытӕ.

Хуссар Ирыстоны мидхъуыддӕгты министрады куыд банысан кодтой, афтӕмӕй фыдгӕнӕджы дыууӕ мӕйы ӕмгъуыдмӕ ӕрӕрвитдзысты республикӕмӕ, цы ран уый ӕрлӕудзӕн тӕрхондоны раз.

8

Бибылты Анатолий ӕмӕ Рашид Нургалиев бакодтой МХМ ИКЦ бӕстыхӕйтты комплекс Цхинвалы

16
(ранӕуӕггонд 15:55 26.07.2021)
ИКЦ директор Болататы Алан радзырда Центры архайды фӕстиуджыты тыххӕй, дӕнцӕгӕн уый ӕрхаста конкретон мадзӕлттӕ фыдгӕнджыты агурын ӕмӕ ӕрцахсыны фӕдыл

Хуссар Ир ӕмӕ Уӕрӕсейы мидхъуыддӕгты органты иумӕйаг информацион-координацион центры территорийыл Цхинвалы кӕронмӕ бахӕццӕ бӕстыхӕйттӕ ӕмӕ агъуыстты комплексы арӕзтады даккаг этап.Абон официалонӕй бакондӕуыд Центры объекттӕ.

Мадзалы хайад райстой президент Бибылты Анатолий, Хуссар Ирыстонмӕ кусӕгон балцы ӕрцӕуӕг Уӕрӕсейы Ӕдасдзинады Советы секретары хӕдивӕг Рашид Нургалиев, афтӕ ма Цӕгат Иры мидхъуыддӕгты министр Михаил Скоков.

Мадзалы рӕстӕджы ИКЦ къорд кусӕджы хицӕн ӕрцыдысты паддзахадон ӕмӕ уагдонон хорзӕхтӕй.

Бӕстондӕрӕй - нӕ видеоӕрмӕджы.

16

Куыд цæрынц швейцариаг сӕгътæ Хуссар Иры

91
(ранӕуӕггонд 11:26 22.06.2021)
Цхинвалы районы Тъбеты хъӕуӕй рацӕугӕ Бибылты Олег сфӕнд кодт ӕрцӕрын кӕнын Хуссар Ирыстоны фӕсарӕйнаг сӕгъты мыггаг

Фермер швейцариаг сӕгъты Хуссар Ирыстонмӕ ӕрласта ивгъуыд азы. Урс-урсид рӕгъӕуттӕ тезгъо кӕнынц Тъбеты хъӕуы Бибылты сыхы. Фӕсарӕйнаг "уазджытӕ" хуссайраг уавӕрты сӕхи хатынц хорз.

Сӕ хицӕуттӕ - ӕвзонг къай Бибылты Олег æмæ Козаты Этерийы зӕрдӕтӕ райынц стыр цот ӕмӕ хӕрзгъӕд урсагӕй ӕмӕ сæ хъомтӕ æнæхъусдард нæ уадзынц.

Уый бафиппайдта, зӕгъгӕ, бирӕ адӕм натуралон ӕхсыр фӕфауынц йӕ тӕфы тыххӕй, фӕлӕ тъбеттаг сӕгъты ӕхсыр уыцы аиппӕй дӕр цух у.

Амалиуӕггӕнӕг нымайы, ацы куыст ӕнӕмӕнг кӕй суыдзӕн пайдаджын, ӕрмӕст продукци домы тагъд реализаци. Кӕд Хуссар Иры ӕруарзой ӕнӕниздзинадӕн пайдаджын ӕмӕ хӕрзад сӕгъы ӕхсыр, уӕд ныфс дӕтты, ноджы кӕй рауӕрӕх кӕндзӕн йӕ фермӕ.

Ныридӕгӕн хӕдзарад дӕтты ӕрмӕст ӕхсыр, уый ӕнахуыр пайдаджын ӕууӕлтӕ рагӕй фӕстӕмӕ бӕрӕг сты, ӕгӕрыстӕмӕй йӕ амонынц лӕмӕгъ ӕнӕниздзинадимӕ сывӕллӕттӕн, афтӕ ма фӕтары кӕны аллерги дӕр. Фермер фӕстӕдӕр фӕнд кӕны йӕ урсаджы продукци рауӕрӕх кӕнын - йӕ урс фосы рӕгъаумӕ ма ноджы хъулон сӕгътӕ дӕр бамбал кӕнын.

91
Ӕхцатӕ

Хуссар Иры вице-премьер фехъусын кодта уӕлбар кредиттӕ дӕттыны дыккаг этапы тыххӕй

2
(ранӕуӕггонд 09:45 30.07.2021)
Чысыл ӕмӕ астӕуккаг бизнесӕн республикӕйы уӕлбар кредиттӕ дӕттынц 2018 азӕй фӕстӕмӕ. Ацы аз хицауад ныридӕгӕн рахицӕн кодта 28 милуан сомы бизнес-проекттӕн

ЦХИНВАЛ, 30 июл - Sputnik. Хуссар Ирыстоны ӕввахс рӕстӕджы райдайдзӕн чысыл ӕмӕ астӕуккаг амалиуӕгадӕн уӕлбар кредиттӕ дӕттыны дыккаг этап, кӕцы ӕххӕст цӕудзӕн 2018 азы хӕстӕй фӕрӕзты руаджы, хъусын кӕны хицауады пресс-службӕ.

Уӕлбар кредиткӕнынады фӕдыл закон райстӕуыд 2018 азы марты. Уӕд 49 амалиуӕггӕнӕджы ӕдӕппӕт райстой 21 милуан сомы.

"2021 азмӕ уӕлбар кредиткӕнынадӕн суммӕ дыууӕ хатты фӕфылдӕр ӕмӕ у 49 милуан сомы. Азы райдайӕнӕй 28 милуан сомы райстой 43 амалиуӕггӕнӕджы. Уӕлбар кредиткӕнынады программӕйы цы механизм ис, уый руаджы популярондӕр кӕнынц экономикӕйы приоритетон къабазтӕ: хъӕууон хӕдзарад, рауагъдад, туризм, медицинӕ ӕмӕ ӕхсӕнадон хӕлцад", - радзырдта вице-премьер – экономикон райрӕзты министр Тадтаты Дзамболат.

Йӕ ныхӕстӕм гӕсгӕ, уӕлбар кредиттӕ райсыны дыккаг этапы фӕлгӕтты куырдиаттӕ ист фесты 5 июлы, Экономикон райрӕзты министрадмӕ ӕрбацыд 37 бизнес-проекты. Уыдонмӕ ӕркӕсдзӕн уӕлбар кредиткӕнынады фӕдыл Фонды совет.

Министрты кабинеты бафтыдтой, зӕгъгӕ, 2018-2020 ӕзты уӕлбар кредиттӕ райстой 157 амалиуӕггӕнӕджы 76,5 милуан сомы бӕрц. Уыдонӕй 111 субъекты – хъӕууон хӕдзарады фадыджы; 20 субъекты – рауагъдады фадыджы; 16 субъекты – лӕггӕдты фадыджы; 10 субъекты – базарады фадыджы.

2